Tau Fekafekau Fuata he tau Vaha he Tohi Tapu

KUA talahau mai he Tohi Tapu tokologa e tau tagata fuata mitaki ne nakai taute fakateaga e lautolu e fekafekauaga ke he Atua mo e kua moua e lautolu e monuina lahi he taute pihia. Kaeke ko e tau fuata a tautolu, poke fuakau mo e ulu hina, ko e tau fakatai mitaki a nei he Tohi Tapu kua maeke ke foaki fakalahi mai e tau fakamaloloaga.

Ne hogofulumafitu ni e tau tau he moui ha Iosefa he magaaho ne fakafua a ia ke fakatupa ki Aikupito. He kavi ia, kua mamao lahi ke he hana magafaoa, mo e galo ki a lautolu ne iloa a ia, ne fakakite e Iosefa hana a fakamoli. He magaaho ne lali e hoana ha Potifara ke fakataki a Iosefa, ne pehe a ia: “To maeke fefe ia au ke eke e mena kelea lahi ia mo e hala au ke he Atua?” Pihia foki ni ki mua he iki lahi ko Farao, ko e patuiki malolo lahi mahaki he tau aho hana, ne kuku e Iosefa e magaaho ia ke tuku atu ke he Atua e fakahekeaga ma e fakaliliuaga he tau miti ha Farao. Ne lahi mahaki hana monuina ne moua. Ne fakaaoga he Atua a ia ke fakahao auloa e tau Aikupito mo e hana magafaoa mai he mamate ha ko e hoge mo e tahifo hana a matua tane, ko Iakopo, mo e hana magafaoa ki Aikupito.​—Kenese 37:2; 39:7-9; 41:15, 16, 32.

Ko Mose mo e Falu ne Fakamoli he tau Vaha Fuata

Ne uta he tama fifine ha Farao a Mose mo tama ni hana, ka e maeke he matua fifine mo e matua tane ha Mose ke fakaako a ia hagaao ke he Atua Moli. Kua pehe e Tohi Tapu, he magaaho ne lahi ai, kua “nakai maeke ai e ia ke talahau a ia ko e tama he tama fifine a Farao, Ne fifili e ia e matematekelea fakalataha mo e tau tagata he Atua, ka e nakai ko e fiafia ke he hala kua mole vave.” Ne fakaaoga he Atua a Mose ke uta kehe hana tau tagata mai i Aikupito, ke moua e Fakatufono i Sinai, mo e ke tohia e maga lahi he Tohi Tapu. Pete ni ko e fiha mo e fiha hau a tau tau he moui, kua tupu nakai hau a loto mauokafua ke fekafekau ke he Atua tuga ne taute e Mose?​—Heperu 11:23-29; Esoto 2:1-10.

Kua tala mai he tau Tohiaga Tapu ki a tautolu e “tau tama ikiiki,” ne fanogonogo fakalataha mo lautolu he kautu he magaaho ne totou e Fakatufono he Atua ke he tau Isaraela. (Teu-taronome 31:10-13) Ko “lautolu oti ne maama he fanogonogo ki ai” ne tutu he “kamata mai he maama he aho ke hoko ke he tupoulā,” ke logona e Fakatufono he tau aho a Nehemia. (Nehemia 8:1-8) Pete ni, he nakai maeke e tau kau ikiiki ke maama e tau mena oti, ka e maeke ia lautolu ke iloa ko e lata a lautolu ke fakaalofa, tapuaki, mo e omaoma ki a Iehova ko e Atua. Ko e heigoa ni hau a tau tau he moui, kua fanogonogo nakai a koe ke he tau fonoaga mo e tau toloaga ne kua fakatutala ke he Kupu he Atua? Kua iloa nakai e koe e aoga lahi ka omaoma atu ki a ia, tuga ia e tau kau ikiiki ha Isaraela?

