Tapuaki ke he Atua Fe?

KO TAUTOLU ko e tau tagata kua nakai tatai ke he tau manu, ha kua ha ha i ai e lotomatala ke tapuaki. Ti ko e mena nei kua kamata mai ni he vaha ne fanau mai a tautolu. Ha ha ia tautolu foki e mahani mitaki, e manamanatuaga ke puipui aki a tautolu ke he mena kua hako mo e mena kua hepe. Ke he tau puhala kehekehe ko tautolu oti kua mumui tua ke he manamanatuaga ia, mo e he gahua ki ai, tokologa kua onoono ke he atua po ke tau atua ma e puipuiaga.

Ke he senetenari kua mole po ke ua, falu tagata iloilo fakalalolagi kua fetoko atu ke he moui moli he Atua malolo ue atu mo e Tufugatia. He tau 1844, ne fakapuloa e Karl Marx e lotu “ko e opiami ma e tau tagata.” Nakai leva, ne ta mai e Charles Darwin e fakaakoaga fakataitai he tupu noa mai. Ti hau e pule malolo totoko a Bolshevik. He Fahi Uta i Europa ko e nakai tali tonu ko e fai atua kua fakamau ai ke he fakaveaga, ti kua pehe ko e to mate hifo e lotu mo e atuhau he tau 1917. Ka ko e tau tagata ia ne nakai tali tonu ko e fai atua kua nakai maeke ke hiki e puhala kua taute aki e tau tagata. Ko e fakamoliaga a nei he liu fakatu e lotu he Fahi Uta i Europa he magaaho nei.

Ka e pete ia, kua talahau mai pehe e Tohi Tapu, ko e tokologa a lautolu “kua fakahigoa ‘ko e tau atua,’ ki luga he lagi po ke he lalolagi, tuga ni foki he tokologa e ‘tau atua’ mo e tokologa e ‘tau ‘iki.’ ” (1 Korinito 8:5, NW) Mai he tau tau kua loga e tau tagata ne tapuaki ke he tau atua tokologa. Kua ha ha i ai e tau atua he tupu loga, he fakaalofa, he tau, mo e he uaina mo e tafeauhi. Ke he lotu Hinitu ni hokoia, kua totou numela ai e tau atua ke he tau miliona.

Ko e tau atua Tolu Taha kua puke ai i Papelonia, Asuria, mo Aikupito, ti pihia foki mo e tau motu faka-Puta. Kua ha ha i ai foki he Kerisitenitome e “tapu” he Tolu Taha. He Isilama, kua tiaki e lautolu e Tolu Taha, ti “nakai fai atua ka ko Ala ni.” Mua atu foki, kia lautolu ne fakatikai ke he mena nakai kitia, ko e Atua malolo ue atu ka kua ha ha ni ai ia lautolu e tau atua. Ma e fakatai he Filipi 3:19, kua talahau mai he Tohi Tapu ko e matahele he tau tagata ne foli ke he tau koloa he tino: “Ko e manava, ko e atua ha lautolu haia.”

Laulahi he tau tagata kua tapuaki ni a lautolu ke he atua po ke tau atua he motu po ke kaufakalatahaaga ne kua fanau mai ki ai. Ko e mena nei kua fakatupu mai e huhu: Kua maeke kia he tau vahega tapuaki ke takitaki atu ke he mena taha​—tuga e tau puhala tu ke he tapunu mouga? Po ke kua loga e tau puhala tu he tau tala tuai he lotu kua takitaki atu ke he matematekelea​—tuga e hala fano hui ke he feutu? Loga la nakai e tau puhala tonu ke tapuaki po ke taha ni? Loga la nakai e tau atua ke fakaheke ki ai po ke kua taha ni e Atua Malolo ue Atu kua lata ia tautolu ke tuku ki ai e mahani fakamoli katoa mo e tapuaki?

Ko e Tupu he Tau Atua Fakavai

Ko e tau huhu i luga kua lata lahi mo e ha tautolu a kumikumiaga makutu. Ko e ha? Kakano ha ko e Tohi Tapu, ko e pule ne tohia mai i tuai ke he lotu, kua fakamaama e puhala he atua fakavai, ne puhala mai he gata, ne hele e tau tupuna fakamua ha tautolu ke he matematekelea lahi. Ti hoko mai ke he vaha nei, kua moua e tautolu e pehiaaga mamahi ha ko e hana puhala. (Kenese 3:1-13, 16-19; Salamo 51:5) Ko e “Tama he Atua,” ko Iesu ne vagahau a ia ke he atua totoko “ko e pule he lalolagi nei.” Taha mai he tau aposetolo a Iesu ne fakahigoa a ia ko e “atua he lalolagi nai.” (Ioane 1:34; 12:31, NW; Ioane 16:11, NW; 2 Korinito 4:4) He Fakakiteaga veveheaga 12, kupu 9, kua fakamaama mai a ia “ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti.” Ko e lotu fakavai he lalolagi kua ha ha i lalo hifo he taofiaga a Satani.

