Gahuahua e Tau Tagata Tukuogo he Kautu ke he Lalolagi Katoa

“To eke foki a mutolu mo tau talahau haku . . . ke hoko ni ke he fakaotiaga he lalolagi.”​—GAHUA 1:8.

1. Ko e heigoa e fekau ne talahau e Iesu ka tukuogo he tau tutaki hana he vaha ha tautolu?

HE MAGAAHO ne fakamaama e gahua ne fakafano e Iehova hana Tama ke he lalolagi ke taute, ne pehe a Iesu: “Ha ko e mena lata ke fakamatala e au e vagahau mitaki he kautu he Atua.” (Luka 4:43) Ti kua pihia foki, he magaaho ne talahau e gahua ka taute he tau tutaki hana ke he lalolagi he magaaho ka liu mai a ia fakalataha mo e pule malolo fakapatuiki, ne kua pehe a Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—Mataio 24:14.

2. (a) Ko e ha kua mua atu e aoga ke fakailoa lahi e fekau he Kautu? (e) Ko e heigoa e huhu kua lata a tautolu ke huhu hifo ki a tautolu ni?

² Kua mua atu he ha e aoga he tau tala ke he Kautu he Atua? Ko e ha kua lata ai e Kautu ke fakailoa lahi pihia? Kakano ha ko e Kautu faka-Mesia ka fakamatalahi ai ha Iehova a pule katoatoa ke he lagi mo e lalolagi katoatoa. (1 Korinito 15:24-28) Ha ko e mena ia, to fakahoko e Iehova e fakafiliaga ke he fakatokaaga mena a Satani he magaaho nai mo e fakamoli ai hana maveheaga ke fakamonuina e tau magafaoa oti kana he lalolagi. (Kenese 22:17, 18; Tanielu 2:44) He taute ai e gahua fakamoliaga hagaao ke he Kautu, kua moua ai e Iehova a lautolu ne kua fakauku e ia he magaaho fakamui ke eke mo tau hakeaga fakalataha mo e hana Tama. Ha ko e tukuogoaga he Kautu, kua taute ai foki e gahua vehevehe he vaha nei. (Mataio 25:31-33) Kua manako a Iehova ke iloa he tau tagata he tau motu oti kana e finagalo hana. Kua manako a ia ke moua e lautolu e magaaho ke fifili e moui he eke mo tau tagata ka nonofo i lalo he hana Kautu. (Ioane 3:16; Gahua 13:47) Kua taute katoa nakai e koe e gahua tukuogo he Kautu nei?

Amaamanaki ke he Fakaotiaga he Tau Vaha he Tau Motu Kehe

3. (a) Ha kua lata moli ni, ko e heigoa e matapatu tala ne fakakite e C. T. Russell he fenoga fakamua ke fakatokatoka e tau matakau ke fakaako Tohi Tapu? (e) Ko e heigoa ne iloa he Tau Tagata Fakaako Tohi Tapu fakamua ia, hagaao ke he mena kua lata ke tu ai e Kautu he Atua he tau momoui ha lautolu?

³ He tau 1880 i tuai, ne fano a Charles Taze Russell, ko e etitoa fakamua he mekasini Kolo Toko, he fenoga ke he fahi uta-tokelau he tau Fahi Motu Kaufakalataha ke fakamalolo atu ke fakatutu e tau matakau ke fakaako Tohi Tapu. Ti kua lata tonu ni e matapatu tala ne vagahau a ia ki ai ko e “Tau Mena kua Hagaao ke he Kautu he Atua.” Tuga ne fakaata mai he tau fufuta fakamua he Kolo Toko, ne iloa ai he Tau Tagata Fakaako Tohi Tapu (ko e higoa ne iloa ai e Tau Fakamoli a Iehova he magaaho ia) kaeke ke maeke a lautolu ke aoga ke fai vala gahua ka taute he Kautu he Atua, kua lata a lautolu ke taute e Kautu ko e mena kua mua atu ha lautolu, ti kua fiafia lahi ke fakaaoga ha lautolu a tau momoui, ha lautolu a tau iloilo, mo e ha lautolu a tau koloa ke he hana a fekafekauaga. Ti kua lata ne tau mena oti he moui ke tu he mena ua aki. (Mataio 13:44-46) Kua fakalataha foki ke he matagahua ha lautolu e gahua tukuogo he tala mitaki ke he tau tagata ne kua hagaao ke he Kautu he Atua. (Isaia 61:1, 2) Ati kua lahi fefe e mena ne taute e lautolu ato hoko e fakaotiaga he Tau Vaha he Tau Motu Kehe he tau 1914?

