Ko e Aho ke Manatu

“Kua tala age e au e tau mena nei kia mutolu, kia moua ai e mutolu e monuina ia au, to moua foki e mutolu e matematekelea ke he lalolagi, kia fakamanavalahi a mutolu, kua kautu au ke he lalolagi.”​—IOANE 16:33.

1, 2. Ko e heigoa e aho taha mai he fakamauaga tuai kua kehe lahi mai he tau aho oti kana, mo e ko e ha?

KUA loga e tau mena ka talahau he lalolagi he vaha nei hagaao ke he mafola. He fakaotiaga he Tau II he Lalolagi, ne fa tutaki atu e mafola mo e Aho V-E mo e Aho V-J.a He tau tau takitaha, kua taute he Kerisimasi e tau tagata ke manamanatu atu ke he “mafola ke he lalolagi.” (Luka 2:14) Ka e kua ha ha i ai e taha e aho mai he fakamauaga tuai katoa he tagata kua kehe mamao lahi mai he falu oti kana. Ko e aho naia ne vagahau e Iesu Keriso e tau kupu ne fatiaki mai i luga. Mai he ua e miliona mo e loga foki falu he tau aho ne moui ai e tagata i luga he lalolagi nai, ko e aho taha ia ni ne hiki katoatoa e puhala he moui he tagata ma e hana mitaki tukulagi tukumuitea.

² Ko e aho lahi ia ko e Nisana 14 ke he kalena Iutaia. He tau 33 he Vaha Nei, ne kamata e Nisana 14 he to e la ia Apelila 1. Kia manamanatu la a tautolu ke he tau mena tutupu he aho kua mua atu e kehe ia.

Nisana 14!

3. Kua fakaaoga fefe e Iesu e tau tula fakahikuhiku nei?

³ He hifo mai e mahegihegi, ko e mahina pula kau fuluola kua liga kikila mai ke fakamanatu mai ko Iehova ne fifili e tau magaaho mo e tau vaha he tau. (Gahua 1:7) Mo e ko e heigoa kua tupu i loto he poko luga kua ha ha i ai a Iesu mo e hana tau aposetolo 12 ne tolo ke taute e kaiaga he Paseka ne taute lagataha he tau he tau Iutaia? He tauteute a Iesu ke ‘toka e ia e lalolagi nai, ke fano ke he Matua; kua fakaalofa a ia ke he hana tau tagata.’ (Ioane 13:1) Ne taute fefe e ia e mena nai? Mai he kupu he gutu mo e fakafifitakiaga, ne fakatumau a Iesu ke tuku atu ki loto he tau tutaki hana e tau fuafuaaga mitaki ke lagomatai aki a lautolu ke fakakaumahala e lalolagi.

Tui e Mahani Fakatokolalo mo e Fakaalofa

4. (a) Ne fakakitekite mai fefe e Iesu ke he hana tau tutaki e matapatu fuafuaaga? (e) Kua iloa fefe e tautolu ne ako e Peteru ko e aoga lahi e fakatokolalo?

⁴ Ko e tau aposetolo kua nakai la tiaki e lautolu e falu vala he mahani mahekeheke mo e loto tokoluga. Ti tuku ai e Iesu e tauela ia ia mo e kamata ke holoholo ha lautolu a tau hui. Nakai ko e fakakiteaga he fakatokolalo fakapikopiko a nai, tuga ne fa taute he pope a Kerisitenitome he tau tau takitaha i Roma. Nakai, kua ai pihia! Ko e fakatokolalo moli he foaki ne koe a koe kua hake mai he “loto fakatokolalo kua mua e faoa oti.” (Filipi 2:2-5) He magaaho fakamua, ne nakai maama e Peteru e manatu, he nakai talia ke holoholo e Iesu hana tau hui. Ha kua fakahako atu ki a ia, ne ole a ia ki a Iesu ke holoholo hana tino katoa. (Ioane 13:1-10) Ka e pete ia, kua liga maama tuai e Peteru e fakaakoaga. He tau tau fakamui, kua moua tuai e tautolu a ia he fakatonutonu hako ke he falu. (1 Peteru 3:8, 9; 5:5) Kua aoga lahi ha ki a tautolu oti kana he vaha nei ke fakatupa ma Keriso mo e loto fakatokolalo!​—Kikite foki Fakatai 22:4; Mataio 23:8-12.

