Veveheaga 128

Kua Moui a Iesu!

KO E magaaho ne kitia he tau fifine kua gatigati e tuagamau ha Iesu, ne poi a Maria Makatala ke tala age ki a Peteru mo Ioane. Ka e taha e mena, ne nonofo ni e falu fifine he tuagamau. Ne nakai leva, ti hau e agelu mo e uiina a laua ki loto.

Ko e mena nei ne kitia he tau fifine e taha agelu foki, ti pehe e taha agelu ki a lautolu: “Aua neke matakutaku a mua; ha kua iloa e au kua kumi e mua a Iesu ne fakatautau. Nakai ha hinai a ia; ha kua matike mai tuai a ia, tuga ne tala atu ai e ia. O mai a, ke kitekite ke he mena ne takoto ai e Iki. Ati o a fakaave, ke tala age e mua ke he hana tau tutaki, kua matike tuai a ia ia lautolu kua mamate.” Ne tafepoi e tau fifine nei mo e matakutaku mo e fiafia lahi.

Ke he magaaho nei, ne moua e Maria a Peteru mo Ioane mo e hokotaki e ia ki a laua: “Kua uta kehe tuai e lautolu e Iki mai he tuagamau fakamanatu; nakai iloa foki e mautolu e mena kua tuku ai e lautolu a ia.” Ko e magaaho ia ni ne tafepoi kehe e tau aposetolo. Ne mafiti e tau hui ha Ioane​—ko e moli ni ko ia ne fakamui​—ti hoko mua a ia ke he tuagamau. Ka ko e magaaho nei kua o kehe tuai e tau fifine, ti nakai ha ha i ai taha. He tukutuku hifo, ne onoono atu a Ioane ki loto he tuagamau mo e kitia e tau ie ne pipipipi aki, ka e tu atu ni a ia i fafo.

Ko e magaaho ne hoko atu a Peteru, ne nakai fakauaua a ia ka e hu ki loto. Ne kitia e ia e tau ie ne pipipipi aki ne toka agaia mo e ie foki ne afi aki e ulu ha Iesu. Kua vakai ai ke he taha fahi. Kua hu foki a Ioane he magaaho nei ke he tuagamau, mo e talitonu a ia ke he hokotaki ha Maria. Ka e nakai iloa e Peteru po ko Ioane kua liu tu mai a Iesu, pete ni he tala age e Ia he falu magaaho ki a lautolu to pihia a Ia. Ne tupetupe mo e liliu a laua ki kaina, ka ko Maria, ne kua liu mai ke he tuagamau, ne toe hifo ai.

Ka ko e magaaho taha ia, ko e falu fifine ne fakamafiti ke tala age ke he tau tutaki kua liu tu mai a Iesu, tuga he poaki he tau agelu a lautolu ke taute. Ha ne tafepoi fakaave a laua ti feleveia a Iesu mo laua mo e pehe: “Fakaalofa te.” Ne fakaveveli hifo ke he hana tau hui, mo e hufeilo a laua ki a ia. Ti pehe a Iesu: “Ua matakutaku a mua, ati o a, ke talahau atu e mua ke he haku a tau matakainaga kia o atu a lautolu ki Kalilaia, kia kitia ai e lautolu au.”

Ko e magaaho fakamua, ne to e mafuike mo e o mai e tau agelu, ko e tau kau ne leoleo kua ligoia ti tuga e tau tagata mamate. Ka ko e magaaho ne liu ofo, ne o fakaave a laua ke he loto maaga mo e tala age ke he tau ekepoa ne mua e tau mena ne tutupu. Mole he pulega mo e “tau patu” he tau Iutaia, ne taute e fifiliaga ke lali ke fufu e mena ia ke totogi tupe e tau kau. Ne fakaako a lautolu: “Kia pehe a mutolu, Na o mai hana tau tutaki he po, kua kaiha a ia ka e momohe na mautolu.”

Ha kua liga fakahala ke he mate e tau kau Roma he momohe he ha lautolu a leoleoaga, ne mavehe e tau ekepoa: “Kaeke foki ke logona ai he iki [e hokotaki nei he momohe a mutolu], ti ole atu a mautolu kia ia, ti nakai haofia a mutolu.” Ha kua lahi e totogi he fakavai, ati taute he tau kau tuga ni he fakaako ki a lautolu. Ko e fua, ko e hokotaki pikopiko ke he tino a Iesu ne kaiha kua fakapuloa fano ke he tau Iutaia.

Ko Maria Makatala ne toe hifo he tuagamau, kua lahi mahaki e momoko. Ko fe la a Iesu? Ne tukutuku hifo a ia ke ono ki loto he tuagamau, ti kitia e ia ua e agelu tapulu hina, kua liu kitia! Ko e taha ne nofo ke he ulu mo e taha ha he tau ve, he mena ne toka ai e tino ha Iesu. “Teme na e, kua tagi a koe he ha?” he huhu e laua.

“Ha kua uta kehe e lautolu haku a Iki,” he tali e Maria, “ti nakai iloa e au e mena ne tuku ai e lautolu a ia.” Ne haga a ia ki tua mo e kitia taha ne liu fatiaki e huhu: “Teme na e, kua tagi a koe he ha?” Ne huhu foki a ia: “Ko hai kia ne kumi e koe?”

Piko ni a ia ko e leoleo he fonua ne toka ai e tuagamau, ti tala age ki a ia: “Ko e iki na e, kaeke kua uta kehe e koe a ia, ati talahau mai a kia au, po ko fe e mena ne tuku ai a ia e koe, ke uta kehe ai e au a ia.”

“Ma Maria na e,” he talahau he tagata. Ko e magaaho ia ni ti iloa e ia ke he puhala vagahau hana ki a ia, ko Iesu ni a ia. “Raponi na e,” (kakano “Akoako na e”) he talahau e ia. Ko e fiafia ne nakai fai fakaotiaga, ti kuku e ia a Iesu. Ka e pehe a Iesu: “Aua neke piki mai a koe kia au, ha ko e mena nakala hake ni au ke he haku a Matua; ka e fano a koe ke he haku a tau matakainaga, mo e tala age kia lautolu, To hake au ke he haku a Matua mo e Matua ha mutolu, ke he haku a Atua mo e ha mutolu Atua.”

Ne poi a Maria he magaaho nei ke he mena ne fakapotopoto ai e tau aposetolo mo e tau tutaki. Ne lafi e ia hana tala ke he hokotaki ne kua fita he talahau he falu fifine ne kitia a Iesu kua liu tu mai. Ka e taha e mena, ko e tau tagata tane nei, ne nakai talitonu ke he tau fifine fakamua, kua nakai talitonu foki ki a Maria. Mataio 28:3-15; Mareko 16:5-8; Luka 24:4-12; Ioane 20:2-18.

▪ He kitia e tuagamau kua gatigati, ko e heigoa ha Maria Makatala ne taute, mo e ko e heigoa e mena ne tupu ke he falu fifine foki?

▪ Fefe a Peteru mo Ioane he kitia kua gatigati e tuagamau?

▪ Ko e heigoa he falu fifine ne feleveia he o a lautolu he puhala ke hokotaki e liu tu mai ha Iesu ke he tau tutaki?

▪ Ko e heigoa ne tupu ke he tau kau leoleo, mo e ko e heigoa e tali ke he hokotaki ha lautolu ke he tau ekepoa?

▪ Ko e heigoa ne tupu ki a Maria Makatala he toe tokotaha a ia he tuagamau, mo e ko e heigoa e tali he tau tutaki ke he tau hokotaki he tau fifine?