Aoga Lahi e Totou Tohi Tapu he Tau Aho Oti

“Uhoaki e tagata . . . ka ko e fakatufono a Iehova kua fiafia ai a ia, ti [“totou,” NW] a ia ke he tau fakatufono hana ke he aho katoa mo e po.”​—SALAMO 1:1, 2.

1. (a) Ko e heigoa e fakamailoga lahi ne tohi he taha fahi he fale gahua he matapatu lotu he Sosaiete Kolo Toko he lalolagi oti? (e) To moua fefe e tautolu e tau mena aoga lahi kaeke kua tuku ni e tautolu e hatakiaga ia he tau loto?

“TOTOU E KUPU HE ATUA KO E TOHI TAPU HE TAU AHO OTI.” Kua kitia ai e tau kupu nei ne tohi fakamatalalahi he taha fahi he fale gahua he Sosaiete Tohi Tapu mo e Pepa Lotu he Kolo Toko i Brooklyn, New York, ne lolomi Tohi Tapu mo e tau tohi fakamaama Tohi Tapu. Nakai ni ko e tomatomaaga hokoia ma e tau tagata he lalolagi ne kitia e fakamailoga. Iloa he Tau Fakamoli a Iehova kua lata foki a lautolu ke toka loto e mena ia. Ko lautolu ne totou tumau e Tohi Tapu mo e fakagahua fakatagata ai ka moua e tau mena aoga lahi mai he fakaakoaga, fakatonuaga, fakahakoaga, mo e akonakiaga tututonu ne foaki mai ai.​—2 Timoteo 3:16, 17.

2. Pehi lahi fefe he Matakainaga ko Russell e aoga lahi he totou Tohi Tapu?

² Kua fakaaue lahi mahaki e Tau Fakamoli a Iehova ke he tau lagomatai he tau tohi fakaako Tohi Tapu, fakalataha mo e Kolo Toko, ko e tau mena kua fakaaoga tumau e lautolu. Ka kua iloa e lautolu, nakai tautui he tau mena ia e Tohi Tapu. He vaha kua mole he tau 1909, tohia e Charles Taze Russell, ko e peletiteni fakamua he Sosaiete Tohi Tapu mo e Pepa Lotu he Kolo Toko, ke he tau tagata ne totou e mekasini Kolo Toko: “Aua nimo ko e Tohi Tapu e Matapatu he tau Fakaakoaga ha tautolu mo e pete ni ko e mena foaki mai he Atua e tau lagomatai ha tautolu ko e tau ‘lagomatai’ ni e tau mena ia, nakai tautui aki e Tohi Tapu.”

3. (a) Lauia fefe a lautolu ne hagaaki mau ke he “kupu he Atua”? (e) Fa totou mo e fakaako Tohiaga Tapu laga fiha e tau Perea?

³ Kua hokulo mo e malolo lahi e tau Tohiaga Tapu mai he agaga tapu kua nakai fai tohi foki kua tatai ki ai. “Ha ko e kupu he Atua kua moui ia, mo e gahua malolo, kua mua foki hana matila ke he tau pelu oti kana kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau manatu mo e tau fakafiliaga he tau loto.” (Heperu 4:12) Kua mafanatia e navanava he tutaki ko Luka ke he tau tagata Perea he ui ko e “mua e mahani mitaki” ha lautolu. Kua nakai ni fiafia hokoia a lautolu ke fanogonogo ke he kupu ne fakamatala he aposetolo ko Paulo mo e hana hoa ko Sila ka kua ‘kumikumi fakalahi foki ke he tau Tohi ke he taha aho mo e taha aho’ ke iloa tonu ko e fakave he Tohiaga Tapu e tau mena ne fakaako age ki a lautolu.​—Gahua 17:11.

