Ko e Fakamauaga Ni Kia e Kei ke he Fiafia Lahi?
“To tokanoa a ia ke fakalataha mo e tane kua loto ki ai, ka kia lata mo e Iki. Ka e mua atu e fiafia hana kaeke ke nofo noa pihia a ia.”—1 KORINITO 7:39, 40, NW.
1. Fakamaama mai fefe he tau Tohiaga Tapu a Iehova, mo e ko e heigoa ne taute e ia ma e hana a tau mena momoui?
KO Iehova ko e “Atua fiafia.” (1 Timoteo 1:11, NW) Ha ko Ia ne Foaki Loga “e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki,” ne foaki mai e ia ma e hana a tau momoui lotomatala oti—tau tagata mo e tau agaga—e tau mena ne manako a lautolu ke fiafia ke he hana a fekafekauaga. (Iakopo 1:17) Hagaao ia ke he mena ia, ko e manu lele ne lologo, ko e punua kuli poipoi fano mo e ko, po ke tolofine fefeua, ne fakamoli oti ko e tufugatia e Iehova e tau manu ke fiafia e moui ke he ha lautolu a tau nonofoaga. Ne talahau mai fakafulufuluola he salamo, “kua makona e tau akau a Iehova, ko e tau arasi a Lepanona ne to e ia.”—Salamo 104:16.
2. (a) Ko e heigoa e fakakiteaga ko e fiafia lahi a Iesu he gahua e finagalo he hana matua? (e) Ko e heigoa e tau kakano ne fiafia lahi ai e tau tutaki ha Iesu?
2 Ko Iesu Keriso ko e ‘fakatai moli ni he Atua.’ (Heperu 1:3) Nakai ofo mogoia he lata tonu ia Iesu ke fakahigoa “ko e Patuiki fiafia tokotaha maka.” (1 Timoteo 6:15, NW) Ne foaki mai e ia e fakafifitakiaga mitaki he makona e taute e finagalo he Atua ke he tau mena kai, ti moua mai e fiafia lahi. Ne fakakite foki e Iesu kia tautolu to ha ha i ai e olioli lahi ka gahua ke he matakutaku he Atua, ko e pehe a ia, ko e fakalilifu mo e katoatoa e nakai manako ke nakai fakafiafia a ia. (Salamo 40:8; Isaia 11:3; Ioane 4:34) Ko e magaaho ne liliu mai e tau tutaki toko fitugofulu “mo e olioli” he mole atu e fenoga fakamatala, ti ko Iesu kua “eke a ia ke olioli lahi ke he agaga tapu.” Mole atu he talahau e ia hana fiafia ke he hana Matua ke he liogi ti fuluhi a ia ke he tau tutaki mo e pehe: “Fiafia e tau mata ha lautolu ne kitia e tau mena ne fa e kitia e mutolu. Ha kua pehe au kia mutolu, Tokologa e tau perofeta mo e tau patuiki ne manako ke kitia e tau mena ne fa e kitia e mutolu ka e nakai kitia a lautolu, mo e ke logona e tau mena ne logona e mutolu ka e nakai logona a lautolu.”—Luka 10:17-24, NW.
Tau Kakano ke Fiafia
3. Ko e heigoa e falu kakano ke fiafia lahi?
3 Nakai kia fiafia ha tautolu a tau mata ke kitia e tau mena ne kitia e tautolu, ke he fakamoliaga he Kupu mo e tau amaamanakiaga a Iehova ke he vaha nei he fakaotiaga? Nakai kia mua atu e olioli ha tautolu he maama e tau perofetaaga ne nakai maama he tau perofeta fakamoli mo e tau patuiki tuga a Isaia, Tanielu, mo Tavita? Nakai kia fiafia a tautolu ke fekafekau ke he Atua fiafia, ko Iehova, ki lalo hifo he takitaki he Patuiki fiafia, ha tautolu a Patuiki ko Iesu Keriso? E, moli e fiafia ha tautolu!
4, 5. (a) Ke tumau e fiafia ke he fekafekauaga kia Iehova, ko e heigoa ke kalo kehe mai a tautolu? (e) Ko e heigoa e falu mena ke ati e fiafia lahi, mo e ko e heigoa e tau huhu ne laga mai he mena nei?
