Veveheaga 10

Kua Pule e Kautu he Atua

1, 2. Kua fakamoli fefe e tau fakatufono he tau tagata ko e nakai lata?

LIGA kua iloa e koe ke fakatau e taha kanavaakau, ke moua ni kua nakai gahua. Ke fakatai ki ai, kua hea e koe e tagata ­taute mena. He magaaho ku he mole e “taute” e ia e kanavaakau, ka e, liu ni malona. Kua fakaita ha e mena ia!

² Kua tatai ai mo e tau fakatufono he tagata. Kua leva tuai e manako he tau tagata ma e fakatufono ka fakamoli ke tamai e mafola mo e fiafia lahi. Ka e, ko e tau laliaga fakamakamaka ke fakamitaki e tau malolo hifo he kaufakalatahaaga kua nakai la kautu moli. Kua muatua e loga he tau fakamoliaga ke he mafola kua taute​—ti kua malona. Ka e, ko e fakatufono fe ne kua maeke ke uta kehe e mativa, fili tagata, holifono, gagao, mo e moumouaga he tau mena he kelekele? Ko e pule he tagata kua nakai fakaai ke fakamitaki. Kua huhu foki he patuiki pulotu ko Solomona i Isaraela: “Ko hai kia e tagata kua iloa hana ni a puhala.”​—Tau Fakatai 20:24.

3. (a) Ko e heigoa e matapatu tala he fakamatalaaga ha Iesu? (e) Fakamaama fefe he falu tagata e Kautu he Atua?

³ Kia nakai fakaatukehe! Nakai ko e miti noa e fakatufono mauokafua he lalolagi. Ko e matapatu tala a ia he fakamatalaaga ha Iesu. Kua ui aki e ia ko e “kautu he Atua,” mo e kua fakaako e ia e tau tutaki hana ke liogi ma e mena ia. (Luka 11:2; 21:31) E moli, ke he falu magaaho kua tutala ai e tau matakau lotu ke he Kautu he Atua. Ke he moliaga, kua miliona ne liogi ke he mena ia ke he tau aho takitaha he magaaho ka liu talahau e lautolu e Liogi he Iki (ne kua ui foki ko e Ha Mautolu a Matua po ke liogi fakatai). Ka e kua tali e tau tagata ke he tau puhala kehekehe ka huhu ki ai, “Ko e heigoa e Kautu he Atua?” Kua talahau he falu, “Kua ha ha ai ke he loto hau.” Kua ui e falu ko e lagi. Kua tuku mai he Tohi Tapu e tali maaliali, tuga ka kitia e tautolu.

KO E KAUTU MO E FINAGALO

4, 5. Ko e ha ne fifili ai e Iehova ke tamai e fakatino fou ke he hana a pule katoatoa, mo e ko e heigoa ka fakakatoatoa mai?

⁴ Kua eke tumau e Atua ko Iehova mo Patuiki, po ke Pule Katoatoa, he lagi mo e lalolagi katoatoa. Ha kua moli kua tufugatia e ia e tau mena oti kua tuku hake a ia ke he tuaga tokoluga. (1 Nofoaga he Tau Patuiki 29:11; Salamo 103:19; Gahua 4:24) Ka ko e Kautu ne fakamatala a Iesu ki ai ko e mena ke ua aki ke he pule katoa he lalolagi mo e lagi katoatoa he Atua. Kua ha ha he Kautu faka-Mesia ia e finagalo pauaki, ka e ko e heigoa a ia?

⁵ Tuga kua fakamaama mai he Veveheaga 6, kua totoko e tau tagata tokoua fakamua ke he pule malolo he Atua. Ha ko e mafuta hake he tau matakupu, kua fifili e Iehova ke fakakite mai e fakatino fou he hana a pule katoatoa. Ne fakapuloa he Atua e finagalo hana ke fakatupu mai e “tega” ka tatuki e Gata, ko Satani, mo e uta kehe e hukiaaga he hala ne moua he tau tagata. Ko e “tega” ne mua atu ko Iesu Keriso, mo e ko e “kautu he Atua” ko e hukui a ia ka fakakaumahala a Satani. He puhala mai he Kautu nei, to liuaki mai e Iesu Keriso e pule ki luga he lalolagi ke he higoa a Iehova mo e to fakatokoluga e pule kua tonuhia he Atua ma e tau magaaho oti kana.​—Kenese 3:15; Salamo 2:2-9.

