Ko e Moto Tagata Tokologa kua Tuku Atu e Fekafekauaga Tapu
“Mo e kua tuku atu e lautolu e fekafekauaga tapu ki a ia ke he aho mo e po he faituga hana.”—FAKAKITEAGA 7:15, NW.
1. Ko e heigoa e maamaaga fakaagaga mamafa lahi ne kua hokotia ki ai he tau 1935?
IA ME 31, he tau 1935, ha ha i ai e olioli lahi mahaki he vahaloto he tau tagata ne o ke he fonoaga he Tau Fakamoli a Iehova i Washington, D.C. I ai ke he magaaho fakapa, kua fakakite maaliali moli ko hai e tau tagata loga lahi mahaki (po ke, moto tagata tokologa) ia Fakakiteaga 7:9, ne kua felauaki foki mo e Tohi Tapu katoa mo e o fakalataha ai mo e tau mena tutupu kua fita he kamata ke kitia.
2. Fakakite mai he heigoa kua iloa e lautolu ne tupu tolomaki e numela ko e nakai ui he Atua a lautolu ke he moui he lagi?
2 Teitei ke ono e tau fahi tapu fakamua, ke he fakafiafiaaga he Kaiaga Afiafi he Iki ke he tau fakapotopotoaga he Tau Fakamoli a Iehova, kua 10,681 ha lautolu ne ha ha i ai (kua magahala ke 1 mai he 6) ne nakai kai mo e inu e tau mena fakatai ko e falaoa mo e uaina, mo e ia lautolu nei kua 3,688 ni e tau tagata gahuahua kua fakapuloa e Kautu he Atua. Ko e ha ne nakai kai e lautolu e tau mena fakatai? Kakano ha ko e tau mena ne ako mai e lautolu he Tohi Tapu, kua iloa e lautolu nakai ui he Atua a lautolu ke he moui he lagi ka e ha ha i ai e taha puhala kua maeke a lautolu ke moua e tau foakiaga fakaalofa a Iehova. Ti ke he fonoaga ia, he magaaho ne huhu e tagata lauga: “Fakamolemole kia tutu hake la a mutolu oti ne kua ha ha i ai e amaamanakiaga ke moui tukulagi ke he lalolagi,” ko e heigoa ne tupu? Kua tokoafe ne tutu hake, ne kua mui ki ai e patipati fiafia loa lahi ha lautolu i ai.
3. Kua fakafou he ha e kakano he fekafekauaga he fonua he fakakite moli e moto tagata tokologa, mo e fefe e logonaaga he Tau Fakamoli ke he mena nei?
3 Ko e tau mena ne ako he tau tagata ne o ke he fonoaga ia kua liu fakafou hake e fakamaloloaga ha lautolu ke he fekafekauaga. Kua eke a lautolu ke fakaaue ko e magaaho nei, fakamua to fakaoti e fakatokaaga tuai, nakai ni ke he tau afe gahoa ka e ke he tau tagata loga lahi mahaki foki ka foaki age e magaaho ke o mai ke he fakatokatokaaga a Iehova ma e puipuiaga he moui, fakalataha mo e amaamanakiaga ke moui tukulagi he lalolagi parataiso. Kua fakamafanatia loto ha e fekau ne kua tuku atu ki a lautolu i ai ne ofania e kupu moli! Ne iloa he Tau Fakamoli a Iehova ko e ha ha i ai e gahua lahi mahaki ke taute—ko e gahua olioli lahi. Ko John Booth, he tau tau fakamui, kua eke mo taha he Kau Fakatufono, ne liu ke manatu: “Kua lahi mahaki e tau mena ne foaki mai he toloaga ia ki a mautolu ke olioli.”
4. (a) Kua fakapotopoto mai lahi moli fefe e moto tagata tokologa tali mai he tau 1935? (e) Ke he puhala fe kua fakakite moli e lautolu he moto tagata tokologa ko e moui e tua ha lautolu?
