Iesu Keriso—Ko Hai a Ia?

“TOKOLOGA foki e tau tagata ne nakai ko e tau Kerisiano kua talitonu ko Ia ko e faiaoga ne mua mo e pulotu. Ko ia moli taha he tau tagata fakaohooho lahi ne moui i tuai.” (The World Book Encyclopedia) Ko hai a “Ia”? Ne moua e Iesu Keriso e faka-Kerisiano. Iloa nakai e koe ko hai a ia? Lauia nakai e moui hau ke he ha puhala hana?

Ko e tau mena tutupu ke he fekafekauaga ha Iesu ne fakamau he Tohi Tapu ke he fa e matagahua fakamau tala tuai ne higoa ko e tau Evagelia. Moli fefe e tau fakamauaga nei? He mole e filifilia ki ai, ne tohi he tagata fakamau tala tuai talahaua ko Will Durant: “Ko e gahoa ni e tau tagata noa ne kua maeke ai he taha e atuhau ke fakatu hake e mahani fakatagata, kua malolo lahi mo e fulufuluola, ne tokoluga e tau mahani tonu mo e omoi e kitekiteaga fakamatakainaga he tagata, ko e mana haia ne mua atu e fakaofogia ke he ha fakamauaga ne ha ha i ai he tau Evagelia.”

Ke he tau tagata miliona he Fahi Uta mo e falu matakavi, kua nakai iloa e lautolu a Iesu Keriso. Liga talitonu a lautolu kua moui a ia, ka e nakai manatu a lautolu ke fai matutakiaga a ia ke he tau momoui ha lautolu. Kua fakagofua he falu a Iesu ke kelea muikau ha ko e mena ne taute e lautolu ne talahau ko e tau tutaki hana. ‘Ne fakato e lautolu e pomu etome ki Nagasaki,’ kua talahau he falu i Sapani, ‘ko e maga kua tokologa lahi he tau Kerisiano ke he falu maga i Sapani.’

Ka e, tukupau nakai e koe e ekekafo ma e tatalu he tagata ka kaumahala e tagata gagao ke muitua ke he tau hatakiaga he ekekafo? Maaliali ai, nakai. Kua leva tigahau e heheu kehe he Kerisitenitome e fakaakoaga a Iesu ke kautu mai he tau mena vihi ha lautolu ke he tau aho takitaha. He nakai heheu kehe a Iesu ha kua nakai muitua e lautolu kua talahau ko e tau Kerisiano e tau fakaakoaga hana, ko e ha he nakai ako ni e koe taha mena hagaao ki a ia? Kikite ke he Tohi Tapu, mo e kitia moli ko hai a Iesu mo e hiki fefe foki e ia e moui hau.

Ofania—Hana Fakaakoaga

Ko Iesu Keriso ko e faiaoga ne mua ne nofo i Palesitaina he teitei 2,000 tau kua mole atu. Tote lahi e mena kua iloa hagaao ke he vaha tama tote hana. (Mataio, veveheaga 1 mo e 2; Luka, veveheaga 1 mo e 2) He 30 e tau he moui hana, ne kamata e Iesu hana fekafekauaga ke ‘talahau e kupu moli.’ (Ioane 18:37; Luka 3:21-23) Tokofa e tagata fakamau tala tuai ne hagaaki ke he moui a Iesu he hana fekafekauaga ke he tau tagata, he tolu mo e hafa e tau hana he nofo fakaku he lalolagi.

He fekafekauaga ha Iesu, ne age e ia ke he tau tutaki hana e kei ke fehagai mo e tau mena vihi kehekehe he tau momoui ha lautolu. Ko e heigoa e kei ia? Ko e fakaalofa. Ko e taha he tau lauga talahaua he fakamauaga tala tuai, ne higoa ko e Lauga he Mouga, ne fakaako e Iesu e puhala ke he hana tau tutaki he fakakite e fakaalofa ma e tau tagata. Ne pehe a ia: “Ko e tau mena oti kua loto a mutolu ki ai, ke eke he tau tagata kia mutolu; ati eke ā e mutolu e tau mena ia kia lautolu.” (Mataio 7:12) Ko e matapatu fakaakoaga nei ne higoa ko e Matafakatufono Uho Lahi. Ko e “tau tagata” ne hagaao a Iesu he mena nei ki ai kua lauia ai foki e tau fi he tagata. He lauga taha nei, ne pehe a ia: ‘Kia fakaalofa atu a mutolu kia lautolu kua fai fi kia mutolu, kia liogi foki a mutolu ma lautolu ne favale mai kia mutolu.’ (Mataio 5:44) Nakai kia fakamafola he fakaalofa pihia e tau mena vihi loga kua fehagai mo tautolu he vaha nei? Ne manatu pihia e takitaki Hinitu ko Mohandas Gandhi. Ne fatiaki e ia he pehe: “Ko e magaaho ka fakalataha [a tautolu] ke he tau fakaakoaga ha Keriso ke he Lauga nei he Mouga, to maeke e tau mena vihi he taute tautolu . . . he lalolagi katoa.” Ko e fakaakoaga a Iesu he fakaalofa, ka fakagahua, kua fakamalolo e tau tatalu he tagata.