Totou Ai he Tau Aho Oti

4. Fakakite mai fefe he tau Tohiaga Tapu kua lata ke totou laga fiha e tautolu e Tohi Tapu?

⁴ Nakai talahau fakatonu he Tohi Tapu ko e lata a tautolu ke totou ai laga fiha. Ka e pete ia, kua fakamau i ai e fakatonuaga a Iehova ki a Iosua ke ‘totou ai ke he aho katoa mo e po’ ke maeke ai a ia ke mahani iloilo mo e kautu he ­taute hana kotofaaga ne age he Atua. (Iosua 1:8) Kua tala mai ki a tautolu ko e tagata ka pule patuiki i Isaraela tuai kua lata a ia ke totou e tau Tohiaga Tapu “he tau aho oti he hana moui.” (Teutaronome 17:19) Kua tala mai foki: “Uhoaki e tagata kua nakai fano ke he pulega he tau tagata mahani kelea . . . Ka ko e fakatufono a Iehova kua fiafia ai a ia, ti [“totou,” NW] a ia ke he tau fakatufono hana ke he aho katoa mo e po.” (Salamo 1:1, 2) Ko e taha mena foki, ko e Evagelia ne fakamau e Mataio ne tala mai ki a tautolu ko e magaaho ne nakai talia e Iesu Keriso e tau laliaga a Satani ke kamatamata a Ia, ne fatiaki e Ia e tau kupu Tohiaga Tapu Heperu he pehe: “Kua tohi, Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mataio 4:4) Kua lata a tautolu ke moua laga fiha e tau mena kai he tino? He tau aho oti! Kua mua atu foki ke kai mena fakaagaga kakano ha kua lauia ha tautolu a amaamanakiaga ke he moui tukulagi.​—Teutaronome 8:3; Ioane 17:3.

5. Maeke fefe he totou Tohi Tapu ke lagomatai a tautolu ke ‘mahani ke lata mo Iehova’ he magaaho ka hohoko mai ki a tautolu e tau kamatamata ke he tua?

⁵ Kua lata a tautolu oti ke fakamalolo he Kupu he Atua he tau aho oti. Kua hohoko he tau aho oti​—i kaina, he gahuaaga, he aoga, he tau puhala tu, ka o fakatau he fale koloa, he ha tautolu a fekafekauaga​—e tau kamatamata ke he tua ha tautolu. To mahani fefe mogoia a tautolu ke he tau mena nei? To manatu vave nakai e tau poakiaga mo e tau matapatu fakaakoaga he Tohi Tapu? Kua nakai fakaohooho e logonatiaaga ke tua ne tagata ki a ia ni, ne hataki mai e Tohi Tapu: “Hanai, ko ia kua manatu kua tu a ia, kia fakaeneene a ia neke veli.” (1 Korinito 10:12) Ko e totou Tohi Tapu he tau aho oti ka lagomatai a tautolu ke ‘mahani ke lata mo Iehova kia fiafia mai a ia kia tautolu ke he tau mena oti’ ka e nakai toka e lalolagi ke omoi a tautolu ke fakamapita he hana mahani.​—Kolose 1:9, 10; Roma 12:2.

Kua Lata ke Totou Laga Loga e Tohi Tapu

6. Kua aoga lahi he ha ke totou laga loga e Tohi Tapu?

⁶ Kua kehe lahi e totou Tohi Tapu mai he totou tohi tala fakalata. Loga e tau tala fakalata talahaua ne talaga pauaki ke totou lagataha ni; ka oti he iloa he tagata e tala mo e fakahikuaga, ko e na ia nakai aoga foki ke liu totou. Kua kehekehe, pete ni ko e laga fiha he totou e tautolu e Tohi Tapu, kua aoga lahi ki a tautolu he liu foki ke totou. (Tau Fakatai 9:9) Ke he tagata loto matala, kua eke tumau e tau Tohiaga Tapu ke fai kakano fou. Ko e tau perofetaaga hagaao ke he tau aho fakamui kua eke ai ni ke mahomo atu e mahinohino ki a ia mai he maamaaga he tau mena ne kitia mo e logona e ia, mo e mai he tau mena ne tutupu ki a ia ni he tau mahina e kua mole. (Tanielu 12:4) He tupu hana tau mena ne iloa he moui mo e fahia ke kautu mai he tau mena vihi, kua fakaaue lahi e tagata totou Tohi Tapu loto matala he maama e tau fakatonuaga ne kua liga fa totou holo e ia fakamua. (Tau Fakatai 4:18) Kaeke kua gagao kelea lahi a ia, kua eke e tau maveheaga he Tohi Tapu hagaao ke he uta keheaga he mamahi mo e liu maiaga he malolo tino mitaki ke hokulo lahi e kakano ki a ia mai he magaaho fakamua. Ka mamate e tau kapitiga tata lahi mo e taha he magafaoa, kua eke ai ni e maveheaga ke he liu tu mai mo mena uho lahi.