4 Kaeke ke manako a tautolu ke tumau e fiafia ke he fekafekauaga he Atua, ti nakai maeke ke fakave ha tautolu a tutuaga fiafia lahi ke he tau manatu fakalalolagi. Mukamuka he tau mena nei ke fakapulefu ha tautolu a tau manamanatu kakano ni ha kua putoia ai e tau koloa he tino, hula ke he moui muhu mena, mo e falu mena pihia. Ko e “fiafia” ne moua mai he tau mena pihia to ku, ha ko e mena to mole atu e lalolagi nei.—1 Ioane 2:15-17.
5 Ko e laulahi he tau fekafekau fakamoli a Iehova ne mailoga e nakai moua mai e fiafia lahi ha ko e mouaaga he tau foliaga fakalalolagi. Ko e Matua ni ha tautolu he lagi ka foaki mai e tau mena fakaagaga mo e tau mena he tino ke moua he tau fekafekau hana e fiafia lahi. Lahi e fakaaue ha tautolu ke he tau mena kai fakaagaga ne foaki mai e ia, puhala mai he “tupa fakamoli mo e lotomatala”! (Mataio 24:45-47, NW) Fakaaue foki a tautolu ke he tau mena kai he tino mo e falu a koloa foki ne moua mai e tautolu he lima fakaalofa he Atua. Ko e taha mena foki, ko e mena fakaalofa fulufuluola he fakamauaga mo e tau olioli he moui fakamagafaoa. Ko e mena haia ne talahau e Naomi e manako hana ma e tama fifine fugavai, takape hana ke he tau kupu nei. “Kia foaki mai e Iehova kia mua ke moua e mua takitokotaha e okiokihaga ke he kaina he hana tane.” (Ruta 1:9) Ti ko e fakamauaga e kei ke vevete aki e gutuhala ke he fiafia lahi. Ka ko e fakamauaga ni ka hokoia e kei ke vevete aki e gutuhala ke he moui fiafia? Ko e tau fuata kua lata pauaki ke kikite fakalahi ko e pihia moli e mena nei.
6. Hagaao kia Kenese, ko e heigoa e amaamanakiaga fakamua he fakatokaaga he fakamauaga?
6 Ka manamanatu ke he fakamauaga fakamua, ne pehe mai he Tohi Tapu: “Ti eke ai he Atua e tagata ke he hana fakatai, ko e fakatai he Atua ne eke ai e ia; ne eke e ia a laua ko e tane mo e fifine. Kua fakamonuina foki he Atua a laua, mo e pehe atu e Atua kia laua, Kia fanau a mo e fakatokologa, kia fakapuke foki e lalolagi, mo e kautu ki ai.” (Kenese 1:27, 28) Ha kua fakatu e Iehova e fakamauaga, ne aga a Atamu he fanafanau, ti fakatokologa e tau tagata. Ka e lahi mahaki atu foki ke he mena nei e fakamauaga.
“Ka kia Lata mo e Iki”
7. Ko e heigoa e mena kua lata ma e fakamauaga ne fakamakamaka e taha matua mai he kamataaga ke fakamoli?
7 Ha ko e Atua ko Iehova e Kamataaga he fakamauaga, kua amanaki a tautolu ke taute e ia e tau fakatufono he fakamauaga ke moua mai he tau fekafekau hana e fiafia lahi. Ke he vaha ha Aperahamo, Isaako mo Iakopo, ko e fakamauaga kia lautolu ne nakai tapuaki ke he Atua ne malolo e totoko ki ai. Ne fakaomonuo e Aperahamo hana a fekafekau ko Elisara kia Iehova ke nakai uta hoana ma e hana a tama ko Isaako mai he tau Kanana. Ne loa e fenoga ha Elisara mo e omaoma fakatonu ke he tau fakatonutonuaga ha Aperahamo ke maeke ke moua e ‘fifine ne kotofa e Iehova ma e tama he hana a iki.’ (Kenese 24:3, 44) Ne mau a Isaako mo Repeka. Ko e magaaho ne fifili he tama ha laua ko Esau e tau hoana mai he tau tagata pouli i Heti, ko e tau fifine nei “ne fakamamahi e laua e tau loto a Isaako, mo Repeka.”—Kenese 26:34, 35; 27:46; 28:1, 8.