Ko Tavita, Iosia, mo Ieremia

Ne fifili he Atua a Tavita, ko e tama fakamuiaki he tau lafu taokete ne valu, ma e fekafekau uho mo e pehe ki a ia: “Kua moua e au a Tavita e tama a Iese, ko e tagata ke lata mo e haku a loto, to eke e ia e tau mena oti kana kua manako au ki ia.” Ne fifili he Atua a ia ke eke mo “leveki mamoe” he hana a tau tagata, mo e taute e Tavita e fekafekauaga ia, mo e fakakite he magaaho taha ia hana fakaalofa ki a Iehova ke he loga e tau tau. Ne tohia e ia, loga atu he 70 e tau Salamo mo e kua eke foki a ia mo tupuna ha Iesu Keriso. Kaeke ko e fuata poke fuakau, fakaaue nakai a koe ke he tau puhala he Atua mo e taute nakai e koe e tau mena ne manako a ia ki ai, ke tuga ne taute e Tavita?​—Gahau 13:22; Salamo 78:70, 71, NW; 1 Samuela 16:10, 11; Luka 3:23, 31.

Ne kamata a Iosia ke patuiki he magaaho ne valu ni hana a tau tau he moui. Ke he magaaho he magahala ke he 15, “ka ko e fuata agaia a ia, ne kamata ai a ia ke kumi ke he Atua a Tavita hana a matua.” Ato hoko a ia ke he 20, kua kamata a Iosia ke fakapapahi e fakaholoaga totoko ke he tapuakiaga fakavai. He magaaho fakamui, ne taute e ia e faituga ke fakafou mo e liuaki mo e ati hake e ia e tapuakiaga mea ke he motu. Totou e tautolu: “Nakai o kehe a lautolu he tau aho oti hana he mumui atu a lautolu kia Iehova ko e Atua he tau matua ha lautolu.” Nakai maeke oti a tautolu ke patuiki ke tuga a Iosia, ka e maeke a tautolu ke fekafekau ke he Atua mo e mauokafua e tutuaga totoko ke he tapuakiaga fakavai, pete ni poke heigoa e tau tau he tau momoui ha tautolu.​—2 Nofoaga he Tau Patuiki 34:3, 8, 33.

Ne talage he Atua mua ue atu ki a Ieremia: “Ne iloa e au a koe ka kua nakaila eke e au a koe ke he manava; ne fakatapu e au a koe ka kua nakaila fanau mai a koe, kua kotofa e au a koe ke eke mo perofeta ke he tau motu.” Ne nakai fiafia a Ieremia ha kua tote lahi a ia ke eke mo perofeta: “Oi te fakaalofa, ko e Iki na e Iehova, kitiala, nakai iloa e au ke vagahau, ha ko e tama tote au.” Ka e tali pehe a Iehova: “Aua neke pehe mai a koe, Ko e tama tote au; ha ko e mena fano ni a koe kia lautolu oti ke fakafano atu e au a koe ki ai, ko e tau mena oti foki ke poaki atu e au kia koe to vagahau atu ai e koe.” Ne molea e 40 he tau tau ne taute e Ieremia pihia, mo e ne fia loto foki a ia ke fakaoti, ka e nakai maeke a ia ke oti. Kua “tuga ne mena ha i ai ke he haku loto e afi kaka kua puipui ai ke he haku a tau hui motua” e kupu he Atua. Kua eke na ia ke vagahau! Pete ni ko e heigoa hau a tau tau he moui, kua talaga nakai e koe e tua ne tuga ha Ieremia, fakaholo ki mua ke he fekafekauaga he Atua, tuga ne taute e ia?​—Ieremia 1:4-8; 20:9.

Ko Tanielu, Iesu, mo Timoteo

Nakai kia logona a koe ia Tanielu? Liga ko e lahi ki lalo hifo ke he 20 e tau tau a ia he magaaho ne uta ai he fakapaeaaga mo e falu “fanau” ke he kaina he iki lahi ko Nepukanesa, ko e patuiki ha Papelonia. Pete ni ko e fuata a Tanielu, ne mauokafua hana loto ke omaoma ke he Atua. Kua nakai talia e Tanielu mo e hana tau hoa ke takiva a lautolu mai he tau mena kai ne liga ke holia e tau Fakatufono he Atua poke kua tapilo he tau tapuakiaga pouliuli. Ne molea e 80 e tau tau kua nakai maueue a Tanielu, tumau ke fakamoli ti hoko ke he tapuni ke nakai talia ke oti e liogi ke he Atua, pihia ni kaeke ke liti ke he ana leona e fua ka moua e ia. Pihia nakai hau manamanatuaga nakai fakateaga ke he hau a fekafekauaga ke he Atua mo e hau a tau liogi? Kua lata a koe ke pihia.​—Tanielu 1:3, 4, 8; 6:10, 16, 22.

