Kua Fakamatala Fēfē e Tala Mitaki?

Puhala he Kautu ha Iehova, to nakai leva ti utakehe e ia e tau lekua oti ha tautolu. Ko e tala mitaki anei ti nakai lata ke toka ni ki a tautolu. Manako a Iesu ke he tau tutaki haana ke tala age e fekau nei ke he tau tagata oti! (Mataio 28:19, 20) Tali atu fēfē e Tau Fakamoli a Iehova ke he poakiaga ha Iesu?

1. Fakamooli fēfē e Mataio 24:14 he vahā nei?

Talahau tuai e Iesu: “To fakamatala atu foki e tala mitaki nai he kautu ke he lalolagi oti.” (Mataio 24:14) Fiafia e Tau Fakamoli a Iehova ke taute e gahua aoga lahi nei. Hane fakamatala e tautolu e tala mitaki ke he lalolagi katoa ke molea e 1,000 vagahau! Ko e gahua makimaki anei kua lata ke fakatokatoka fakamitaki. Ti nakai maeke ke taute ka noa mo e lagomatai ha Iehova.

2. Ko e heigoa e tau laliaga kua taute e tautolu ke fakamatala ke he tau tagata?

Fakamatala a tautolu he ha mena kua moua ai e tau tagata. Tuga e tau Kerisiano he senetenari fakamua, fakamatala a tautolu mai he “taha fale . . . mo e taha fale.” (Gahua 5:42) Ko e puhala fakatokatoka nei ati maeke a tautolu ke hokotia ke he tau tagata tokologa he tau tau takitaha. Ha kua nakai haia tumau e tau tagata he tau kaina, fakamatala foki a tautolu he tau toloaga tagata. Kumi puhala tumau a tautolu ke tala age ke he falu hagaao ki a Iehova mo e finagalo haana.

3. Ha hai e matagahua ke fakamatala e tala mitaki?

Ko e tau Kerisiano mooli oti kua moua e matagahua ke tala age e tala mitaki ke he falu. Uta fakahokulo e tautolu e matagahua nei. Fakamatala fakalahi a tautolu ha kua mailoga kua lata ke fakamomoui e tau tagata. (Totou 1 Timoteo 4:16.) Nakai totogi a tautolu ke taute e gahua nei, he pehē e Tohi Tapu: “Kua moua noa e mutolu, kia foaki noa atu e mutolu.” (Mataio 10:7, 8) Nakai talia he tau tagata oti e fekau ha tautolu. Ka e matutaki a tautolu ha ko e gahua fakamatala ko e vala he tapuakiaga ha tautolu ti fakafiafia foki a Iehova.

KUMIKUMI FAKAHOKULO

4. Gahua malolō a tautolu ke hokotia ke he tau tagata oti

VITIŌ: Fakamatala “he Hoko Ni ke he Fakaotiaga he Lalolagi” (7:33)

• Ko e heigoa kua nava a koe ke he gahua he Tau Fakamoli a Iehova ke fakamatala?

Totou Mataio 22:39 mo e Roma 10:13-15, ti tutala ke he tau hūhū nei:

• Fakakite fēfē he gahua fakamatala ha tautolu kua fakaalofa a tautolu ke he tau katofia?

• Fēfē e logonaaga ha Iehova ki a lautolu kua fakamatala e tala mitaki?​—Kikite e kupu 15.

5. Ko tautolu ko e tau ekegahua he Atua

Loga e tau mena tutupu ne fakakite kua takitaki e Iehova e gahua ha tautolu. Ma e fakatai, ko e matakainaga taane ko Paul i Niu Silani ne feleveia mo e fifine he gahua fakamatala he taha afiafi. He mogo pogipogi he aho ia, liogi e fifine ke he Atua he fakaaoga e higoa he Atua ko Iehova mo e ole ke fai tagata ke ahiahi age ki a ia. “Tolu e tulā he mole,” he ui e Paul, “ne hoko atu au ke he gutuhala haana.”

Totou 1 Korinito 3:9, ti tutala ke he hūhū nei:

• Fakakite fēfē he tau mena tutupu tuga i Niu Silani kua takitaki e Iehova e gahua fakamatala?

Totou Gahua 1:8, ti tutala ke he hūhū nei:

• Ko e ha kua lata ke moua e lagomatai ha Iehova ke taute e gahua fakamatala ha tautolu?

Iloa nakai e koe?

He tau feleveiaaga ha tautolu he tau faahi tapu takitaha, fakamahani a tautolu ke iloa e puhala ke fakamatala. Ka fina atu a koe ke he taha he tau feleveiaaga nei, fēfē e manatu haau ke he fakamahani?

6. Omaoma a tautolu ke he poakiaga he Atua ke fakamatala

He senetenari fakamua, lali e tau tagata totoko ke taofi e tau tutaki ha Iesu he fakamatala. Lalago he tau Kerisiano fakamua atu e tonuhia ha lautolu ke fakamatala he “fakatonu atu katoa mo e . . . fakamoli ke he vagahau mitaki.” (Filipi 1:7) Taute pihia foki he Tau Fakamoli a Iehova he vahā nei.a

VITIŌ: Fakatonu Atu mo e Fakamoli e Tala Mitaki (2:28)

Totou Gahua 5:27-42, ti tutala ke he hūhū nei:

• Ko e ha ka nakai oti e fakamatala ha tautolu?​—Kikite e kupu 29, 38, mo e 39.

MANATU KATOA

Fakaako e Iesu e tau tutaki haana ke fakamatala e tala mitaki ke he tau motu oti. Lagomatai e Iehova e tau tagata haana ke taute e gahua nei.

Liu Fakamanatu

• Kua fakamatala fēfē e tala mitaki ke he lalolagi katoa?

• Fakakite fēfē he gahua fakamatala kua fakaalofa a tautolu ke he tau katofia?

• Manatu kia a koe ko e gahua fakamatala ko e gahua fiafia? Ko e ha?

KUMI FOKI

Kitia e puhala kua fakamatala e Tau Fakamoli a Iehova ke he tau tagata he tau taone lalahi.

Gahua Fakamatala Pauaki he Taone Lahi i Paris (5:11)

Hokotia fēfē e Tau Fakamoli a Iehova ke he tau tagata ne fehola ke he falu motu?

Fakamakona e Fia Inu Fakaagaaga he Tau Tagata ne Fehola ke he Taha Motu (5:59)

Logona mai he taha matakainaga fekafekau mau e moui fiafia he fakamatala.

Fiafia Au he Fifili e Gahua Nei (6:29)

Fakaako ke he tau kautūaga he hopoaga tokoluga ne fakaholo ki mua e fakamatala he tala mitaki.

“Tau Tagata Fakamatala he Kautu ne Uta e Matakupu ha Lautolu ke he Fakafiliaga” (God’s Kingdom Rules!, veveheaga 13)