Fakaakoaga 9

Kua Lata ke Mahani Mea e Tau Fekafekau he Atua

Ko e ha kua lata ia tautolu ke mahani mea ke he tau mena oti? (1)

Ko e heigoa e kakano ke mea fakaagaga? (2) mahani mea? (3) mea e tau manamanatuaga? (4) mea ke he tau mena he tino? (5)

Ko e tau vahega tala nakai mea fefe kua lata ia tautolu ke fakamamao mai i ai? (6)

1. Mea mo e tapu e Atua ko Iehova. Pihia foki hana a amaamanakiaga ki a lautolu ne tapuaki ki a ia ke fakatumau e mahani mea—fakaagaga, tau mahani, tau manamanatuaga, mo e ke he tau mena he tino. (1 Peteru 1:16) Lahi e gahua ke tumau e mea ki mua he Atua. Momoui a tautolu ke he lalolagi nakai mea. Taufetului foki a tautolu mo e ha tautolu a tau manako ke taute e tau mena hepehepe. Kua nakai lata ia tautolu ke tiaki nakai lali fakalahi.

2. Mea Fakaagaga: Kaeke ke manako a tautolu ke fekafekau ki a Iehova, kua nakai maeke ia tautolu ke taofi mau e tau fakaakoaga po ke tau mahani he lotu pikopiko. Kua lata ia tautolu ke o mai kehe he lotu pikopiko mo e nakai lagomatai atu ki ai ke he ha mena taha. (2 Korinito 6:14-18; Fakakiteaga 18:4) Kaeke kua fakaako e tautolu e mena moli ke he Atua, ti lata ia tautolu ke fakaeneene ke nakai fakahehe he tau tagata ne fakaako e tau mena pikopiko.—2 Ioane 10, 11.

3. Mahani Mea: Manako a Iehova ke he hana tau tagata ne tapuaki ki a ia ke mahani tuga e tau Kerisiano moli ke he tau magaaho oti. (1 Peteru 2:12) Kitia oti e ia e tau mena oti ha tautolu ne taute, pete ni ko e tau mena fufu foki. (Heperu 4:13) Kua lata ia tautolu ke fakamamao mo e tau mahani fakatane mo e fifine nakai lata mo e falu a mahani kiva he lalolagi nei.—1 Korinito 6:9-11.

4. Mea e Tau Manamanatuaga: Ka fakapuke e tautolu ha tautolu a tau manamanatuaga aki e tau manatu mea mo e mitaki, to mea foki ha tautolu a tau mahani. (Filipi 4:8) Kaeke ke manamanatu a tautolu ke he tau mena nakai mea, to fua mai ai e tau mahani kelea muikau. (Mataio 15:18-20) Kua lata ia tautolu ke fakamamao mo e tau fakafiafiaaga ne kua takiva ha tautolu a tau loto manamanatu. Maeke ia tautolu ke fakapuke aki e tau mena mea ha tautolu a tau loto manamanatu ha ko e kumikumi ke he Kupu he Atua.

5. Mea ke he Tau Mena he Tino: Ha kua hukui e lautolu e Atua, kua lata he tau Kerisiano ke mea tumau ha lautolu a tau tino mo e tau mena tui. Kua lata ia tautolu ke holoholo e tau lima ka oti e fakaaoga he fale tote, ti lata foki ia tautolu ke holoholo foki to kai po ke taute e tau mena kai. Ka nakai fai hala paipa uta vao pauaki a koe, kua lata ni e tau vao ke tanu. (Teutaronome 23:12, 13) Maeke he fakameaaga he tino ke moua e tino malolo mitaki. Kua lata e kaina he Kerisiano ke maopoopo mo e mea a fale mo fafo. Kua lata ke kitia maali e mitaki ke he matakavi ia mo e eke mo fakafifitakiaga mitaki.

6. Mea e Tau Vagahau: Ko e tau fekafekau he Atua kua lata ke vagahau tumau e mena moli. Nakai hohoko a lautolu ne pikopiko ke he Kautu he Atua. (Efeso 4:25; Fakakiteaga 21:8) Nakai fakaaoga he tau Kerisiano e tau vagahau kelea. Nakai fanogonogo po ke talahau e lautolu e tau vaiga kelea po ke tau tala kiva. Kakano ha ko e ha lautolu a vagahau mea kua kitia mali e kehe ha lautolu ke he tau gahuaaga po ke tau aoga mo e tau tuuta kaina.—Efeso 4:29, 31; 5:3.

[Tau Fakatino he lau 18, 19]

Kua lata e tau fekafekau he Atua ke mea ke he tau mena oti