Taofi e Ia a Ia​—Ko e Ha ne Aoga Lahi Ai?

“Ko e ha mutolu a foaki atu ke he tauteaga ke he laliaga fakamoli, kua lafilafi atu ke he ha mutolu a tua e mahani mitaki, ke he ha mutolu a mahani mitaki e iloilo, ke he ha mutolu a iloilo e taofi e ia a ia.”​—2 PETERU 1:5, 6, NW.

1. Ko e heigoa e fakatataaga ofoofogia he taofi e ia a ia he tino ne hoko ai he senetenari ke 19 aki?

NAKAI fai fakauaua, taha mai he tau fakakiteaga he taofi he tino ne mua e ofoofogia ne foaki mai e Charles Blondin ke he vala fakahiku he senetenari ke 19 aki. Ko e talahauaga he taha hokotakiaga, ne fano laga loga a ia mai he taha fahi ke he taha fahi he Vailele To i Niagara, fakamua he 1859, ke he toua mao 340 e mita he loa mo e 50 e mita he tokoluga hake he vai. Mole atu e mena ia, ne kehekehe e tau fakatataaga he hana a malolo ke he tau magaaho ne taute e ia: pipi pouli kiki e tau mata, i loto he taga, omoi e huilapa, tui he tekeka, mo e fafa e tagata he hana a tua. He mole atu e mena ia, matakavi foki ne fakafiti he tekeka ke he toua totoho ke he 52 e mita he tokoluga mai he kelekele. Ke moua e lago tatai pihia kua lata ni ke ha ha i ai e taofi e ia a ia ke he tino kua mua ue atu. Ma e hana a tau mamahi, ne taui a Blondin aki e talahaua mo e monuina.

2. Ko e heigoa foki e falu gahua ne fakamakamaka ke ha ha i ai e taofi e ia a ia he tino?

² Ko e tokogahoa ni ne teitei ke fakafifitaki e tau fakatataaga ia, ka kua kitia maaliali tei e tautolu e aoga lahi he taofi e ia a ia he tino ke fakagahuahua e tau iloilo kua fakaako ki ai po ke ke he tau pele sipote. Tuga a nei, ko e fakatataiaga ke he makaka he tagata ta piano ko Vladimir Horowitz, ne pehe e taha tagata feua ta kofe mo e fati lologo: “Kia au ko e mena ne nava lahi au ki ai ko e manamanatuaga taofi katoatoa . . . , ko e manamanatuaga he malolo nakai tali tonu ki ai ne moua katoatoa.” Ko e taha hokotakiaga foki kia Horowitz ne tala a ia ke he “valu hogofulu hana a tau tau he mua atu e mafiti he tau matalima kua ha ha i ai e taofi mitaki katoatoa.”

3. (a) Ko e heigoa e taofi e ia a ia ne mua atu e fekafekau ki ai, mo e fakamaama fefe a ia? (e) Ko e heigoa e kakano he kupu Heleni ne fakakite mai “taofi e ia a ia” i loto he Tohi Tapu?

³ Ne lahi mahaki e malolo to moua e tau iloilo pihia. Ka e taha e mena, ko e mua atu e aoga lahi mo e fetoko he taofi e ia a ia. Ne kua fita he fakakakano ko e “taofi mai ne fakagahuahua he tagata ke he hana a tau mahani, logona hifo po ke tau manako.” Ke he tau Tohiaga Tapu Kerisiano Heleni, ko e kupu ne fakaliliu “taofi e ia a ia” he 2 Peteru 1:6 (NW) mo e falu foki, ne kua fakamaama ko e “mahani mitaki he tagata ne pule ke he hana a tau manamanatuaga mo e hana tau manako mua atu ke he hana a hula ke he tau mena he tino.” Ko e taofi e ia a ia ke he tagata tokotaha kua ui ia ko e “tapunu he tokoluga he mitaki he tagata.”