4 He vaha he tau tau ne mui mai, kua tupu lahi mahaki ki mua e numela he Tau Fakamoli a Iehova. Pete ni he fa mahani mau a lautolu ke matematekelea lahi he fa hohoko e tau favaleaga kelea lahi ki a lautolu he vaha he Felakutaki II he Lalolagi, kua teitei fakalahi tolu e numela ha lautolu he hogofulu tau. Ko e tau tagata fakailoa ne 56,153 ne tuku atu e fakamoliaga ke he tau tagata he tau 1935 kua tupu ki mua, he tau 1994, ke molea e 4,700,000 ha lautolu ne fakapuloa e Kautu ne ha ha he tau motu kua molea e 230. Kua loga lahi mahaki a lautolu nei ne fakatalitali lahi ke fakalataha auloa ia lautolu ka fiafia pauaki a Iehova ke age e moui mitaki katoatoa ke he lalolagi parataiso. Fakatatai ai mo e fuifui mamoe gahoa, kua eke moli na lautolu ko e moto tagata tokologa. Nakai ko e tau tagata a lautolu ne pehe ko e tua a lautolu ka e nakai fakakite e mena ia. (Iakopo 1:22; 2:14-17) Kua foaki e lautolu oti e tala mitaki he Kautu he Atua ke he falu. Ko koe nakai taha he matakau fiafia ia? He eke ko e Fakamoli gahuahua ko e fakamailoga aoga lahi ke fakakite moli, ka e lahi mai foki e mena ne putoia i ai.
‘Tutu ki Mua he Nofoaiki’
5. Ko e heigoa ne fakakite mai ha ko e mena moli ko e ‘tutu ki mua he nofoaiki’ e moto tagata tokologa?
5 He fakakiteaga ne age ke he aposetolo ko Ioane, kua kitia e ia a lautolu ne ‘tutu ki mua he nofoaiki, ki mua foki he Punua mamoe.’ (Fakakiteaga 7:9) He tutu a lautolu ki mua he nofoaiki he Atua, tuga ne fakamaama mai he tala nei, kua fakakite mai ai ko e mailoga katoatoa e lautolu e pule katoatoa a Iehova. Kua lahi e tau mena kua fakalataha ke he mena nei. Ke fakatai ki ai: (1) Kua mailoga e lautolu e hako a Iehova ke fifili ma e hana tau fekafekau e mena kua mitaki mo e mena kua kelea. (Kenese 2:16, 17; Isaia 5:20, 21) (2) Ne fanogonogo a lautolu ki a Iehova he vagahau a ia ki a lautolu mai he hana Kupu. (Teutaronome 6:1-3; 2 Peteru 1:19-21) (3) Kua fakaaue a lautolu kua aoga lahi ke fanogonogo ki a lautolu ne kua age e Iehova e feua leveki ki ai. (1 Korinito 11:3; Efeso 5:22, 23; 6:1-3; Heperu 13:17) (4) Pete ni he nakai mitaki katoatoa, kua lali fakamoli a lautolu ke talia e tau takitakiaga teokaratiki, nakai mo e kono, ka e mai he loto fiafia lahi. (Fakatai 3:1; Iakopo 3:17, 18) Kua ha ha a lautolu i mua he nofoaiki ke tuku atu e fekafekauaga tapu ki a Iehova, ko ia ne fakalilifu lahi mo e fakaalofa lahi a lautolu ki ai. Ko e moto tagata tokologa nei, ha kua “tutu” a lautolu ki mua he nofoaiki ko e fakakiteaga ke he taliaaga Hana ne nofo he nofoaiki. (Fakatatai Fakakiteaga 6:16, 17.) Kua fakave e taliaaga ke he heigoa?
