Fakaakoaga 3

Ko Hai a Iesu Keriso?

Ko e ha a Iesu ne fakahigoa ai ko e Tama “uluaki”? (1)

Ko e ha ne fakahigoa ai a ia ‘ko e Loko’? (1)

Ko e ha ne hau ai a Iesu ke he lalolagi ko e tagata? (2-4)

Ko e ha ne taute ai e ia e tau mana? (5)

Ko e heigoa ha Iesu ka taute ke he tau vaha i mua ne tata mai? (6)

1. Ne nofo a Iesu he lagi ko e peresona agaga to hau a ia ke he lalolagi. Ko ia ko e kamataaga he tau mena ne tufugatia he Atua, ti ko e mena haia ne fakahigoa a ia ko e Tama “uluaki” he Atua. (Kolose 1:15; Fakakiteaga 3:14) Ko Iesu ni hokoia e Tama ne tufugatia he Atua tokotaha. Ne fakaaoga e Iehova a Iesu ke he hana moui fakamua to eke a ia mo tagata ko e hana a “iki gahua iloilo” ke tufugatia e tau mena oti he lagi mo e lalolagi. (Tau Fakatai 8:22-31, NW; Kolose 1:16, 17) Fakaaoga foki he Atua a ia ko e Hana a gutu vagahau mua ue atu. Ko e mena haia ati fakahigoa ai a Iesu ‘ko e Loko.’—Ioane 1:1-3; Fakakiteaga 19:13.

2. Ne fakafano mai he Atua Hana Tama ke he lalolagi he hiki mai hana moui ke he nofoaga tama ha Maria. Ti nakai fai matua tane tagata a Iesu. Ko e mena haia ne nakai fai hala po ke ha kelea a ia. Tolu la e kakano ati fakafano mai he Atua a Iesu ke he lalolagi: (1) Ke fakaako a tautolu ke he mena moli hagaao ke he Atua (Ioane 18:37), (2) ke fakatumau e fakamoli katoatoa, ke foaki e fakafifitakiaga ma tautolu ke mumuitua ki ai (1 Peteru 2:21), mo e (3) ke poa hana moui ke tokanoa aki a tautolu mai he hala mo e mate. Ko e ha ne kua lata ke ha ha i ai e mena nei?—Mataio 20:28.

3. Ha ko e nakai omaoma ke he poakiaga he Atua, ko e tagata uluaki, ko Atamu, ne taute e “agahala” he talahau he Tohi Tapu. Ti fakahala ai he Atua a ia ke mate. (Kenese 3:17-19) Kua nakai hoko a ia ke he tau tufaaga he Atua, ti kua nakai tuai mitaki katoatoa a ia. Ne fuakau fakaeneene a ia ti mate. Ko Atamu ne ta mai e hala ke he hana a tau fanau oti. Ko e mena haia ati fuakau foki a tautolu, gagao, mo e mamate. Maeke fefe ke fakamomoui e tau tagata?—Roma 3:23; 5:12.

4. Ko Iesu ko e tagata mitaki katoatoa tuga ni a Atamu. Ka e nakai tuga a Atamu, ne omaoma katoatoa a Iesu ke he Atua pihia ni i lalo hifo he kamatamata lahi. Kua maeke ai a ia ke poa hana a tino mitaki katoatoa ke totogi aki e hala ha Atamu. Ko e mena hanai ne talahau he Tohi Tapu ko e “lukutoto.” Ti kua maeke ai e tau fanau ha Atamu ke fakahao mai he fakahala he mate. Ko lautolu oti ne tua ki a Iesu ka maeke ke fakamagalo ha lautolu a tau hala mo e moua e moui tukulagi.—1 Timoteo 2:5, 6; Ioane 3:16; Roma 5:18, 19.

5. He moui he lalolagi ne fakamaulu e Iesu e tau tagata gagao, fagai a lautolu ne hoge, mo e fakamilino e tau afa. Ne maeke foki a ia ke fakaliliu tutu mai a lautolu ne mamate. Ko e ha ne taute ai e ia e tau mana? (1) Ne hofihofi e fakaalofa hana ke he tau tagata ne matematekelea, mo e manako a ia ke lagomatai a lautolu. (2) Kua fakamoli he tau mana hana ko ia ko e Tama he Atua. (3) Ne fakakite he tau mena nei e tau gahua hana ka taute ma e tau tagata omaoma ka pule ai a ia ko e Patuiki ke he lalolagi.—Mataio 14:14; Mareko 2:10-12; Ioane 5:28, 29.

6. Ne mate a Iesu ti fakaliu tu mai he Atua ko e mena moui agaga, mo e liu a ia ke he lagi. (1 Peteru 3:18) Tali mai he mogoia, ne eke ai he Atua a ia mo Patuiki. To utakehe fakamafiti e Iesu e tau mena kelea oti mo e tau matematekelea mai he lalolagi nei.—Salamo 37:9-11; Tau Fakatai 2:21, 22.

[Tau Fakatino he lau 7]

Kua putoia ke he fekafekauaga ha Iesu e fakaako atu, taute e tau mana, mo e pihia foki e foaki e ia hana moui ma tautolu