Ke Fakatumau e Kapitiga, kua Lata ia Koe ke Kapitiga

Fakave e kapitiga ke he fakaalofa. Ko e lahi e ako hau ki a Iehova, to lahi atu foki e fakaalofa hau ma hana. He tupu e fakaalofa hau ma e Atua, to tupu foki e manako hau ke fekafekau ki a ia. Kua omoi he mena nei a koe ke eke mo tutaki ha Iesu Keriso. (Mataio 28:19) He fakalataha ke he magafaoa fiafia he Tau Fakamoli a Iehova, kua moua e koe e Atua mo kapitiga tukulagi. Ko e heigoa hau kua lata ke taute?

Kua lata ia koe ke fakakite e fakaalofa ma e Atua he omaoma hana tau fakatufono. “Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”—1 Ioane 5:3.

Fakagahua e mena kua ako e koe. Ne talahau e Iesu e tala nukua fakatai aki e mena nei. Kua ati he tagata pulotu hana fale he mena patu. Kua ati he tagata goagoa hana fale he oneone. He to e afa lahi, ne mauokafua e fale ne ati he mena patu, ka kua maona ki lalo e fale ne ati he oneone. Kua pehe a Iesu ko lautolu ne logona hana tau fakaakoaga mo e fakagahua ai nukua tuga e tagata pulotu ne ati he mena patu. Ka ko lautolu kua logona hana tau fakaakoaga mo e nakai fakagahua ai nukua tuga e tagata goagoa ne ati ke he oneone. Manako a koe ke tuga e tagata fe?—Mataio 7:24-27.

Tukuleleaga. Kua kakano e mena nei kia fina atu a koe ki a Iehova he liogi mo e tala age ki a ia kua manako a koe ke taute tukulagi hana finagalo. Ko e taute e finagalo he Atua kua fakakite ko e tutaki ha Iesu Keriso a koe.—Mataio 11:29.

Papatisoaga. “Papatiso a koe, mo e holoholo kehe hau a tau hala, mo e ui atu ke he higoa he Iki.”—Gahua 22:16.

Kia putoia katoatoa he fekafekau ke he Atua. “Ko e tau mena oti foki kua eke e mutolu kia eke mo e loto, tuga ne eke ke he Iki, ka e nakai ke he tau tagata.”—Kolose 3:23.