“Kua Tapulu a Lautolu ke he Tau Tapulu Hina”
6. (a) Ko e heigoa e kakano he ‘tapulu he tau tapulu hina’ e moto tagata tokologa? (e) Maeke fefe e moto tagata tokologa ke moua e tuaga tututonu ki mua a Iehova? (i) Kua lata ke hokotia fefe e lauiaaga he tua ke he toto a Keriso ne fakamaligi ke he tau momoui he moto tagata tokologa?
6 Kua pehe e fakamaamaaga he aposetolo ko Ioane ke he mena ne kitia e ia ko e tau faoa he moto tagata tokologa nei “kua tapulu a lautolu ke he tau tapulu hina.” Ko e tau tapulu hina ia kua fakatai ke he tuaga mea, tututonu ha lautolu ki mua a Iehova. Ka e moua fefe e lautolu e tuaga pihia? Kua fita he kitia e tautolu ke he fakakiteaga a Ioane kua tutu a lautolu ‘ki mua foki he Punua mamoe.’ Kua mailoga e lautolu a Iesu Keriso ko ia e “Punua mamoe he Atua, ko ia ke uta kehe e hala he lalolagi.” (Ioane 1:29) Ne logona e Ioane e taha he tau patu he fakakiteaga, ne ha ha he nofoaiki he Atua ne fakamaama mai: “Kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe. Ko e mena ia ha i ai a lautolu ki mua he nofoaiki he Atua.” (Fakakiteaga 7:14, 15) Ke he puhala fakatai, kua unu e lautolu ha lautolu a tau tapulu he fakagahuahua e tua ke he palepale he toto a Keriso. Ne nakai tali iloilo ni mai he manamanatuaga ke he fakaakoaga he Tohi Tapu hagaao ke he lukutoto. Ka ko e fakaaueaga ke he mena ia kua lauia ai e tagata i loto he tau loto; ti ko e “loto” ka fakagahuahua e lautolu e tua. (Roma 10:9, 10) Ko e mena nei ka lauia lahi mahaki e puhala kua fakaaoga e lautolu ha lautolu a tau momoui. He tua, kua tukulele e lautolu a lautolu ni ki a Iehova he fakave ke he poa a Keriso, kua fakamailoga ai e tukuleleaga ia he fakatomo katoa ke he vai, he moui lagotatai moli mo e ha lautolu a tukuleleaga, mo e eke ai ke olioli he moua e fakafetuiaga mitaki mo e Atua. Kua mitaki ha e monuina—ko e mena kua lata lahi ke puipui fakamitaki!—2 Korinito 5:14, 15.
7, 8. Ne lagomatai fefe he fakatokatokaaga a Iehova e moto tagata tokologa ke leveki tumau ha lautolu a tau tapulu ke ua ilaila?
7 Mai he manamanatu fakaalofa ke he tokotoko mitaki tumau ha lautolu, kua fakakite lagaloga he fakatokatokaaga a Iehova e tau aga mo e tau mahani kua maeke ke fakailaila, po ke fakakelea e tapulu ne fakakite moli aki e tagata, pete ni kua fa omonuo, ka e nakai tatai tonu moli ne tagata mo e fakamaamaaga fakaperofeta ia Fakakiteaga 7:9, 10. (1 Peteru 1:15, 16) Ke toko hake e mena kua fita he tohi fakailoa fakamua, ne fakakite lagaloga he Kolo Toko, mai he tau 1941 mo e he mole ai, ko e mahani muikau lahi ke fakamatala ke he falu mo e eke mogoia, he tau magaaho noa, ke taute e tau mahani tuga e feuaki po ke faivao. (1 Tesalonia 4:3; Heperu 13:4) He tau 1947 kua pehi lahi ko e mena taha maka ne fakagahuaaga he tau fakaakoaga a Iehova ke he mauhoana Kerisiano he tau motu oti; pete ni ko e heigoa kua talia he tau mahani fakamotu he tau matakavi, ko lautolu ne fakatumau ke hoana loga kua nakai maeke ke eke mo Tau Fakamoli a Iehova.—Mataio 19:4-6; Tito 1:5, 6.