Fakagahuahua Tuai Hana Fakaalofa

Ne fakagahua e Iesu e mena ne fakaako e ia. Ne tuku mua e ia e fiafia he falu ke he hana mo e fakagahuahua ai e fakaalofa. He taha aho ne nakai fakamaoki a Iesu mo e tau tutaki hana ke kai he fakaako ke he tau tagata tokologa. Ne kitia e Iesu e lata ma e tau tutaki hana ke “okioki fakatote ai,” ati o atu a lautolu ke he matakavi tokanoa. Ka e tokologa e tagata ne feoaki ai mo lautolu ti tatali atu ki a lautolu. Fefe e tali atu hau ane mai ko koe he tuaga a Iesu? ‘Ne hohofi e fakaalofa a Iesu ki a lautolu’ ti “kamata ai a ia ke fakaako a lautolu ke he tau mena loga.” (Mareko 6:30-34) Ko e logonaaga malolo nei he fakaalofa ne omoi a ia ke lagomatai e falu.

Ko e lagomatai ne taute e Iesu ma e falu ne nakai ni fakakaupa ke he tau fakaakoaga fakaagaga. Ne foaki foki e ia e lagomataiaga fakatino. Ma e fakatai, ne fagai e ia e tau tagata tane 5,000 (lafi ki ai e tau fifine mo e tau fanau) ne fanogonogo ki a ia ato hoko ke he aho hake. Ne fagai foki e ia e 4,000 he taha magaaho fakamui. He magahala fakamua atu, ne foaki e ia lima e areto mo e ua e ika mo e, he magaaho fakamui, fitu e areto mo e tau ika ikiiki gahoa. (Mataio 14:14-21; 15:32-38; Mareko 6:35-44; 8:1-9) Tau mana kia? E, ko e tagata taute mana a ia.

Ne fakamalolo foki e Iesu e tokologa ne gagao. Ne fakamalolo e ia e tau matapouli, kulikuli, tau lepela, mo e teliga tuli. Ti fakaliu tu mai foki e ia a lautolu kua mamate! (Luka 7:22; Ioane 11:30-45) Taha magaaho, ne fina atu e lepela ki a ia: “Kaeke kua finagalo a koe ki ai, kua maeke ni ia koe ke fakamea au.” Fefe e tali a Iesu? “Kua fakaolo atu hana a lima, kua piki atu kia ia, mo e tala age ki ai, Mena loto au ki ai; kia mea a koe.” (Mareko 1:40, 41) Ne omoi a Iesu he manako malolo ke lagomatai a lautolu. Puhala mai he tau mana pihia, ne fakatata e ia hana fakaalofa ma lautolu ne matematekelea.

Uka kia ke talitonu? Ka e taute e Iesu e laulahi he hana tau mana he toloaga. Ti pihia foki e tau tagata totoko hana ne lali ke kumi kelea ki a ia he tau magaaho oti, ne nakai fakatikai e moli he tau mana ne taute e ia. (Ioane 9:1-34) Kua fai kakano moli e tau mana hana. Ne lagomatai ai e tau tagata ke kitia a Iesu ko ia ne fakafano mai he Atua.—Ioane 6:14.

He ono fakaku ke he tau fakaakoaga a Iesu mo e moui hana kua uho a ia ki a tautolu ti omoi a tautolu ke manako ke fifitaki hana fakaalofa. Ka e, nakai ko e puhala ni a ia kua maeke ia Iesu ke lauia hau a moui. Nakai ni ko e faiaoga ne mua a ia ne fakaako e fakaalofa. Ne fakakite e ia na moui fakamua a ia ko e Tama fuataha hokoia he Atua. (Ioane 1:14; 3:16; 8:58; 17:5; 1 Ioane 4:9) Na fakafano mai foki a ia fakatino tagata, ne kua fakamahomo atu a ia ki a koe. Kua fakakite he Tohi Tapu ne fakatu mai a Iesu mo e kua eke a ia mogonei mo Patuiki he Kautu he Atua. (Fakakiteaga 11:15) Ne pehe a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3; 20:31) Moli, ko e uta e iloilo ha Iesu Keriso kua kakano ko e moui nakai fai fakaotiaga he Parataiso! Maeke fefe e mena ia? He ha he nakai ako fakalahi hagaao ki a Iesu ti kitia ai “kua omoomoi a [t]autolu he fakaalofa a Keriso” ke fifitaki ki a ia? (2 Korinito 5:14) To fiafia e Tau Fakamoli a Iehova ke lagomatai a koe.—Ioane 13:34, 35.

Ane mai kua kehe e mena ne fakakite, ne moua mai e tau fatiaga kupu Tohi Tapu oti kana he Tohi Tapu Niue.