Vala 7
Nakai Leva to Kitia e Finagalo he Atua
1, 2. Ko e ha kua mauokafua a tautolu to taute he Atua taha mena ke fakaoti e mahani kelea mo e matematekelea he lalolagi nei?
Pete ni kua leva tigahau he fakaata he Atua e nakai mitaki katoatoa mo e matematekelea mai he onoonoaga he tagata, to nakai fakaata e ia e tau tutuaga kelea ke hoko tukulagi. Tala mai e Tohi Tapu ki a tautolu kua ha ha ai e vaha kotofa he Atua he fakaata e tau mena nei ke tutupu.
2 “Ko e mena mo e hana ni a tau ke he tau mena oti.” (Fakamatalaaga 3:1) Ka hoko mai e magaaho kotofa he Atua ke fakaata e mahani kelea mo e matematekelea ke he fakahikuaga, mogoia ka fakalavelave mai a ia ke he tau puhala he tagata. To fakaoti e ia e mahani kelea mo e matematekelea mo e to fakamoli hana finagalo fakamua ke fakapuke e lalolagi aki e magafaoa mitaki katoatoa mo e fiafia, ko lautolu ka olioli e mafola katoatoa mo e puipuiaga he tau koloa he tuaga Parataiso.
Fakafiliaga he Atua
3, 4. Fakamaama fefe he tohi he Tau Fakatai e tau fua he fakalavelave mai he Atua?
3 Mailoga la falu he tau perofetaaga loga he Tohi Tapu ne talahau e kakano he fakalavelaveaga he Atua, ko e mena ia, ko e tau fua he tau fakafiliaga hana, ma e magafaoa tagata kua tata mai:
4 “Ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu. Ka to vevehe kehe mai he motu a lautolu ne mahani kelea, to taaki ai foki a lautolu ne mahani fakavai.”—Tau Fakatai 2:21, 22.
5, 6. Fakakite fefe he Salamo 37 e mena ka tupu he magaaho ka fakalavelave mai e Atua?
5 “Ko e mena fakaotioti a lautolu kua mahani kelea; ka ko lautolu kua talifaki kia Iehova, to eke ma lautolu e motu. Toe tote, ti nakai ha i ai e tagata mahani kelea . . . Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”—Salamo 37:9-11.
6 “Kia talifaki a koe kia Iehova, mo e tumau ke he hana puhala; ti fakamatalahi e ia a koe ke eke māu e motu; to kitia e koe e tau tagata mahani kelea kua mahakava. Kia manamanatu kia ia kua mahani hakohako, mo e kitekite kia ia kua mahani tonu; ha ko e fakahikuaga he tagata ia ko e monuina haia. Ka e mahaikava fakalataha e tau holifono; ko e fakahikuaga foki he tau tagata mahani kelea ko e malaia haia.”—Salamo 37:34, 37, 38.
7. Ko e heigoa e fakatonuaga kakano ne foaki he Kupu he Atua?
7 Ti ko e vaha homo ue atu anoiha ka hoko mai ki a lautolu ne mailoga e tonuhia he Tufuga ue atu ke pule ki a tautolu, kua talahau mai ki a tautolu: “Ka kia omaoma e loto hāu ke he haku a tau fakatufono. Ha ko e mena to lafilafi atu ia kia koe e tau aho loga, mo e tau tau ke moui ai, katoa mo e monuina.” E, to lafi ki a lautolu ne fifili ke taute e finagalo he Atua e moui tukulagi! Ati fakatonu mai e Kupu he Atua ki a tautolu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu.”—Tau Fakatai 3:1, 2, 5, 6.
Ko e Pule he Atua Mai he Lagi
8, 9. Puhala fe ka fakamea he Atua e lalolagi nei?
8 To taute he Atua e fakameaaga nei ke he lalolagi he kakano he fakatufono ne mua ue atu ka moua he tagata. Ko e fakatufono a ia ne fakatata e pulotu mai he lagi ha kua pule mai ai he lagi i lalo he takitakiaga he Atua. Ti to uta kehe he Kautu ia he lagi e tau puhala oti he pule he tagata mai he lalolagi. To nakai liliu e tau tagata ke fai fifiliaga foki ke lali ke pule tutokotaha mai he Atua.
9 Hagaao ki ai ne tala mai e perofetaaga he Tanielu 2:44: “Ko e vaha he tau patuiki ia [tau fakatufono he vaha nei] to fakatu ai he Atua he lagi e kautu [he lagi] nakai fakaoti tukulagi; ko e kautu foki ia nakai tuku atu ai ke he taha motu [to nakai liu fakaata e tau tagata ke pule tutokotaha mai he Atua], to tuki malipilipi mo e fakaotioti e tau kautu oti ia, ka ko ia to tumau tukulagi a ia.”—Kikite foki Fakakiteaga 19:11-21; 20:4-6.