6, 7. (a) Ko fe ai e Kautu, mo e ko hai e Patuiki mo e hana a tau pule fakahoa? (e) Ko hai a lautolu ka omaoma ke he Kautu?

⁶ He hagaao atu ke he taha liliuaga he tau kupu ha Iesu ke he tau Farasaio mahani kelea, ne pehe a ia: “Kua ha ha ia mutolu e kautu he Atua.” (Luka 17:21, King James Version) Kua pehe ka Iesu ko e Kautu ha ia he tau loto he tau tagata mahani kelea ia? Nakai. Ko e liliuaga ne mua e tonu ne mai he vagahau Heleni fakamua ne totou: “Ko e kautu he Atua kua ha ha he vahaloto ha mutolu.” (New World Translation) Ko Iesu, ne kua ha ha he vahaloto ha lautolu kua vagahau a ia hagaao ki a ia ni ko e Patuiki i anoiha. Mamao mai he eke mo taha mena kua ha ha i loto he tagata, ko e mena moli e Kautu he Atua, ko e fakatufono gahuahua ne ha ha i ai e pule mo e tau tagata omaoma. Ko e fakatufono a ia he lagi, ha kua fakahigoa ua ai ko e “kautu he lagi” mo e “kautu he Atua.” (Mataio 13:11; Luka 8:10) He fakakiteaga, kua kitia he perofeta ko Tanielu e Pule i ai ko e “Taha kua tuga e Tama he tagata” kua tamai ki mua he Atua Mua Ue Atu mo e kua foaki age e “pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe.” (Tanielu 7:13, 14) Ko hai e Patuiki nei? E, kua ui he Tohi Tapu a Iesu Keriso ko e “Tama he tagata.” (Mataio 12:40; Luka 17:26) E, kua kotofa e Iehova e Tama hana, ko Iesu Keriso, ke eke mo Patuiki.

⁷ Kua nakai pule tokotaha a Iesu. Kua ha ha mo ia e 144,000 ne kua “fakafua mai he lalolagi” ke eke mo tau patuiki mo e tau ekepoa fakahoa hana. (Fakakiteaga 5:9, 10; 14:1, 3; Luka 22:28-30) Ko lautolu ne omaoma ke he Kautu he Atua ka eke ai mo magafaoa he lalolagi katoa he tau tagata ne kua fakalilifu ke he tuaga pule ha Keriso. (Salamo 72:7, 8) Ka e, maeke fefe, ia tautolu ke tali tonu to fakatokoluga he Kautu e pule katoatoa he Atua mo e liuaki mai e tau tutuaga fakaparataiso ke he ha tautolu a lalolagi?

KO E MOLI HE KAUTU HE ATUA

8, 9. (a) To fakatai fefe e tautolu e falanakiaga he tau maveheaga he Kautu he Atua? (e) Kua maeke ai he ha ia tautolu ke fakamoli atu ke he moli he Kautu?

⁸ Manamanatu la kua moumou he afi e kaina hau. He mogonei ko e kapitiga ne kua fai tupe ke liu ta e fale hau kua mavehe atu ke lagomatai a koe ke liu ta hake e fale hau mo e ke foaki e tau mena kai ma e hau a magafaoa. Kaeke kua fa fakamoli tumau e kapitiga ia ki a koe, nakai kia to talitonu a koe ki a ia? Liga kua liu mai a koe ki kaina he gahua he aho hake mo e kitia ko e tau tagata gahua kua kamata tuai ke fakamea e tau mena ne toe mai he afi mo e kua tamai e tau mena kai ma e hau a magafaoa. Kua nakai fakauaua to mauokafua katoatoa hau loto ko e he fakahikuaga, to nakai ni liu moua e tau koloa ka e to mitaki lahi atu foki ke he tau mena he vaha fakamua.

⁹ Kua foaki mai pihia e Iehova e fakamoliaga he moli he Kautu. Tuga kua fakakite mai he tohi Tohi Tapu ha Heperu, kua loga e tau puhala ne kua ata mai e fakatokaaga he Kautu. (Heperu 10:1) Ko e tau talahauaga tuai ke he Kautu he Atua kua fakamoli foki he kautu ha Isaraela he lalolagi. Nakai ko e fakatufono noa ni a ia, ha kua nonofo e tau pule i luga he “nofoaiki a Iehova.” (1 Nofoaga he Tau Patuiki 29:23) Kua mua atu foki, kua fita he talahau tuai mai: “Nakai uta kehe e tokotoko ia Iuta, po ke ekepule mai hana tau hui, ato haele mai a Sailo, to omaoma e tau motu kia ia.” (Kenese 49:10)a E, ko e mai he ohi nei he tau patuiki a Iuta ka fanau mai a Iesu, ko e Patuiki mau tumau he fakatufono he Atua.​—Luka 1:​32, 33.