Ko e Aoga Lahi he ha e Taofi e Ia a Ia

4. Ko e heigoa e tau fua kelea ne helehele mai ha ko e nakai taofi e ia a ia?

⁴ Kua lahi mahaki e heleheleaga he nakai fai taofi e ia a ia! Loga e tau matematekelea he lalolagi he vaha nei kakano ni he nakai fai taofi e ia a ia. Moli, ko tautolu hanei he “tau aho fakahikuhiku” to ha ha i ai ‘e uka ke gahua ki ai.’ Ko e tau tagata kua “nakai taofi e ia a ia” kakano ni ha ko e lotokai, ti fakakite mai he “fakaalofa ni ke he tau mena fakafiafia ka e nakai fakaalofa ke he Atua.” (2 Timoteo 3:1-5, NW) Kua maama lahi ki a tautolu e moli he mena nei ha kua o kehe e molea he 40,000 he tau fekafekau takitokotaha mai he fakalataha atu ke he fakapotopotoaga Kerisiano ke he tau gahua he tau e kua mole, lahi ni ha ko e tau mahani hepehepe. Ke he tau mena nei kua lafi atu ke he tokologa ne akonaki ha ko e mahani feuaki he kaumahala ke taofi e ia a ia. Ti hoko foki e mena nei ke he tau momotua kua leva kua galo ha lautolu a tau kotofaaga leveki ha ko e kakano taha ia.

5. Fakamaama mai fefe e aoga he taofi e ia a ia?

⁵ Maama e aoga lahi he taofi e ia a ia he fakatai ke he motoka. Kua fa e tau hui hana ke maeke ke holo, ko e enisini malolo lahi ke holo mafiti aki e tau hui ia, mo e tau taofi ke taofi aki a lautolu. Pete ia, to ha ha i ai e matematekelea ka nakai ha ha i ha tagata he nofoa fakaholo ke fifili e viloaga he tau hui ko e fano ki fe, mafiti fefe lautolu ka fuluhi, mo e magaaho ka taofi, ke fakaaoga e taofiaga he tau hui, mitaki he fohe, la penisini, mo e tau taofi.

6. (a) Ko e heigoa e tuaga he fakaalofa ke fakagahuahua ke he taofi e ia a ia? (e) Ko e heigoa e fakatonuaga fakalaulahi atu ke toka loto e tautolu?

⁶ Kua uka ke pehi fakalahi e aoga lahi he taofi e ia a ia. Ko e talahauaga he aposetolo ko Paulo ne pehe he 1 Korinito 13:1-3 hagaao ia ke he aoga lahi he fakaalofa ne liga kua talahau foki he taofi e ia a ia. Pete ni ko e lahi fefe e he iloilo mavete mitaki ha tautolu he fakamatala ki mua he tau tagata, pete ni ko e lahi fefe iloilo e mo e tua ne moua mai he mitaki he tau puhala kumikumi, pete ni he mitaki e tau gahua ne liga taute ma e mitaki he falu, ka e nakai fai taofi e ia a ia, ti nakai aoga e tau mena oti ia. Kua lata ia tautolu ke toka he tau loto e tau kupu ha Paulo: “Nakai ki a iloa e mutolu kua tokologa kua tafepoi ki loto he poitufi, ka e tokotaha ni ka moua e fakamailoga? Tafepoi ke he puhala ia to moua e mutolu e kautu. Kia pihia ha mutolu a tafepoi, kia moua e mutolu. Pihia foki, ko e tau tagata ne fai vala ke he feua fetoko nei kua lata ke fakamanavalahi e taofi e ia a ia ke he tau mena oti.” (1 Korinito 9:24, 25, NW) Ke lagomatai aki a tautolu ke taofi e ia a ia ke he tau mena oti ko e poakiaga ha Paulo he 1 Korinito 10:12: “Hanai, ko ia kua manatu kua tu a ia, kia fakaeneene a ia neke veli.”

Poakiaga Mai he Tau Fakafifitakiaga

7. (a) Kamata fefe he nakai fai taofi e ia a ia e kaumahala he tau tagata? (e) Ko e heigoa e falu a fakafifitakiaga fakamua he nakai fai taofi e ia a ia ne foaki mai he tau Tohiaga Tapu kia tautolu?

