Omoi he Heigoa a Koe ke Fekafekau ke he Atua?

“Kia fakaalofa atu foki a koe ke he Iki hāu a Atua mo e hāu a loto katoa, mo e hāu a manatu katoa, mo e hāu a malolo katoa.”​—MAREKO 12:30.

1, 2. Ko e heigoa e tau mena fulufuluola ne kua fakakatoatoa ha ko e gahua fakamatala?

KO E mena nakai iloa moli e totogi he peleoafi he onoono noa ni hokoia ki fafo he motoka. Liga kua fulufuluola a fafo he vali, mo e liga ko e talagaaga momole ne futiaki e tagata ke fia fakatau; ka kua mua atu e aoga lahi he tau mena ne nakai mukamuka ke kitia​—ko e enesini ne holo ai e motoka, fakalataha mo e tau valavala oti ne fakagahua aki ai.

² Kua tuga ni e fekafekauaga he Kerisiano ke he Atua. Kua lahi mahaki e tau gahua mahani Atua he Tau Fakamoli a Iehova. He tau tau oti, kua molea e piliona he tau tula ne fakamole ke he gahua fakamatala he tala mitaki he Kautu he Atua. Ke lafi ki ai, kua loga e tau miliona he tau fakaako Tohi Tapu ne taute, mo e ko lautolu ne kua papatiso kua hoko e numela ke he tau teau he tau afe. Kaeke ko koe e tagata fakapuloa he tala mitaki, kua fai vala a koe ne taute​—pete ni foki kua tuga ko e tote​—he tau fakamauaga numela kumikumi fulufuluola nei. Mo e kia iloa moli e koe “ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”​—Heperu 6:10.

3. Ko e heigoa foki kua fakapiki ke he tau gahua ne kua lata lahi e tau Kerisiano ke kapaletu ki ai, mo e ko e ha?

³ Ka e pete ni, ko e mena uho moli he fekafekauaga ha tautolu​—fakaauloa po ke fakatakitokotaha​—kua nakai ni fuafua hokoia ke he tau numela. Tuga ne tala age ki a Samuela, “ha kua kitekite e tagata ke he tino, ka e kitekite a Iehova ke he loto.” (1 Samuela 16:7) E, ko e mena ne ha ha i loto ia tautolu ne kua mua ke he Atua. Moli, kua aoga lahi e tau gahua. Ko e mena fakafulufuluola he tau gahua mahani Atua e fakaakoaga a Iehova mo e futiaki mai e tau tagata ke eke mo tau tutaki. (Mataio 5:14-16; Tito 2:10; 2 Peteru 3:11) Ka e, nakai fakakite oti mai he tau gahua ha tautolu e tala katoa. Kua fai mena moli a Iesu ne liu tu mai ke kapaletu ke he fakapotopotoaga a Efeso​—pete ni kua mitaki e fakamauaga he tau gahua mitaki ha lautolu. “Kua iloa e au hau a tau gahua,” he tala age e ia ki a lautolu. “Ka kua iloa e au taha mena kia koe, ha kua toka e koe hau a fakaalofa fakamua.”​—Fakakiteaga 2:1-4.

4. (a) Maeke fefe ha tautolu a fekafekauaga ke he Atua ke taute noa ni ha kua lata? (e) Kua lata he ha ke onoono hifo ne tagata ki a ia ni?

⁴ Kua ha ha ai e mena hagahaga kelea. Mai he lahi e vaha kua mole, mena maeke ha tautolu a fekafekauaga ke he Atua ke tuga kua taute noa ni he lata. Taha e fifine Kerisiano fai tane ne fakamaama mai pehe: “Fa fano au ke he fekafekauaga, fano ke he tau feleveiaaga, fakaako, liogi​—ka e taute noa ni e au, nakai logonatia ha mena ki ai.” Moli, kua lata ke nava ke he tau fekafekau he Atua ka eketaha a lautolu pete kua logona hifo e lautolu ko e “palu hifo” po ke “tuku ki lalo.” (2 Korinito 4:9; 7:6, NW) Ka e pete ni, ka tunono ha tautolu a tau gahua Kerisiano, kua lata tuai a tautolu ke tuga ke he vagahau fakatai, ke onoono ki loto ke he enesini. Ko e tau peleoafi mitaki lahi ko e mena lata foki ni he tau magaaho ke taute ka malona; ti kua lata pihia foki e tau Kerisiano oti kana ke taute tumau e onoono hifo ki a ia ni. (2 Korinito 13:5) Kua maeke he falu ke kitia ha tautolu a tau gahua, ka e nakai maeke ia lautolu ke kitia ko e heigoa ne omoi aki ha tautolu a tau gahua. Kua lata ai mogoia a tautolu takitokotaha, ke manamanatu lahi ke he huhu: ‘Ko e heigoa ne omoi aki au ke fekafekau ke he Atua?’