4. Ne lahi fefe e tufatufaaga he tau tohi faka-Tohi Tapu ne taute he matakau he Tau Tagata Fakaako Tohi Tapu ato hoko e tau 1914?

⁴ Mai he atu tau 1870 ke he tau 1914, kua gahoa lahi e numela he tau Tagata Fakaako Tohi Tapu. He tau 1914, kua eke ni ke 5,100 ne gahuahua ke taute e gahua fakamoliaga ke he tau tagata. Ka kua kehe muatua ha e gahua fakamoliaga ia! He tau 1881, he ua maka ni e tau tau he mole he lomi fakapa e Kolo Toko, ne tufatufa e lautolu e tohi ne 162 e tau lau tohi ko e Food for Thinking Christians. Ke he tau mahina gahoa, kua 1,200,000 he tau lagakiaga ne kua tufatufa e lautolu. He tau tau gahoa, ne kua tufatufa ai e tau hogofulu he tau miliona he tau tuleke he tau tau takitaha ke he tau vagahau loga.

5. Ko hai e tau tagata uta fekau, mo e ko e faga agaga fefe ne fakakite e lautolu?

⁵ Ti kamata foki he tau 1881, kua foaki he falu a lautolu ni ke taute e gahua fekafekau he tau tagata uta fekau fakaevagelia. Ko e kau fakamua a nei he tau faoa ne gahua foafoa he vaha nei (ko e tau tagata gahua evagelia tumau). Ko e falu he tau tagata uta fekau, fa o hui po ke heke patikala taholi, mo e gahua fakamatala a lautolu ke he teitei oti e tau fahi he motu ne kua nonofo ai a lautolu. Ne folia e falu ke gahua he tau fonua he tau motu kehe mo e kua eke ai mo tau tagata fakamua ne uta fakapa e tala mitaki ke he tau motu tuga a Finilani, Papeto, mo Puma (ne kua ui he magaaho nei ko Maianama). Ne fakakite e lautolu e makutu fakamisionare ne kua tuga ha Iesu Keriso mo e hana tau aposetolo.​—Luka 4:43; Roma 15:23-25.

6. (a) Ne laulahi fefe e tau fenoga he Matakainaga Russell ke folafola e kupu moli he Tohi Tapu? (e) Ko e heigoa foki ne taute ke fakatolomaki e gahua fakamatala he tala mitaki ke he tau fonua he tau motu kehe ato hoko e fakaotiaga he Tau Vaha he Tau Motu Kehe?

⁶ Ne fa fenoga lahi foki ni e Matakainaga Russell ke folafola e kupu moli. Ne fa fano lagaloga a ia ki Kanata; ne vagahau i Panama, Tamaika, Kupa; ne fa fenoga lagaloga ki Europa; mo e takai viko e lalolagi he fenoga fakaevagelia. Ne fakafano foki e ia e falu tagata tane ke kamata mo e takitaki e gahua fakamatala he tala mitaki he tau fonua he tau motu kehe. Ne fakafano a Adolf Weber ki Europa he lotouho he tau 1890, mo e hoko hana gahua fekafekau mai i Suisalani ki Falani, Italia, Sihamani, mo Peletiuma. Ne fakafano atu a E. J. Coward ke he fahi motu Karipeani. Ne kotofa a Robert Hollister ke he Fahi Uta he 1912. Haia, tauteute ai i ai e tau tuleke pauaki ke he hogofulu e tau vagahau, mo e kua eke ai e tau miliona he tau lagakiaga he tau mena nei ke tufa viko katoa i Initia, Saina, Sapani, mo Korea he tufa he tau tagata pauaki he motu. Kaeke kua nofo a koe ha magaaho ia, kua eke nakai e loto hau ke omoi a koe ke lali fakamoli lahi ke hoko atu e tala mitaki ke he falu he hau a kaufakalatahaaga mo e molea atu foki?