Ko Satani ko e takitaki fakavai mua ue atu. (1 Timoteo 2:14) Ke he manako pauaki he tau tagata takitaha ke tapuaki ko e lagatau ne taute e ia he fakatolomaki e tau vahega atua kehekehe​—tau agaga, tau atua ta, tau mena fakatai, tau Matona. Ti leveki foki e ia e tapuaki ke he atua he tagata, tuga e tau pule lalahi, tau takitaki kautau ne kautu mo e tagata talahaua he kifaga mo e tau sipote. (Gahua 12:12-23) Ke fakamalolo a tautolu ke leveki fakamamao, mauokafua e fifiliaga ke kumi mo e tapuaki ni ke he Atua moli, ne kua “nakai ni mamao a ia mo tautolu takitokotaha.”​—Gahua 17:27.

Ko hai mogoia, e Atua kehe lahi nei kua lata ia tautolu ke tapuaki ki ai? Falu he 3,000 he tau tau kua mole, ko e salamo he Tohi Tapu ne fakamaama ko ia ‘ko e Mua ue Atu . . . ko e Malolo oti kana . . . ko e haku a Atua kua falanaki au ki a ia,’ mo e ui ai hana higoa moli​—“Iehova.” (Salamo 91:1, 2) Fakamua, ne pehe a Mose hagaao ki a ia: “Iehova ko e ha tautolu a Atua, ko Iehova ne tokotaha.” (Teutaronome 6:4) Mo e ko e perofeta ko Isaia ne fatiaki mai e ia a ia ni ko e Atua he pehe “Ko au ko Iehova, ko e haku a higoa haia; ko e haku a lilifu foki nakai ta atu e au ke he taha, mo e haku a fakahekeaga nakai ta atu ai e au ke he tupua kua ta.”​—Isaia 42:8.

Ko e finagalo he Atua ko Iehova ke fakamea hana higoa mai he tau mena fakateteki ne kua fakapalaia aki he atua fakavai ko Satani. Ne fakakite e ia e mena nei he tau 1513 F.V.N., he magaaho ne fakaaoga e ia hana perofeta ko Mose ke fakahao mai e tau tagata Isaraela mai he tau favaleaga he tau Aikupito. Ke he mena ia, ne talahau mai hana higoa mo e tau kupu: “To fakamoli ai au ke he mena ia ti to fakamoli ni au ki ai.” (Esoto 3:14, 15, NW) To fakatokoluga e ia a ia mai ia Farao ha Aikupito, ka e fakamua ne tala age a ia ke he pule kelea nei: “Ko e mena ia ni kua fakatu ai e au a koe, kia fakakite e au haku mana kia koe, kia talahaua ai foki haku a higoa ke he lalolagi oti.”​—Esoto 9:16.

Kua tatai e tuaga ia ke he vaha nei. Tuga a Farao i tuai, ko e atua he lalolagi nei ko Satani, ne toka kehe e Atua ko Iehova mo e uta fakavaivai e tauaga fakaagaaga ke totoko atu ke he tau tagata ne fakaalofa ke he tututonu mo e kupu moli. (Efeso 6:11, 12, 18) Ne liu foki, finagalo e Atua ke fakamatalahi hana higoa ke he fofoga he totokoaga a Satani. Pete ni, he to fakakite e ia hana malolo he moumou a Satani mo e hana tau gahua oti, ne fakafano fakamua mai e ia hana tau tagata tapuaki ke fakapuloa Hana higoa ke he lalolagi oti. Ko e fakamatala ke he hana higoa ko e vala aoga lahi haia he tapuaki moli.

Moli lahi, ne talahau ni e Iehova ko e tau tagata tapuaki nei ko e hana tau fakamoli, ko e Tau Fakamoli a Iehova “ne eke e au e motu nai māku; to talahau ai e lautolu haku a fakahekeaga.” (Isaia 43:10-12, 21) Talahau fefe e lautolu e fakaheke ia a Iehova? Ne fakamatala mo e fakaako a lautolu ke he tau tagata mo e ke he taha fale ke he taha fale, fakapuloa e tala mitaki ko e Kautu he Atua, ne pule he hana Tama, ko Iesu Keriso, to tamai e tau monuina tukulagi ke he tau tagata omaoma he lalolagi nei. Ti, tapuaki ai a lautolu ke he Atua mo e “kua nakai oki foki,” tuga e Tau Kerisiano moli he senetenari fakamua. (Gahua 5:42; 20:20, 21) Kua fiafia nakai a lautolu ke he monuina nei mai he lagi? Ko e tau lau tohi mai i mua ka tali.