Ko e Olioli ha Iehova ko e Ha Tautolu a Kolo

“Ha ko e aho tapu hanai ke he Iki ha tautolu; aua neke mamahi foki a mutolu; ha ko e [“olioli,” NW] kia Iehova ko e [“kolo,” NW] ha mutolu haia.”​—NEHEMIA 8:10.

1, 2. (a) Ko e heigoa e kolo? (e) Fakakite fefe e Tavita kua eke e ia a Iehova mo huaga hana?

KO IEHOVA ko e kolo nakai fai fakatataiaga. Ti ko e heigoa e kolo? Ko e matakavi fakamalolo, ko e matakavi he haohao mitaki po ke fakahaoaga. Ko Tavita i Isaraela tuai kua manamanatu ko e Atua ko e hana a kolo. Tuga a nei, manamanatu ke he lologo ha Tavita hagaao ke he Tokoluga Mua Ue Atu “ke he aho ne laveaki ai e [Iehova] a ia mai he tau lima ha lautolu oti kana ne fai fi kia ia, katoa mo e lima a Saulo,” ko e patuiki ha Isaraela.​—Salamo 18, tohiaaga.

² Kamata e Tavita e lologo fakalagalaga ia aki e tau kupu: “Iehova na e, haku a malolo, kua fakaalofa atu au kia koe. Ko Iehova ko e haku a maka tumau haia, mo e haku a kolo, mo e haku a fakamoui; ko e haku a Atua, ko e haku a maka tumau, kua tua au kia ia; ko e haku a akau punuti, mo e hoe he haku a fakamouiaga, mo e haku a taue tokoluga.” (Salamo 18:1, 2) Ko e tuku kehe fakahehe i lalo he fakatufono mo e tutuli ai he Patuiki ko Saulo, ko e tagata hakohako ko Tavita kua eke a Iehova mo huaga, tuga ni e tagata kua poi ke he matakavi fakamalolo ke hao mai he falu a matematekelea.

3. Ko e ha e tau Iutaia he vaha a Esera kua iloa e ‘olioli lahi’?

³ Ko e olioli ne foaki e Iehova ko e kolo nakai kaumahala ma lautolu ne o ai ke he hana a puhala ko e tau tagata mahani hakohako tumau. (Fakatai 2:6-8; 10:29) Ke ha ha i ai e olioli ne foaki he Atua, moli, ko e tau tagata kua lata ke taute e finagalo faka-Atua. Hagaao ke he mena nei, manamanatu ke he mena ne tupu ki Ierusalema he 468 F.V.N. Ko e tagata lagaki tohi ko Esera mo e falu ne moua e maamaaga ha ko e totou fai kakano ke he Matafakatufono. Ti, kua omoi e tau tagata: “Kia kai a e tau mena lolo, mo e inu e tau mena humelie; mo e fakafano age e mutolu e tau tufaaga kia lautolu kua nakai taute ai e tau mena ma lautolu; ha ko e aho tapu hanai ke he Iki ha tautolu; aua neke mamahi foki a mutolu; ha ko e [“olioli ha,” NW] Iehova ko e [“kolo,” NW] ha mutolu haia.” Ko e “olioli lahi” kua fua ai ha ko e fakaaoga he tau Iutaia e iloilo ne kua moua e lautolu mo e taute e Galue he Tau Fale Api. (Nehemia 8:1-12) Ko lautolu ne ha ha i ai ‘e olioli ha Iehova ko e kolo ha lautolu haia’ kua fakapotopoto e malolo ma e hana a tapuakiaga mo e fekafekauaga. Ha ko e olioli ha Iehova ko e ha lautolu a kolo, kua amanaki a tautolu ke he tau tagata he Atua he vaha nei ke olioli foki. Ko e heigoa, mogoia, e falu he ha lautolu a tau kakano he vaha nei ke olioli?