8 He tau 1973, kua fakakite ke he Tau Fakamoli a Iehova he lalolagi oti kua lata a lautolu oti kana ke fakamamao mai he ha mena kua nakai galo ko e tau gahua kelea, tuga e hagahaga kelea he tapaka, pete ni ko e ha ha i fe a lautolu—nakai ni hokoia he Fale he Kautu po ke he fekafekauaga he fonua ka e pihia foki he tau gahuaaga i tua po ke he falu mena ogoogonoa kua nakai kitia he tau tagata. (2 Korinito 7:1) He tau 1987 ke he tau fonoaga he fahi motu he Tau Fakamoli a Iehova, kua mao lahi e fakatonuaga ke he tau fuata Kerisiano ke maeke ai ke fakatumau e tuaga mea ki mua he Atua, kua lata a lautolu ke puipui ke nakai moui fakatupua. (Salamo 26:1, 4) Kua liu foki ti liu foki e Kolo Toko ke hataki ke he tau vala kehekehe he agaga he lalolagi kakano ha “ko e hanai e oma ke he Atua kua mitaki mo e fakamoli ki mua he Atua e Matua” ne kua fakalataha ki ai ke lata ke fakamamao mai ni e tagata “neke ilaila a ia he lalolagi.”—Iakopo 1:27.
9. Ko hai ka tutu moli kua talia ki mua he nofoaiki he Atua ka mole atu e matematekelea lahi?
9 Ko lautolu ni ne kua omoi he tua ha lautolu a lautolu ke eke e puhala he moui ke mea fakaagaga mo e mahani mea tumau ka ‘tutu ki mua he nofoaiki’ ko e tau fekafekau kua talia he Atua he mole e matematekelea lahi ne hau. Ko e tau tagata nei kua nakai ni kamata ke moui faka-Kerisiano ka e fakatumau ke fakamoli ki ai.—Efeso 4:24.
“Tau Lau Pama ke he Tau Lima ha Lautolu”
10. Ko e heigoa e kakano he tau lau pama ne kua kitia e Ioane ke he tau lima he moto tagata tokologa?
10 Mai he tau mena kua mua atu he moto tagata tokologa, tuga ne kitia he aposetolo ko Ioane, “kua toto foki e tau lau pama ke he tau lima ha lautolu.” Ti ko e heigoa e kakano he mena ia? Kua nakai fakauaua ko e tau lau pama ia kua fakamanatu ki a Ioane e fakafiafiaaga Iutaia he faituga, ko e fakafiafiaaga kua mua atu e olioli he kalena Heperu, ne taute he mole e heleheleaga he tau mafana. Ke felauaki mo e Matafakatufono, kua fakaaoga e tau lau pama, fakalataha mo e tau lala he falu akau, ke taute aki e tau fakamalu ke nonofo ai he vaha fakafiafia. (Levitika 23:39-40; Nehemia 8:14-18) Kua aloalo foki e lautolu ne tapuaki he faituga he magaaho ka lologo e Haleluia (Salamo 113-118). Ko e aloalo he moto tagata tokologa e tau lau pama kua liga fakamanatu foki ki a Ioane e magaaho ne heke mai a Iesu ki Ierusalema ti olioli lahi e moto tagata tokologa ne tapuaki ke aloalo e tau lau pama mo e tau ui atu: “Kia monuina a ia ne haele mai ke he higoa he Iki, ko e Patuiki a ia a Isaraela.” (Ioane 12:12, 13) Ti ko e aloalo he tau lau pama ne fakakite foki mai ai e olioli lahi he moto tagata tokologa ke fakaheke e Kautu a Iehova mo e hana Patuiki fakauku.
