Mahani Hakohako Tumau mo e Moui!
‘KIA vagahau kelea ke he Atua mo e mate!’ Ko e kili he mekasini ha tautolu kua fakakite e hoana ha Iopu, ne keli a ia aki e tau kupu ia. Ko e kavi ke he 3,600 e tau tau a ia i tuai. Ka e ko e vagahau vale ia ke he fekafekau tua fakamoli he Atua kua fakamaama e matakupu ne fakafehagai mo e tau tagata ato hoko mai ke he vaha nei. Kua matematekelea lahi a Iopu he tau mena ne galo—hana fuifui manu, hana kaina, hana fanau tokohogofulu. Mogonei ko e hana a tino kua fakamamahi ha ko e gagao kelea lahi, kua kamatamata a ia ke he fakakaupaaga he hana a fakauka. Ko e kakano? Ko e fi mua atu he Atua mo e tagata, ko Satani ko e Tiapolo, kua taute e paleko ko e tagata kua nakai maeke ke tumau e mahani hakohako ke he Atua ki lalo hifo he kamatamata kelea lahi.—Iopu 1:11, 12; 2:4, 5, 9, 10.
He vaha nei, tuga ke he vaha a Iopu, “ko e lalolagi oti ha he pule hana kua mahani kelea,” ko Satani ko e Tiapolo. (1 Ioane 5:19) Moli lahi, kua mua atu e hako he mena ia he vaha nei, ha ko e magaaho nei ‘ko ia ne higoa ko e Tiapolo ko Satani, ne kua fakahehe e lalolagi oti,’ kua liti hifo mai tuai he lagi ki lalo he lalolagi. (Fakakiteaga 12:9) Ko e kakano a nei ne tutupu ai e tau malaia lalahi ne fakamamahi e tau tagata ke he vaha ha tautolu. Ko e felakutaki fakamua he lalolagi, ne pa ke he 1914, kua fakamailoga “e kamataaga ia he tau mena matematekelea” ne kua fakatumau ke hoko mai ke he senetenari 20 aki nei.—Mataio 24:7, 8.
Ke he lalolagi favale, tu tokolalo nei, kua fa logona nakai e koe kua hoko atu a koe ke he fakakaupaaga he fakauka he tagata? Kua manamanatu noa nakai a koe, ‘Kua fai kakano nakai ke he moui?’ Kua liga logona pihia a Iopu, ka e nakai galo hana a tua ke he Atua, pete ni kua taute mena hehe a ia. Ne fakakite e ia e hana a malolo ke he tau kupu nei: “Ato hoko ke he aho ke mate ai au nakai toka e au haku a mahani hakohako.” Ne mauokafua a ia to maeke he Atua ke ‘iloa ai hana a mahani hakohako.’—Iopu 27:5; 31:6.
Ko Iesu Keriso, ko e Tama ni he Atua, kua fakauka foki ke he tau matematekelea he magaaho ne nofo a ia ke he lalolagi. Kua totoko e Satani a Iesu ke he tau puhala kehekehe. Ne fakaohooho e ia ke he tau manako fakatino a Iesu mo e kamatamata Hana a falanakiaga ke he Kupu he Atua, tuga ke he mouga ne kamatamata e Satani a Iesu. (Mataio 4:1-11) Ne fakakapaletu e ia a Iesu he fakaaoga e tau tohikupu ne tiaki e taofiaga mo e tau Farasaio mo e ha lautolu a tau tagata fakahehe ke favale ki a ia, talahaua kelea a ia he ekefakakelea, mo e pulega ke keli a ia. (Luka 5:21; Ioane 5:16-18; 10:36-39; 11:57) Kua kelea lahi mahaki e mena ne taute e lautolu ki a Iesu mai he tau tagata fakamafana fakavai tokotolu ne taute ki a Iopu.—Iopu 16:2; 19:1, 2.
Ke he katene i Ketesemane, he hoko atu a Iesu ke he tapunu he kamatamata nei, ne tala age a ia ke he hana a tau tutaki: “Kua momoko lahi haku a loto ke hoko ke he mate.” Ti, “fakaveli fakafohifo ai a ia mo e liogi, kua pehe atu, Hoku Matua na e, kaeke kua maeke, kia uta kehe e kapiniu nai ia au; ka e aua neke eke hoku loto, ka ko e hau a finagalo.” Fakahiku ai, ke he akau fakakikiveka, ke he fakamoliaga ke he tau kupu fakaperofeta he Salamo 22:1, ne tagi a Iesu: “Hoku Atua na e, hoku Atua na e, ko heigoa e mena kua tiaki mai ai e koe au?” Ka e mua atu ki ai nakai tiaki he Atua a Iesu kakano kua fakatumau a Iesu ke he mahani hakohako mitaki katoatoa ki a Ia, he foaki mai e fakafifitakiaga ma e tau Kerisiano moli oti ke mumuitua ki ai. Kua palepale e Iehova e mahani hakohako tumau ha Iesu he fakaliu tu mai a ia mo e fakamatalahi a ia ke he lagi tokoluga. (Mataio 26:38, 39; 27:46; Gahua 2:32-36; 5:30; 1 Peteru 2:21) To palepale he Atua a lautolu oti ne tatai e mahani hakohako tumau ki a ia.
Nakai ni foaki he mahani hakohako a Iesu e tali katoatoa ke he paleko ha Satani ka e ko e poa he hana moui tagata mitaki katoatoa kua foaki e lukutoto, ke he fakaveaga ne kua maeke e tau tagata mahani hakohako ke moua e moui tukulagi. (Mataio 20:28) Fakamua, ne fakapotopoto e Iesu e “fuifui mamoe gahoa” ne fakauku ne kua eke mo tau hakega fakalataha mo ia ke he Kautu he lagi. (Luka 12:32) Mole atu e mena nei, ko e “moto tagata tokologa” kua fakapotopoto ke hao mai he “matematekelea lahi,” kua o mai i ai ke moua e moui tukulagi ke he matakavi he Kautu he Atua ke he lalolagi.—Fakakiteaga 7:9, 14-17.
Ko e tagata mahani hakohako ko Iopu ka ha ha i ai fakalataha mo lautolu kua piliona ne mamate ka fakaliu tu mai mogoia ke eke mo taha vala he “lalolagi fou” mafola he kaufakalatahaaga. (2 Peteru 3:13; Ioane 5:28, 29) Tuga he fakakite he tua he kili he mekasini ha tautolu, kua palepale a Iopu ke he hana mahani hakohako he magaaho ne fakamonuina e Iehova ‘mua a Iopu ke he hana a fakahikuaga ke he hana a kamataaga.’ Kua moua e ia e malolo fakaagaga ko e taha ne “nakai hala ke he hana a tau laugutu.” Ne fakaloa he Atua hana a moui he lafi ki ai foki 140 e tau tau. Ke he koloa tino, ne foaki e ia ki a Iopu fakalahi ua e tau mena oti ne moua e ia fakamua, mo e “ha ha ia” Iopu “foki tokofitu e tama tane, mo e tokotolu e tama fifine,” kua kitia ki ai ko e tau tama fifine kua mua atu e fulufuluola ke he motu oti. (Iopu 2:10; 42:12-17) Ka ke he tau monuina oti nei ko e ata ni he tau fakamonuina ka olioli he tau tagata mahani hakohako tumau ke he Parataiso he “lalolagi fou.” Kua maeke foki a koe ke moua e olioli ia, ko e tau lau tohi ne mui mai ka fakamaama!
[Fakatino he lau 4]
Kua fakatoka e Iesu e fakafifitakiaga mitaki katoatoa ko e tagata mahani hakohako tumau