7. To lagomatai he heigoa a tautolu ka talia e tautolu e taha matagahua fou he moui, mo e ko e ha?

⁷ Liga kua totou e koe fakatagata e Tohi Tapu mo e fakagahua hana tau fakatonuaga mai he tau tau loga. Ka e liga talia e koe he magaaho nei e tau matagahua fou he moui. Kua kolo kia a koe ke mau? Ko e eke kane fai a koe mo matua? Kua tuku atu kia e taha matagahua motua po ke fekafekau lagomatai he fakapotopotoaga ki a koe? Kua eke kia a koe ke gahua evagelia mau, ti kua lahi ai e tau magaaho ke gahua fakamatala mo e fakaako atu? Kua aoga lahi ai mogoia ke liu foki totou oti e Tohi Tapu fakalataha mo e tau matagahua fou ia he loto manamanatu!​—Efeso 5:24, 25; 6:4; 2 Timoteo 4:1, 2.

8. Maeke fefe he tau tutuaga kua hiki ke fakakite mai kua lata ke ako fakalahi e tau mena ne kua manamanatu a tautolu kua fita he iloa?

⁸ He vaha kua mole liga fakakite mitaki e koe e tau fua he agaga. (Kalatia 5:22, 23) Ka e liga kua hiki e tau tutuaga ne fehagai mo koe, ti kua lata ai ke ako ke iloa lahi foki e tau fua mahani Atua ia. (Fakatatai Heperu 5:8.) Kua talahau he taha leveki faifano he vaha fakamua, ne kua lata ke toka e fekafekauaga uho hana ke maeke ke leveki hana tau mamatua momotua: “Fa mahani au ke manamanatu kua fakakite mitaki lahi e au e tau fua he agaga. Ka ko e magaaho nei kua logona e au tuga ko e liu au ke kamata mai foki he kamataaga.” To pihia foki ni e tau tane mo e tau hoana ne matematekelea lahi mahaki e tau tokoua he gagao kelea lahi e tino po ke logonaaga he loto, kua kitia ai he leveki ni e lautolu, kua maeke e tupetupe he falu magaaho ke tutupu mai e tau mahani ne fakalolelole aki a lautolu. Ka ko e totou Tohi Tapu tumau e punaaga he fakamafanaaga lahi mahaki mo e lagomatai.

Magaaho Kua Maeke ke Totou Tohi Tapu

9. (a) Maeke ke lagomatai he heigoa e tagata lavelave lahi ke moua taha magaaho ke totou Tohi Tapu he tau aho oti? (e) Kua mua atu he ha e aoga ma e tau motua ke totou e Kupu he Atua?

⁹ Kua moli, ke he tau tagata kua fita he lavelave lahi, kua uka lahi ke moua taha magaaho ata ke taute tumau e taha mena foki. Ka e pete ni, maeke ia tautolu ke moua e tau mena aoga lahi mai he fakafifitakiaga a Iehova. Kua fakakite he Tohi Tapu ko e taute mena a ia he ‘vaha kua kotofa.’ (Kenese 21:2; Esoto 9:5; Luka 21:24; Kalatia 4:4) Kua maeke he fakaaue ko e mena aoga lahi ke totou tumau e Kupu he Atua, ke lagomatai a tautolu ke kotofa e taha magaaho ma e mena ia he ha tautolu a fakatokaaga he tau aho oti. (Efeso 5:15-17) Kua lata lahi e tau motua ke tuku kehe taha magaaho ke totou tumau e Tohi Tapu ke maeke ai e fakatonuaga ka foaki e lautolu ke fakave tonu he tau matapatu fakaakoaga he Tohi Tapu mo e maeke ai e agaga ka fakakite e lautolu ke atagia mai e “iloilo mai luga.”​—Iakopo 3:17; Tito 1:9.