‘Olioli Ai Ni’

4. Ko e heigoa e taha punaaga maaliali he olioli ma e tau tagata a Iehova?

⁴ Ko e taha kakano maaliali ma e olioli ko e foakiaga ne taute e Iehova ma e toloaga auloa. Ko e tau toloaga mo e tau fono he Tau Fakamoli a Iehova kua tamai ki a lautolu e olioli he vaha nei, tuga ni e tau galue ke he tau tau takitaha ne taute he tau Isaraela kua tamai e olioli ke he ha lautolu a tau loto. Kua tala age ke he tau tagata ha Isaraela: “Ko e tau aho ni ne fitu ke eke ai e koe e galue [he tau fale api] kia Iehova hau a Atua ke he mena ke fifili ai e Iehova; ha ko e mena to fakamonuina e Iehova hau a Atua a koe ke he tau mena oti ke moua mai e koe, mo e tau mena oti ke eke ai hau a tau lima, ti [“olioli,” NW] ai ni a koe.” (Teutaronome 16:13-15) E, kua manako e Atua ki a lautolu ke ‘olioli ai ni.’ Ko e mena taha kua moli ke he tau Kerisiano, ha kua fakamafana he aposetolo ko Paulo e tau matakainaga talitonu: “Kia [“olioli,” NW] a mutolu ke he Iki, aua neke noa; to liu foki tala atu e au, kia [“olioli,” NW] a mutolu.”​—Filipi 4:4.

5. (a) Ko e heigoa e olioli, mo e moua fefe he tau Kerisiano e mena ia? (e) Moua fefe e tautolu e olioli pete ni he tau kamatamata?

⁵ Ha kua manako a Iehova ki a tautolu ke olioli lahi, kua foaki e ia ki a tautolu e olioli ko e taha he tau fua he hana a agaga tapu. (Kalatia 5:22, 23, NW) Ti ko e heigoa e olioli? Ko e logonaaga he loto fiafia kua tupu ha ko e amaamanakiaga po ke mouaaga he mitaki. Ko e olioli ko e tuaga he fiafia lahi moli, ti pihia foki he olioli lahi. Ko e fua nei he agaga tapu he Atua kua lagomatai a tautolu ki lalo he tau kamatamata. “Mo e kikite atu kia Iesu, ko e kamataaga mo e katoatoaaga he tua, ko ia ne fakauka ke he satauro, mo e fakateaga a ia ke he ma, ha ko e [“olioli,” NW] kua toka ki mua hana, kua nofo foki a ia ke he fahi matau he nofoaiki he Atua.” (Heperu 12:2) Kua tohi he tutaki ko Iakopo: “Kia manatu a mutolu ko e mena ke [“olioli,” NW] lahi ai ka moua a mutolu he tau kamatamata kehekehe; He iloa e mutolu ko e kamatamata he tua ha mutolu, kua tupu mai ai e fakauka.” Ka e kua ka nakai iloa e tautolu ko e heigoa e mena ke taute aki e tau kamatamata takitaha? Ko e magaaho ia ke liogi mo e mauokafua a tautolu ma e pulotu ke fakafehagai mo e mena ia. Ke gahua tatai mo e pulotu mai he lagi kua maeke ia tautolu ke taute fakamitaki e tau mena vihi po ke fahia mo e tau kamatamata tumau mo e nakai galo e olioli ha Iehova.​—Iakopo 1:2-8.

6. Ko e heigoa e fakafetuiaga kua ha ha i ai he vahaloto he olioli mo e tapuaki moli?

⁶ Ko e olioli ne foaki e Iehova kua fakamalolo a tautolu ke fakatupu ki mua e tapuakiaga moli. Ko e mena haia ne tupu ke he vaha a Nehemia mo Esera. Ko e tau Iutaia he magaaho ia ne ha ha i ai e olioli ha Iehova ko e ha lautolu a kolo kua fakamalolo ke fakalaulahi e tau fiafia he tapuakiaga moli. Mo e he fakatupu ki mua e lautolu e tapuakiaga ha Iehova, kua holo ki mua foki ha lautolu a olioli. Mena moli taha ia ni he vaha nei. Ko e tau tagata tapuaki ha Iehova, ha ha ia tautolu e fakaveaga ma e olioli lahi. Kia manamanatu la a tautolu mogonei ke he gahoa atu foki he tau kakano loga ha tautolu ma e olioli.

