To Kautu Nakai e Tau Fakatokatokaaga ma e Nakai Haofia he Lalolagi Katoa?

“KO E Felakutaki Taufetului ne kua gega mau ke he lalolagi ke molea e 40 e tau tau, kua fakakite mai ke he fakaalofa hofihofi noa he Atua ke hoko e fakaotiaga,” he talahau mai he One World, ko e mekasini WCC (World Council of Churches [Takitaki he Tau Lotu he Lalolagi]). “Kua tutupu lahi e tau mena fulufuluola lahi he Uho mo e Fahi Uta i Europa . . . ke tuga kua fakaata fakamali ma e mafola mo e nakai haofia i Europa mo e laulahi he lalolagi,” he lafi atu he tagata tohia tala Akilikana ko John Pobee, he Fakaholoaga he WCC he Fahi Fakaako Faka-Atua.

Ko e tau hukui he WCC kua nakai ni ko lautolu ne tutaki atu e fakatokatokaaga he Atua mo e tagata ma e nakai haofia he lalolagi katoa. Ia Apelila 1991, he mole fakaku e Ava felakutaki ha Pesia, kua fakafano atu he Epikopo ko John Paul e fekau ke he hagai tohi kupu he MK he magaaho ia ko Javier Peréz de Cuéllar ti ko e mena ne talahau e ia: “Ko e tau epikopo he tau Tapu Katolika he Fahi Uho ki Uta mo e Fahi Lalo kua ha ha ia lautolu e loto malolo ke he gahua he Tau Motu Kaufakalataha . . . Ne amaamanaki a lautolu ke puhala mai he Tau Motu Kaufakalataha mo e hana fakatokatokaaga kumikumi pauaki, ko lautolu haia ne lauia he felakutaki nakai la leva lahi kua tuku he tuaga manako lahi to nakai kaumahala ke moua e taliaaga mo e fiafia fakalataha auloa ma e lalolagi katoa.”

Mua atu ki ai, ko e Vetikana ko e taha he Tau Fakalatahaaga ne fakatu mo e fakamoli e ua e Fakamoliaga he Mafola Helsinki he tau 1975 mo e Fakamauaga Stockholm he tau 1986. He magaaho ne fakapuloa he Tau Motu Kaufakalataha he tau 1986 ko e “Tau he Mafola ma e Lalolagi Katoa,” kua fanogonogo e epikopo, he uiina e tau hukui he tau lotu lalahi ke kau auloa ke fakamanatu e “Aho Liogi he Lalolagi ma e Mafola.” Ia Oketopa 1986, ko e tau hukui he lotu Puta, Hinitu, Isalama, Sinito, Akilikana, Lufalani, Heleni Tuai, Iutaia mo e falu tua foki kua nonofo auloa i Assisi, Italia iga mo e magaaho ke liogi ma e mafola he lalolagi.

He falu tau tau kua mole, he lauga ne foaki e ia i Roma, ko e Akilikana, ko e Takitaki Epikopo ha Canterbury kua liu talahau mai e gahua i luga. “I Assisi,” kua pehe a ia, “ne kitia e mautolu ko e Epikopo ha Roma [ko e pope] kua fakapotopoto auloa e tau Tapu Kerisiano. Kua lata a tautolu ke liogi fakalataha, vagahau fakalataha mo e gahua fakalataha ma e mafola mo e nonofo fakamitaki he tau tagata . . . Ke he liogi fakamua ia ma e mafola kua logona e au kua hau au ki mua he Atua ne pehe ‘Manamanatu ne taute e au e mena fou.’ ”