10. Moua fefe e lautolu ne totou Tohi Tapu he tau aho oti e tau magaaho ke totou ai?

¹⁰ Kua tokologa a lautolu ne kautu ke taute e fakaholoaga totou Tohi Tapu fakatagata he ­taute mua ha lautolu a tau totouaga he pogipogi ki, to kamata a lautolu ke taute e tau gahua he aho. Kua kitia he falu kua maeke lahi a lautolu ke taute ai tumau he taha magaaho kehe. Kua lagomatai he tau autiokasete Tohi Tapu (ka maeke ke moua) e tau tagata o puhala tu ke fakaaoga fakamitaki e tau magaaho fenoga, mo e fanogonogo e falu he Tau Fakamoli ke he tau mena ia he taute e tau gahua kaina. Ko e tau fakaholoaga ne gahua mitaki ma e Tau Fakamoli i Europa, Aferika, Amerika Tokelau, Amerika Lalo, mo e tau tagata he Fahi Uta ne fakakite mai he tau lau tohi 31, mo e 32, he tala “Magaaho ne Totou e Lautolu mo e Aoga Lahi ki a Lautolu.”

11. Maeke fefe ke totou Tohi Tapu he tau aho oti pete ni kua tote lahi e tau magaaho ata?

¹¹ Ko e mena kua mua atu e aoga nakai ko e lalahi he tau magaaho ne tuku atu ke he hau a totou Tohi Tapu he ha magaaho, ka ko e aga ke taute mau ai. Liga kua kitia e koe kua mitaki lahi e taui ka taha e tula po ke lahi foki e taimi he tau magaaho oti ka totou ai, kua taute foki falu kumikumiaga mo e hufia lahi e loto he tala ne onoono ki ai. Ka e ata nakai hau a fakatokaaga ke taute tumau e mena ia? Ka e he nakai toka ke loga e tau aho ka mole he nakai totou Tohi Tapu, nakai kia kua mahomo atu e mitaki ka 15 e tau minuti po ke ke 5 foki e tau minuti ka totou he tau aho oti? Kia taute mo fifiliaga hau ke totou ai he tau aho oti. Ka maeke ai lalafi foki ke he totouaga ia e taha kumikumiaga fakahokulo.

Tau Puhala Kehekehe ke Totou Tohi Tapu

12. Ko e heigoa e fakaholoaga totou Tohi Tapu he tau faoa fou he magafaoa Peteli mo e faoa aoga Kiliata?

¹² Kua loga e tau puhala kua maeke ke totou ai e Tohi Tapu. Kua aoga lahi ke totou katoa mai ia Kenese ki a Fakakiteaga. He lalolagi oti kua lata e tau faoa oti he magafaoa Peteli ne fekafekau he matapatu lotu he lalolagi katoa po ke taha he tau la he Sosaiete, ke totou oti e Tohi Tapu he tau fakapa ne fekafekau Peteli a lautolu. (Fa mahani ke tolu ke he lima e tau veveheaga ka putoia i ai, ko e mena falanaki ni ke he loloa ha lautolu, po ke fa ke he lima e tau lau tohi, he aho.) Kua lata e tau faoa ne o he Aoga Tohi Tapu a Kiliata he Kolo Toko ke totou oti foki e Tohi Tapu to tuku e aoga ha lautolu. Kua amaamanaki ko e to lagomatai he mena nei a lautolu ke eke ai e totou Tohi Tapu he tau aho oti ko e vala he tau momoui ha lautolu.