8. Ko e heigoa e tau puipuiaga he maveheaga he Fakatufono ma e fakamauaga, mo e ko e ha?
8 Ki lalo hifo he maveheaga he Fakatufono ko e mauaga ke he tau tane po ke tau fifine Kanana ne nakai maeke. Ne fakaako e Iehova hana tau tagata: “Aua neke fakafetauaki a mutolu mo lautolu, aua neke ta age hau a tama fifine ma e hana tama tane, aua foki neke ta mai hana tama fifine mo e hau a tama tane; Ha ko e mena uhu kehe ai e ia hau a tama tane ke ua mui mai a ia kia au, ka e fekafekau ai ke he tau atua kehe; ti tupu ai e ita a Iehova kia mutolu, ti fakaotioti vave ai a koe.”—Teutaronome 7:3, 4.
9. Ko e heigoa e fakatonuaga ma e fakamauaga mai he Tohi Tapu ke lata mo e tau Kerisiano?
9 Ti nakai ofo, ke he tau fakatufono taha ia ke nakai fai mauaga mo lautolu ne nakai tapuaki kia Iehova, kua lata ke fakagahuahua i loto he fakapotopotoaga Kerisiano he Atua. Ne fakalaga he aposetolo ko Paulo hana a tau matakainaga ne tua mo ia: “Aua neke hahamo a mutolu mo e nakai tatai fakalataha mo lautolu kua nakai tua; ha ko e mena fakalataha fefe e tututonu mo e mahani kelea? Ke fakafetui fefe e maama mo e pouli? Ke loto fakalataha fefe a Keriso mo Pelialo? Po ke igatia fakalataha fefe a ia kua tua mo ia kua nakai tua?” (2 Korinito 6:14, 15) Loga e fakagahuahuaaga he fakatonuaga ia mo e kua lata tonu ke he fakamauaga. Ne mahino mitaki e tau fakaakoaga ha Paulo ke he tau fekafekau fakamoli a Iehova ke mau “ni mo ia kaeke kua fakalataha mo e Iki.”—1 Korinito 7:39, NW, matahui tala.
Nakai Maeke ke Mau “kia Lata mo e Iki”
10. Ko e heigoa he tau Kerisiano tokologa nakai mau ne fa e taute, mo e ko e heigoa e tau huhu ne laga mai ai?
10 Tokologa e tau Kerisiano nofo tokotaha ne fifili ke mumui ke he fakafifitakiaga ha Iesu Keriso he feaki e mena fakaalofa ko e nofo tokotaha. Ko e taha mena foki, ha kua nakai maeke he mogonei ke moua e hoa matakutaku ke he Atua ke mau “kia lata mo e Iki,” ne tokologa e tau Kerisiano fakamoli ne tuku ha lautolu a falanakiaga kia Iehova mo e tumau e nonofo takitokotaha ka e nakai mau mo ia ne nakai tua. Ko e agaga he Atua ne tamai ia lautolu e tau fua tuga e fiafia, mafola, tua, mo e manako fakalatalata, ti maeke ia lautolu ke tumau e mahani mea ke he nofo tokotaha. (Kalatia 5:22, 23) Ko lautolu ne kautu ke he kamatamata nei he fakamoli ke he Atua ko e tau matakainaga Kerisiano fifine ha tautolu ne tokologa, ne kua lata ia tautolu ke fakalilifu. Ke he tau motu kehekehe, ne tokologa a lautolu ke he tau matakainaga tane ti lahi e gahua fakamatala. Ko e moli, “ko ia ni ko Iehova ne foaki mai e talahauaga; Ko e matakau kautau lahi e tau fifine ne talahau e tala mitaki.” (Salamo 68:11, NW) Ko e moli, tokologa e tau fekafekau tane mo e fifine he Atua ne nakai mau ne tumau e mahani fakamoli kakano he ‘tua a lautolu mo e loto katoa kia Iehova, ti fakahakohako e ia ha lautolu a tau puhala.’ (Fakatai 3:5, 6) Ka ko lautolu ne nakai maeke ke mau he mogonei “kia lata mo e Iki” ka moli ke nakai fiafia?