Fakafetuiaga mo e Atua Puhala ia Keriso

7. Hagaao ki a Iehova, ko e heigoa e kakano he tau Kerisiano ke ha ha i ai e olioli?

⁷ Ko e fakafetuiaga tata ha tautolu mo Iehova kua taute a tautolu mo tau tagata fiafia lahi he lalolagi. Fakamua to eke mo tau Kerisiano, ko e taha vala a tautolu he kaufakalatahaaga tagata nakai mahani tututonu ne ha ha i ai e ‘pouligia he tau loto manamanatu mo e mafoki kehe mai he moui he Atua.’ (Efeso 4:18) Ko e fiafia ha a ia ha tautolu ha kua nakai liu mafoki kehe mai ia Iehova! Moli, kua lata ke lali fakamalolo ke tumau ke he hana a taliaaga. Kua lata ia tautolu ‘ke tumau ke he tua, kua fakamau, mo e mauokafua, ka nakai hiki mai he amaamanaki ha he vagahau mitaki.’ (Kolose 1:21-23) Kua maeke ia tautolu ke olioli lahi kua fakatata e Iehova a tautolu ke he hana a Tama ti tatai ai mo e tau kupu ni ha Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Kaeke ke fakaaue moli a tautolu ke he fakafetuiaga uho ha tautolu mo e Atua he puhala ia Keriso, to puipui mai a tautolu he ha mena ne maeke ke moumou ai.

8. Foaki fefe e Iesu ke he ha tautolu a tuaga olioli lahi?

⁸ Ko e fakamagaloaga he tau hala puhala he tua he poa lukutoto ha Iesu kua fakatupu lahi he olioli kakano ko e mena hanei ati maeke ke fai fakafetuiaga a tautolu mo e Atua. Ha ko e hana a tuaga he hala taute pauaki, ko e matua tupuna ha tautolu ko Atamu kua tamai e mate ki luga he tau tagata oti. Pete ia, kua fakamaama he aposetolo ko Paulo: “Ka kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu.” Kua tohi foki e Paulo: “Tuga he hoko ke he tau tagata oti kana e fakahala ha ko e hala ne taha; ti pihia foki he hoko ke he tau tagata oti kana e talahaua tututonu ha i ai e moui, ha ko e tututonu ne taha. Ha ko e mena, tuga he uta mo tau tagata hala e tokologa ha ko e liuliu he tokotaha, to uta pihia foki mo tau tagata tututonu e tokologa ha ko e omaoma he tokotaha.” (Roma 5:8, 18, 19) Ko e olioli ha ia ha tautolu kua fiafia e Atua ko Iehova ke fakamagalo mai a lautolu e fanau ha Atamu ne fakaaoga e fakamonuina fakaalofa pihia!

Tokanoaaga Fakalotu mo e Maamaaga

9. Ko e ha ne olioli ai a tautolu mai he onoonoaga fakalotu?

⁹ Tokanoaaga mai i Papelonia Lahi, ko e pule he lotu fakavai he lalolagi, ko e taha kakano ke olioli lahi. Ko e kupu moli faka-Atua kua fakatokanoa mai ai a tautolu. (Ioane 8:32) Mo e tokanoaaga mai he lotu fakataka nei kakano kua nakai fakalataha a tautolu ke he hana a tau hala, iloa hana a tau malaia, mo e hoko ai ke he moumouaga mo ia. (Fakakiteaga 18:1-8) Nakai fai mena momoko hagaao he fehola katoa mai he mena ia!

10. Ko e heigoa e fiafia ne olioli e tautolu ko e tau tagata ha Iehova?

¹⁰ Maama mo e fakagahua e Kupu he Atua ke he moui ko e tau fakalagalaga he olioli lahi. Tokanoa mai he fakaohooho he lotu fakavai, kua olioli a tautolu kehe lotomatala maliaali fakaagaga kua foaki mai he ha tautolu a Matua he lagi puhala mai he “fekafekau fakamoli mo e loto matala.” (Mataio 24:45-47) Mai he tau tagata oti ne nonofo ke he lalolagi, ko lautolu ni kua fakamoli katoatoa ki a Iehova ka moua e agaga tapu hana mo e monuina ke he maamaaga he hana a Kupu mo e finagalo. Tuga he talahau e Paulo: “Kua fakakite mai he Atua e tau mena ia kia tautolu [ko e tau mena kua tauteute e ia ma lautolu ne fakaalofa ki a ia] ke he hana Agaga; ha ko e mena kumi hifo he Agaga e tau mena oti, ko e tau mena hokulo ia he Atua.” (1 Korinito 2:9, 10) Kua maeke ia tautolu ke fiafia lahi mahaki mo e olioli lahi ha kua olioli e tautolu e tupu ki mua he maamaaga ne kua fakakite mai ke he tau kupu ia Fakatai 4:18: “Ka ko e puhala he tau tagata tututonu, kua lata ia mo e maama he aho, kua tupu tolomaki atu hana maama ke hoko ke he tupoula.”