13. Ko e heigoa e folia ne talahau mai kua lata mo e Tau Fakamoli papatiso fou?

¹³ Kua aoga lahi ma e Tau Fakamoli ne papatiso fou ke fakatoka ma lautolu ni e foliaga ke totou e Tohi Tapu katoa. He tau 1975, ko e magaaho ne tauteute a ia ke papatiso, ne huhu e motua ke he tagata tane fuata i Falani ko e fai fakaholoaga totou Tohi Tapu pauaki nakai a ia. Ti tali mai he magaaho ia kua totou e ia e Tohi Tapu katoa he tau tau oti, fa mahani ke taute hana totouaga he tau pogipogi to fano a ia ke gahua. Ti ko e fua, kua pehe a ia: “Kua iloa lahi e au a Iehova. Kua maeke ia au ke kitia ko e tau mena oti ne taute e ia kua matutaki ai mo e hana finagalo mo e puhala hana ka taute ka tutu mai e tau mena fakalavelave. Kua kitia e au ko e tututonu mo e mitaki a Iehova ke he hana tau gahua oti.”

14. (a) Ke maeke ke kamata e fakaholoaga totou Tohi Tapu mau tumau fakatagata, kua lata lahi mo e heigoa? (e) Ko e heigoa ka lagomatai aki a tautolu ke manatu e tau tala he tau tohi oti he Tohi Tapu ka totou e tautolu?

¹⁴ Kua totou oti nakai e koe e Tohi Tapu? Kaeke kua nakai, ko e magaaho mitaki lahi a nei ke kamata. Fakamau hifo taha fakaholoaga pauaki, mo e tapiki mau ki ai. Fifili ko e fiha e tau lau tohi po ke fiha e tau veveheaga ka totou e koe he tau aho oti, po ke fifili ni ko e fiha e lahi he tau magaaho ka fakaaoga e koe mo e he magaaho fe. To nakai oti e Tohi Tapu ka totou he tau tagata oti he taha ne tau, ka ko e mena kua mua atu e aoga ko e totou tumau e Kupu he Atua, ti taute ai pihia he tau aho oti ka maeke ai. He totou e koe e Tohi Tapu, liga to kitia e koe ko e lagomatai lahi ka fakaaoga e tau tohi fakamaama ke hu lahi e manamanatuaga hau he mena ne tala ki ai. Kaeke kua maeke ke moua e Insight on the Scriptures ke he vagahau hau, fakamua to kamata a koe ke totou e taha tohi he Tohi Tapu, liu la ke onoono ke he fakamauaga fakaku he tau matapatu tala he Insight.a Mua atu ke mailoga e tau mataulu tala ne tohi fakamatafua he fakamauaga fakaku. Po ke fakaaoga pihia foki e tau fakamaama laulahi he tohi “All Scripture Is Inspired of God and Beneficial.”b

15. (a) Ko e heigoa e tau lagomataiaga ne talahau mai he tau lau tohi 28 mo e 29 ka lagomatai ke fakamahomo atu hau a totou Tohi Tapu? (e) Ka e he nakai totou holo ni e falu lau tohi, ko e heigoa e mena aoga lahi kua lata a tautolu ke onoono fakalahi ki ai?

¹⁵ Kua aoga lahi ka totou fakapapale e Tohi Tapu, ka e nakai eke ko e tagata totou holo. Kia nakai totou ni ke fiha e lau tohi he tau aho oti ke maeke a koe ke pehe ko e oti e Tohi Tapu he totou e koe he tau tau oti. Tuga ne fakakite mai he puha ko e “Tau Kupu Lagomatai ke Fakatolomaki Aki Hau a Totou Tohi Tapu” (tau lau tohi 28 mo e 29), kua loga e tau puhala kua maeke ia koe ke totou mo e olioli e Tohi Tapu. Pete ni ko e puhala fe ne taute ai e koe, kia ­taute moli a koe ke fagai hau a loto manamanatu mo e hau a loto.