⁷ Ha kua fakaata e ia e manako ka e nakai fakakakano hana a tau gahua, ti kaumahala a Atamu ke fakagahua e taofi e ia a ia. Ko e fua, “hoko mai ai e hala ke he lalolagi . . . ko e mate foki ha ko e hala.” (Roma 5:12) Ko e kelipopo fakamua ko e kakano foki ni ha ko e nakai fai taofi e ia a ia, ha ko e mena poaki age he Atua ko Iehova kia Kaino: ‘Kua ita he ha a koe, ti fakatetefu mai he ha e mata hau? Kua takoto mai e hala ke he gutuhala, to pule nakai a koe kia ia?’ Ha kua nakai pule a Kaino ke he hala, ati kelipopo e ia hana matakainaga ko Apelu. (Kenese 4:6-12) Ne kaumahala foki e hoana ha Lota ke fakagahua e taofi e ia a ia. Ne nakai maeke ia ia ke totoko e kamatamata ke haga ki tua. Ti ko e heigoa e totogi he hana a nakai taofi e ia a ia? Ko e hana ni a moui!​—Kenese 19:17, 26.

8. Ko e tau tala ke he tau tagata tane tokotolo fe i tuai ne foaki mai e tau poakiaga ma tautolu ke kitia e lata tonu ke fakagahua e taofi e ia a ia?

⁸ Ko e tama uluaki ha Iakopo ko Reupena ne fakagalo e ia e tufaaga he uluaki kakano ha ko e hana a nakai fai taofi e ia a ia. Ne fakakelea e ia e lotofale he hana matua tane he feuaki mo e taha mai he tau hoana fakahoa ha Iakopo. (Kenese 35:22; 49:3, 4; 1 Nofoaga he Tau Patuiki 5:1) Ha kua ita a Mose ke he puhala ne kamatamata a ia aki e tau loma, tagi, mo e totoko, ti fakatikai hana a monuina ke hoko atu ke he Motu he maveheaga. Numera 20:1-13; Teutaronome 32:50-52) Ti pihia ne Patuiki fakamoli ko Tavita ko e ‘tagata ke lata mo e finagalo he Atua,’ ne to a ia ke he vihi lahi ha ko e hana a nakai taofi e ia a ia ke he taha magaaho. (1 Samuela 13:14; 2 Samuela 12:7-14) Ko e tau fakafifitakiaga oti nei ne foaki mai e tau poakiaga ke iloa e tautolu ke fakagahua e taofi e ia a ia.

Ko e Heigoa ha Tautolu Kua Lata ke Taofi

9. Ha e fe e falu Tohiaga Tapu ne pehi mai e aoga e taofi e ia a ia he ha tautolu a tau manamanatuaga mo e tau manako?

⁹ Ko e mena fakamua, ko e taofi e ia a ia kua lauia ai ha tautolu a tau manamanatuaga mo e tau logona hifo. Ne fakaaoga foki he Tohiaga Tapu e tau mena nei ke he vagahau fakatai ke he tau kupu tuga e “ate” mo e tau “fua ifi.” Ko e tau mena ne manamanatu a tautolu ki ai ke lagomatai po ke taofi ha tautolu a tau laliaga ke fakafiafia a Iehova. Kua lata ke ha ha i ai e taofi e ia a ia kaeke ke omaoma a tautolu ke he fakatonuaga he Tohiaga Tapu ne moua mai he Filipi 4:8, ke manamanatu ke he tau mena moli, mea, mo e tau mahani mitaki. Ko e salamo a Tavita ne talahau e tau manatu taha ia ni ke he liogi ne pehe: “Kia mitaki . . . e tau manamanatu he haku loto, Iehova na e, ko e haku a maka tumau mo e haku a lukutoto.” (Salamo 19:14) Ko e fakatufono ke hogofulu aki​—ke aua neke manako ke he tau mena he taha tagata—​kua lata ni he tagata ke taofi e ia a ia ke he tau manamanatuaga. (Esoto 20:17) Ne pehi mai e Iesu e mamafa he fakauka ha tautolu a tau manatu mo e tau manako he pehe a ia: “Ka kikite atu taha ke he fifine kia manako ki ai, kua faivao tuai a ia ke he hana loto.”​—Mataio 5:28.

