Tau Tala he Kautu Nu. 37

Ko e Fekau ke he Lalolagi Katoa

Kua Tata e Fakaotiaga he Lotu Fakavai!

▪ Ko e heigoa e lotu fakavai?

▪ To fēfē haana fakaotiaga?

▪ To lauia fēfē a koe?

Ko e heigoa e lotu fakavai?

Kua tupetupe kia a koe ha ko e kolokolovao ne taute ke he higoa he lotu? Kua fakamamahi kia he felakutaki, fakamatakutaku, mo e matahavala e logonaaga tonu haau? Ko e ha e lotu ne tuga ko e punaaga he tau lekua loga?

Ko e tukumale kua fakavē, nakai ke he tau lotu oti, ka ko e lotu fakavai. Ko e tagata lilifu fakalotu talahaua ko Iesu Keriso, ne fakakite ko e lotu fakavai ne fakatupu e tau gahua kelea, tuga ni e “tau akau kelea kua fua mai e tau fua kelea.” (Mataio 7:15-17) Ko e heigoa e tau fua ne moua mai he lotu fakavai?

Ko e Lotu Fakavai . . .

◼ NE PUTOIA KE HE FELAKUTAKI MO E POLITIKA: “I Asia mo e falu matakavi,” ne talahau he senolo Asiaweek, “kua fakavaia kelea he tau takitaki to vevele ke he pule e tau manatu fakalotu he tau tagata ke felauaki mo e tau manako he tau takitaki.” Ti ko e fua, ne hataki he senolo: “Kua hagahagakelea e lalolagi ke teitei vikoia.” Ne fakapuloa he takitaki lotu talahaua he tau Faahi Kaufakalataha: “Kia kelipopo e tau tagata fakamatakutaku ke nakai liliu a lautolu ke kelipopo tagata.” Ko e tali haana? “Tamate oti a lautolu ke he higoa he Iki.” Ka e, pehē e Tohi Tapu: “Kaeke ke pehe age taha, Kua fakaalofa au ke he Atua, ka e vihiatia e ia hana matakainaga, ko e pikopiko a ia.” (1 Ioane 4:20) Pehē foki a Iesu: “Kia fakaalofa atu a mutolu kia lautolu kua fai fi kia mutolu.” (Mataio 5:44) Fai lotu nakai he manatu e koe ne o e tau tagata ke he felakutaki?

◼ NE FAKAHOLOFA E FAKAAKOAGA FAKAVAI: Laulahi he tau lotu ne fakaako ko e solu po ke agaaga ko e vala nakai kitia he tagata ne moui agaia he mole e mate haana. Kakano he fakaakoaga nei, loga e lotu ne fakaaoga hehē e tau tagata ha lautolu, he totogi tupe ke liogi ma e tagata mate. Ka e, nakai pihia e fakaakoaga he Tohi Tapu. “Ko e tagata [“solu,” NW] kua hala to mate a ia.” (Esekielu 18:4) “Ha ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena.” (Fakamatalaaga 9:5) Ne fakaako e Iesu to liu tutū mai a lautolu ne mamate—to nakai aoga e mena nei ane momoui agaia e tau solu he mole e mamate. (Ioane 11:11-25) Fakaako kia he lotu haau to nakai mate e solu?

◼ NE FAKAATĀ E MAHANI KELEA FAKATAANE MO E FIFINE: He tau motu he Faahi Lalo, ne fakagofua he tau matakau lotu e taane ne nofo mo e taane mo e fifine ne nofo mo e fifine ke eke mo tau akoako ti ole ke he tau fakatufono ke talia e tau fakamauaga pihia. Pihia foki e tau lotu ne nakai talia e mahani feuaki ne fakaatā e tau takitaki lotu ne fakakelea e tau fanau ke he mahani fakataane mo e fifine. Ko e heigoa mogoia ne fakaako he Tohi Tapu? Kua talahau fakatonu: “Aua neke fakahehe ai a mutolu; ko e tau tagata feuaki, mo lautolu kua hufeilo ke he tau tupua, mo lautolu kua faivao, mo lautolu kua fakakelea e lautolu a lautolu, mo lautolu kua eke e mahani Sotoma . . . nakai moua e lautolu nā e kautu he Atua.” (1 Korinito 6:9, 10) Iloa nakai e koe e tau lotu ne nakai talia e mahani kelea fakataane mo e fifine?