Kia Maama e Kakano he Mena ne Totou e Koe

16. Kua aoga lahi he ha ke fai magaaho ke manamanatu fakahokulo ke he tau mena ne totou e tautolu?

¹⁶ He magaaho ne fakaako hana tau tutaki, ne pehi e Iesu e aoga lahi ke maama e lautolu e mena ne talahau e ia. Kua mua atu, nakai ke iloa noa ni, ka e ‘maama ha lautolu a tau loto’ ke maeke ai a lautolu ke fakagahua ke he tau momoui ha lautolu. (Mataio 13:14, 15, 19, 23) Ko e mena moli he loto he tagata ne kua mua ke he Atua, mo e ko e mena hanai ne hukui he loto. (1 Samuela 16:7; Tau Fakatai 4:23) Ke lafi ke ­taute moli ke maama e tautolu e tau fekau ne talahau mai he Tohi Tapu, kua lata ia tautolu ke manamanatu fakahokulo ke he tau mena ia, manamanatu fakalahi kua lata ke fakagahua fefe e tau mena ia ke he tau momoui ni ha tautolu.​—Salamo 48:9; 1 Timoteo 4:15.

17. Ko e heigoa falu fahi kua liga maeke ia tautolu ke manamanatu fakahokulo ke he tau mena ne totou e tautolu he tau Tohiaga Tapu?

¹⁷ Lali fakalahi ke kitia moli e tau matapatu fakaakoaga he tau fakamauaga tala he Tohi Tapu ke maeke ia koe ke fakagahua e tau mena ia he tau tutuaga ne fehagai mo koe. (Fakatatai Mataio 9:13; 19:3-6.) He totou mo e manamanatu fakahokulo a koe ke he tau mahani homo ue atu a Iehova, fakaaoga e magaaho ia ke ati hake hau a fakafetuiaga fakatagata mo ia, ke tupu hake ia koe e maamaaga ke he ofaofa moli he mahani Atua kua malolo lahi. Ka totou e koe e tau fakamauaga tala ke he finagalo a Iehova, manamanatu ke he tau mena kua maeke ia koe ke taute ke gahua fakalataha mo e tau mena ia. Ka totou e koe e fakatonuaga pauaki, ka he nakai pehe hifo ki a koe ni, ‘Iloa e au e mena ia,’ ka e huhu, ‘Taute nakai e au e mena ne talahau mai?’ Kaeke kua pihia, huhu hifo ki a koe ni, ‘Ko e heigoa e tau puhala kua maeke ia au ke “au atu he fakamalolo” ke taute ai?’ (1 Tesalonia 4:1) He ako e koe e tau mena kua lata he Atua, kia mailoga foki e tau fakafifitakiaga he tau tagata moli he Tohi Tapu ne kua felauaki e tau momoui ha lautolu mo e tau mena nei kua lata mo lautolu ne nakai. Manamanatu ko e ha ne tutuli ai e lautolu e tau puhala ia mo e taui ne moua. (Roma 15:4; 1 Korinito 10:11) Ka totou e koe e tala ke he moui a Iesu Keriso, manatu ko Iesu e tagata ne age e Iehova e pule patuiki ke he lalolagi oti; fakaaoga e magaaho ia ke ati hake ia koe e manako ke he lalolagi fou he Atua. Kia fuafua foki e tau puhala kua maeke ia koe ke fifitaki katoatoa ke he Tama he Atua.​—1 Peteru 2:21.

18. Maeke fefe ia tautolu ke fakalagotatai e totou Tohi Tapu mo e ha tautolu a fakaaogaaga he tau tala fakaako ne puhala mai he “fekafekau fakamoli mo e loto matala”?

¹⁸ Kua moli, nakai lata ke tautui e totou Tohi Tapu hau a fakaaogaaga he tau tala fakaako kua mua atu e mitaki ne puhala mai he “fekafekau fakamoli mo e loto matala.” Ko e vala foki ia ko e tau mena foaki a Iehova​—ko e mena uho lahi mahaki. (Mataio 24:45-47) Kia eke moli ko e mena lahi he moui hau ke totou e Kupu he Atua he tau aho oti. Kaeke kua maeke ai, “TOTOU E KUPU HE ATUA KO E TOHI TAPU HE TAU AHO OTI.”

[Tau Matahui Tala]

To Tali Fefe e Koe?

◻ Kua aoga lahi he ha ke totou taha vala he Tohi Tapu he tau aho oti?

◻ Kua lata he ha a tautolu ke totou lagaloga e Tohi Tapu?