11. Kua moua moli he ha he tau fekafekau he Atua e olioli he fekafekau ki a Iehova?
11 Ko e agaga olioli ia kua fakakite he moto tagata tokologa he magaaho nei he fekafekau a lautolu ki a Iehova. Kua nakai kakano e mena nei foki ko e nakai fehagaaki a lautolu mo e tau mena uka po ke nakai mahani a lautolu ke nakai momoko po ke mamahi. Ka ko e loto mamakona ne moua mai he fekafekau mo e fakafiafia a Iehova kua lagomatai ke tuku kehe e tau mena ia. Ti ko e misionare ne fekafekau fakalataha mo e hana tane ke 45 e tau tau i Kuatemala ne tala mai e tau tutuaga holoilalo lahi tuga he vaha tuai ne viko takai ia laua, e gahua uka mo e puhala o fano hagahaga kelea lahi ne eke ko e tau mena ni he moui he lali a laua ke hohoko atu ke he tau maaga Initia mo e fekau he Kautu. Ne pehe hana manatu fakahiku: “Ko e magaaho haia he tau momoui ha maua ne kua fiafia lahi mahaki.” Pete ni kua logona e ia e matematekelea he motua e tino mo e gagao, mai he tau mena fakamui ne tohi e ia he hana fakamauaga tohi fakatagata e tau kupu: “Ko e moui mitaki, kua lahi e palepale.” Ke he lalolagi katoa, kua logona hifo he Tau Fakamoli a Iehova e mena taha ia ke he fekafekauaga ha lautolu.
‘Fekafekauaga Tapu ke he Aho mo e Po’
12. Pete ni ko e aho po ke he po, ko e heigoa kua kitia e Iehova i hinai he lalolagi?
12 Kua tuku atu he tau tagata tapuaki olioli lahi nai ki a Iehova e ‘fekafekauaga tapu ke he aho mo e po he faituga hana.’ (Fakakiteaga 7:15, NW) Kua takai viko he lalolagi oti, e tau miliona tagata ne kau fakalataha ke he fekafekauaga tapu nei. He magaaho ka pouli ai e falu motu mo e kua momohe e tau tagata i ai, ka kua hake e la he falu motu mo e kua lavelave lahi e Tau Fakamoli a Iehova he taute e gahua fakamoliaga. He mavilovilo tumau e fua lalolagi, ke he aho mo e po, kua lologo e lautolu e tau fakahekeaga a Iehova. (Salamo 86:9) Ka ko e fekafekauaga he aho mo e po ne talahau mai ia Fakakiteaga 7:15 ko e mena lahi atu ni fakatagata.
13. Kua fakakite mai fefe he tau kupu Tohiaga Tapu e kakano he fekafekau he “aho mo e po”?
13 Ko e tau tagata ne ha ha he moto tagata tokologa kua tuku atu e fekafekauaga tapu he aho mo e po. Kua kakano kia e mena nei ko e tau mena oti ne taute e lautolu kua onoono ki ai ko e fekafekauaga tapu? Kua moli ko e tau mena kua taute e lautolu, kua ako e lautolu ke taute ke he puhala kua fakalilifu aki a Iehova. (1 Korinito 10:31; Kolose 3:23) Ka e pete ni, ko e “fekafekauaga tapu” kua hagaao ni ke he mena kua putoia tonu e tapuakiaga he tagata ke he Atua. Ke taute e gahua he “aho mo e po” kua fakahaha ke he tumau po ke aga tumau mo e pihia foki ke he tau laliaga loto moli.—Fakatatai Iosua 1:8; Luka 2:37; Gahua 20:31; 2 Tesalonia 3:8.
14. Ko e heigoa ka taute e fekafekauaga ha tautolu ni he fonua ke tatai tonu mo e fakamaamaaga ke he fekafekauaga he “aho mo e po”?