7. (e) Ne fakaaoga fefe e tau nusipepa ke lagaki fakalahi e gahua fakamatala? (e) Ko e heigoa e “Tala-Atapoki ke he Tufugatiaaga,” mo e toko fiha e tagata ne kitia ai he tau taha ia?

⁷ He tata mai e fakaotiaga he Tau Vaha he Tau Motu Kehe, ne kua fakaaoga e tau nusipepa ke fakailoa e tau lauga Tohi Tapu ne lauga e Matakainaga Russell. Kua pehi lahi fakamua e lautolu nakai ke he tau 1914 ka e ke he finagalo he Atua mo e hana ni a fakamoliaga ka hoko mai moli. Ko e loga ke he 2,000 nusipepa he magaaho, ne hoko ai ke he 15,000,000 he tau tagata totou, ne tohia tumau e tau lauga nei. Ti, ko e magaaho ne hake mai ai e tau 1914, kua kamata e Kaufakalatahaaga ke fakakite ke he tau tagata hana “Tala-Atapoki ke he Tufugatiaaga.” Mai he tau fakatataaga fa ne kua ua e tau tula, kua fakakite e tau kupu moli he Tohi Tapu mai he magaaho tufugatia ati hoko ke he Afe Tau. He taha maka ne tau, kua molea e hiva miliona e tau tagata i Amerika Tokelau, Europa, Ausetalia, mo Niu Silani ne kua fita he kitia ai.

8. He tau 1914, fiha e tau motu kua hohoko e Tau Tagata Fakaako Tohi Tapu ki ai mo e tala mitaki?

⁸ Hagaao ke he tau fakamau ne kua maeke ke moua, he hoko ke he vala fakahiku he tau 1914, kua folafola he matakau evagelia makaukau nei ha lautolu a tukuogoaga ke he Kautu he Atua ati hoko ke he 68 e tau motu.a Ka e ko e kamataaga ni a ia!

Tukuogo Fakamakutu e Kautu kua Fakatu

9. He tau fonoaga i Cedar Point, ne kua omoi pauaki fefe e gahua fakamatala he Kautu?

⁹ He magaaho ne tolo fakalataha e tau Tagata Fakaako Tohi Tapu i Cedar Point, Ohio, he tau 1919, ne fakapuloa e J. F. Rutherford, ko e pelesiteni he Kaufakalatahaaga he Kolo Toko he magaaho ia: “Ko e mena haia mo e mena ia ni ha tautolu a gahua, ke fakailoa e kautu lilifu ue atu hane hau he Mesia.” He fonoaga ke ua aki i Cedar Point, he tau 1922, ne lagaki fakamahino he Matakainaga Rutherford e mena moli ne hoko he fakaoti e Tau Vaha he Tau Motu Kehe, he tau 1914, ‘kua uta tuai he Patuiki lilifu ue atu ki a ia ni hana malolo lahi mahaki mo e kua kamata ai ke pule.’ Ke mui mai ai ne, tuku atu fakalapalapa e ia e, e matakupu ki a lautolu ne fanogonogo, kua pehe: “Kua talitonu nakai a mutolu kua fita he kamata he Patuiki lilifu ue atu hana pule? Kia liliu a ke he fonua, a mutolu ma tau tama tane he Atua muatua! . . . Kia fakapuloa e fekau ke he tau mena mamao mo e laulahi. Kua lata e lalolagi ke iloa ko Iehova e Atua mo e ko Iesu Keriso e Patuiki he tau patuiki mo e Iki he tau iki. Ko e aho na nai he tau aho oti kana. Kitiala, kua pule e Patuiki! Ko mutolu e tau hukui fakailoa tala hana.”

