Papatiso​—Ko e Foliaga Aoga Lahi!

Fakaako e Iesu kua lata e tau Kerisiano ke papatiso. (Totou Mataio 28:19, 20.) Ka ko e heigoa e papatiso? Ti ko e heigoa he tagata kua lata ke taute ke hokotia ke he foliaga ia?

1. Ko e heigoa e papatiso?

Ko e kupu “papatiso” ne moua mai he kupu Heleni ne kakano “ke hū hifo” ki loto he vai. Magaaho ne papatiso a Iesu, ne tanumia a ia he Vailele i Ioritana ti “kua haele hake a ia he vai.” (Mareko 1:9, 10) Pihia foki, ko e tau Kerisiano mooli ne papatiso he hū hifo katoatoa, po ke tanumia ki loto he vai.

2. Ko e heigoa ne fakakite he papatiso?

He papatiso, fakakite he tagata kua tukulele a ia ki a Iehova ko e Atua. Taute fēfē he tagata e tukulele? Ato papatiso, liogi tokotaha a ia he tala age ki a Iehova e manako haana ke fekafekau tukulagi ki a Ia. Mavehe a ia ke tapuaki hokoia ni ki a Iehova mo e ko e taute e finagalo he Atua kua mua atu he moui haana. Ti kua fifili ke “aua neke omaoma a ia kia ia, . . . mo e mui” ke he tau fakaakoaga mo e fakafifitakiaga ha Iesu. (Mataio 16:24) Ko e tukulele mo e papatiso haana ati maeke a ia ke kapitiga tata mo Iehova mo e tau matakainaga.

3. Maeke fēfē e tagata ke holo atu ke papatiso?

Maeke a koe ke tauteute ke papatiso he fakaako hagaao ki a Iehova mo e atihake e tua ki a Ia. (Totou Heperu 11:6.) He tupu ki mua e maamaaga mo e tua haau, to pihia foki e fakaalofa haau ma Iehova. Ti nakai noa to manako a koe ke fakamatala hagaao ki a ia mo e moui ke he tau tuaga haana. (2 Timoteo 4:2; 1 Ioane 5:3) Ka hoko e tagata ke ‘mahani ke lata mo e Iki ko Iehova, kia fiafia mai a Ia ke he tau mena oti,’ liga fifili a ia ke tukulele e moui haana ke he Atua ti papatiso.​—Kolose 1:9, 10.a

KUMIKUMI FAKAHOKULO

4. Maeke a tautolu ke fakaako mai he papatiso ha Iesu

Totou Mataio 3:13-17 ke iloa falu vala tala ke he papatiso ha Iesu. Ti tutala ke he tau hūhū nei:

• Ko e tama mukemuke kia a Iesu he mogo ne papatiso ai?

• Papatiso fēfē a ia? Fuifui aki kia e vala vai?

Kamata e gahua pauaki ha Iesu ne age he Atua ke taute he lalolagi he mogo ne papatiso ai. Totou Luka 3:21-23 mo e Ioane 6:38, ti tutala ke he hūhū nei:

• He mole e papatiso ha Iesu, ko e heigoa e gahua ne tuku fakamua e ia he moui haana?

5. Ko e papatiso ko e foliaga kua maeke ke moua

Ko e manatu ke tukulele mo e papatiso kua tuga na lahi mahaki he mogo fakamua. Ka e maeke a koe ke holo ki mua ti mauokafua ke taute e fifiliaga aoga ia. Ke kitia e falu tagata ne taute pihia, tā e VITIŌ.

VITIŌ: Atihake e Fakafetuiaga mo Iehova (1:11)

Totou Ioane 17:3 mo e Iakopo 1:5, ti tutala ke he hūhū nei:

• Ko e heigoa ka lagomatai e tagata ke mautali ke papatiso?

1. A. Taute e tautolu e tukulele he tala age ki a Iehova kua manako a tautolu ke fekafekau tukulagi ki a Ia

2. E. He papatiso ai, fakakite e tautolu ke he falu kua fitā a tautolu he tukulele ke he Atua

6. Kakano he papatiso ke eke mo vala he magafaoa ha Iehova

Ka papatiso a tautolu, to eke a tautolu mo vala he magafaoa kaufakalataha he lalolagi katoa. Pete kua o mai a tautolu he tau matakavi mo e tau feakiaga kehekehe, tatai e tau taofiaga ha tautolu mo e kua momoui fakatatau ke he mahani mitaki. Totou Salamo 25:14 mo e 1 Peteru 2:17, ti tutala ke he hūhū nei:

• Lauia fēfē e fakafetuiaga he tagata mo Iehova mo e falu ne tapuaki ki a Ia ha ko e papatiso?

MANATU KATOA

Fakaako e Iesu kua lata e tau Kerisiano ke papatiso. Ke hokotia ke he foliaga ia, lata e tagata ke atihake e tua malolō ki a Iehova, moui ke he tau tuaga Haana, mo e tukulele e moui ki a Ia.

Liu Fakamanatu

• Ko e heigoa e papatiso, ti ko e ha kua aoga ai?

• Matutaki fēfē e tukulele mo e papatiso?

• Ko e heigoa e tau lakaaga ne takitaki ke he tukulele mo e papatiso?

KUMI FOKI

Fakaako ko e heigoa e papatiso mo e ko e heigoa ne nakai ko e papatiso.

“Ko e Heigoa e Papatiso?” (Vala tala he kupega hila)

Liu fakamanatu e tau puhala kua maeke e tagata ke holo atu ke papatiso.

“Fakaalofa mo e Fakaaue ki a Iehova kua Takitaki ke he Papatiso” (Ko e Kolo Toko, Mati 2020)

Totou ke he puhala ne fakavē e fifiliaga he taha tagata ke papatiso.

“Manako a Laua ki a Au ke Kitia Mitaki e Au e Kupu Mooli” (Ko e Kolo Toko, Mati-Aperila 2013)

Manamanatu ke he kakano ko e papatiso ko e foliaga aoga lahi mo e puhala ka tauteute a koe ke papatiso.

“Lata Nakai Au ke Papatiso?” (Questions Young People Ask ​—Answers That Work, Volume 2, veveheaga 37)