14 He fekafekau a lautolu he lotopa he faituga fakaagaga lahi mahaki a Iehova he lalolagi, kua lali fakalahi a lautolu he moto tagata tokologa ke kau auloa tumau mo e aga tumau ke fano ke he fekafekauaga he fonua. Kua tokologa kua taute ai ko e ha lautolu a foliaga ke fai vala ka taute he fekafekauaga he fonua he tau fahi tapu oti. Kua omoi lahi he falu a lautolu ni he gahua paionia mau po ke paionia lagomatai. Kua fa mahani a lautolu nei ke lavelave lahi he taute e fakamoliaga he tau puhala tu mo e he tau fale koloa he tau magaaho mahegihegi he tau pogipogi. Ke lata mo lautolu ne talia fiafia, kua taute he falu he Tau Fakamoli e tau fakaakoaga Tohi Tapu he tau magaaho mule he po. Kua gahua fakamoliaga a lautolu ka o ke he fale koloa, ka o fenoga, he tau magaaho kai okioki, mo e he hea telefoni.
15. Kua kehe mai he fekafekauaga he fonua, ko e heigoa kua fakalataha ke he fekafekauaga tapu ha tautolu?
15 Ke kau auloa he tau feleveiaaga he tau fakapotopotoaga ko e taha vala foki naia he fekafekauaga tapu ha tautolu; ti pihia foki e gahua kua putoia ke talaga mo e leveki e tau kaina ma e tau toloaga Kerisiano. Fakalataha mo e tau laliaga ke fakamalolo mo e lagomatai e tau matakainaga tane mo e tau matakainaga fifine Kerisiano he taha, ke he tau mena fakaagaga mo e he tino, ke maeke ai ke nonofo tumau he fekafekauaga a Iehova. Kua fakalataha ke he mena nei e gahua he tau Komiti Matutaki Fale Gagao. Ko e tau vahega kehekehe oti kana he fekafekauaga Peteli, pihia foki ke he fekafekauaga ne foaki noa he tagata ni a ia ke gahua he tau fonoaga ha tautolu, ko e tau fekafekauaga tapu oti kana naia. Kua moli, ka uta viko ha tautolu a tau momoui he ha tautolu a fakafetuiaga mo Iehova, kua pukeina a lautolu mo e fekafekauaga tapu. Tuga he talahau mai he tohiaga tapu, kua tuku atu he tau tagata a Iehova e ‘fekafekauaga tapu he aho mo e po,’ mo e kua moua ai e lautolu e olioli lahi mahaki he taute pihia.—Gahua 20:35; 1 Timoteo 1:11.
‘Mai he Tau Motu Oti, Tau Faoa, Tau Tagata Kehekehe, mo e Tau Vagahau Kehekehe’
16. Kua fakakite mai moli fefe ko e moto tagata tokologa ko e o “mai he tau motu”?
16 Mai he tau motu oti kana, kua o mai a lautolu he moto tagata tokologa. Kua nakai fakamailoga tagata e Atua, mo e kua lahi e lukutoto ne foaki mai ia Iesu Keriso ke maluia a lautolu oti kana. He magaaho fakapa ne kua fakakite moli mai faka-Tohiaga Tapu he tau 1935, kua gahuahua ni e Tau Fakamoli a Iehova ke he 115 e tau motu. Ka e he tau atu tau 1990, kua hokotia e kumiaga ma lautolu ne tuga e tau mamoe ke he tau motu kua molea e fakalahi ua.—Mareko 13:10.
17. Ko e heigoa kua taute ke lagomatai e tau tagata he ‘tau faoa, tau tagata kehekehe, mo e tau vagahau kehekehe’ ke fakalataha ke he moto tagata tokologa?