10, 11. Kua lauia mitaki oti fefe e fakaaogaaga he tau letio, tau motoka fakataogo leo, mo e tau lapa tohi ke fakahokotia atu ke he tau tagata e kupu moli he Kautu?

¹⁰ Kua 70 e tau tau kua molea he tali mai he hoko e tau fonoaga ia i Cedar Point​—kua teitei ke 80 e tau tau tali mai he kamata a Iehova ke fakakite hana pule katoatoa he puhala mai he pule faka-Mesia he hana Tama. Kua lahi fefe e mena kua fakakatoatoa moli he Tau Fakamoli a Iehova e gahua ne kua fakatoka mai he Kupu he Atua ke taute e lautolu? Ko e heigoa hau a vala gahua ne taute i ai?

¹¹ Ke he fakamua he atu tau 1920, kua maeke ai ke fakaaoga e letio mo kanavaakau ke folafola fakalahi e tau fakailoaaga he fekau he Kautu. He vaha he atu tau 1930, kua eke e tau lauga he tau fonoaga ne tala ke he Kautu ko e amaamanakiaga ni ma e lalolagi, ke uta fano he tau matakau letio po ke fakapuloaaga hololoa pauaki he leo taogo mo e tau kave telefoni ne viko takai he lalolagi. Kua fakaaoga foki e tau motoka ne fakakanavaakau aki e tau sipika leo lahi, ke pele e tau tapakiaga he tau lauga Tohi Tapu ne kua lauga ke he tau toloaga tagata. Ati kamata mogoia e tau matakainaga he tau 1936, i Glasgow, Sikotelani, ke tui e tau lapa tohi ti takai fano a lautolu he tau matakavi fakatuaga gahua ke fakailoa e tau lauga he toloaga tagata. Ko e tau puhala lauia mitaki oti a nei ke foaki atu e gahua fakamoliaga ke he tau tagata tokologa he magaaho ia ne kua gahoa e numela ha tautolu.

12. Tuga he fakakite mai he tau Tohiaga Tapu, ko e heigoa e taha he tau puhala kua mua atu e lauiaaga ma tautolu takitokotaha ke tuku atu e gahua fakamoliaga?

¹² Kua moli, kua talahau fakamaali mai he tau Tohiaga Tapu ha ko e tau Kerisiano, kua ha ha ia tautolu takitokotaha e matagahua ke tuku atu e fakamoliaga. Kua nakai maeke ia tautolu ke tokanoa e tau tala he nusipepa po ke tau leo taogo he letio ke taute e gahua ia. Kua tokologa e tau afe he tau Kerisiano mahani fakamoli​—tau tagata tane, tau fifine, mo e tau fuata​—ne kua talia e matagahua ia. Ti ko e fua, kua eke tuai e gahua fakamatala mai he taha fale ke he taha fale mo fakamailogaaga moli he Tau Fakamoli a Iehova.​—Gahua 5:42; 20:20.

Foli ke Hokotia ke he Tau Nonofoaga Oti he Lalolagi

13, 14. (a) Ko e ha ne hiki ai e falu he Tau Fakamoli ke he falu taone, ti pihia foki ke he falu motu, ke taute ha lautolu a fekafekauaga? (e) Kua eke e manamanatu fakaalofa ke he tau tagata he motu ne fanau ai e taha, ke lagomatai fefe e folafolaaga he tala mitaki?

¹³ He iloa kua lata e fekau he Kautu ke fakamatala ke he tau tagata oti ne nonofo he lalolagi, kua manamanatu fakamoli lahi e falu he Tau Fakamoli a Iehova ke he mena kua maeke a lautolu takitokotaha ke taute ke hohoko atu ke he tau matakavi ne kua mole matua he tau kaufakalatahaaga ha lautolu.