10. Ko e ha kua mauokafua a tautolu to nakai ha ha ai foki e pule nakai fakamoli i lalo he Kautu he Atua he lagi?
10 Ko e mena ia, to nakai liu ke fai pule kelea ke he tau tagata, ha ko e mena ka mole he fakaotioti he Atua e fakatokaaga nei, ko e pule he tagata ne pule tutokotaha mai ia ia to nakai liu ke kitia foki. Mo e ko e pule he Kautu mai he lagi to nakai kelea, ha ko e Atua e Kamataaga mo e Puipui ki ai. Ti to taute e tau mena mitaki ma e tau tagata ne pule ki ai. Mogoia ka taute ai e finagalo he Atua ke he lalolagi katoa tuga ni he lagi. Ko e mena haia ne kua maeke ia Iesu ke fakaako hana tau tutaki ke liogi ke he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:10.
Tata Lahi Fefe a Tautolu?
11. I fe i loto he Tohi Tapu ka moua e tautolu e tau perofetaaga ka lagomatai a tautolu ke mailoga e tata lahi ha tautolu ke he fakaotiaga he fakatokaaga nei?
11 Tata lahi atu fefe a tautolu ke he fakaotiaga he fakatokaaga temotemoai nei he tau mena mo e ke he kamataaga he lalolagi fou he Atua? Kua mai he perofetaaga he Tohi Tapu ki a tautolu e tali. Ke tuga anei, ne talahau tuai mai e Iesu e mena ke kumi ki ai ke maeke ia tautolu ke fifili e tuaga ha tautolu he hagaao ki ai, tuga ne fakakite mai he Tohi Tapu, “fakaotiaga [he tau mena] he lalolagi.” Kua fakamau ai ia Mataio tau veveheaga 24 mo e 25, Mareko 13, mo Luka 21. Tuga foki ne fakamau ia 2 Timoteo tau veveheaga 3, ne talahau tuai he aposetolo ko Paulo to ha ha ai e vaha ka ui ko e “tau aho fakamui” ka fakakite foki he tau mena tutupu kehekehe e magaaho kua hohoko a tautolu ki ai.
12, 13. Ko e heigoa ne talahau e Iesu mo Paulo hagaao ke he magaaho he fakaotiaga?
12 Ne talahau e Iesu ko e vaha nei to kamata mo e tau mena tutupu nei: “Ko e mena to laga e taha motu ke he taha motu, ko e taha kautu ke he taha kautu; to ha ha i ai e tau hoge, mo e tau tatalu, mo e tau mafuike ke he taha mena mo e taha mena.” (Mataio 24:7) Fakakite foki he Luka 21:11 kua tala foki a ia “ke he taha mena mo e taha mena . . . e tau tatalu.” Mo e hataki foki a ia “nukua tupu lahi e mahani hepehepe.”—Mataio 24:12.
13 Ne talahau tuai he aposetolo ko Paulo: “Ka kia iloa e koe e mena nai, ko e tau aho fakamui to hohoko mai ai e tau aho uka. Ha ko e mena ke ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea, to nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, to afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua. To ha i ai ia lautolu e gati he mahani Atua, ka kua tiaki e lautolu e malolo ne toka ai . . . Ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.”—2 Timoteo 3:1-5, 13.
14, 15. Fakamoli fefe he tau mena tutupu he senetenari ke 20 aki nei kua ha ha moli a tautolu he tau vaha fakahiku?
14 Kua fakamoli kia e tau mena ia ne talahau tuai e Iesu mo Paulo he vaha ha tautolu? E, kua fita. Ko e Felakutaki I he Lalolagi e felakutaki ne mua atu e kelea ato hoko e magaaho ia. Ko e felakutaki fakamua he lalolagi mo e ko e hikiaga lahi he fakamauaga tala he vaha fou nei. Fakalataha mo e felakutaki ia ko e tau hoge, holofa he tau tatalu, mo e falu a matematekelea. Ko e tau mena tutupu ia tali mai he 1914, tuga ne talahau e Iesu, “ko e kamataaga ia he tau mena matematekelea.” (Mataio 24:8) Kua kamata he tau mena ia e vaha ne talahau tuai ko e “tau aho fakamui,” ko e kamataaga he atuhau ke fakamui aki he magaaho ka fakaata he Atua e mahani kelea mo e matematekelea.
15 Tuga ia kua mailoga e koe e tau mena tutupu he senetenari ke 20 aki. Iloa e koe e tau mamahi ne tutupu mai ai. Kua kavi ke 100 miliona e tau tagata ne mamate he tau felakutaki. Totou teau mo e totou miliona falu ne mamate he hoge mo e gagao. Uta kehe he tau mafuike e tau momoui loga. Tolomaki ki mua e nakai fakalilifu ke he moui mo e tau maga fonua. Matakutaku ke he mahani holifono kua eke mo vala mau he moui ke he tau aho oti. Kua fakaheu e tau matafakatufono mitaki ke he mahani. Ko e tupu tolomaki he puke tagata kua fakatupu e tau mena vihi ne ha ha agaia ai. Kua moumou mo e fakahagahaga kelea he matagi kiva e moui mitaki. Moli ni, kua hanai a tautolu he tau aho fakamui tali mai he 1914 mo e kua tatatata atu tuai ke he fafatiaga he tau perofetaaga he Tohi Tapu hagaao ke he vaha ha tautolu.