Amaamanakiaga he Kautu mo e Moui Tukulagi

11. Kua fakakite fefe ke he falu e amaamanakiaga olioli he Kautu?

¹¹ Ko e ha tautolu a amaamanakiaga he Kautu kua taute foki a tautolu ke olioli lahi. (Mataio 6:9, 10) Ha ko e Tau Fakamoli a Iehova, kua leva e fakapuloa ko e Kautu ni he Atua ko e amaamanakiaga ni ma e tau tagata oti. Tuga a nei, manamanatu la ke he tau 1931, he magaaho ne moua e tautolu e higoa ko e Tau Fakamoli a Iehova ha ko e fakamalolo olioli ne moua he tau fonoaga 51 ne viko takai ke he lalolagi. (Isaia 43:10-12) Ko e fonoaga fakamalolo mo e mua atu ia kua talahau ai e J. F. Rutherford (pelesiteni mogoia ke he Sosaiete he Kolo Toko) ne fakailoa ke he tohi tote The Kingdom, the Hope of the World. Fakalataha i ai e taha fakamaloloaga kua moua mai ke he fonoaga ia, ko e taha ne talahaua kelea a Kerisitenitome ma e hana a tiaki taofiaga mo e taute fakakelea e fakatonutonuaga a Iehova. Kua fakapuloa foki: “Ko e amaamanakiaga he lalolagi ko e kautu he Atua, mo e nakai fai amaamanakiaga foki.” Ke he tau mahina gahoa, kua tufatufa he Tau Fakamoli a Iehova molea e lima e tau miliona lagaki he tohi tote nei ke he tau kalakala oti he lalolagi. Tali mai he mogoia kua fa mahani tumau a tautolu ke fakamau ko e Kautu ko e amaamanakiaga ni ma e tagata.

12. Ko e heigoa e tau amaamanakiaga he moui olioli kua fakatoka mai i mua ha lautolu ne fekafekau ki a Iehova?

¹² Kua olioli foki a tautolu, ke he amaamanakiaga he moui tukulagi ki lalo hifo he pule he Kautu. Ko e “fuifui mamoe gahoa” he tau Kerisiano fakauku kua ha ha i ai e amaamanakiaga olioli he lagi. “Fakaaue ke he Atua ko e Matua he Iki ha tautolu ko Iesu Keriso,” he tohi he aposetolo ko Peteru, “ko ia kua fanau fakafou ai a tautolu ha ko e hana fakaalofa lahi, kia moua e tautolu e amaamanaki kua moui, ha ko e liu tu mai a Iesu Keriso mai ia lautolu kua mamate. Kia moua e tufaaga nakai tuai popo, nakai fai kelea nakai tuai fifigo, kua toka ke he lagi ma tautolu.” (Luka 12:32; 1 Peteru 1:3, 4) He vaha nei, ko e laulahi he Tau Fakamoli a Iehova kua onoono atu ke he moui tukulagi ke he Parataiso ki loto he takaiaga he Kautu. (Luka 23:43; Ioane 17:3) Nakai fai tagata foki he lalolagi kua ha ha i ai ha mena ke fakatatai mo e ha tautolu a tau amaamanakiaga olioli. Kua lata ni ke ofania e tautolu a lautolu!

Ko e Fakamatakainaga kua Fakamonuina

13. Kua lata ke fefe e onoonoaga ha tautolu ke he ha tautolu a fakamatakainaga ke he lalolagi katoa?

¹³ He fai vala he fakamatakainaga he lalolagi katoa kua talia he Atua tokotaha ko e punaaga foki he olioli lahi mahaki. Fiafia lahi, kua ha ha ia tautolu e tau fioaga mitaki lahi he lalolagi. Kua tuhi mai he Atua ko Iehova ke he vaha ha tautolu mo e pehe: “To luelue foki e au e tau motu oti; ti hoko mai ai e tau mena kua manako ki ai e tau motu oti; to fakapuke foki e au e fale nai ke he lilifu, kua pihia mai a Iehova Sapaota.” (Hakai 2:7) Moli, ko e tau Kerisiano kua nakai mitaki katoatoa. Pete ia, kua fakatata mai e Iehova e tau tagata takitokotaha pihia ki a ia he puhala ia Iesu Keriso. (Ioane 14:6) Ha kua fakatata mai e Iehova ki a ia e tau tagata ne manamanatu a ia kua mitaki, ko e olioli ha tautolu to fua loga kaeke ke fakakite e tautolu ki a lautolu e fakaalofa fakamatakainaga, tuku a lautolu ki luga muatua, fakalataha mo lautolu ke he tau matagahua mahani Atua, toto ki luga ke he ha lautolu a tau matematekelea, mo e liogi ke lata mo lautolu.