Pete he nakai fakalataha atu falu lotu ki Assisi, kua pihia moli hagaao ke he fakatokatokaaga he tagata ma e nakai haofia he lalolagi katoa. Ko e tala i loto he Die Kerkbode, ko e senolo pauaki he Tapu Liliu Fou a Holani i Aferika Toga kua pehe: “Kua kitia e mautolu e hikiaga ke he fakatokaaga he lalolagi fou. Ko e mena ne uka lahi ke manamanatu ki ai he tau tau gahoa e kua mole kua liu tupu ki mua he tau mata ha mautolu. Ko e matutakiaga ne ha ha i ai e kitiaaga lahi ue atu he vahaloto he Kautaha Soviete mo e Fahi Lalo kua fuluola lahi kua ha ha i ai e putoiaaga lahi. He ha tautolu a vala he lalolagi, ko e matakau totoko mo e tau fi kelea ne tutala ke he taha mo e taha, mo e kua puna e manako atu ke he ‘mafola’ he tau mena oti . . . He tuaga he Kerisiano, kua lata ke fakafeleveia fakamitaki e tau laliaga ke tamai e mafola ke he vahaloto he tau tagata. Liogi a tautolu ma e mafola he vaha ha tautolu.”

Kua fakamonuina kia he Atua e tau fakatokatokaaga he tagata ma e nakai haofia he lalolagi katoa?

Fefe he Talahau he Tohi Tapu?

He magaaho ka fakahagaao e falanakiaga ke he laliaga he tagata, ne foaki he Tohi Tapu e hatakiaga hakotika: “Aua neke tua a mutolu ke he tau iki, po ke fanau he tau tagata, nakai ha i ai ha fakamouiaga. Kua fina atu hana agaga, kua liu a ia ke he kelekele ne eke aki a ia, ko e aho ia ni kua mate ai hana tau manatu.” (Salamo 146:3, 4) Ko e tupu ki mua he vaha nei ke he mafola kua tuga ko e fakaohoohoaga. Ka e kua lata a tautolu ke fakamoli. Na fakakaupa e malolo he tagata. Fa mahani ke, lalahi e tau mena tutupu ia lautolu. Fa mahani foki a lautolu ke nakai iloa tumau e tau mena tutupu, ko e tau malolo galo, ne fakatupetupe aki ha lautolu a tau manamanatuaga ue atu he tau fakatokatokaaga.

He fitu e tau tau ato hoko ke he vaha ha Iesu, ke he tau aho he perofeta ko Isaia, kua fakatokatoka e tau takitaki Iutaia ma e nakai haofia mai he tau maveheaga he lalolagi katoa pauaki mo e tau motu tata kua fakatatai aki e puhala ke he mena ne tupu he vaha nei. He tau vaha ia foki, kua lagomatai he tau takitaki lotu e tau mena ne taute he tau politika. Ka e hataki mai a Isaia: “Kia pulega a mutolu, ka to fakahui ni; kia vagahau e mutolu e kupu ka e nakai ni mau.” (Isaia 8:10) Ko e ha lautolu a fakaholoaga kua kaumahala lahi. Pihia nakai e mena ka tupu he vaha nei?

E pihia, ha ko e mai he perofeta taha ia, kua fakapuloa he Atua ko Ia ha ha ia ia Hana ni a puhala ke tamai e nakai haofia ke he lalolagi. To pihia, he nakai puhala mai he ha fakatokatokaaga he tagata, ka e puhala mai he matohiaga he patuiki Isaraela ko Tavita. (Isaia 9:6, 7) Ko e hakeaga nei he Patuiki ko Tavita ko Iesu Keriso, he magaaho ne huhu he Ponitio Pilato, ti talahau ko ia ni ko e Patuiki ka e pehe: “Nakai ko e kautu he lalolagi nai haku a kautu.” (Ioane 18:36; Luka 1:32) He moli, ha ha he lagi e Kautu ha Iesu. Mo e kua​—nakai ko e Tau Motu Kaufakalataha po ke ha motu fakapolitika he lalolagi​—ke tamai e nakai haofia tukulagi kua maeke ke falanaki ki ai ke he lalolagi nei.​—Tanielu 2:44.