16. To leva fefe e vaha he tau aho fakamui nei?
16 To leva fefe e vaha he tau aho fakamui nei? Ne tala mai a Iesu hagaao ke he vaha ka hohoko e “kamataaga ia he tau mena matematekelea” tali mai he 1914: “[To] nakai mole atu e hau nai, ato hohoko mai e tau mena oti ia.” (Mataio 24:8, 34-36) Ha kua pihia, kua lata ni e tau fakamailoga oti he tau aho fakamui ke fakamoli ke he vaha ku. Ne tala mai he Fakakiteaga 12:12 ka mole e liti hifo a Satani ke he katofia he lalolagi, to ku ni e magaaho hana.
17, 18. Fakakite mai he perofetaaga fe kua tata lahi a tautolu ke he fakaotiaga he lalolagi nei?
17 Ne foaki he aposetolo ko Paulo taha perofetaaga ne fakakite kua tata lahi e fakaotiaga he fakatokaaga nei: “Ko e aho he Iki, to hoko mai ia ke tuga e kaiha ke he po. Ha ko e mena ka pehe a lautolu, Kua mafola, kua nakai haofia, ti hokotia fakalutukia ai a lautolu he mahaikava . . . ti nakai fakai ke hao a lautolu.”—1 Tesalonia 5:2, 3; kikite foki Luka 21:34, 35.
18 He vaha nei kua oti tuai e Felakutaki Taufetului, mo e liga to nakai liu foki e felakutaki he lalolagi katoa ke eke mo mena matakutakuina lahi. Ti liga manatu e tau motu hane o atu a lautolu ke he fakatokatokaaga he lalolagi fou. Ka e he magaaho ka manatu a lautolu kua kautu e tau gahua ha lautolu, to kehe ni e kakano ke he mena ne manatu e lautolu, ha ko e fakamailoga fakahiku a ia kua tetei tuai e Atua ke fakaotioti e fakatokaaga nei. Manatu, ko e tau fehagaiaga mo e tau fakamoliaga fakapolitika kua nakai taute ha hikihikiaga moli ke he tau tagata. Kua nakai taute e lautolu e tau tagata ke fefakaalofaaki. Mo e tau takitaki he lalolagi kua nakai fakagata e holifono, nakai uta kehe foki e lautolu e gagao mo e mate. Ti aua neke tua a koe ke he ha fakaholoaga he mafola mo e nakai haofia he tagata mo e manatu to uta kehe he lalolagi nei e tau mena vihi i ai. (Salamo 146:3) Ko e kakano moli he fakapuloaaga ia, kua tata lahi tuai e lalolagi nei ke he fakaotiaga.
Fakamatalaaga he Tala Mitaki
19, 20. Ko e perofetaaga fe ne putoia ai e fakamatalaaga he tau aho fakamui ne kitia e tautolu hane fakamoli?
19 Taha perofetaaga ne fakakite kua ha ha a tautolu he tau aho fakamui tali mai he 1914 ko e perofetaaga ne foaki e Iesu: “To fakamatala fakamua foki e vagahau mitaki ke he tau motu oti kana ke lata ai.” (Mareko 13:10) Po kua tuga he talahau he Mataio 24:14: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”
20 He vaha nei, nakai la pihia tali mai he fakamauaga tuai, ko e tala mitaki ke he fakaotiaga he lalolagi nei mo e ke he Parataiso he lalolagi fou ka hoko mai i lalo he Kautu he Atua kua hane fa e fakamatala ai ke he lalolagi oti. Taute e hai? He tau miliona he Tau Fakamoli a Iehova. Kua fakamatala a lautolu ke he tau motu oti he lalolagi.
21, 22. Ko e heigoa ne fakakite lahi e Tau Fakamoli a Iehova ko e tau Kerisiano moli?
21 Ke lafi ke he fakamatalaaga ha lautolu hagaao ke he Kautu he Atua, kua taute he Tau Fakamoli a Iehova e mahani ne fakakite a lautolu ko e tau tutaki moli he Keriso, ha kua fakapuloa e ia: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” Ha ko e mena ia, ko e Tau Fakamoli a Iehova kua kaufakalataha ke he fematakainagaaki he lalolagi ha ko e pipiaga maunivaniva he fakaalofa.—Ioane 13:35; kikite foki Isaia 2:2-4; Kolose 3:14; Ioane 15:12-14; 1 Ioane 3:10-12; 4:20, 21; Fakakiteaga 7:9, 10.
22 Talitonu e Tau Fakamoli a Iehova ke he mena ne talahau he Tohi Tapu: “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) Ne kitia e lautolu ha lautolu a tau katofia Fakamoli he tau motu oti ko e tau matakainaga fakaagaga, pete ni ko e tau tagata lanu kehekehe. (Mataio 23:8) Mo e ha kua kitia e fematakainagaaki pihia he lalolagi he vaha nei kua lafi atu ai ke he fakamoliaga, nakai leva to mailoga e finagalo he Atua.
[Fakatino he lau 26]
Ko e Kautu mitaki katoatoa ni he Atua i luga he lagi ka eke mo pule katoa ke he tau tagata he lalolagi fou