Fakaakoaga 2
Ko Hai e Atua?
Ko hai e Atua moli, mo e ko hai hana a higoa? (1, 2)
Ko e tino fefe a ia? (3)
Ko e heigoa hana a tau mahani mua ue atu? (4)
Maeke nakai a tautolu ke fakaaoga e tau mena fakatai mo e tau fakamailoga ke he ha tautolu a tapuakiaga ki a ia? (5)
Ko e heigoa e tau puhala ua ne maeke ia tautolu ke fakaako ke he Atua? (6)
1. Tapuaki e tau tagata ke he tau mena loga. Ka e talahau mai he Tohi Tapu ki a tautolu ko e mena taha ni e Atua MOLI. Ko ia ne tufugatia e tau mena oti he lagi mo e lalolagi. Ha kua foaki mai e ia ha tautolu a tau momoui, ko ia ni Tokotaha kua lata ia tautolu ke tapuaki ki ai.—1 Korinito 8:5, 6; Fakakiteaga 4:11.
2. Ha ha he Atua loga e tau matahigoa kotofaaga ka e taha ni e higoa hana. Ko e higoa ia ko IEHOVA. Ko e laulahi he tau Tohi Tapu, ko e higoa he Atua kua utakehe mo e kua fita he hukui aki e tau matahigoa kotofaaga ko e IKI po ke ATUA. Ka ko e magahala ne tohia ai e Tohi Tapu, ko e higoa a Iehova ne tohi ai laga 7,000!—Esoto 3:15; Salamo 83:18.
3. Ha ha ia Iehova e tino, ka e nakai tuga ha tautolu. “Ko e Atua ko e agaga ni a ia,” he talahau mai he Tohi Tapu. (Ioane 4:24) Ko e agaga ko e taha vahega mena moui ne mua hake e tokoluga ke he ha tautolu. Nakai la fai tagata ne kua kitia e Atua. Nofo a Iehova he lagi, ka e maeke ia ia ke kitia e tau mena oti. (Salamo 11:4, 5; Ioane 1:18) Ka ko e heigoa mogoia e agaga tapu? Ko e mena ia nakai ko e peresona tuga e Atua. Ko e mena ia, ko e malolo gahuahua he Atua.—Salamo 104:30.
4. Ne fakakite mai he Tohi Tapu e tau mahani ha Iehova ki a tautolu. Ne fakakite mai hana a tau mahani mua ue atu ko e fakaalofa, fakafiliaga tonu, iloilo mo e malolo. (Teutaronome 32:4; Iopu 12:13; Isaia 40:26; 1 Ioane 4:8) Talahau mai he Tohi Tapu ki a tautolu ha ha foki ia ia e fakaalofa hofihofi noa, totonu, fakamagalo atu, fakamokoi, mo e fakauka. Ko tautolu, ke tuga e tau fanau omaoma, kua lata ke lali ke fifitaki ki a ia.—Efeso 5:1, 2.
5. Kua lata nakai a tautolu ke hufeilo po ke liogi ke he tau mena fakatai, tau fakatino, po ke tau fakamailoga ke he ha tautolu a tapuakiaga? Nakai! (Esoto 20:4, 5) Ne pehe mai a Iehova kua lata ni a tautolu ke tapuaki ni ki a ia hokoia. To nakai age hana a lilifu ma e ha tagata po ke ha mena taha. Nakai ha ha he tau mena fakatai ha malolo ke lagomatai a tautolu.—Salamo 115:4-8; Isaia 42:8.
6. Maeke fefe ia tautolu ke iloa mitaki e Atua? Ko e taha puhala ko e kitekite ke he tau mena ne tufugatia e ia mo e manamanatu fakahokulo ke he tau mena ne talahau mai e lautolu ki a tautolu. Fakakite he tau tufugatia he Atua ki a tautolu kua ha ha ia ia e malolo lahi mo e iloilo. Kitia e tautolu hana a fakaalofa ke he tau mena oti ne taute e ia. (Salamo 19:1-6; Roma 1:20) Ko e taha puhala ke fakaako a tautolu ke he Atua ko e kumikumi ke he Tohi Tapu. Ne talahau fakalahi mai e ia i loto ko e vahega Atua fefe a ia. Ne talahau mai foki e ia ki a tautolu e hana a finagalo mo e hana a manako ke he tau mena ke taute e tautolu.—Amosa 3:7; 2 Timoteo 3:16, 17.
[Tau Fakatino he lau 5]
Fakaako a tautolu ke he Atua mai he tau mena ne tufugatia mo e mai he Tohi Tapu