He hogofulu maua e tau tau he moui, kua moua ai a Iesu hane nofo he vaha loto he tau faiaoga lotu he faituga i Ierusalema, “kua fanogonogo kia lautolu, mo e hūhu mena kia lautolu. Kua ofomate a lautolu oti kana ne fanogonogo kia ia [fuata tote ko Iesu] ke he loto matala hana mo e hana tau kupu ne tali atu.” Kua fiafia nakai a koe ke he tutalaaga fakatohiaga tapu he tau tagata tane momotua he faituga, ke tuga a Iesu? Maeke nakai falu ke ofo ha ko e hau a maamaaga mo e hau a tau tali? He vaha nei, tokologa e tau Fakamoli fuata ne fakaako, fanogonogo fakamitaki, mo e gahua fakalataha ke he tau feleveiaaga Kerisiano ne lotomatala faka-Tohiaga Tapu, kua maeke ke ofo lahi ai a lautolu ne motua.​—Luka 2:42, 46, 47.

Tuga nakai a Timoteo a koe, mai he tama tote ne fakaako ke he “tau Tohi Tapu”? He magaaho he fuata tane ai, kua “talahaua a ia he tau matakainaga” kua mate ai, ua e tau fakapotopotoaga. Ne fifili he aposetolo ko Paulo a Timoteo ke o fenoga mo ia, nakai ke lau e tau kato, ka e lagomatai a Paulo ke fakaako falu. Maeke nakai ia koe ke fifili ma e tau kotofaaga pihia? Ko e hau a tau gahua ko e “talahaua” nakai ni ke he hau a fakapotopotoaga ka e pihia foki ke he falu?​—2 Timoteo 3:15; Gahua 16:1-4.

Ko e Vaha i Mua Fefe kua Fia Loto a Koe ki Ai?

Maeke nakai he tau tagata fuata he vaha nei ke maeke ke fakamoli tuga a Iosefa, Mose, Tavita mo e falu foki? E, to maeke. Moli, tokologa e tau fuata kua fiafia hokoia ni ke taute tau mena fakafiafia. Ka e ko e falu kua fakaaoga ha lautolu a vaha fuata mo e lotomatala, ke iloa e Atua mo e hana finagalo ma lautolu. Kua fakamoli e lautolu nei e perofetaaga he Tohi Tapu: “Fiafia e tau tagata hau ke foaki a lautolu ni, he aho he hau a malolo . . . ha i ai ia koe hau a matakau tagata tane fuata, tuga e tau tuluta hahau.”​—Salamo 110:3, NW.

Ko e tau tagata fuata mitaki pihia, kua fakakite e pulotu kua molea atu ke he ha lautolu a tau tau, ha kua maeke he Atua ke lagomatai a lautolu ke taute ke mitaki lahi e moui he magaaho nei ha lautolu mo e age foki ki a lautolu e mitaki lahi mahaki he vaha i mua ke he lalolagi fou ne hau. (1 Timoteo 4:8) Ka e maeke fefe he tau fuata he vaha fou nei ke fakatupu e tua ne tuga he tau fuata ne talahau mai he Tohi Tapu? Ka fia loto a koe ke iloa, kua uiina atu a mautolu ki a koe ke totou e matakupu tala “Tau Fuata Fiafia he Fekafekauaga ha Iehova,” ne kamata he lau tohi 20 he mekasini nei.

[Tau Fakatino he lau 5]

Kua nakai fakataki he muhu koloa ha Aikupito e fuata ko Mose

Ko e tama fuata ko Tavita ne kua talia ke he loto ha Iehova

[Tau Fakatino he lau 6]

Pete ni ke he logona ha Ieremia ko ia “ko e tama tote,” ka e fakamalolo a ia ke fakamatala e fekau nakai talahaua

Ke he 12 e tau tau he moui, kua fakaofo e Iesu hana tau momotua ke he hana maamaaga ke he Kupu he Atua

[Fakatino he lau 7]

I Isaraela kua fanogonogo foki e tau kau ikiiki he magaaho ne totou e Fakatufono he Atua. Pihia nakai a koe?