◻ Ke he hau ni a fakatokaaga, ha fe e magaaho kua mitaki ke totou Tohi Tapu he tau aho oti?

◻ He totou lagaloga e koe e Tohi Tapu, ko e heigoa kua maeke ke fakakehekehe aki hau a fakaholoaga?

◻ Kua aoga lahi he ha ke manamanatu fakahokulo ke he tau mena ne totou e tautolu?

[Puha he lau 28, 29]

Tau kupu lagomatai ke fakatolomaki aki hau a totou Tohi Tapu

(1) Tokologa e tau tagata ne totou e tau tohi he Tohi Tapu tuga ni kua lomi fakaatuatu tuai, mai ia Kenese ke he Fakakiteaga. Kua maeke foki ia koe ke totou fakapapahi a lautolu ke he vaha ne tohi ai. Kia manatu ko e 66 e tau tohi mai he agaga ne pota fakalataha i loto he Tohi Tapu, ko e tokaaga tohi mai he Atua. Ke fakakehekehe aki, liga to manako a koe ke totou falu he tau tohi ne tala ke he fakamauaga tala tuai, ti holo atu ke he falu ne kua lahi e tau perofetaaga i ai, ti mui mai ai e falu he tau tohi fakatonu, ka e nakai mui ni fakatonu ke he tau lau tohi ne tuku fakaatuatu tuai. Kia nakai galo e tau mena ne totou e koe, mo e kia totou moli e Tohi Tapu katoa.

(2) Ka mole he totou e koe e taha maaga he tau Tohiaga Tapu, huhu hifo a koe ki a koe ni, ko e heigoa ne fakakite mai hagaao ki a Iehova, hana finagalo, hana puhala ne taute ai e tau mena; maeke fefe ke lauia hau a moui; maeke fefe ia koe ke fakaaoga ai ke lagomatai e taha tagata.

(3) Fakaaoga mo fakatonuaga e fakatino ne fakatautonu ke he “Tau Mena Tutupu Lalahi he Moui a Iesu he Lalolagi” ne lomi i lalo he mataulu tala “Iesu Keriso” i loto he Insight on the Scriptures (i loto foki he “All Scripture Is Inspired of God and Beneficial”), ti totou foki e tau fakamauaga tala ne tatai ki ai he falu maaga tohi he tau Evagelia. Mo e fakalaulahi atu e mena nei he fakaati e tau maaga tohi he tohi The Greatest Man Who Ever Lived.

(4) Ka totou ai e koe e Gahua he Tau Aposetolo he fakamauaga tala ke he moui mo e fekafekauaga a Paulo, kia totou foki e tau tohi mai he agaga tapu ne matutaki ki ai. Ti ka talahau mai e tau taone po ke tau fahimotu ne fakamatala ai a Paulo, kia fakamaoki he mena ia mo e totou e tau tohi ne tohi e ia he magaaho fakamui ke he tau faoa Kerisiano he tau matakavi ia. Kua lagomatai lahi foki ke muitua ke he hana tau fenoga he onoono ke he mepe, tuga ne ta i tua he tau lau tohi fakahiku he New World Translation.

(5) Fakalataha ke fakatauo mo e hau a totouaga ia Esoto ke he Teutaronome, totou foki e tau tohi ne tohi ke he tau Heperu ke moua e tau fakamaamaaga ke he tau fakatokaaga he tau perofetaaga loga. I lalo he “Matafakatufono” i loto he Insight on the Scriptures, onoono ke he fakatino ne fakatautonu ke he “Falu Mena Pauaki he Maveheaga he Matafakatufono.”

(6) Ka totou e tau tohi fakaperofetaaga, fakaaoga taha magaaho ke liu onoono ke he tau fakamauaga tala tuai he tau kalakala ne matutaki ki ai he Tohi Tapu. Ke fakatai ki ai, ka totou e tohi a Isaia, liu ke onoono ke he mena ne talahau mai he taha mena kehe hagaao ke he tau patuiki ko Usia, Iotamo, Ahasa, mo Hesekia, ne talahau mai ia Isaia 1:1. (2 Tau Patuiki, tau veveheaga 15-20; 2 Nofoaga he Tau Patuiki, tau veveheaga 26-32) Po ke ka totou a Hakai mo Sakaria, fakaaoga taha magaaho ke liu onoono ke he mena ne toka i loto he tohi a Esera.