10. Ko e heigoa e tau Tohiaga Tapu ne pehi mamafa mai e aoga ke taofi e ia a ia ke he ha tautolu a tau vagahau?

¹⁰ Kua lauia foki e tau kupu ha tautolu ke he taofi e ia a ia, ko e ha tautolu a tau vagahau. Ne loga moli e Tohiaga Tapu ne fakatonu mai kia tautolu ke fakagahua e taofi ke he ha tautolu a tau alelo. Tuga a e: “Ha ko e Atua ha ha he lagi a ia, ka e ha ha he lalolagi nai a koe; ko e mena ia kia gahoa ai haū a tau kupu.” (Fakamatalaaga 5:2) “Ko e loga e kupu ti nakai noa ai mo e holifono; ka ko ia kua taofi hana a tau laugutu ko e tagata iloilo a ia.” (Fakatai 10:19) “Aua neke hopo mai ha kupu kelea he tau gutu ha mutolu, ka ko e tau kupu mitaki ke ati hake ke he mena ke aoga ai, . . . Kia tiaki . . . e miha, mo e kupu kelea, katoa mo e tau loto kelea oti kana.” Ne matutaki a Paulo ke foaki mai e tau fakatonuaga ke tuku kehe mai ia tautolu e tau kupu fakateaga goagoa mo e fefeua kiva.​—Efeso 4:29, 31; 5:3, 4.

11. Taute fefe e Iakopo e vihi ke ha ha i ai e mataofi he alelo?

¹¹ Ko Iakopo, ko e matakainaga a Iesu ne gahua fakamalolo ke hola kehe mai he vagahau kelea mo e fakakite e uka ke taofi e alelo. Ne pehe a ia: “Kua pihia foki e alelo, ko e mena tote a ia, ka e hula ke he tau mena lalahi. Kitiala, ko e tau akau loga kua tugi he afi tote. Ko e alelo, ko e afi haia, ko e tanakiaga he tau mahani kelea; kua pihia foki e alelo kua tuku ke he tau fahi tino ha tautolu kua kelea ai e tino oti, kua tugi e ia e mouiaga nai oti kana, kua tugi a ia he Kehena. Ha ko e mena kua fakaako mo e fakaako tuai foki he pulotu he tau tagata e tau mahani kehekehe, ko e tau manu favale, mo e tau manu lele, ko e tau mena totolo, mo e tau mena momoui ha ha he tahi. Ka ko e alelo, kua nakai maeke ia taha ke fakaako ia, ko e mena kelea kua nakai mataofi kua puke namo ke he tau mena kona ke mamate ai. Ko ia kua fakaheke aki e tautolu ke he Atua e Matua, ko ia foki kua kaialu aki e tautolu ke he tau tagata kua eke ke he fakatai he Atua; Kua hopo mai he gutu taha e fakaheke mo e kaialu. Haku a tau matakainaga na e, nakai lata e tau mena ia ke eke pihia.”​—Iakopo 3:5-10.

12, 13. Ko e heigoa e falu Tohiaga Tapu ne fakakite mai e aoga he taofi e ia a ia ha tautolu a tau mahani mo e tau gahua?

¹² Ko e moli, kua lauia e taofi e ia a ia mo e ha tautolu a tau mahani. Ko e taha e mena ne kua lata ke lahi e taofi e ia a ia ko e fakafetuiaga ha tautolu ko e fifine mo e tane. Ne poaki mai ke he tau Kerisiano: “Kia fehola kehe mai he mahani he tane mo e fifine.” (1 Korinito 6:18, New International Version) Ne tomatoma ke he tau tane ke fakakaupa ha lautolu a tau manako ke he ha lautolu ni a tau hoana, ha kua talahau mai pehe e taha vala: “Kia inu e koe e maga vai mai he vai hāu, mo e vai ne tafe mai ai he vaikeli hāu.” (Fakatai 5:15-20) Ne maama e talahauaga kia tautolu he pehe, “fakahala he Atua e tau tagata feuaki mo e faivao.” (Heperu 13:4) Kua lata tonu ke feaki e lautolu ne nonofo takitokotaha e mahani taofi e ia a ia.​—Mataio 19:11, 12; 1 Korinito 7:37.

¹³ Ne fakaku e Iesu e mena katoa hagaao ia ke he ha tautolu a tau mahani ke he falu tagata ke he magaaho ne foaki mai e ia e “Fakatufono Auro,” ne pehe: “Ko e tau mena oti kua loto a mutolu ki ai, ke eke he tau tagata kia mutolu; ati eke ā e mutolu e tau mena ia kia lautolu; ha ko e fakatufono haia, mo e tau perofeta.” (Mataio 7:12) Ko e moli, ha ko e taofi e ia a ia, ati nakai toka e tautolu ha tautolu a tau mahani lotokai po ke tau mamafa mai he mafoa po ke tau kamatamata ke taute fakakehe atu e tautolu e falu mai he puhala ne manako a tautolu ke taute mai kia tautolu.