5. Ko e poakiaga fe ne fakakite e Iesu e aoga lahi he taha matapatu he fuafuaaga?

⁵ Taha mai he 12 ne nakai moua e aoga he fakatonutonuaga a Iesu. Ko Iuta Isakariota a nai. Ha kua hane taute ai e kaiaga he Paseka, ne tupetupe lahi e agaga a Iesu, kua fakakite ai a Iuta ko e hana afokau, mo e fakafano kehe a ia. Kua talahau ni e Iesu he mole atu e mena nei ke he hana tau tutaki 11 ne fakamoli: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) Hanai moli e poakiaga fou, ne fakatai mai he fakafifitakiaga mitaki ue atu ha Iesu ni! He tata mai e magaaho ma e hana mate ne taute mo poa, ne fakakitekite e Iesu e fakaalofa kua kehe ue atu e mitaki. Ne fakaaoga oti e ia e tau minuti uho ia ke fakaako mo e fakamalolo e tau tutaki ia. He magaaho fakamui, ne pehi e ia e aoga lahi he fakaalofa, he pehe: “Ko e haku a poaki hanai, kia feofanaki a mutolu, tuga e fakaalofa au kia mutolu. Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki hana tau kapitiga.”​—Ioane 15:12, 13.

“Ko e Puhala, mo e Kupu Moli, mo e Moui”

6. Ko e heigoa e foliaga kua tuku atu e Iesu ki mua he tau tutaki fetuiaki lahi hana?

⁶ Kua tala age e Iesu ke he 11 ne fakamoli: “Aua neke fakaatukehe ha mutolu a tau loto; kia tua a mutolu ke he Atua, ati tua mai a foki kia au. Ne loga e tau mena ke nonofo ai ke he fale he haku a Matua; ane nakai, po kua tala atu e au kia mutolu; ke fano au ke taute taha mena ke nonofo ai a mutolu.” (Ioane 14:1, 2) Ko e nonofoaga nei kua ha ha “ke he kautu he lagi.” (Mataio 7:21) Kua talahau mai e Iesu ko e to liga moua fefe he matakau fetuiaki lahi nei he tau tutaki fakamoli ha lautolu a foliaga. Kua pehe a ia: “Ko au nai ko e puhala, mo e kupu moli, mo e moui; nakai hau taha ke he Matua, ka noa mo au.” (Ioane 14:6) Kua hagaao foki e mena nei ki a lautolu ko e tau tagata ka moua e moui tukulagi ke he lalolagi.​—Fakakiteaga 7:9, 10; 21:1-4.

7-9. Ko e ha ne fakamaama mai e Iesu hagaao ki a ia ni “ko e puhala, mo e kupu moli, mo e moui”?

⁷ Ko Iesu “ko e puhala.” Ko e tahamaka mo e koenaia ke fina atu ke he Atua he liogi kua puhala atu ia Iesu Keriso. Ne talahau fakatonu e ia ni ko Iesu ke he hana tau tutaki ko e to age he Matua ki a lautolu e tau mena oti ne ole a lautolu ki ai ke he higoa a Iesu. (Ioane 15:16) Ko e tau liogi ne taute ke he tau mena talaga fakatai po ke “tau tagata tapu” fakalotu po ke taute fakalahi fakalataha mo e tau Ave Maria mo e tau lologo uhu tumau​—nakai logona e tau mena oti nei po ke talia he Matua. (Mataio 6:5-8) Ka e taha foki, kua totou e tautolu hagaao ki a Iesu ia Gahua 4:12: “Nakai fakai taha higoa i lalo he lagi kua foaki mai ke he tau tagata, ke maeke ai ke fakamomoui a tautolu.”