(7) Fifili taha tohi mai he Tohi Tapu, totou e taha maaga i ai (liga ko e veveheaga), ti taute mogoia e kumikumiaga, he fakaaoga e Watch Tower Publica­tions Index po ke tapakiaga fakakomupiuta he Watchtower Library kaeke kua maeke ke moua ke he hau a vagahau. Fakagahua ke he moui hau e tau mena ne tala ki ai. Fakaaoga ke he tau lauga mo e ke he fekafekauaga he fonua. Ti fakaholo atu foki ke he taha maaga.

(8) Kaeke kua fai tohi fakailoa he Kolo Toko ne tala mai e tau fakamaamaaga ke he taha tohi po ke taha maaga he tohi he Tohi Tapu, liu ke kikite tumau ki ai ka totou e koe e vala ia he Tohi Tapu. (Ke fakatai ki ai: ke he Lologo a Solomona, The Watchtower, Tesema 1, 1957, tau lau tohi 720-34; ke he Esekielu, “The Nations Shall Know That I Am Jehovah”​—How?; ke he Tanielu, “Your Will Be Done on Earth” po ke Our Incoming World Govern­ment​—God’s Kingdom; ke he Hakai mo e Sakaria, Paradise Restored to Mankind​—By Theocracy!; ke he Fakakiteaga, Revelation​—Its Grand Climax At Hand!)

(9) He totou e koe, kikite foki ke he falu mena ne tatai ki ai. Mailoga e tau vala tohi ne 320 he Tohiaga Tapu Heperu ne fatiaki tonu mai he tau Tohiaga Tapu Heleni faka-Kerisiano mo e tau teau he falu vala tohi ne talahau i ai, mo e tau puhala ke fakagahua aki foki. Kua tuhi e tau mena ne tatai ki ai ke he tau fakakatoatoaaga he tau perofetaaga ne fakamau he Tohi Tapu, ke he tau tala fakamatafeiga ke he tau tagata mo e tau maaga motu, mo e ke he tau manatu ne tatai tonu ki ai kua liga to fakamaama aki e tau fakailoaaga ne kua liga uka a koe ke maama.

(10) Fakaaoga e Maaga Lalafi Fakamaama he New World Translation, kaeke kua maeke ke moua ke he vagahau hau, fakaati e tau matahuitala mo e tau vala tala fakamaama i tua ne matutaki ke he mena ne totou e koe. Kua fakakite mai he tau mena nei e mena ne fakave ki ai e tau talahauaga ne fakaaoga mo e falu puhala aoga lahi foki ne kua maeke ke fakaliliu aki e tau fakailoaaga. Ti liga to manako foki a koe ke fakatatai e tau talahauaga he falu kupu mo e taha liliuaga kehe foki he Tohi Tapu.

(11) He oti he totou e koe e tau veveheaga, tohi fakaku hifo e tau matapatu manatu he veveheaga ia. Fakaaoga ai mo matapatu ka liu ke onoono mo e manamanatu fakahokulo ki ai he magaaho ne toe.

(12) He totou e koe e Tohi Tapu, fakamailoga e tau kupu tohi fifili ne kua manako lahi a koe ke manatu, po ke lagaki a lautolu ke he tau tama laupepa mao mo e toka ai he mena kua maeke ia koe ke kitia he tau aho oti. Ako manatu a lautolu; manamanatu fakahokulo ke he tau mena ia; mo e fakaaoga a lautolu. Kia nakai lali ke loga e tau mena ka ako manatu he magaaho taha, liga taha po ke ua he tau fahi tapu oti; ti liu foki fifili falu he magaaho ne toe ka totou e koe e Tohi Tapu.

[Tau Fakatino he lau 27]

Totou nakai e koe e Tohi Tapu po ke fanogonogo ke he tepi Tohi Tapu he tau aho oti?