11. Ko e heigoa he tau Kerisiano nonofo takitokotaha ha ko e fakalilifu ke he tau fakatufono he Tohi Tapu ka moua moli?
11 Ka e manatu e tautolu ko tautolu ko e Tau Fakamoli he Atua fiafia, ko Iehova, fekafekau ki lalo hifo he Patuiki fiafia, ko Iesu Keriso. Ko e ha tautolu a fakalilifu ke he tau fakatufono ne tohi fakamaama mai he Tohi Tapu kua lata ke omoi aki a tautolu ke tumau e nonofo takitokotaha kakano ha ko e nakai maeke ke moua e hoa he fakamauaga kua “lata mo e Iki,” ti fai kakano nakai ka manamanatu ke toka he Atua mo Keriso a tautolu ke nakai fiafia? Ne nakai moli. Ti ko e mena ia, ne maeke ia tautolu ke talahau ke he fakaotiaga na maeke ke fiafia e tau Kerisiano ka e nakai fai fakamauaga. Ko e mena maeke ia Iehova ke fakafiafia a tautolu pete he fai fakamauaga po ke nonofo takitokotaha.
Ko e Kei ke he Fiafia Lahi Moli
12. Ko e heigoa e mena ne fakakite mai he tau agelu ke he fakamauaga?
12 Nakai ko e fakamauaga ni e kei ke he fiafia lahi ma e tau fekafekau oti he Atua. Tuga ka fakatai ke he tau agelu. Fakamua atu to hoko e Fakapuke, ne ha ha he falu agelu e tau manako ne nakai lata ma e tau mena momoui fakaagaga, ne nakai makona a lautolu he nakai fai fakamau, ti fakafaliu ke fai tino ke maeke ke fai hoana ke he tau fifine. Ha ko e tau agelu nei ne “kua toka e lautolu e mena ne nonofo ai a lautolu,” “kua taofi [he Atua] a lautolu ke he tau liliaga tukulagi ki lalo he pouli, ato hoko ke he fakafiliaga he aho lahi.” (Iuta 6; Kenese 6:1, 2) Kua maama mitaki, ne nakai taute he Atua ke fai fakamauaga e tau agelu. Ti ko e mena ia ne nakai ko e kei ke he fiafia lahi ha lautolu e fakamauaga.
13. Ko e ha ne fiafia ai e tau agelu tapu, ti ko e heigoa e fakakiteaga he mena nei ma e tau fekafekau oti he Atua?
13 Ka e taha e mena, ne fiafia e tau agelu fakamoli. Ne taute he Atua e fakaveaga he lalolagi ke he “lologo fakalataha e tau fetu he pogipogi, mo e kalaga fiafia ai e tau tama tane [fakaagelu] oti he Atua.” (Iopu 38:7, The New Jerusalem Bible) Ko e ha ne fiafia ai e tau agelu tapu? Kakano ni ha kua fakalataha tumau ke he Atua ko Iehova, “kua fanogonogo ke he hana tau kupu” ke maeke ke fekafekau ki ai. Ne kolikoli ke “eke hana manako.” (Salamo 103:20, 21, NW, matahui tala) E, ko e moua e fiafia lahi he tau agelu mai he fekafekau fakamoli kia Iehova. Ko e kei ke he fiafia lahi moli foki ni a ia ma e tau tagata. Ha ko e mena ia, ko e tau Kerisiano fakauku ne fai fakamauaga ne fekafekau fiafia ke he Atua mogonei, to nakai mau ka liliu tutu mai ke he moui he lagi, ka e to fiafia a lautolu ko e tau mena momoui fakaagaga ke fekafekau ia ke he finagalo he lagi. Pete ne fai fakamauaga po ke nonofo takitokotaha, maeke he tau fekafekau fakamoli oti ha Iehova ke fiafia kakano ha ko e fakaveaga moli ma e fiafia lahi ko e fekafekau fakamoli ke he Tufugatia.
“Mua Hana Mitaki ke he Tau Tama Tane mo e Tau Tau Tama Fifine”
14. Ko e heigoa e maveheaga fakaperofeta ne foaki ke he tau eunuka fakaatua i Isaraela i tuai, mo e ko e ha ne foliga kehe ai e mena nei?