⁸ Ko Iesu ko e “kupu moli.” Ko e aposetolo ko Ioane ne talahau hagaao ki a ia: “Kua faliu tino tagata e Loko, ne nofo foki a ia fakalataha mo tautolu, (ne kitekite a mautolu ke he hana lilifu; ko e lilifu haia he Tama fuataha he Matua,) kua puke ke he fakaalofa noa mo e fakamoli.” (Ioane 1:14) Kua taute ai a Iesu mo kupu moli ke he tau teau he tau perofetaaga he Tohiaga Tapu Heperu he fakamoli a lautolu. (2 Korinito 1:20; Fakakiteaga 19:10) Ne fakailoa e ia e kupu moli he tutala ke he hana tau tutaki mo e moto tagata tokologa ne fanogonogo, he hana fetokoaki mo e vahega fekafekau lotu fakavai, mo e mai he fakafifitakiaga he moui hana.

⁹ Ko Iesu ko e “moui.” Ha ko e Tama he Atua, ne pehe a Iesu: “Ko e tagata ne tua ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui, ka ko e ita he Atua ha ne toka mau ni ki luga hana.” (Ioane 3:36) Ko e tua ne fakagahuahua ke he poa a Iesu ka takitaki ke he moui tukulagi​—ko e moui nakai maeke ke mate i luga he lagi ma e “fuifui mamoe gahoa” he tau Kerisiano ne fakauku mo e moui tukulagi ke he lalolagi parataiso ma e moto tagata tokologa he tau “mamoe kehe.”​—Luka 12:32; 23:43; Ioane 10:16.

Fakaukaaga ke he Favaleaga

10. Ko e ha kua lata a tautolu ke ‘kautu mai he lalolagi,’ mo e ko e heigoa e tau fakamaloloaga kua foaki mai e Iesu hagaao ke he mena nei?

¹⁰ Ko lautolu ne amaamanaki ke momoui i loto he fakatokaaga fou a Iehova kua lata ke taufetuluiaki mo e lalolagi kua “ha he pule hana kua mahani kelea,” ko Satani ko e Tiapolo. (1 Ioane 5:19) Kua fakamalolo mai ha, he mogoia, e tau kupu a Iesu ia Ioane 15:17-19! Kua tukuogo e ia: “Kua tala atu e au e tau mena ia kia mutolu, kia feofanaki a mutolu. Kaeke ke fakavihia he lalolagi a mutolu, kua iloa e mutolu ne fakavihia fakamua mai kia au, ti fakavihia ai kia mutolu. Kane mai ko e tau tagata he lalolagi a mutolu po kua fakaalofa e lalolagi ke he hana tau tagata; ka e nakai ko e tau tagata he lalolagi a mutolu, ka kua fifili e au a mutolu mai he lalolagi, ko e mena ia kua fakavihia ai he lalolagi a mutolu.” Ne fa fakavihia atu ke he tau Kerisiano moli ati hoko mai ke he tau 1992 nei, mo e kua loto olioli ha a tautolu ha ko e tau fakafifitakiaga mitaki ha lautolu ne fakatumau ke mauokafua, kua fakatokolalo ti moua ai e malolo i lalo he lima malolo lahi he Atua! (1 Peteru 5:6-10) Ko tautolu oti kua maeke ke fakauka ke he tau mena uka he fakagahuahua e tua ki a Iesu, ne fakaoti hana fakatutalaaga mo e tau kupu kua fakamafanatia e tau loto nei: “To moua foki e mutolu e matematekelea ke he lalolagi, kia fakamanavalahi a mutolu, kua kautu au ke he lalolagi.”​—Ioane 16:33.

He Fakailoa e Maveheaga Fou

11. Ko e heigoa ne perofeta a Ieremia hagaao ke he maveheaga fou?

¹¹ He magaaho afiafi ia, he mole atu e kaiaga he Paseka ti kua oti tuai, kua vagahau a Iesu hagaao ke he maveheaga fou. Kua talahau tuai he perofeta ko Ieremia e mena nei he senetenari fakamua kua pehe: “Kua pehe mai a Iehova, Kitiala, to hoko mai e tau aho ke eke ai e au e maveheaga fou mo e magafaoa a Isaraela, mo e magafaoa a Iuta; . . . to tuku e au haku a tau fakatufono ki loto ia lautolu, mo e tohi e au ke he tau loto ha lautolu; to eke foki au mo Atua ha lautolu, ti eke a lautolu mo motu haku. . . . ha ko e mena to fakamagalo e au ha lautolu a tau mahani kelea, mo e nakai tuai manatu e au ha lautolu a tau hala.” (Ieremia 31:31-34) He Nisana 14, he tau 33 he V.N., kua taute ai e poa ke fakamoli aki e maveheaga fou nei!