¹⁴ Kua tokologa e tau tagata ne kua ako e kupu moli he mole he o kehe mai he tau matakavi ne fanau a lautolu. Pete ni kua hiki a lautolu ke moua e tau tutuaga mitaki fakakoloa tino, kua moua ni e lautolu e mena kua mua atu e uho, mo e eke e falu ke logonatia e omoiaga ke liliu ke he tau motu po ke tau kaufakalatahaaga ne fanau mai ai a lautolu, ke tufatufa e kupu moli. Ti, kua tolomaki ai e gahua fakamatala he tala mitaki he senetenari nei, ki Sikatinavia, Heleni, Italia, tau motu he Fahi Uta i Europa, mo e falu matakavi loga foki. Ti kua pihia foki he magaaho nei, he atu tau 1990, kua hane folafola e fekau he Kautu ke he puhala taha ia.

15. He vaha he atu tau 1920 mo e atu tau 1930, ko e heigoa ne fakakatoatoa he falu ne kua aga manamanatu tuga ne fakailoa mai ia Isaia 6:8?

¹⁵ He fakagahua e tomatomaaga he Kupu he Atua ke he tau momoui ha lautolu, kua maeke e falu ke fakaata ni e lautolu a lautolu ke fekafekau he taha matatepu ne nakaila nonofo a lautolu i ai fakamua. Ko W. R. Brown (ne fa mahani ke ui ko “Bible Brown”) e taha mai ia lautolu nai. He tau 1923, ke fakatolomaki e gahua evagelia, ne hiki mai i Turinitata ki Aferika Lalo. He vaha he atu tau 1930, ko Frank mo Gray Smith, Robert Nisbet, mo David Norman ne kua ha ha mo lautolu ne uta fano e fekau he Kautu ke he fahi uta a Aferika. Ne lagomatai e falu ke fakagahua e fonua i Amerika Toga. He vala fakamua he atu tau 1920, kua eke a George Young, ko e tagata Kanata, ke fai vala gahua ne taute i Atenetina, Parasili, Polivia, Sili, mo Peru. Ne fekafekau a Juan Muñiz i Sepania, ati fakaholo atu ki Atenetina, Sili, Parakuai, mo Urukuai. Ne fakakite e lautolu oti nei e agaga ne kua tuga ne fakailoa mai ia Isaia 6:8: “Ko au hanai, kia fakafano atu e koe au.”

16. Mai he tau nonofoaga tagata tokologa ne taute foki i fe e gahua fakamatala ato hoko e tau felakutaki?

¹⁶ Kua hoko atu foki e gahua fakamatala he tala mitaki ke he tau fahi mamao. Ne ahi atu e tau toga ne gahua he Tau Fakamoli ke he tau uaafo i New­found­land, ko e fahi tahi i Noue ne fano atu ki Atiki, ko e tau atu aelani he Pasifika, mo e tau uaafo he fahi Uta-Toga i Asia.

17. (a) He hoko ke he tau 1935, fiha e tau motu ne kua hohoko e Tau Fakamoli ki ai? (e) Ko e ha ne nakai oti e gahua he magahala ia?

¹⁷ Kua ofo lahi ai, ko e Tau Fakamoli a Iehova he tau 1935 kua lavelave ke he gahua fakamatala ke he 115 e tau motu, mo e kua hohoko a lautolu ke he 34 foki e tau motu he o malaga gahua fakamatala po ke he fakafano tohi he meli. Ka e nakai la oti e gahua. Kua hafagi e Iehova he tau ia ha lautolu a tau mata ke he hana finagalo ke fakapotopoto mai e “moto tagata tokologa” ka hao atu ke he hana lalolagi fou. (Fakakiteaga 7:9, 10, 14) Kua lahi agaia ni e gahua fakamoliaga ne kua lata ke taute!

18. Ke he gahua tukuogo he Kautu, ko e heigoa e tau kotofaaga ne kua fakapuke he Aoga Kiliata mo e he Aoga Fakamahani Fekafekau?