14 Pete ne nakai mau e Kerisiano, ka to fakamoli he Atua e fiafia lahi he tagata ia. Maeke ke moua mai e tau fakamaloloaga he tau kupu nei ne perofeta ke he tau eunuka i tuai i Isaraela: “Ha kua vagahau mai pehe a Iehova ke he tau eunuka kua omaoma ke he haku a tau aho sapati, mo e fifili e lautolu e tau mena kua loto au ki ai, mo e taofi mau e lautolu haku a maveheaga; To ta atu e au kia lautolu e fakamailoga mo e higoa ne mua hana mitaki ke he tau tama tane mo e tau tama fifine; to ta atu e au kia ia e higoa tukulagi to nakai uta kehe ai.” (Isaia 56:4, 5) Ko e amaamanakiaga he tau tagata ma e magafaoa nei ke fai maveheaga ke fai hoana mo e fanafanau ke matutaki tukulagi aki ha lautolu a tau higoa. Ka e taha e mena kua mavehe ki a lautolu ke “mua hana mitaki ke he tau tama tane mo e tau tama fifine”—ke mau tukulagi e higoa ke he fale ha Iehova.
15. Ko e heigoa e talahauaga hagaao ke he fakamoliaga he Isaia 56:4, 5?
15 Kaeke ko e tau eunuka nei ko e fakatino fakaperofeta ke he “Isaraela he Atua,” ko e hukui e lautolu a lautolu ne fakauku ne moua e tau nonofoaga tumau ki loto he fale fakaagaga a Iehova, po ke faituga. (Kalatia 6:16) Ne nakai fai fakauaua, ko e perofetaaga nei ne hagaao fakatino ia ke he tau eunuka fakaatua i Isaraela i tuai ne liliu tutu mai. Ka talia e lautolu e poa lukutoto ha Keriso mo e matutaki tumau ke fifili ke he tau mena ne fiafia a Iehova ki ai, to moua e lautolu e “higoa tukulagi” ke he lalolagi fou he Atua. Hagaao foki e mena nei ki a lautolu e tau “mamoe kehe” he vaha nei he fakaotiaga he lalolagi ne nakai fai fakamauaga mo e nakai fanafanau ke maeke ia lautolu ke katoatoa e fakamakamaka ke he fekafekauaga kia Iehova. (Ioane 10:16) To mamate falu ia lautolu ka e nakai mau mo e nakai fai tama. Ka e kaeke ke fakamoli a lautolu, to moua e lautolu ke he liliu tutu mai e “higoa ne mua hana mitaki ke he tau tama tane mo e tau tama fifine”—ko e higoa “tukulagi to nakai uta kehe” ke he fakatokaaga fou.
Nakai ko e Fakamauaga ni e Kei ke he Fiafia Lahi
16. Ko e ha ne pehe ai ko e mena nakai moua tumau e fiafia lahi mai he fai fakamauaga?
16 Ko e logonaaga he falu tagata ko e fakatauo ne fiafia lahi mo e fakamauaga mo e nakai maeke ke mavehevehe. Ka e taha e mena, ne kua fita e iloa, ko e pihia foki ni e tau fekafekau a Iehova he vaha nei, ne nakai moua tumau e fiafia lahi mai he fakamauaga. Ne taute he mena nei e falu mena vihi ka e laga mai ai e falu ne uka ke taute ka fakatatai atu ke he tau momoui he tau tagata ne nonofo takitokotaha. Ne pehe a Paulo to moua mai he fakamauaga e “matematekelea ke he tino.” (1 Korinito 7:28) To ha ha i ai e tau magaaho ha lautolu ne fai fakamauaga ka “fakaatukehe” mo e “mavehevehe.” Ne uka lahi e tane mo e fifine ke “fakatumau e fekafekauaga ke he Iki ti nakai fai fakalavelave.”—1 Korinito 7:33-35, NW.
17, 18. (a) Ko e heigoa e hokotakiaga he falu a leveki faifano? (e) Ko e heigoa e fakatonuaga ha Paulo, mo e ko e ha ne aoga ai ke fakagahua?
17 Ko e tau mena fakaalofa ua he Atua e nofo tokotaha mo e fakamauaga. (Ruta 1:9; Mataio 19:10-12) Ke kautu ke he tau tutuaga tokoua nei, kua aoga lahi e liogi. Ne hokotaki mai he tau leveki faifano ko e tokologa e Tau Fakamoli ne fai mauaga tuai he vaha fuata, ti mamatua tuai ka e nakai la lata ke hahamo e tau kavega ne tupu mai he mena nei. Ne mavehevehe e falu a fakamauaga nei. Ko e falu tane mo e hoana ne maeke ke fua ha lautolu a tau mena vihi, ka e nakai moua mai ha fiafia lahi he ha lautolu a fakamauaga. Tuga ne tohi he tagata taute tala Igilani ko William Congreve, kia lautolu ne mau fakatepetepe to “tokihala ke he loa he tau magaaho.”