12. Ne fakatu fefe e Iesu e maveheaga fou, mo e ko e heigoa ke fakakatoatoa mai?

¹² Kua tala age e Iesu ke he 11 ne fakamoli kua manako lahi ai ke kai e Paseka nei mo lautolu. Ti toto ai e ia e fua falaoa, taute e fakaaue, ti pakipaki ai, mo e age ki a lautolu kua pehe: “Ko e haku a tino a enei, kua foaki atu ma mutolu; kia eke e mutolu e mena nai mo e fakamanatuaga kia au.” Ke he puhala taha ia, ne age e ia e tau kapiniu uaina ki a lautolu, kua pehe: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.” (Luka 22:15, 19, 20) Kua taute ai e maveheaga fou ke gahuahua ha ko e “toto uho” a Iesu, ko e mena uho lahi mahaki mai he toto he manu ne ganagana ke fakamoli aki e maveheaga he Matafakatufono a Isaraela! (1 Peteru 1:19; Heperu 9:13, 14) Ko lautolu ne uta ki loto he maveheaga fou ia kua moua e loto olioli he fakamagaloaga katoatoa he tau agahala. Ti kua pihia, kua liga lata a lautolu ke eke mo 144,000, kua moua e tufaaga tukulagi ma Isaraela fakaagaga.​—Kalatia 6:16; Heperu 9:15-18; 13:20; Fakakiteaga 14:1.

“Mo Fakamanatuaga kia Au”

13. (a) Ke he heigoa kua lata a tautolu ke manamanatu ki ai he magaaho he Fakamanatuaga? (e) Ko hai ni hokoia kua lata ke kai e tau mena fakatai, mo e ko e ha?

¹³ Ko e Fakamanatuaga ke 1,960 aki ne taute he tau tau takitaha ke he mate a Iesu kua fakahoko ia Apelila 17, he tau 1992. He tata mai e aho ia, kua mitaki a tautolu ke liu manamanatu ke he tau mena oti kana kua fakakatoatoa he poa mitaki katoatoa a Iesu. Kua fakamatalahi he fakatokatokaaga nei e pulotu a Iehova mo e hana fakaalofa hokulo ma e tau tagata. Ko e mahani fakamoli a Iesu kua nakai ha ha i ai ha mena nakai kelea, ti pihia foki ke he mate kua mamahi ue atu, ne fakatokoluga a Iehova ke tali atu ke he fakafiufiu a Satani ko e nakai katoatoa e tufugatiaaga Hana ko e tagata mo e to kaumahala ka tuku atu ke he kamatamata. (Iopu 1:8-11; Fakatai 27:11) Ko e hana toto ne taute mo poa, kua hulalo e Iesu e maveheaga fou, ko e kanavaakau ne fakaaoga e Iehova ke fifili e “tau patuiki mo e tau ekepoa, ko e motu tapu, mo e motu kua moua māna.” Ka nonofo agaia he lalolagi, ko lautolu nei ne “fakakite atu . . . e mitaki” he Atua ha lautolu ko Iehova, ‘ne ui a lautolu ke o mai he pouli ke he hana maama.’ (1 Peteru 2:9; fakatatai Esoto 19:5, 6.) Ti kua tonuhia, ko lautolu ni hokoia ne kai e tau mena fakatai he Fakamanatuaga he tau tau takitaha.

14. Kua fakamuhu koloa fefe e tau tagata miliona ne fakalataha ke kitekite?

¹⁴ He Fakamanatuaga he tau e kua mole, 10,650, 158 ne fakalataha ki ai he lalolagi katoa, ka e ko e 8,850 ni hokoia mai ia lautolu nei​—kua tote hifo he vala taha he mena ke hogofulu aki he taha e pasene—​ne kai e tau mena fakatai. Ti ko e heigoa mogoia e aoga, he kaiaga nei ke he tau tagata miliona ne kitekite? Kua aoga lahi mahaki! Pete he nakai kai, ne fakamuhu koloa fakaagaga a lautolu mai he fakalataha mo e tau matakainaga tokologa lahi nei he lalolagi, he logona e lautolu e tau mena homo ue atu oti kana kua taute katoatoa e Iehova he puhala mai he poa he Tama hana.