¹⁸ He magaaho foki ne kua kaputia e lalolagi he Felakutaki II he Lalolagi mo e taofi e tau tohi po ke gahua he Tau Fakamoli a Iehova ke he tau motu loga, ne hafagi he Aoga Tohi Tapu he Kolo Toko a Kiliata hana tau gutuhala ke fakaako e tau tagata ne amaamanaki ke gahua misionare ke fakakatoatoa ai e gahua fakapuloa lahi mahaki he Kautu ke he lalolagi katoa. He magaaho nai, kua molea e 200 he tau motu ne fekafekau ai a lautolu ne oti mai i Kiliata. Kua lahi atu e mena ne taute e lautolu mai he tufa tohi, ti fakaholo atu ke he taha matakavi. Ne taute e lautolu e tau fakaakoaga Tohi Tapu, fakatoka e tau fakapotopotoaga, mo e fakamahani e tau tagata ke fua e matagahua pule faka-Atua. He magaaho ku kua mole, kua lagomatai foki he tau motua mo e tau fekafekau lagomatai kua oti mai he Aoga Fakamahani Fekafekau, ke fakapuke e manako aoga lahi kua hagaao ke he gahua nei he tau atu motu lalahi ne ono. Kua fakatoka ai e fakaveaga maonivaniva ma e tupu ki mua tumau.​—Fakatatai 2 Timoteo 2:2.

19. Kua lahi fefe e tali he tau fekafekau a Iehova ke he uiina ke fekafekau he tau fahi kua lahi mahaki e manako?

¹⁹ Kua maeke nakai e falu tagata ke lagomatai ke leveki e falu fonua ne nakaila gahua ki ai? He tau fonoaga he lalolagi katoa he tau 1957, kua fakamalolo atu ke he tau tagata takitaha mo e tau magafaoa​—he Tau Fakamoli a Iehova ne motua​—kua fakamalolo atu ke manamanatu la ke o ke nonofo he tau matakavi kua lahi mahaki e manako mo e taute ha lautolu a fekafekauaga i ai. Ko e uiina ne kua tuga ni mo e mena ne talahau he Atua ke he aposetolo ko Paulo, ne kitia e tagata tane i loto he fakakiteaga kua ole fakalahi ki a ia: “Hau a ki Maketonia, mo e lagomatai mai kia mautolu.” (Gahua 16:9, 10) Ne hiki e falu he magahehala he atu tau 1950, ti pihia foki e falu he magaaho fakamui. Kua eke ke afe e Tau Fakamoli ne hiki ki Aielani mo Kolomopia; kua hiki e tau teau tagata ke he falu matakavi loga foki. Kua loga e tau afe tagata ne hiki ke he tau fahi he ha lautolu ni a tau motu ne lahi mahaki e manako lagomatai.​—Salamo 110:3.

20. (a) Tali mai he tau 1935, ko e heigoa ne kua fakakatoatoa he fakamoli e perofetaaga ha Iesu ia Mataio 24:14? (e) He vaha he tau tau gahoa kua mole, kua fakaaveave hake fefe e gahua?

²⁰ He fakamonuina e Iehova hana tau tagata, kua holo tumau ki mua e gahua tukuogo he Kautu ti kua kehe muatua e mafiti. Tali mai he tau 1935 kua teitei lafi laga valugofulu e holo ki mua he numela he tau tagata fakailoa mo e tuaga holo ki mua he matakau gahua foafoa kua 60 e pasene ne lahi hake mahaki mai he numela he faoa fakailoa. Ne kamata mai ai e fakatokatokaaga fakaako Tohi Tapu he magahehala he atu tau 1930. Kua eke ai fakaavelesi he mogonei ke molea lahi he fa mo e hafa e miliona ne taute he tau mahina takitaha. Tali mai he tau 1935 kua molea e 15 piliona he tau matahola ne kua tuku katoatoa ke he gahua tukuogo he Kautu. Kua taute ai e fakamatalaaga tumau he tala mitaki he magaaho nei i loto he 231 e tau motu. He mahafagi hake e tau fonua he Fahi Uta a Europa mo Aferika ke ataina e fakamatalaaga he tala mitaki, kua lauia mitaki e fakaaogaaga he tau fonoaga fakalalolagi katoa ke fakakite fakalahi e fekau he Kautu ki mua he tau tagata. Ke tuga he mavehe a Iehova he vaha kua mole, ia Isaia 60:22, kua ‘fakaaveave hake’ moli ni e ia ‘e gahua ke he hana ni a aho.’ Kua homo ue atu ha e monuina ma tautolu ke fai vala gahua i ai!