10. (a) Kua fakatoka ne fe e fakaveaga he Kautu faka-Mesia he Atua? (e) Ko e heigoa e gahua aoga lahi ka takitaki he tau pule fakahoa ha Iesu ke he lalolagi?

¹⁰ Ko e fakaveaga he Kautu faka-Mesia he Atua kua fakatoka ai ha ko e fifiliaga he tau aposetolo ha Iesu. (Efeso 2:​19, 20; Fakakiteaga 21:14) Ko lautolu fakamua a nei he 144,000 ka pule i luga he lagi mo Iesu Keriso ke eke mo tau patuiki fakahoa. He magaaho ne ha ha he lalolagi, ko lautolu ka pule fakalataha nei to takitaki e matagahua fakamatala, he fakatatai atu ke he poaki a Iesu: “Kia o atu . . . ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu.”​—Mataio 28:19.

11. Kua taute fefe e gahua fakamatala he Kautu he vaha nei, mo e ko e heigoa kua moua mai?

¹¹ Ko e poakiaga ke taute tutaki kua omaoma ki ai he mogonei ke he laulahi kua mua ue atu. Ko e Tau Fakamoli a Iehova kua fakapuloa ai e tala mitaki he Kautu ke he lalolagi katoa, ke fakalagotatai atu ke he tau kupu fakaperofeta ha Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Ke eke mo taha puhala he gahua fakamatala he Kautu, kua taute ai e polokalama fakaakoaga. Ko lautolu ne kua omaoma ke he tau matafakatufono mo e tau matapatu fakaakoaga he Kautu he Atua kua fita he moua e mafola mo e fakalatahaaga ne kua nakai fakaai e tau fakatufono he tagata ke tamai. Ko e tau mena oti nei kua fakamoli mai e moli he Kautu he Atua!

12. (a) Ko e ha kua lata ai ke fakahigoa a lautolu ne fakapuloa e Kautu ko e Tau Fakamoli a Iehova? (e) Kua kehe fefe e Kautu he Atua mai he tau fakatufono he tagata?

¹² Kua tala age a Iehova ke he tau Isaraela: “Ko e haku a tau fakamoli a mutolu, mo e haku a tau fekafekau ne fifili e au.” (Isaia 43:10-12) Ko Iesu, “ko e talahau fakamoli,” kua fakamakutu ke fakapuloa e tala mitaki he Kautu. (Fakakiteaga 1:5; Mataio 4:17) Ti kua lata ai ia lautolu ne fakapuloa e Kautu he vaha fou nei ke fua e higoa ne kotofa faka-Atua ko e Tau Fakamoli a Iehova. Ka e ko e ha ne kua lahi ai e tau magaaho mo e tau malolo ne fakamole he Tau Fakamoli ke tutala ke he falu hagaao ke he Kautu he Atua? Kua taute e lautolu e mena nei ha ko e Kautu ko e amaamanakiaga ni haia he tau tagata. Ko e tau fakatufono he tagata to hoko ni ke malolo hifo he taha vaha, ka e ko e Kautu he Atua to nakai fakaai ke pihia. Kua fakahigoa ai he Isaia 9:​6, 7 hana a Pule, ko Iesu, ko e “Iki he mafola” mo e lafi atu: “Nakai fai mena ke liu mai ai e lilifu he hana pule, mo e mafola he hana pule.” Kua nakai tatai e Kautu he Atua mo e tau fakatufono he tagata​—ne kua ha ha i ai he aho nei mo e kua kaumahala a pogipogi. Kua moli, ne talahau e Tanielu 2:44: “To fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, . . . ka ko ia to tumau tukulagi a ia.”

13. (a) Ko e heigoa e falu a lekua ka kautu e fakafehagai he Kautu he Atua ki ai? (e) Ko e ha kua maeke ai a tautolu ke iloa moli to fakakatoatoa ai e tau maveheaga he Atua?

