Ko e Heigoa ka Tupu ki a Tautolu ka Mamate?

Kua fai fakahele nakai a koe ne kua mate? He magaaho mamahi lahi ia, liga manamanatu a koe: ‘Ko e heigoa ka tupu ki a tautolu ka mamate? Fai amaamanakiaga nakai to liu a tautolu ke kitia e tau fakahele ha tautolu?’ He fakaakoaga nei mo e fakaakoaga ka mui mai, manamanatu ke he tau tali mafanatia he Tohi Tapu.

1. Ko e heigoa ka tupu ki a tautolu ka mamate?

Fakatatai e Iesu e mate ke he mohe pulumohea. Ko e tagata ne mohe pulumohea kua nakai mailoga e tau mena ne tutupu viko ia ia. Tatai fēfē e mate ke he mohe? Ka mole e mate he tagata, nakai logona e ia e mamahi. Nakai matimati a ia, pete he fakaalofa lahi a ia ke he tau kapitiga mo e magafaoa haana. “Ko lautolu ne mamate nakai iloa e lautolu ha mena,” he talahau he Tohi Tapu.​—Totou Fakamatalaaga 9:5.

2. Aoga fēfē ki a tautolu he iloa e tala mooli ke he mate?

Tokologa e tagata ne matakutaku ke he mate, mo e ki a lautolu foki ne kua mamate! Ka e maeke a koe ke mafanatia ke he talahauaga he Tohi Tapu hagaao ke he mate. Pehē a Iesu: “Ko e mena moli foki ke toka noa ai a mutolu.” (Ioane 8:32) Kehe mai he talahauaga he falu lotu, kua nakai fakaako he Tohi Tapu na fai vala e tagata ne moui he mole e mate. Ti nakai fai tagata ka matematekelea he mole e mate. Kua nakai iloa e lautolu ne mamate ha mena, ti nakai maeke a lautolu ke fakamamahi a tautolu. Ti nakai lata ke fakafiafia po ke tapuaki ki a lautolu ne kua mamate, nakai lata foki ke liogi ma lautolu ia.

Pehē falu tagata na maeke a lautolu ke matutaki mo lautolu ne kua mamate. Ka e nakai maeke e mena nei. Tuga ne fakaako laia e tautolu, ko lautolu ne mamate kua “nakai iloa e lautolu ha mena.” Ko e tau tagata ne manatu kua matutaki a lautolu mo e tau fakahele ne mamate, kua matutaki mooli a lautolu mo e tau temoni ne fifitaki e tau tagata ne kua mamate. He iloa e tala mooli hagaao ke he mate kua puipui a tautolu mai he tau temoni. Hataki e Iehova a tautolu ke ua lali ke matutaki mo lautolu kua mamate he iloa e ia ko e matutaki mo e tau temoni to fakamamahi a tautolu.​—Totou Teutaronome 18:10-12.

3. Iloa e tuaga mooli ha lautolu ne kua mamate

He lalolagi katoa, kehekehe e tau taofiaga he tau tagata ke he mena ka tupu ka mamate a tautolu. Ka e nakai mooli e tau taofiaga oti ia.

• Ko e heigoa e tau taofiaga aga mau he matakavi haau ke he tuaga ha lautolu ne kua mamate?

VITIŌ: Ko e Heigoa e Tuaga ha Lautolu kua Mamate? ​—Vitiō Kū (1:19)

Totou Fakamatalaaga 3:20, ti tutala ke he tau hūhū nei:

• He kupu nei, ko e heigoa ka tupu ka mate e tagata?

• Fai vala nakai e tagata ne moui he mole e mate?

Tala mai he Tohi Tapu hagaao ke he mate ha Lasalo, ko e kapitiga tata ha Iesu. He totou Ioane 11:11-14, mailoga e talahauaga ha Iesu hagaao ke he tuaga ha Lasalo. Ti tutala ke he tau hūhū nei:

• Fakatatai e Iesu e mate ke he heigoa?

• Ko e heigoa he fakatataiaga nei kua tala mai ki a tautolu hagaao ke he tuaga ha lautolu ne kua mamate?

• Fēfē e logonaaga haau ke he talahauaga he Tohi Tapu hagaao ke he mate?

4. Aoga ki a tautolu e tala mooli hagaao ke he mate

He iloa e tala mooli ke he mate kua fakatokanoa a tautolu mai he matakutaku ki a lautolu ne kua mamate. Totou Fakamatalaaga 9:10, ti tutala ke he hūhū nei:

• Maeke nakai a lautolu ne kua mamate ke fakamamahi a tautolu?

Puipui he tala mooli he Tohi Tapu a tautolu mai he taofiaga kua lata a lautolu ne kua mamate ke fakafiafia po ke tapuaki ki ai. Totou Isaia 8:19 mo e Fakakiteaga 4:11, ti tutala ke he hūhū nei:

• Fēfē e logonaaga ha Iehova he manatu e koe ke he tagata ne tapuaki po ke kumi lagomatai ke he taha ne kua mate?

5. Mafanatia a tautolu he tala mooli hagaao ke he mate

Tokologa e tagata ne fakaako ki ai ka mamate a lautolu to matematekelea ha ko e tau hehē fakamua ha lautolu. Ka e mafanatia a tautolu he iloa kua nakai fai tagata ne matematekelea he mole e mate, pihia foki mo e tagata ne taute e tau mena ne mua atu e kelea. Totou Roma 6:7, ti tutala ke he hūhū nei:

• Tuga ne totou e tautolu he Tohi Tapu, ka mate kua tokanoa e tagata mai he agahala, ti manatu nakai a koe kua fai tagata ne mate hane matematekelea ha ko e tau agahala kua mole?

Ka iloa lahi e tautolu a Iehova, ti mailoga foki e tautolu kua nakai fakaatā e ia a lautolu ne mamate ke matematekelea. Totou Teutaronome 32:4 mo e 1 Ioane 4:8, ti tutala ke he tau hūhū nei:

• Talia kia he Atua ne ha ha i ai e tau mahani ne totoku mai he tau kupu tohi nei ke fakahala a lautolu ne kua mamate?

• Mafanatia nakai a koe he tala mooli hagaao ke he mate? Ko e ha?

MANATU KATOA

Ka mate e tagata, kua fakaoti tuai e moui haana. Nakai matematekelea a lautolu ne kua mamate ti nakai maeke a lautolu ke fakamamahi e tau tagata momoui.

Liu Fakamanatu

• Ko e heigoa ka tupu ki a tautolu ka mamate?

• Aoga fēfē ki a tautolu e tala mooli ke he mate?

• Mafanatia fēfē a tautolu he tala mooli hagaao ke he mate?

KUMI FOKI

Kitia e kakano mooli he kupu “soul” i loto he Tohi Tapu.

“What Is the Soul?” (Vala tala he kupega hila)

Kumikumi ke iloa na fakaaoga nakai he Atua e afi tote ke fakahala e tau tagata kelea.

Ko e Matakavi Fakakikiveka Mooli Kia e Afi Tote? (3:07)

Lata nakai a tautolu ke matakutaku ia lautolu ne kua mamate?

Tau Agaaga he Tau Tagata Mamate​—Lagomatai Nakai e Lautolu a Koe po ke Fakamamahi a Koe? Gahuahua Mooli Nakai a Lautolu? (porosua)

Totou ke he puhala ne mafanatia e taha tagata he iloa e ia e tala mooli ke he mena ka tupu ki a tautolu ka mamate.

“Nava Au ke he Tau Tali Maaliali mo e Maama he Tohi Tapu” (Vala tala he Kolo Toko)