Veveheaga 120

Tau Fakatikai he Lotopa

NE MOLE he tiaki a Iesu he kaina i Ketesemane mo e fehola he matakutaku fakalataha mo e laulahi he tau aposetolo, ne tutu a Peteru mo Ioane he ha laua a fehola. Liga kua tata atu a laua ki a Iesu he magaaho ne uta ke he kaina ha Ana. Ko e magaaho ne fakafano e Ana a ia ke he Ekepoa ne Mua ko Kaiafa, ne mumui mamao a Peteru mo Ioane, kua maaliali e lahi he matakutaku ke he ha laua a tau momoui mo e lahi e tupetupe ke he mena ka tupu ke he ha laua a Iki.

Ne hohoko ke he kaina pu lahi ha Kaiafa, ti maeke ia Ioane ke hu ke he lotopa ha kua iloa he ekepoa ne mua a ia. Ka e taha e mena ko Peteru ne tu ni i fafo he gutuhala. Ka e nakai leva ti liu a Ioane mo e tutala mo ia ne leveki e gutuhala, ko e fekafekau fifine, mo e fakaata a Peteru ke hu ki fale.

Ka ko e magaaho nei kua makalili tuai, ti ko e tau fekafekau he fale mo e tau leoleo he ekepoa ne mua kua tafu e afi malala. Ne fakalataha atu a Peteru ke mumu mafana he fakatali ke he fakahikuaga he fakafiliaga ha Iesu. Ke he mena ia, ha ko e maama he kaka he afi, ko e leveki gutuhala ne fakaata a Peteru ki fale kua kitia mitaki e ia a Peteru. “Ko koe foki, ne fakalataha a mua mo Iesu ko e Kalilaia!” he talahau e ia.

Ne tupetupe ha kua kitia, ne fakatikai e Peteru ki mua ha lautolu oti e nakai iloa e ia a Iesu. “Nakai kitia e au a ia, ti nakai logona foki e au e mena ne talahau mai e koe,” he talahau e ia.

Ko e mena ia, ne fano a Peteru ki fafo tata ke he gutupa. Ke he mena ia, ne kitia foki he taha tama fifine a ia mo e talahau ki a lautolu ne tutu agaagai ai: “Ko e tagata na foki ne fakalataha a laua mo Iesu ko e Nasareta.” Ne liu a Peteru fakatikai, mo e omonuo: “Nakai kitia e au e tagata ia!”

Ne nofo ni a Peteru he lotopa, mo e lali fakalahi ke nakai iloa he tau tagata ia. Liga ko e magaaho ia foki ne ofo a ia he ko e moa he pogipogi pouli agaia. Ka ko e magaaho taha ia, ko e fakafiliaga ha Iesu hane fa e fakafili, ne fakafili ke he vala he fale i luga he lotopa. Ne nakai fakauaua ko Peteru mo e falu foki ne fakatali i lalo kua kitia e tau mena tutupu he tau tagata fakamoli kehekehe ne ta mai ke fakamoli.

Ko e liga taha ia e matahola he mole, tali he kitia fakahiku a Peteru ko e taha ne fakalataha mo Iesu. Ko e magaaho nei ne o mai falu ia lautolu ne tutu fano mo e pehe ki a ia: “Ko e moli ni, ko koe taha ia lautolu; ha kua iloa a koe he hau a vagahau.” Ko e taha ia lautolu ia ko e magafaoa ha Maliko, ne hio kehe e Peteru e teliga. “Ka e nakai kia kitia e au a koe fakalataha mo ia ke he kaina?” he talahau e ia.

“Nakai kitia e au e tagata ia!” he totoko fakamakamaka e Peteru. Ko e moli, ne lali a ia ke talia e lautolu kua hepe a lautolu he kaialu a ia mo e omonuo ke he mena ia, ko e pehe a ia, ko e kaialu ni a ia ki a ia ka nakai talahau e mena moli.

Ko e magaaho ia ni ne talahau e Peteru e fakatikai ke toluaki, ne ko e moa. Ko e magaaho ia, ko Iesu, hane hau ke he fakamaluaga i luga he lotopa, ne fuluhi mo e ono ki a ia. Ko e magaaho ia ni, ne manatu e Peteru e kupu ne talahau e Iesu he tau magaaho gahoa ia fakamua he poko tapa ki luga: “Nakaila ko lagaua e tau moa, to fakatikai lagatolu mai a koe kia au.” Ne pehia he mamafa he hana a hala, ti fano a Peteru ki fafo mo e tagi.

Maeke fefe ke tupu e mena nei? Maeke fefe, he manatu ko e mauokafua hana a malolo fakaagaga, ke mafiti pihia e fakatikai lagatolu e Peteru hana a Iki? Ko e tau mena ne tutupu, ne nakai fakauaua, kua moua fakalutukia a Peteru. Kua fakakeukeu e mena moli, mo e taute a Iesu tuga e tagata matahavala kelea. Ko e mena hako kua taute ke tuga ko e mena hepe, ko ia ne nakai fai mena kelea kua eke mo tagata agahala. Ha kua mamafa e tau tupetupe he magaaho ia, kua nakai lagotatai a Peteru. Kua amanaki ni hana mahani fakamoli ti maheu; ko e hana momoko kua ligoia he matakutaku tagata. Kua lata ke nakai pihia a tautolu! Mataio 26:​57, 58, 69-75; Mareko 14:30, 53, 54, 66-72; Luka 22:​54-62; Ioane 18:​15-18, 25-27.

▪ Maeke fefe ia Peteru mo Ioane ke huhu ke he lotopa he ekepoa ne mua?

▪ He ha ha i ai a Peteru mo Ioane he lotopa, ko e heigoa ne taute i loto he fale?

▪ Lagafiha e ko he moa, mo e lagafiha e fakatikai e Peteru a Keriso?

▪ Ko e heigoa e kakano he kaialu mo e omonuo ha Peteru?

▪ Ko e heigoa ne fakalagalaga a Peteru ke fakatikai na iloa e ia a Iesu?