18 Ne hokotaki mai foki he tau leveki he takaiaga ko e falu a matakainaga tane fuata ne nakai taute e tohi ole ke gahua ke he Peteli po ke fifili ke o he Aoga Fakaako Fekafekau Lagomatai kakano ha ko e tuaga ke nonofo takitokotaha ke he falu a magaaho. Ka e foaki mai e Paulo e fakatonuaga ke nakai fai tane po ke fai hoana fakamua ato mole e ‘uho he vaha fuata,’ ko e kakano, ke fakatali ke fakaeneene hifo e manako lahi fakamua he tane po ke fifine. (1 Korinito 7:36-38) Ko e tau tau he nonofo takitokotaha e tagata ke moua he tagata e uho he lotomatala mo e maama, ke hagahaga mitaki a ia ko e tane po ke fifine ke fifili e hoa he fakamauaga po ke taute fakamitaki e fifiliaga ke nonofo takitokotaha tumau.
19. To liga manamanatu fefe ka nakai ha ha ia tautolu e manako ke fai tane po ke fai hoana?
19 Ko e falu ia tautolu kua mole e uho he vaha fuata, mo e malolo he manako lahi fakatane po ke fakahoana. To liga fakakite mai ke he falu a magaaho e tau fakamonuinaaga he fakamauaga ka e ha ha moli ia tautolu e mena fakaalofa ko e nofo tokotaha. To mailoga e Iehova e mitaki he fekafekauaga ha tautolu kia ia he nonofo takitokotaha ti nakai ha ha i ai ha mena ke pehe kua lata ke fai tane po ke fai hoana, ti lata mogoia ke toka e falu a fakamonuinaaga he fekafekauaga. Kaeke ko e fakamauaga kua nakai loto e tagata ki ai, ti nakai fakamonuina mai ha hoa kia tautolu, ti ha ha he Atua e falu a mena ne toka fakatalitali ke lata mo tautolu. O mai a tautolu ke fakagahuahua e tua ko e mena to foaki mai e ia ha tautolu a tau manako kua lata ki ai. Ko e fiafia lahi mahaki ke moua, ka talia mo e mahani fakatokolalo e mena kua tuga ko e finagalo he Atua ma tautolu, tuga ne tau matakainaga Iutaia ne ‘talia mo e fakaheke ke he Atua’ he maama e lautolu kua talia he Atua e tokihala he tau motu kehe ke maeke ia lautolu ke moua e moui.—Gahua 11:1-18.
20. (a) Ko e heigoa e fakatonuaga ma e tagata nofo tokotaha ne foaki mai he mena nei ma e tau Kerisiano fuata? (e) Ko e heigoa e uho manatu hagaao ke he fiafia lahi ka moli tumau?
20 Maeke e fakamauaga ke eke mo kei ke he fiafia lahi, ti maeke foki ke mahafagi e gutuhala ke he tau mena vihi. Taha e mena ne moli: Ne nakai ko e fakamauaga ni e kei ke he fiafia lahi. Ka manamanatu ke he tau fahi oti, kua lotomatala ni, mua atu ke he tau Kerisiano fuata, ke lali ke fai tau ke nofo tokotaha. Ko e tau tau ia ke fakaaoga fakamitaki ke fekafekau kia Iehova mo e tupu fakaagaga. Ka e taha e mena, ke he ha tau he tau tau momoui po ke lotomatala fakaagaga ko e tumau ne moli he uho manatu nei ma lautolu ne fakatapu mo e nakai fai fakauaua: Moua e fiafia lahi moli ka fekafekau fakamoli kia Iehova.
To Tali Fefe e Koe?
◻ Ko e ha ne fiafia e tau fekafekau a Iehova?
◻ Ko e ha e fakamauaga ne nakai ko e kei ke he fiafia lahi?
◻ Ke he fifiliaga he hoa he fakamauaga, ko e heigoa kua lata he tau tagata a Iehova ke taute?
◻ Ko e ha ne fai kakano ai ke taofi pehe ko e fiafia e tau Kerisiano ne nonofo takitokotaha?
◻ Ko e heigoa ne kua lata ke iloa hagaao ke he fakamauaga mo e fiafia lahi?