Tau Huhu Mai he Tau Tagata Totou

Ne pehe e Heperu 9:16 nakai aoga e maveheaga ia ato mate a ia ne eke. Ka e nakai mate e Atua he taute e ia e maveheaga fou. Ti maama fefe e tautolu e kupu nei?

Ne totou e tautolu ia Heperu 9:15-17: “Ko e mena foki ia kua eke ai a ia [Keriso] mo hulalo he maveheaga fou, ha ko e hana matulei ke lukutoto aki e tau hala ne eke ke he maveheaga fakamua, kia moua ai e lautolu kua uiina e tufaaga tukulagi kua talahaua mai. Ha ko e mena kaeke kua eke e maveheaga, nakai aoga e maveheaga ia ato mate a ia ko e [tagata] ne eke. Ha ko e mena kua mau e maveheaga ka mamate a lautolu ne eke ka kua nakai aoga ka moui a ia ko e [tagata] hana e maveheaga.”a

Ko Iehova ko e Taute moli he maveheaga fou. Ia Ieremia 31:31-34, kua talahau tuai fakamahino he Atua ko ia ni hokoia ke taute e maveheaga fou nei mo e hana tau tagata. Ne fatiaki he aposetolo ko Paulo e kupu tohiaga tapu nei ia Heperu 8:8-13, ne fakakite kua fiafia a Paulo ke he vagahau mamafa ia, ko e Atua ni kua fakatu e maveheaga fakaatua nei.

Pete ia, i loto he Heperu veveheaga 9, ne fakaholo atu a Paulo ke taute e tau gahua kehekehe ne taute e Iesu fakahagaao atu ke he maveheaga fou. Mai he taha tuaga, ko Iesu ko e poa ma e maveheaga fou; ko e “toto a Keriso” ni hokoia ke ‘fakamea ha tautolu a tau loto manamanatu mai he tau gahua ke mamate ai.’ Ko Keriso foki ko e Hulalo he maveheaga nei, ti tuga foki a Mose ko e hulalo he maveheaga faka-Matafakatufono.​—Heperu 9:11-15.

Ne talahau e Paulo ko e mate kua lata ke fakamau aki e tau maveheaga he vahaloto he Atua mo e tau tagata. Ko e maveheaga faka-Matafakatufono ko e fakatai. Ko Mose ko e hana hulalo, ko ia haia ke tamai e taliaaga nei he vahaloto he Atua mo Isaraela he tino. Ne taute e Mose e matagahua uka lahi mo e ko e tagata ne kua taute mo e tau Isaraela he magaaho ne o mai a lautolu ke he maveheaga. Kua eke ai a Mose tuga ko e eke maveheaga a ia ke he maveheaga faka-Matafakatufono kua fakatu ai mo Iehova. Ka e liligi nakai e Mose e toto he hana moui ma e maveheaga faka-Matafakatufono ke hau ke he malolo? Nakai. Ko e toto ni he tau manu kua foaki ke hukui ma e toto a Mose.​—Heperu 9:18-22.

Ka e kua e maveheaga fou he vahaloto a Iehova mo e motu he Isaraela fakaagaga? Ko e matagahua mitaki lahi a Iesu he fano vahaloto, ko e Hulalo he vahaloto a Iehova mo Isaraela fakaagaga. Pete he ko Iehova ne fakatu e maveheaga nei, kua tu uho ni ia Iesu Keriso. He taha fahi ha ko ia e Hulalo, kua tuhi fakahako ni e tau mena taute a Iesu ke he tino mo e mo lautolu ka uta fakamua ke he maveheaga. (Luka 22:20, 28, 29) Lafi ki ai, kua lata a ia ke taute e poa kua manako ke fakamau aki e maveheaga. Ko e poa nei nakai he tau manu fakateaga ka ko e moui he tagata mitaki katoatoa. Ti kua onoono atu a Paulo ki a Keriso ko e tagata eke ke he maveheaga he maveheaga fou. He magaaho fakamui ‘Ha kua haele atu a Keriso ke he lagi ni ki mua he Atua ma tautolu,’ ko e maveheaga fou kua mitaki.​—Heperu 9:12-14, 24.

He vagahau ia Mose mo Iesu ko e tau tagata eke maveheaga, nakai fakakite manatu a Paulo ko e taha ia laua kua fakatu e tau maveheaga fou lilifu ha kua fita he tauteute he Atua. Kua kehe ai, ko e tau tagata tokoua kua putoia ko e tau hulalo ke he tamaiaga he tau maveheaga lilifu ia. Mo e he tau veteaga takitaha, kua lata ke moua e mate​—tau manu kua hukui ma Mose, mo e foaki ni e Iesu hana toto he moui ma lautolu he maveheaga fou.

[Tau Matahui Tala]