Ko Hai e Tau Fi he Atua?

Ko e fi ne mua he Atua ko Satani ko e Tiapolo. Ko e mena moui fakaagaga a ia ne totoko ki a Iehova. Kua fakatumau a Satani ke tau ke he Atua mo e fakatupu e tau kelea lalahi ma e tau tagata. Kua kelea muikau a Satani. Ko e pikopiko mo e ko e kelipopo tagata a ia.—Ioane 8:44.

Kua fakalataha falu mena moui fakaagaga mo Satani ke he hana totokoaga ke he Atua. Kua fakahigoa he Tohi Tapu a lautolu ko e tau temoni. Tuga a Satani, ko e tau temoni e tau fi he tau tagata. Kua manako a lautolu ke fakamamahi e tau tagata. (Mataio 9:32, 33; 12:22) To moumou tukulagi e Iehova a Satani mo e tau temoni hana. Tote maka ni e magaaho ne toe ma lautolu ke taute kelea ma e tau tagata.—Fakakiteaga 12:12.

Ka manako a koe mo kapitiga he Atua, kua nakai lata ia koe ke taute e mena kua manako a Satani ke taute e koe. Kua vihiatia e Satani mo e tau temoni a Iehova. Ko e tau fi he Atua a lautolu, ti manako a lautolu ke taute a koe mo fi he Atua. Kua lata ia koe ke fifili ko hai hau ka fakafiafia—ko Satani po ko Iehova. Ka manako a koe ke he moui tukulagi, kua lata ia koe ke fifili ke taute e finagalo he Atua. Loga lahi e tau lagatau mo e tau puhala ha Satani ke fakavaia aki e tau tagata. Laulahi he tau tagata ne fakapouli e ia.—Fakakiteaga 12:9.