Ke Hokotia ki a Lautolu Oti ne Maeke e Tala Mitaki

21, 22. Ko e heigoa kua maeke ia tautolu takitokotaha ke taute ke eke mo Tau Fakamoli kua lauia mitaki lahi e gahua ke he ha mena ne kua fekafekau i ai a tautolu?

²¹ Kua nakaila pehe e Iki kua oti tuai e gahua. Kua tokologa e tau afe tagata ne talia agaia e tapuaki moli. Ko e mena ia, kua malagaki mai ai e huhu, Kua taute nakai e tautolu e tau mena oti ke maeke ke fakaaoga fakamitaki e tau magaaho ne kua fakaata he fakauka ha Iehova ma e gahua nei?​—2 Peteru 3:15.

²² Kua nakai maeke e tau tagata oti ke hiki ke he tau fahi fonua ne fa lavea ke gahua i ai. Ka e fakaaoga katoatoa nakai e koe e tau magaaho ne kua mahafagi atu ki a koe? Kua gahua fakamatala nakai a koe ke he kaugahua hau? ke he tau faiaoga mo e tau kapitiga aoga? Kua hikihiki nakai a koe ke he tau tutuaga fehikitaki he hau a fahi fonua? Kaeke ha ko e fua he fehikitaki e tau puhala gahua kua gahoa lahi e tau tagata ne nonofo he tau kaina he aho, ka kua hiki nakai e koe hau a fakaholoaga ke maeke ke ahi atu ki a lautolu he magaaho afiafi? Kaeke kua puipui e tau fale ke nakai maeke e tau tagata ahiahi ne nakai uiina ke o ki loto, kua taute nakai e koe e gahua fakamoliaga he hea telefoni po ke gahua fakamoliaga ke he meli? Kua liu nakai a koe ke fakaati e talia fiafia ne fakakite mo e foaki ke taute e tau fakaako Tohi Tapu i kaina? Kua taute katoatoa nakai e koe hau a fekafekauaga?​—Fakatatai Gahua 20:21; 2 Timoteo 4:5.

23. Ha kua kitekite a Iehova ke he tau mena ne taute e tautolu i loto he hana fekafekauaga, ko e heigoa kua lata ke kitia moli ia tautolu?

²³ Kia eke a tautolu oti ke taute ha tautolu a fekafekauaga ke he puhala kua fakakite maaliali ki a Iehova ko e loto fakaaue moli a tautolu ke he monuina homo ue atu he eke mo Tau Fakamoli hana he tau magaaho talahaua nei. Kia monuina ai a tautolu ke kitia mata moli e fakafiliaga ka fakahoko e Iehova ke he fakatokaaga kelea tuai mo e takitaki mai e Pule Afe Tau lilifu ue atu a Iesu Keriso!

[Tau Matahui Tala]

Ke Fakamanatu

◻ Kua mua atu he ha e aoga he fakamatalaaga he fekau he Kautu?

◻ Ne lahi fefe e fakamatalaaga he tala mitaki ato hoko mai e tau 1914?

◻ Ne malolo lahi fefe e gahua fakamatala ne kua taute tali mai he fakatu hake e Kautu?

◻ Liga ko e heigoa ka taute aki ha tautolu ni a vala he fekafekauaga ke tupu loga?

[Tau Fakatino he lau 24]

Kua tokologa e tau tagata ne kua hokotia e fekau he Kautu ki ai pete ni kua gahoa e numela he Tau Fakamoli