¹³ Ko e patuiki tagata fe ka tamai e fakaotiaga ke he felakutaki, holifono, gagao, hoge, mo e nakai fai kaina? Ke lafi ki ai, ko e pule fe he lalolagi ka liu fakatu mai a lautolu ne kua mamate? To fehagai atu e Kautu he Atua mo e hana a Patuiki ke he tau mena nei. To nakai kaumahala e Kautu, ke tuga e kanavaakau malona ne kua tumau ke lata ke taute ke mau. Ka e, to kautu ni e Kautu he Atua, ha kua mavehe mai a Iehova: “Haku a kupu kua fina atu ai he gutu haku, nakai liu noa mai a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.” (Isaia 55:11) To nakai kaumahala e finagalo he Atua, ka e to kamata a fe e pule he Kautu?

PULE HE KAUTU—A FE?

14. Ko e heigoa ne nakai maama mitaki he tau tutaki ha Iesu hagaao ke he Kautu, ka ko e heigoa ne iloa e Iesu hagaao ke he hana a pule?

¹⁴ “Ko e Iki na e, ko e vaha nai kia ke liu fakafou mai ai e koe e kautu kia Isaraela?” Ko e huhu nei ne huhu he tau tutaki ha Iesu kua fakakite ko e nakai iloa e lautolu e finagalo he Kautu he Atua mo e magaaho ne kotofa ai ke kamata e pule. He hataki atu ki a lautolu ke nakai manamanatu noa atu ke he mena ia, ne pehe a Iesu: “Nakai lata he iloa e mutolu e tau vaha mo e tau tau, kua toka tuai he Matua ke he hana pule ni.” Kua iloa e Iesu ko e pule hana ki luga he lalolagi kua toka ma e a anoiha, leva mai he mole e liu tu mai hana mo e haele hake ke he lagi. (Gahua 1:6-11; Luka 19:11, 12, 15) Kua talahau tuai mai he tau Tohiaga Tapu e mena nai. He puhala fe?

15. Kua fakamaama mai fefe ia Salamo 110:1 ki a tautolu hagaao ke he magaaho he pule ha Iesu?

¹⁵ Kua fakaperofeta mai hagaao ki a Iesu ko e “Iki,” ne pehe e Patuiki ko Tavita: “Kua pehe mai e kupu a Iehova ke he haku a Iki, Kia nofo a koe ke he haku a lima matau, ato eke e au a lautolu kua fai fi kia koe mo fakatuaga hui hāu.” (Salamo 110:1; fakatatai Gahua 2:​34-36.) Kua fakakite mai he perofetaaga nei ko e pule ha Iesu to nakai kamata he mogoia ni he mole hana haele hake ia ki luga he lagi. Ka e, to fakatalitali ni a ia ke he lima matau he Atua. (Heperu 10:​12, 13) To loa fefe e fakatalitali nei? To kamata a fe e pule hana? Kua lagomatai he Tohi Tapu a tautolu ke moua e tau tali.

16. Ko e heigoa ne tupu he 607 F.V.N., mo e kua matutaki fefe e mena nei ke he Kautu he Atua?

¹⁶ Ko e maaga ni ne toka ai e Iehova e higoa hana ko Ierusalema. (1 Tau Patuiki 11:36) Ko e maaga lahi foki he kautu he lalolagi ne talia he Atua kua fakatino e Kautu he Atua he lagi. Ti ko e mena ia, ko e moumouaga ha Ierusalema he tau Papelonia he 607 F.V.N. kua kehe mahaki. Kua fakamailoga he mena nei e kamataaga he loa he fakalavelaveaga ke he pule tonu he Atua ki luga he tau tagata hana he lalolagi. Ke he tau senetenari ono ne mole, ne fakakite e Iesu ko e vaha fakalavelave ke he pule nei kua gahuahua agaia, ha kua pehe a ia: “To taholi foki a Ierusalema he tau motu kehe, ato fakakatoa ai e tau vaha he tau motu kehe.”​—Luka 21:24.

17. (a) Ko e heigoa e “vaha he tau motu kehe,” mo e fiha e leva ka ha ha i ai a lautolu? (e) Ko e kamata mo e oti he magaaho fe e “vaha he tau motu kehe”?

¹⁷ Ke he magahala he “tau vaha he tau motu kehe” ne kua fakaata e tau fakatufono he lalolagi ke fakalavelave e pule ne talia he Atua. Kua kamata e vaha ia mo e moumouaga ha Ierusalema he 607 F.V.N., mo e kua fakakite mai e Tanielu to fakaholo atu ai e vaha nei ke he “fitu e tau.” (Tanielu 4:​23-25) Ko e fiha e leva a ia? Kua fakakite mai he Tohi Tapu ko e “tau tau” ne tolu mo e hafa kua katoa ke he 1,260 e tau aho. (Fakakiteaga 12:​6, 14) Ke fakalahi ua e vaha ia, po ke fitu e tau, ko e 2,520 e tau aho a ia. Ka e kua nakai fai mena ofogia ne tupu he vaha ku ia. He lafi atu e ‘aho ma e tau taha’ ke he perofetaaga ha Tanielu mo e totou 2,520 e tau tau mai he 607 F.V.N., ti kua hohoko atu a tautolu ke he tau 1914 V.N.​—Numera 14:34; Esekielu 4:6.