Ne fakakite tuai e Iesu kua kamata pule hana Kautu mai he lagi he magaaho ne kua ha ha i ai e “tau tau mo e tau ogo tau,” mo e “to laga e taha motu ke he taha motu, ko e taha kautu ke he taha kautu.” Ko e fakamoliaga he perofetaaga kua fakamailoga ai he tau 1914 ko e magaaho ne tutupu mo e fakamailoga ai e tau tau kua kamata mai ai tuga “mo e fakaotiaga he lalolagi.”​—Mataio 24:3, 6-8.

Kakano fefe e mena nei? Ha kua ku e magaaho ne toe ma e fakatokatokaaga he lalolagi nei, kua tata lahi ke teitei oti tuai. Ko e tupuaga ia ka ma e fai manatu po ke momoko? Nakai pihia, kaeke ke manatu e tautolu e favale lahi, mo e nakai ko e fakafiliaga tonu, ko e totoko, ko e tau, mo e tau mena mamahi ne kua fakamailoga aki e fakaotiaga he lalolagi nei. To moli ko e hahau mitaki ke nonofo hifo he pule ne fakahagaao e Tohi Tapu ki ai: “To haele mau ia ia e Agaga a Iehova; ko e Agaga he iloilo mo e pulotu; ko e Agaga he fifiliaga mo e malolo; ko e Agaga he maama mo e matakutaku kia Iehova.”​—Isaia 11:2.

Nakai Haofia Moli he Lalolagi

Ko e kupu moli, kua nakai fai haofia moli e lalolagi ato, ki lalo hifo he Kautu he Atua, ko e perofetaaga ha Isaia kua fakamoli ke he lalolagi lahi katoa: “Kua eke e au e lagi fou mo e lalolagi fou; nakai tuai manatu ke he tau mena fakamua, ti nakai hake ai ke he loto e tau mena ia.” (Isaia 65:17) Pete ni he laga loga e tau liogi he tau takitaki lotu kua foaki fakalata he lalolagi nei, ko e tau fakatokatokaaga he tagata ma e nakai haofia kua nakai maeke ke hukui aki e puhala he Atua ma e tamaiaga he mafola.

Ko e nakai haofia mau he lalolagi lahi ne kua omoi fakalahi he Kautu he Atua to mua atu e mitaki. Hanei e taha fakamauaga tala ku kua mua i loto he Tohi Tapu: “Ti tukituki e lautolu e tau pelu ha lautolu ke eke mo tau koho, ko e tau tao foki ha lautolu ke eke mo tau titipi ke taute aki e tau vine; to nakai nikiti atu he taha motu e pelu ke he taha motu, to nakai liu ako tau foki a lautolu. To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai; ha kua vagahau mai ai pihia e fofoga a Iehova Sapaota.”​—Mika 4:3, 4.

Ko e nakai haofia ni ne taute he Atua ka tumau mo e maeke ke tua ki ai. He pihia, ke kehe mai he tuku e tua ke he tau iki, ko e ha ne nakai tuku e tua ki a ia? Ti to moua e koe e moli he tau kupu he salamo: “Uhoaki e tagata ha i ai e Atua a Iakopo mo lagomatai hana; ko e hana amaamanaki ha i ai ia kia Iehova ko e hana Atua; Ko ia ne eke e lagi katoa mo e lalolagi, ko e tahi mo e tau mena oti ha i ai; ko ia ne toka ki ai e fakamoli tukulagi.”​—Salamo 146:5, 6.

[Puha he lau 7]

Ko e Tapu Katolika mo e Tau Politika he Lalolagi Katoa

“Ha kua talahau e Keriso kua ‘nakai mai he lalolagi nei hana kautu,’ ko e vahega fekafekau lotu tokoluga mo e ofisa epikopo ko e fakatuaga kua kau auloa ke he lalolagi katoa mo e tau taufetului fakapolitika he motu kua fakamakamaka kamata mai he vaha ha Constantine.”​—The Catholic Church in World Politics, mai he Tagata Fakaako Tokoluga Atu ko Eric Hanson he Santa Clara University Iesuiti.