15. Kua aoga fefe e poa a Iesu ke he falu ne nakai fakauku?

¹⁵ Ko e taha mena foki, kua fakailoa mai he aposetolo ki a tautolu ia 1 Ioane 2:1, 2: “Ha ia tautolu e Lagomatai ki mua he Matua, ko Iesu Keriso ko e tututonu a ia. Ko e lukutoto foki a ia mo e tau hala ha tautolu; ka e nakai kuenaia e tau hala ha tautolu, ka e katoa mo e lalolagi oti kana.” E, ko e poa a Iesu, kua aoga lahi fakamua ke he vahega Ioane ne uta ki loto he maveheaga fou, ka e kua foaki foki ma e fakamagaloaga he tau agahala he “lalolagi oti kana.” Ko e “lukutoto” ma e tau agahala he tau tagata oti kana he lalolagi tagata kua fakagahuahua e tua ke he toto a Iesu ne fakamaligi, ko e mena kua hafagi hake ma lautolu e amaamanakiaga fiafia ke he moui tukulagi tukumuitea ke he lalolagi parataiso.​—Mataio 20:28.

“Ke he Kautu he Haku a Matua”

16. (a) Ko e heigoa he magaaho nei ne taute auloa e Iesu mo e hana tau hakeaga fakalataha? (e) Ko e heigoa kua lata ke taute e lautolu ne fakauku ne toe mo e moto tagata tokologa?

¹⁶ He fakatumau ke fakamalolo hana tau aposetolo, kua tuhi atu a Iesu ke he aho ka inu fou e ia ke he puhala fakatai e uaina ka fakalataha mo e hana tau tutaki ke he Kautu he hana Matua. (Mataio 26:29) Kua tala age e ia ki a lautolu: “Ko mutolu nā, ne tumau a mutolu kia au ke he tau mena ne kamatamata ai au. Tuga ne kotofa mai he haku a Matua e kautu kia au, ke pihia foki he kotofa e au kia mutolu. Kia kai a mutolu mo e inu ke he haku a kaiaga mena ke he kautu haku, kia nonofo foki ke he tau nofoaiki, mo e fakafili e tau faoa a Isaraela ne hogofulu ma ua.” (Luka 22:28-30) Tali mai he uta e Iesu e malolo he Kautu i luga he lagi he tau 1914, to liga manamanatu a tautolu ko e tau tagata tokologa lahi mahaki he hakeaga fakalataha mo Iesu, ne fakapotopoto mai he tau senetenari, kua fita he liliu tutu mai, ke “nonofo foki he tau nofoaiki” fakalataha mo ia. (1 Tesalonia 4:15, 16) Kua fakamafiti lahi mai e aho ke vevete he tau agelu e “tau matagi ne fa” he “matematekelea lahi”! He magaaho ia, ko e fakamauaga he 144,000 ha Isaraela fakaagaga mo e fakapotopoto he tau miliona he moto tagata tokologa kua fita he fakakatoatoa. Kua lata a lautolu oti kana nei ke tumau e fakamoliaga, tuga ne taute e Iesu, ke maeke ai ke moua e palepale ko e moui tukulagi.​—Fakakiteaga 2:10; 7:1-4, 9.

17 mo e puha. (a) Kaeke kua nakai talia e taha ne fakauku he nakai fakamoli, ko hai kua liga lata ke tautui aki a ia? (e) Ko e tala i loto he Kolo Toko he tau 1938 ne fakapuho mai e maama fulufuluola fe ke he gahua talaga mo e he magaaho fakamui e fakalaulahiaga ke he fakatokatokaaga pule atua he lalolagi?