14. Ko e heigoa e fakatonuaga ne foaki mai he Kupu he Atua hagaao ke he tau mena kai mo e tau mena inu?

¹⁴ Ha ha i ai foki e taofi e ia a ia hagaao ke he tau mena kai mo e tau mena inu. Ne lotomatala e fakatonuaga mai he Kupu he Atua. “Ua eke a koe mo taha ia lautolu kua inu lahi ke he uaina; mo lautolu kua kai loto kai ke he maga kakano he tau manu.” (Fakatai 23:20) Ne pauaki mai e poaki ha Iesu hagaao ia ke he vaha ha tautolu: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu.” (Luka 21:34, 35) E, lauia e taofi e ia a ia ke he ha tautolu a tau manamanatuaga mo e ha tautolu a tau logonaaga, ti pihia foki ni mo e ha tautolu a tau kupu mo e ha tautolu a tau mahani.

Ko e Ha e Taofi e Ia a Ia ne Uka Lahi Ai

15. Fakakite fefe he tau Tohiaga Tapu e moli he totoko he Tiapolo ke he taofi e ia a ia he tau Kerisiano?

¹⁵ Ne nakai mukamuka e taofi e ia a ia he iloa oti he tau Kerisiano, ha kua ha ha ia tautolu tolu e malolo mao ne totoko mai ke he gahuahuaaga he ha tautolu a taofi e ia a ia. Ke kamata aki, ne ha ha ai a Satani mo e hana a tau temoni. Ne nakai fakauaua e moli ha lautolu he fakakite mai he tau Tohiaga Tapu. Ti ko e mena ia, ne totou e tautolu ne “heke ai e Satani” a Iuta to finatu a ia ke afo a Iesu. (Ioane 13:27) Ne huhu he aposetolo ko Peteru kia Anania: “Ko e heigoa e mena kua fakapuke ai e Satani hau a loto, ke pikopiko ai a koe ke he Agaga Tapu?” (Gahua 5:3) Ne tonu lahi e poakiaga ha Peteru: “Kia nonofo fakalatalata a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia.”​—1 Peteru 5:8.

16. Ko e ha e tau Kerisiano ne lata ke fakagahuahua e taofi e ia a ia hagaao ke he lalolagi nei?

¹⁶ Ke he laliaga ha lautolu ke fakakite e taofi e ia a ia, ko e taufetului foki e tau Kerisiano mo e lalolagi nei ne “ha he pule hana kua mahani kelea,” ko Satani ko e Tiapolo. Hagaao ia ke he mena nei, ne tohi he aposetolo ko Ioane: “Aua neke fakaalofa a mutolu ke he lalolagi, po ke tau mena ha ha he lalolagi; kaeke kua fakaalofa taha ke he lalolagi, nakai nofo e fakaalofa ke he Matua ke he loto hana. Ha ko e tau mena oti ha ha he lalolagi, ko e manako lahi he tino, mo e manako lahi he tau mata, katoa mo e tau mena he mouiaga nai ke hula ki ai, nakai mai he Matua ia, ka e mai he lalolagi. Ha ne mole atu foki e lalolagi katoa mo e hana a tau manako lahi; ka ko e tagata kua eke e finagalo he Atua to tumau a ia tukulagi.” Kaeke ke nakai fakagahua e tautolu e taofi e ia a ia mo e totoko fakalahi e hagahaga fakaalofa ke he lalolagi, to toho he hana a tau manako a tautolu, ke tuga a Tima ko e taha ne gahua fakalataha mo Paulo ke he taha magaaho.​—1 Ioane 2:15-17; 5:19; 2 Timoteo 4:10.