Ko e heigoa e fakaotiaga anoiha he tau lotu ne tupu mai e tau fua kelea? Ne hataki e Iesu: “Ko e tau akau oti kua nakai fua mai e tau fua mitaki, to hio ni mo e tolo ke he afi.” (Mataio 7:19) E, to utakehe mo e moumou e lotu fakavai! Ka e fēfē mo e he magaaho fe ka hoko e mena nei? Ko e fakakiteaga fakaperofeta ne fakamau he tohi a Fakakiteaga veveheaga 17 mo e 18, ka foaki e tali.

To fēfē e fakaotiaga he lotu fakavai?

Manamanatu ke he fakatino nei. Ko e fifine fakataka ne nofo he tua he manu favale matakutakuina. Fitu e ulu mo e hogofulu e hoe he manu favale. (Fakakiteaga 17:1-4) Ko hai ne hukui he fifine fakataka? Ne fakaohooho e ia e “pule ke he tau patuiki he lalolagi.” Ne tui a ia he tapulu kula uhi, fakaaoga e tau mena manogi, mo e monuina lahi mahaki. Lafi ki ai, ha ko e haana a tau gahua fakataulaatua, “kua fakahehe ai e tau motu oti kana.” (Fakakiteaga 17:18; 18:12, 13, 23) Kua lagomatai he Tohi Tapu a tautolu ke kitia ko e fifine fakataka nei ko e fakatokatokaaga fakalotu he lalolagi katoa. Ne fakatino e ia, nakai taha ni e lotu, ka ko e tau lotu oti ne moua mai e tau fua kelea.

Ko e manu favale ne heke ai e fifine fakataka ne fakatino mai e tau pule fakapolitika he lalolagi.a (Fakakiteaga 17:10-13) Ne heke e lotu fakavai he tua he manu favale fakapolitika nei, mo e lali ke fakaohooho e tau fifiliaga mo e pule ke he takitakiaga fakapolitika.

Nakai leva, to fai mena ofoofogia ka tupu. “Ko e tau hoe foki ne hogofulu ne kitia e koe ke he manu favale, to fakavihia e lautolu e fifine fakataka mo e moumou a ia, mo e uta kehe hana tau tapulu, to kai foki e lautolu hana tino, mo e huhunu a ia ke he afi.” (Fakakiteaga 17:16) Ati fuluhi fakalutukia ai e tau pule fakapolitika he lalolagi ke he lotu fakavai mo e moumou katoatoa ai! Ko e heigoa ka fakalagalaga e mena nei? Kua tali he tohi ha Fakakiteaga: “Kua tuku atu he Atua ke he tau loto ha lautolu ke eke hana finagalo.” (Fakakiteaga 17:17) E, to fai fakalagoaga e lotu fakavai ke he Atua ha ko e tau gahua kelea muitui ne taute ai ke he higoa haana. He fakafili tonu mitaki katoatoa, to fakaaoga e Ia e tau matakau fakapolitika he lotu fakavai ke moumou aki.

Ko e heigoa kua lata ke taute e koe kaeke ke nakai manako a koe ke fakalataha ke he malaia he lotu fakavai? “Haku motu na e, ati o kehe ā mutolu ia ia,” he hataki he uta fekau he Atua. (Fakakiteaga 18:4) Mooli, ko e magaaho anei ke fehola kehe mai he lotu fakavai! Mena fe mogoia ka hola a koe ki ai? Nakai ke he fakaakoaga mena ai fai Atua, ha kua ataata ai foki e vahā anoiha. (2 Tesalonia 1:6-9) Ko e huaga ni haia he lotu mooli. Kitia fēfē e koe e lotu mooli?