¹⁷ Ko e heigoa kaeke kua kaumahala e falu ne fakauku ke fakatumau e fakamoliaga? He magaaho mule nai, kua nakai mahalohalo ko e numela ha lautolu ne nakai fakamoli pihia to gahoa ni. Ko e kakano mitaki ni, ko e ha tautui ka tamai, nakai mai ia lautolu ne papatiso fou, ka e mai ia lautolu ne fakamoli ne kua tapiki tumau mo Iesu ke he hana tau kamatamata mai he tau tau loga ke he fekafekauaga. Ko e tau lupalupa kikila lahi kua hau he Ko e Kolo Toko he tau tau he 1920 mo e 1930 kua fakakite mai ko e fakapotopoto ha lautolu ne fakauku ne toe kua teitei lahi ke katoatoa he tau magaaho he vaha ia. Ko lautolu ne ‘kua unu foki ha lautolu a tau tapulu, mo e fakahina ha lautolu a tau tapulu ke he toto he Punua Mamoe’ tali mai he magaaho ia kua ha ha i ai e amaamanaki olioli kehe lahi. He puhala mai ia Keriso, kua takitaki he agaga a Iehova a lautolu ke he “tau vaipuna he moui” i loto he lalolagi Parataiso.​—Fakakiteaga 7:10, 14, 17.

Ko e Liogi Fakamakamaka Lahi

18. Ko e heigoa e fakaakoaga malolo lahi kua ako e tautolu mai he liogi a Iesu he veveheaga 17 a Ioane?

¹⁸ Ti kua fakaoti aki e Iesu e fakapotopoto he hana Fakamanatuaga fakalataha mo e hana tau tutaki he foaki atu e liogi fakamakamaka lahi ne fakamau ia Ioane 17:1-26. Kua liogi fakamua a ia ko e hana Matua kia fakalilifu a ia he fakatumau a ia ke fakamoli ke he fakaotiaga. Ke he puhala nei to fakalilifu foki a Iehova, ne fakatapu ai hana a higoa​—ne uta kehe pitopito e tau mena oti kana ne fakakelea aki. Ha kua, ti moli ai, ko e tagata mitaki katoatoa ko Iesu ne fakakite moli kua maeke e tau tagata ne tufugatia he Atua ke nakai mahani hepehepe, ti pihia foki i lalo he kamatamataaga kelea lahi. (Teutaronome 32:4, 5; Heperu 4:15) Ko e taha mena foki, ko e mate ne taute poa e Iesu kua hafagi ai e magaaho lilifu ue atu ma e tau fanau a Atamu. Kua pehe a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” Ko e mena aoga lahi ke moua e lotomatala tonu he Atua ko Iehova mo e ke he hana Tama, ko e Punua Mamoe he Atua, ha ko ia kua foaki mai hana moui ma e fakatokolugaaga a Iehova mo e ma e fakamouiaga he tau tagata! (Ioane 1:29; 1 Peteru 2:22-25) Kua loto fakaaue nakai a koe ke he fakaalofa lahi he poa ati hoko atu ke tukulele katoatoa a koe ki a Iehova mo e ke he hana fekafekauaga uho?

19. To moua fefe e lautolu ne toe mo e moto tagata tokologa e olioli he fefakalatahaaki uho?

¹⁹ Ko e taha mena foki, kua liogi a Iesu ke he hana Matua Tapu ke leveki e Ia e tau tutaki he fakakite fakamoli e lautolu ko e nakai ko e taha vala he lalolagi a lautolu, kua tapiki ke he kupu Hana ko e kupu moli ni, mo e fakatumau e koloa uho he loto taha fakalataha mo e Matua mo e Tama. Nakai kia kua homo ue atu e tali ke he liogi nei ti hoko mai ke he aho nei he kau auloa a lautolu ne fakauku ne toe mo e moto tagata tokologa ke he pipiaga he fakaalofa, ka e he magaaho taha kua fakatumau ke tu tokotaha nakai kau ke he tau mena he lalolagi, hana mahani favale, mo e hana mahani kelea? Mo e ko e koloa uho ha e tau kupu fakaoti a Iesu ke he hana Matua ko Iehova! “Ne fakailoa atu foki e au hau a higoa kia lautolu, to fakailoa atu ai foki e au” ne talahau pihia e Iesu “kia nofo i loto kia lautolu e fakaalofa ne fakaalofa mai ai a koe kia au, ko au foki ha i loto ia lautolu.”​—Ioane 17:14, 16, 26.