14. Ko e heigoa e fakamaloloaga kua moua mai e tautolu ia 1 Peteru 5:5-11?

¹⁴ Ko e tau mena oti nei to fakalataha ke he ha tautolu a olioli. Moli lahi, ko e olioli ha Iehova ko e kolo he ha tautolu a fakamatakainaga fakaagaga ke he lalolagi oti. E, mamahi oti a tautolu ha ko e favaleaga mo e falu he tau mena uka. Ka ko e mena nei kua eke ke fakatata a tautolu auloa mo e foaki ki a tautolu e manamanatuaga he kaufakalataha ko e vala he taha e fakatokatokaaga moli he Atua he lalolagi. Tuga he talahau e Peteru, kua lata ke fakatokolalo e tautolu a tautolu ki lalo hifo he lima malolo he Atua mo e tala age e tau fakaatukehe oti ha tautolu ki a ia ke he iloilo ko e leveki e ia a tautolu. Kua lata ia tautolu ke mataala kakano kua kumi e Tiapolo ke hehe a tautolu, ka e ko e mena nei nakai tokotaha a tautolu, he lafi e Peteru: “Kia totoko atu a mutolu kia ia, mo e mauokafua a mutolu ke he tua, he iloa e mutolu ha ne fakakatoatoa e tau mena mamahi ia ni ke he tau matakainaga ha mutolu ha he lalolagi.” Ti ko e fakamatakainaga olioli nei ke he lalolagi katoa to nakai malolo, ha kua ha ha ia tautolu e fakamoliaga ‘ka oti he mamahi a tautolu ke he tau aho gahoa, kia fakakatoatoa ni he Atua ha tautolu a fakaakoaga, he fakatumau mo e fakamalolo a tautolu.’ (1 Peteru 5:5-11) Manamanatu ki ai. Ko e olioli fakamatakainaga ha tautolu to tumau tukulagi!

Ko e Moui Fai Kakano

15. Ko e ha ne pehe ai ko e Tau Fakamoli a Iehova kua fai kakano lahi e moui?

¹⁵ Ko e olioli ko e ha tautolu ke he lalolagi matematekelea nei kakano kua ha ha ia tautolu e moui fai kakano. Kua tuku mai ki a tautolu e fekafekauaga kua taute a tautolu mo e falu ke fiafia. (Roma 10:10) Kua moli ko e kotofaaga olioli ke eke mo tau tagata gahua he Atua. Ke he mena nei, ne pehe a Paulo: “Ko hai . . . a Paulo? Ko hai a Apolo? Nakai kia ko e tau fekafekau ne tua ai a mutolu ke he Iki kia tuga he foaki mai e ia kia maua takitokotaha? Ne to e au, ne fakamalū e Apolo, ka ko e Atua ni kua fakatutupu ai. Hanai, kua noa a ia ne to, mo e noa a ia ne fakamalū; ka ko e Atua ni kua fakatutupu ai. Ko ia ne to, mo ia ne fakamalū ne taha a laua; ka e takitokotaha mo e moua hana taui ke lata mo e hana gahua. Ha ko e tau ekegahua a mautolu fakalataha mo e Atua; ko mutolu ko e kaina haia ne to he Atua, ko e fale ne eke he Atua.”​—1 Korinito 3:5-9.

16, 17. Ko e heigoa e tau fakafifitakiaga kua tohi ke fakamoli ko e tau tagata ha Iehova kua fai kakano e olioli he tau momoui?

¹⁶ Kua loga e tau fakafifitakiaga ke tohi ke fakakite ko e fekafekau fakamoli ki a Iehova kua fua ke he moui fai kakano lahi ne fakapuke a tautolu aki e olioli. Tatai ai ke he talahauaga nei: “Ne onoono viko au ke he Fale he Kautu kua puke [ke he aho he fakaholoaga he hana a fakauluaga] mo e kua kitia ai tokovalu he tau tagata he haku a magafaoa kua fakalataha ai, fakalataha mo au mo e hoana haku mo e tokotolu he fanau ha maua mo e ha lautolu a tau kapitiga. . . . Ko e hoana haku mo au kua ha ha i ai moli e moui fiafia mo e fai kakano lahi ke he fekafekau he Atua.”