18. Ko e heigoa ne taute e Iesu he magaaho ne mole laia he moua e malolo he Kautu, mo e lauia fefe e lalolagi ke he mena nei?

¹⁸ Kua kamata ka Iesu ke pule i luga he lagi he magaaho ia? Ko e tau kakano faka-Tohiaga Tapu ma e talahauaga kua ­taute pihia e ia ka tutala ki ai he veveheaga ne mui mai. Kua moli ai, ko e kamataaga he pule ha Iesu to nakai fakamailoga ai ha ko e mafola fakalutukia ke he lalolagi. Kua fakakite mai ia Fakakiteaga 12:​7-12 he mole fakatote ni he moua e Kautu, to tolo hifo e Iesu a Satani mo e tau agelu temoni mai he lagi. Ko e kakano e mena nei to matematekelea e lalolagi, ka e kua fakamafana ai ke totou “kua tote ni hana [Tiapolo] a vaha” ne toe. Nakai leva, to olioli a tautolu nakai ni ha kua pule tuai e Kautu he Atua ka e pihia foki ha kua tamai ai e tau fakamonuinaaga ke he lalolagi mo e tau tagata omaoma. (Salamo 72:​7, 8) Iloa fefe e tautolu to nakai leva to tupu ai e mena nei?

[Tau Matahui Tala]

KAMATAMATA E ILOILO HAU

Ko e heigoa e Kautu he Atua, mo e pule mai i fe?

Ko hai ne pule i loto he Kautu, mo e ko hai a lautolu ka omaoma ki ai?

Kua fakamoli mai fefe e Iehova ki a tautolu ko e moli e Kautu hana?

Kua kamata mo e oti he magaaho fe e “tau vaha he tau motu kehe”?

[Puha he lau 94]

FALU TUTUPUAGA AOGA LAHI NE MATUTAKI KE HE KAUTU HE ATUA

• Kua fakapuloa e Iehova e finagalo hana ke fakatupu e “tega” ka tatuki e ulu he Gata, ko Satani ko e Tiapolo.—Kenese 3:15.

• He 1943 F.V.N., ne fakakite e Iehova ko e “tega” nei to eke ko e tagata mai he ohi a Aperahamo.—Kenese 12:1-3, 7; 22:18.

• Ko e Fakatufono he maveheaga kua foaki ke he tau Isaraela he 1513 F.V.N. kua foaki ai e “ata he au mena mitaki ne tatali.”—Esoto 24:6-8; Heperu 10:1.

• Ko e kautu he lalolagi ha Isaraela kua kamata he 1117 F.V.N., mo e kua fakaholo atu he magaaho fakamui ke he ohi a Tavita.—1 Samuela 11:15; 2 Samuela 7:8, 16.

• Kua fakaotioti a Ierusalema he 607 F.V.N., mo e kamata ai e “vaha he tau motu kehe.”—2 Tau Patuiki 25:8-10, 25, 26; Luka 21:24.

• He 29 V.N., kua fakauku a Iesu ke eke mo Patuiki he Kotofaaga mo e kamata ai e fekafekauaga hana he lalolagi.—Mataio 3:16, 17; 4:17; 21:9-11.

• He 33 V.N., ne haele hake a Iesu ke he lagi, ke fakatalitali i ai ke he lima matau he Atua ato kamata e pule hana.—Gahua 5:30, 31; Heperu 10:12, 13.

• Kua fakanofo ai a Iesu he nofoa patuiki i luga he Kautu he lagi he 1914 V.N. he oti ai e “vaha he tau motu kehe.”—Fakakiteaga 11:15.

• Ko Satani mo e hana tau temoni kua tolo hifo ke he kelekele he lalolagi mo e kua fakatolomaki e oi ke he tau tagata.—Fakakiteaga 12:9-12.

• Kua leveki e Iesu e gahua fakamatala he tala mitaki he Kautu he Atua ke he lalolagi katoa.​—Mataio 24:14; 28:19, 20.