20. Ko e ha e Nisana 14, he tau 33 V.N., ko e aho ke manatu?

²⁰ He fano kehe mai he katene a Ketesemane, kua liu foki a Iesu fakaku, ke fakalataha mo e ati hake hana tau tutaki. Ti hoko mai ai hana tau fi ki a ia! Kua kaumahala e tau kupu ke fakamaama e mamahi he tino a Iesu, hana loto momoko malipilipi ke he tau mena kelea ne tamai he mena ia ki a Iehova, mo e hana fakafifitakiaga ke he fakamoliaga mai he tau mena oti kana ia. Ne fakauka a Iesu ke he fakaotiaga, he po katoa mo e teitei oti foki e magaaho la he aho ia. Kua fakakitekite maliali e ia ko e hana Kautu nakai ko e taha vala he lalolagi. Mo e fakalataha mo e hana fafagu fakahiku, kua tagi a ia: “Kua fakaoti tuai!” (Ioane 18:36, 37; 19:30) Kua fakakatoatoa hana fakakaumahala he lalolagi. Ko e Nisana 14, he tau 33 he V.N., kua moli ni ko e aho ke manatu!

[Tau Matahui Tala]

To Tali Fefe e Koe?

◻ Ko e heigoa ne fakaako e Iesu hagaao ke he loto fakatokolalo mo e fakaalofa?

◻ Ne maeke fefe a Iesu ke eke mo “puhala, mo e kupu moli, mo e moui”?

◻ Ko e heigoa e kakano he maveheaga fou?

◻ Ko e heigoa e fefakalatahaaki mo e fakaalofa ne moua auloa e lautolu ne fakauku ne toe mo e moto tagata tokologa?

[Puha he lau 20]

Ko e Pulotu ha Solomona Lahi Mahaki

Ko e tau tala ne fakamataulu “Fakatokatokaaga” i loto he tau fufuta he Ko e Kolo Toko ia Iuni 1 mo e Iuni 15, 1938, ne fakatu e matapatu he fakatokaaga pule atua kua muitua ki ai e Tau Fakamoli a Iehova ke he aho nei. Ne fakatapunu aki he tau mena nei e vaha kua kehe ue atu e mitaki he tau fakaakoaga mo e tau fakahakohakoaga he fakatokatokaaga ne kamata he tau 1919. (Isaia 60:17) He fakatatai e vaha he tau tau 20 ia ke he tau tau 20 he vaha ne talaga ai e Solomona e faituga mo e fale he patuiki i Ierusalema, ne pehe e Ko e Kolo Toko: “Kua fakakite mai he tau Tohiaga Tapu ko e, he mole atu e tau tau uafulu he fakaholoaga talaga fale ha Solomona . . . , ne kua putoia a ia ke he fakaholoaga talaga fale he motu katoa. (1 Patu. 9:10, 17-23; 2 Nofo. 8:1-10) Ti hoko mai ai tuai e patuiki fifine a Sihipa ‘mai he fakaotiaga he lalolagi ke fanogonogo ke he pulotu a Solomona.’ (Mata. 12:42; 1 Patu. 10:1-10; 2 Nofo. 9:1-9, 12) Ti kua talahau mai he mena nei e huhu: Ko e heigoa e tau mena he magaaho ku i mua ma e tau tagata a Iehova he lalolagi? Mo e tau loto mauokafua katoatoa to fakatalitali a tautolu, mo e to kitia ai e tautolu.” Nakai ko e falanaki hehe e loto mauokafua ia. I lalo he fakatokatokaaga pule atua kua lahi mahaki e fakaholoaga talaga ne fakapotopoto e moto tagata tokologa ne molea atu e fa e miliona. Ke tuga e patuiki fifine a Sihipa, kua omai a lautolu nei mai he tau kalakala oti kana he lalolagi ke logona e pulotu ha Solomona Lahi Mahaki, ko Keriso Iesu​—ne puhala mai ki a lautolu he “tupa fakamoli mo e lotomatala.”​—Mataio 24:45-47, NW.