¹⁷ Kua fakamalolo foki ke mailoga ko e he ha tau tau moui kua maeke he tagata ke fakamalolo ke he moui olioli he fai kakano moli he fekafekauaga ha Iehova. Ma e fakatai, ko e fifine fai tane ne fakaako e kupu moli he Tohi Tapu he kaina nosi kua papatiso ko e taha he Tau Fakamoli a Iehova he 102 e tau tau. Ti fakaoti ai e hana a moui ke he fai kakano olioli he, ‘matakutaku ke he Atua moli, mo e omaoma ke he hana tau fakatufono.’​—Fakamatalaaga 12:13.

Ko e Kolo Nakai Kaumahala

18. Ko e heigoa e mena ka taute ke fakakaumahala e nakai fai amaamanakiaga mo e ke fakalaulahi e olioli ha tautolu?

¹⁸ Ko e olioli ha Iehova ko e kolo nakai kaumahala ma e tau tagata tua fakamoli. Ka e, he ha hai ai e olioli nei kua nakai kakano to nakai fai magaaho momoko a tautolu tuga a lautolu ne omoi a Iesu ke pehe i Ketesemane: “Kua mamahi haku a loto, ke hoko ke he mate.” (Mareko 14:32-34) Manamanatu kua fua mai e ha tautolu a nakai fai amaamanakiaga he kumi ke he tau gahua lotokai. Ti kua lata ni a tautolu ke hiki e ha tautolu a puhala he moui. Kaeke ke hifo ki lalo e olioli ha tautolu kakano ha kua fua nakai lotokai e tautolu e kavega mamafa he tau matagahua faka-Tohiaga Tapu, kua lata ia tautolu ke taute e tau hikihikiaga ke fakatotoka e tupetupe mo e liuaki mai e agaga olioli ha tautolu. Mua atu ke he mena ia, to fakamonuina e Iehova a tautolu aki e olioli kaeke ke kumi e tautolu e fakafiafia ki a ia he fakamamao fakamalolo e tino hala, ko e lalolagi kelea lahi mahaki, mo e Tiapolo.​—Kalatia 5:24; 6:14; Iakopo 4:7.

19. Onoono fefe a tautolu ke he ha kotofaaga ne ha ha ia tautolu ke he fakatokatokaaga he Atua?

¹⁹ Ma e tau kakano ne kua fakatutala a tautolu ki ai, mo e loga atu foki, kua ha ha ia tautolu e olioli lahi mahaki. Po ke ko tautolu ko e tau tagata fakailoa he fakapotopotoaga po ke lagomatai ke he falu vahega he fekafekauaga mau, kua loga e tau mena ha tautolu ke taute ke he gahua he Iki, mo e ke lafi moli he mena nei ke he ha tautolu a olioli. (1 Korinito 15:58) Ko e ha kotofaaga ni ne ha ha ia tautolu he fakatokatokaaga ha Iehova, kia fakaaue a tautolu ki a lautolu mo e fakatumau ke olioli lahi ke taute e fekafekau tapu ke he ha tautolu a Atua fakaalofa mo e fiafia.​—1 Timoteo 1:11.

20. Ko e heigoa e kotofaaga lahi mahaki ha tautolu, mo e ke he heigoa ka iloa moli a tautolu?

²⁰ Mua atu kua fai kakano a tautolu ke olioli ke he ha tautolu a kotofaaga he fua e higoa tokoluga ha Iehova ko e hana Tau Fakamoli. E, kua nakai mitaki katoatoa a tautolu mo e fehagai mo e tau matematekelea loga, ka e kia fakatumau ke manatu e tau fakamonuinaaga homo ue atu ko e Tau Fakamoli a Iehova. Mo e manatu, ko e Matua fakaalofa ha tautolu he lagi to nakai fakakaumahala a tautolu. Kua iloa moli a tautolu to fakamonuina a tautolu kaeke ko e olioli ha Iehova ko e ha tautolu a kolo.

Tali Fefe e Koe?

◻ Ko e heigoa e ‘olioli a Iehova’?

◻ Moua fefe he tau Kerisiano e olioli moli?

◻ Ko e heigoa e falu he tau kakano ko e ha e Tau Fakamoli a Iehova ne olioli ai?

◻ Ko e ha e olioli ha Iehova ko e kolo nakai kaumahala?