Hokotaki he Tau Tagata Fakapuloa he Kautu

Ne Fakamonuina e Tau Fanau Aoga Nigeria ma e Mahani Fakamoli

NE TOHIA he aposetolo ko Paulo: “Kaeke kua maeke ia mutolu, kia nonofo fakamitaki mo e tau tagata oti kana.” (Roma 12:18) Ko e tau fanau aoga he Tau Fakamoli a Iehova i Nigeria kua fakaaoga e fakatonuaga nei, ti pihia foki he magaaho ne favale mai ki a lautolu. Ko e fua ne moua mai, ne fakamonuina e Iehova a lautolu.

◻ Ne taha e faiaoga ne nakai fiafia lahi ke he Tau Fakamoli a Iehova. He taha pogipogi he fonoaga, ne ui e ia e Tau Fakamoli oti ki mua mo e hataki atu ki a lautolu ke lologo e lologo he motu. Ne nakai talia e lautolu, he talahau ha kua manako a lautolu ke age e tau loto fakamoli katoatoa ke he Atua. Ti uta ai he faiaoga a lautolu oti he mogoia ki fafo mo e tala age ki a lautolu ke kini e tau pupu. Ka e he magaaho taha, ne fakatumau e falu tama aoga mo e ha lautolu a tau fakaakoaga.

Ne uta he Fakamoli motua e tohi tote fakailoa School and Jehovah’s Witnesses (Aoga mo e Tau Fakamoli a Iehova) mo e age ke he faiaoga, kua fakamaama atu e tu uho he Tau Fakamoli a Iehova. Ka e pete ni ia, ne nakai fiafia e faiaoga ke fakatutala ke he mena ia po ke talia e tohi tote fakailoa. Ka e moli ni, ne fakalahi hake agataha e ia e fakahala he tau fanau.

Ne fakatumau ni e tau fuata Fakamoli ke fakauka ke he fakahala nei mo e kini e tau pupu ti pihia foki ni he magaaho ka nakai nofo e faiaoga. Taha aho ne fakamumuli e faiaoga mo e takahao fakagalo a lautolu ka e fakatumau ni a lautolu mo e gahua mo e lologo e tau lologo he Kautu. Ne nava lahi a ia ia lautolu ti liu a ia fekau ke liliu ke he poko aoga, fakakite ai e manatu ofogia ke he ha lautolu a tau mahani. Ko e heigoa e fua? Ko e faiaoga he mogonei kua fai fakaakoaga Tohi Tapu mo e Tau Fakamoli a Iehova!

Moli ko e tau fanau nei ne fakamonuina ma e mahani fakamoli ha lautolu ki a Iehova mo e hana a tau poakiaga.​—Fakatai 10:22.

◻ Ko Ruta mo e hana a tau kapitiga ne fakamonuina ma e ha lautolu a tau mahani fakamoli ke he tuaga ha Iehova ke “nakai ko e tau tagata he lalolagi.” (Ioane 17:16) Ko Ruta ne 18 e tau, ne kamata a ia ke gahua foafoa he 12 e tau hana. Ko ia mo e falu he Tau Fakamoli kua moua mai e tau totokoaga mai he tau hukui he tau faiaoga he aoga kakano ni he nakai talia ke uhu e lologo he motu. Kua huhu e faiaoga ke kitia e tau mamatua he tau tama fifine. He mole atu e foaki e lautolu e fakamaamaaga, he fakaaoga e tohi tote fakailoa School, kua fiafia e faiaoga mo e nakai liu foki tukuatu ke he tau fanau nei e ha mena vihi.

Ka e pete ni ia, he taha aho ko e taha faiaoga mai i Initia ne vagahau fakakelea mo e fakahala e tama fifine ki mua he vahega he magaaho ne nakai lologo e tama fifine e lologo he motu. Ne kau fakamalolo e tama fifine ke he tua hana ti uta he faiaoga a ia ke kitia e takitaki aoga. He magaaho ne hoko a laua ke he mena ia kua kitia he fuata Fakamoli ko e hagai takitaki aoga foki a ia i ai. Lahi ke he hana a ofogia, kua kamata e takitaki aoga mo e hukui takitaki aoga ke feki. Hahaga atu ke he faiaoga, kua pehe e takitaki aoga: “Fifine na e, ua tupetupe a koe ke he tau fanau fifine nei. Pete ni foki e kelipopo e ko e a lautolu, to mamate a lautolu ka e nakai fakalataha mo e uhu he lologo he motu. Na nakai kia la logona ia a koe ia lautolu?” Ne fakatutala a ia mo e hana a hagai ke he tua mo e loto malolo he Tau Fakamoli a Iehova. Ne vagahau ke he tama fifine kua fakamolemole e takitaki aoga ke he mamahi fakama. Ne lafi e ia ki luga: “Fakatumau ke he tau gahua he tua. To lahi e nava haku ke he lotu hau mo e fakamalolo hau kua tu malolo ke he tau fahi ne ua ki fafo mo e i loto he aoga.” Fakahiku, ne fakamolemole e faiaoga ne totoko he magaaho fakamua ke he Fakamoli, he pehe kua maama la ia e ia he mogonei e tu uho ne tutu he Tau Fakamoli.

Ko e tau fanau nei kua mumui a lautolu ke he fakafifitakiaga he tau Heperu toko tolu ne nakai fakamamutu ke he e malolo ke he Atua ke hufeilo ke he tupua ta, mo e pihia foki a Tanielu, ne nakai mamahi ke oti e liogi ki a Iehova. Ko e tau tagata nei ne fakamonuina e Iehova kakano ha kua fakamoli a lautolu ke he tau fakatufono tututonu he Atua.​—Tanielu, tau veveheaga 3 mo e 6.