Puhala ke kitia e lotu mooli

Ko e heigoa e fua mitaki ka moua mai he lotu mooli?—Mataio 7:17.

Ko e Lotu Mooli . . .

◼ NE FAKAGAHUA E FAKAALOFA: Ne “nakai ko e tau tagata he lalolagi” e tau tagata tapuaki mooli, ti nakai vevehe he lanu po ke aga fakamotu, ka kua ‘fakafeofanaki’ ai. (Ioane 13:35; 17:16; Gahua 10:34, 35) He nakai fekeliaki, kua makai a lautolu ke mamate ma e falu.—1 Ioane 3:16.

◼ NE FALANAKI KE HE KUPU HE ATUA: He nakai fakaako ke he “tau kupu toka tuai” mo e “tau poaki he tau tagata,” kua fakavē e fakaakoaga he lotu mooli ke he Kupu he Atua, ko e Tohi Tapu. (Mataio 15:6-9) Ko e ha? Ha ko e “tau Tohi Tapu oti kana mai he [a]gaga he Atua ia, kua aoga ni ke fakaako ai, ke fakatonu ai, ke akonaki ai.”—2 Timoteo 3:16.

◼ NE FAKAMALOLŌ E TAU MAGAFAOA MO E TAOFI E TAU TUTUAGA MAHANI MITAKI: Kua fakaako he lotu mooli e tau taane ke ‘fakaalofa ke he tau hoana ha lautolu, tuga e tau tino ha lautolu,’ kua lagomatai e tau hoana ke feaki ‘e fakalilifu ke he ha lautolu a tau taane,’ ti fakaako e tau fanau ke ‘omaoma ke he tau matua ha lautolu.’ (Efeso 5:28, 33; 6:1) Pihia foki ki a lautolu ne ha ha ai he tau tuaga maukotofa nukua lata ke moua e tau mahani mitaki lahi.—1 Timoteo 3:1-10.

Fai lotu nakai ne tatai mo e tau tutuaga nei? Kua pehē e tohi Holocaust Politics, ne taute fakailoa he 2001: “Ane mai tokologa e tau tagata ne muitua e tau puhala ne fakamatala mo e taute he Tau Fakamoli a Iehova, a po kua nakai tupu e Kelipopoaga Lahi mo e nakai liu e lalolagi ke lauia he tamate fakamatakau.”

Ke he 235 e motu, ne nakai ni fakamatala he Tau Fakamoli a Iehova e tau tutuaga he mahani mitaki he Tohi Tapu—ka e fakagahua foki e lautolu. Ne fakamalolō e mautolu a koe ke ole ke he Tau Fakamoli a Iehova ma e lagomatai ke fakaako e mena ne manako e Atua ke taute e koe ke maeke ke talia e ia e tapuakiaga haau. Taute ā mogonei. Ua fakamule. Kua tata e fakaotiaga he lotu fakavai!—Sefanaia 2:2, 3.

Ka manako a koe ke moua foki falu fakailoaaga ke he fekau ne fakavē ke he Tohi Tapu ne fakamatala he Tau Fakamoli a Iehova, kia atāina he matutaki atu ki a lautolu he kaina i lalo.

□ Nakai fai maveheaga, manako au ke moua e lagaki he porosua Kia Mataala!

□ Fakamolemole fakailoa mai ki a au hagaao ke he fakaakoaga Tohi Tapu nakai totogi he kaina.

[Matahui Tala]

[Blurb he lau 3]

Ne fakaohooho he lotu fakavai e “pule ke he tau patuiki he lalolagi”

[Blurb he lau 3]

“Haku motu na e, ati o kehe ā mutolu ia ia”