17 Ke moua e tau faoa ke eke mo kau he moto tagata tokologa, kua tuku atu he Tau Fakamoli a Iehova e lagomataiaga nakai ni ke he tau matakau motu ka e pihia foki ke he tau faoa fakamatakavi mo e tau tagata kehekehe mo e tau matakau vagahau kehekehe foki he tau motu ia. Ke maeke ke hokotia ke he tau tagata nei, kua tohi fakailoa he Tau Fakamoli e tau tohi faka-Tohi Tapu ti molea e 300 he tau vagahau. Kua putoia ke he mena nei e fakamahaniaga mo e levekiaga he tau kau gahua fakaliliu kua lata, kua foaki e tau lakau komupiuta kua maeke ke fakagahua ke he tau vagahau nei, mo e taute foki e tau lomiaga. He vaha he lima e tau tau kua mole, kua 36 e tau vagahau, ne vagahau he 98,000,000 tagata, ne kua lafi atu ke he tau vagahau ne fakaliliu. Ko e taha mena foki, kua lali e Tau Fakamoli ke ahi atu a lautolu he tino ni ke he tau tagata nei ke lagomatai a lautolu ke maama e Kupu he Atua.—Mataio 28:19, 20.
“Kua O Mai Mai he Matematekelea Lahi”
18. (a) He magaaho ka kamata e matematekelea lahi, ko hai ka moua e puipuiaga? (e) Ko e heigoa e fakapuloaaga fiafia ka taute he magaaho ia?
18 He magaaho ka fakatoka he tau agelu e tau matagi moumou ne talahau mai ia Fakakiteaga 7:1, nakai ni ko e ‘tupa fakauku hokoia he Atua ha tautolu’ ka logona e puipuiaga a Iehova ka ko e moto tagata tokologa foki ne fakalataha mo lautolu ke he tapuakiaga moli. Tuga he tala age ke he aposetolo ko Ioane, ko lautolu he moto tagata tokologa to ‘o mai he matematekelea lahi’ ko e tau tagata kua hao. Kua lahi ha e kalaga fakaaue mo e fakahekeaga ka tuku atu e lautolu he magaaho ia he tukuogo e lautolu: “Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe”! Mo e to fakalataha oti kana e tau fekafekau fakamoli he Atua i luga he lagi ke lafi ha lautolu a tau leo ki ai he tukuogo: “Amene; kia ha he Atua ha tautolu e fakamonu, mo e fakahekeaga, mo e iloilo, mo e fakaaue, mo e lilifu, mo e mana, mo e malolo tukulagi tukumuitea. Amene.”—Fakakiteaga 7:10-14.
19. Ko e heigoa e gahua olioli lahi ka manako lahi a lautolu ne hao mai ke kau auloa ke taute?
19 Ko e magaaho fiafia lahi ha a ia! Ko lautolu oti kana ne momoui ko e tau fekafekau he Atua moli ni hokoia! Ko e olioli lahi mahaki ha lautolu oti nei, to eke ni ko e fekafekauaga ki a Iehova. To ha ha ai e gahua lahi ke taute—ko e gahua olioli lahi! Ko e lalolagi to fakafaliu ke he Parataiso. Kua afe e tau miliona ha lautolu ne mamate ka fakaliu tu mai mo e fakaako ai mogoia ke he tau puhala a Iehova. Ko e monuina olioli lahi ha a ia ke kau auloa ki ai!
Ko e Heigoa Hau a Tali?
◻ Kua lauia fefe he tau mena tutupu he tau 1935 e fekafekauaga he fonua he Tau Fakamoli a Iehova?
◻ Heigoa kua kitia ai he mena moli ne fakakite mai ko e ‘tutu i mua he nofoaiki’ e moto tagata tokologa?
◻ Kua lata fefe e fakaaueaga ke he toto he Punua mamoe ke lauia e tau puhala momoui ha tautolu?
◻ Ko e heigoa ne fakakite mai he aloalo e lautolu e tau lau pama?
◻ Ne tuku atu fefe he moto tagata tokologa e fekafekauaga tapu he aho mo e po?
[Tau Fakatino he lau 26, 27]
Kua atagia mai he fekafekauaga tapu ha lautolu ko e taute tumau, kua fakamakutu, mo e lali fakamoli