17. Ko e heigoa e vihi ia hagaao ke he taofi e ia a ia ke he ha tautolu a tupumaiaga?

¹⁷ Ha ko e tau Kerisiano, kua lata foki ia tautolu ke taofi e ia a ia ke kautu mai he tau fetului mo e tau lolelole mo e tau mena ne kuku ai a tautolu tali he fanau mai. Ne nakai hao mai a tautolu he mena moli ko e “kelea e tau fatuakiloto he tau loto he tau tagata kua kamata mai he vaha tote.” (Kenese 8:21) Ke tuga e patuiki ko Tavita, ‘ne fanau a tautolu mo e mahani hepehepe; ne fatu foki e tau matua fifine ia tautolu mo e hala.’ (Salamo 51:5) Ne nakai iloa he tama fanau fou ke taofi e ia a ia. Ka manako a ia ke he taha mena, ko e tumau na ia ke tagi to moua e ia e mena ia. Ne taha e hokotaki ne pehe ke he fakaakoaga tama: ‘Kehe e puhala manamanatu he tau fanau mai he tau tagata lalahi. Ko e manamanatu ne tau fanau kia lautolu ni ti mahani ke nakai maama e fakamaamaaga kakano ha kua nakai maeke ia lautolu ke “tuku a lautolu ke he tuaga he taha tagata.”’ Ko e moli, “kua lili ai e goagoa ke he loto he tama.” Ka e taha e mena, ka fakaaoga e “akau ne akonaki,” to lotomatala fakahaga ke iloa ko e mena ha ha i ai e tau fakatufono kua lata ia ia ke omaoma ki ai ti mataofi e goagoa.​—Fakatai 22:15.

18. (a) Ke lata ia mo Iesu, ko e heigoa e tau manamanatuaga ne nofo ke he loto? (e) Ko e heigoa e tau kupu ha Paulo ke fakakite aki hana a iloa he uka ke taofi e ia a ia?

¹⁸ E, ko e ha tautolu a tau aga lotokai ne totoko ke he ha tautolu a taofi e ia a ia. Ko e tau mahani ia ne nonofo ke he tau loto, ati pehe ai a Iesu: “Ha ko e mena kua hake mai he loto e tau manatu kelea, ko e keli tagata, ko e faivao, ko e feuaki, ko e kaiha, ko e talahau pikopiko, mo e kupu kelea.” (Mataio 15:19) Ko e mena haia ne tohi e Paulo: “Ha kua nakai eke e au e mena mitaki kua loto au ki ai, ka ko e mena kelea kua nakai loto au ki ai, ko e mena haia kua eke e au. Kaeke foki kua eke e au e mena kua nakai loto au ki ai, nakai tuai ko au kua eke e mena ia, ka ko e hala kua nofo i loto ia au.” (Roma 7:19, 20) Ka e taha e mena, nakai ko e tau kaumahala a ia, he tohi foki e Paulo pehe: “Ka kua tatuki e au hoku tino mo e fakatupa a ia, neke iloa a au kua tiaki, ko au kua fakamatala atu ke he falu a tagata.” Ke tatuki e tino hana kua lata ni ke fakagahua e taofi e ia a ia.​—1 Korinito 9:27.

19. Ko e ha ne pehe ai a Paulo ko e tatuki e ia hana a tino?

¹⁹ Ti maeke nakai a Paulo ke pehe ko e tatuki e ia hana a tino, ha kua fakalavelave he tau mena loga e fakagahua he taofi e ia a ia, tuga e toto tokoluga, hopo ate, nakai katoatoa e mohe, tau mamahi ulu, kelea e manava, mo e falu foki. Ke he vala tala ka hau, to manamanatu a tautolu ke he tau mahani mo e tau lagomatai ke taute aki a tautolu ke fakagahua e taofi e ia a ia.

Manatu Nakai e Koe?

◻ Ko e ha ne aoga lahi mahaki e taofi e ia a ia?

◻ Ko e heigoa falu he tau fakafifitakiaga ha lautolu ne matematekelea kakano he nakai fai taofi e ia a ia?

◻ Ha e fe e tau mena kua lata ia tautolu ke taofi e ia a ia ki ai?

◻ Ko e heigoa e tau fi tolu ne fakatauhele aki e taofi e ia a ia ha tautolu?

[Fakatino he lau 8]

Kua lata he tau Kerisiano ke taofi e ia a ia ke he tau mena kai mo e tau mena inu?

[Fakatino he lau 9]

Maeke he taofi e ia a ia ke lagomatai a tautolu ke fakamamao mo e uta tala

[Fakatino Credit Line he lau 6]

Historical Pictures Service