Tau Mena Fakalavelave ke he Omoiaga kua Tonu

5. Ko e heigoa e poakiaga ne tala mai e Iesu kua mua?

⁵ He magaaho ne huhu atu ko e ha e fe mai he tau matafakatufono ne age ke he tau Isaraela kua mua, ne fatiaki mai e Iesu e poakiaga ne onoono, nakai ke he tauteuteaga i fafo, ka e ke he omoiaga he loto: “Kia fakaalofa atu foki a koe ke he Iki [Iehova] hāu a Atua mo e hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa. Ko e poaki haia kua mua.” (Mareko 12:28-30) Ti kua fakakite moli ai e Iesu e mena kua lata ke omoi aki e tau gahua ha tautolu he fekafekauaga ke he Atua​—ko e fakaalofa.

6, 7. (a) Ko e heigoa e puhala kelea lahi ne moumou aki e Satani e magafaoa, mo e ko e ha? (2 Korinito 2:11) (e) Maeke fefe he puhala ne feaki hake e tagata ke lauia hana aga ke he pule malolo faka-Atua?

⁶ Kua manako a Satani ke fakalavelave ha tautolu a iloilo ke fakagahua e mahani aoga lahi he fakaalofa. Ke fakakatoatoa ai e mena nei, taha e puhala ne fakaaoga e ia ko e moumouaga he magafaoa. Ko e ha? Kakano ha ko e kavi hanei ka iloa mua e tautolu ti toka mau lahi he tau loto e fakaalofa. Kua iloa lahi e Satani e matapatu fakaakoaga faka-Tohi Tapu ko e tau mena ne ako he vaha tote kua aoga lahi he vaha lalahi. (Tau Fakatai 22:6) Kua muikau lahi ai e tau laliaga hana ke fakakelea ha tautolu a manamanatuaga he fakaalofa he vaha tote. Ha ko e “atua he lalolagi nai,” kua kitia e Satani, kua aoga lahi ke he hana mena ne loto ki ai ka tokologa e tau tagata ne feaki hake he tau loto kaina nakai fai fakaalofa ka e ko e tau male taulatau, mahani ita lahi, mo e vagahau kelea.​—2 Korinito 4:4; Efeso 4:31, 32; 6:4; Kolose 3:21.

⁷ Kua kitia ai he tohi Making Your Family Life Happy ko e puhala ne taute he matua tane hana matagahua fakamatua “ka lauia lahi e aga he fanau hana he magaaho i mua ke he tau pule malolo he tagata mo e Atua.”a Kua talahau he taha tagata tane Kerisiano ne feaki hake i lalo he pule mao lahi he matua tane: “Mukamuka lahi ki a au ke omaoma ki a Iehova; ka ke fakaalofa ki a ia ko e mena uka lahi mahaki.” Kua moli, kua aoga lahi ke omaoma, ha ko e ke he tau mata he Atua “ko e fanogonogo kua mua hana mitaki ke he poa.” (1 Samuela 15:22) Ka e maeke he heigoa ke lagomatai a tautolu ke mua mai he omaoma noa mo e eke ko e fakaalofa ki a Iehova e omoiaga malolo he tapuaki ha tautolu?

“Kua Omoomoi a Mautolu he Fakaalofa a Keriso”

8, 9. Kua lata ke fakalagalaga fefe he lukutoto a Iesu ha tautolu a fakaalofa ki a Iehova?

⁸ Ko e fakaaueaga ke he poa lukutoto a Iesu Keriso e fakaohoohoaga lahi mahaki ke fakagahua mai he loto katoa e fakaalofa ki a Iehova. “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia.” (1 Ioane 4:9) He magaaho ka maama e tautolu mo e fakaaue ki ai, to futiaki mai he gahua fakaalofa nai e tau mahani fakaalofa. “Kua fakaalofa a tautolu, ha ko e mena ne fakamua mai hana [Iehova] fakaalofa kia tautolu.”​—1 Ioane 4:19.

⁹ Kua manako lahi a Iesu ke talia hana kotofaaga, ke eke mo Fakamouiaga he tagata. “Ko e mena foki hanai kua iloa ai e tautolu e fakaalofa he tuku atu e ia hana moui ke hukui aki a tautolu.” (1 Ioane 3:16; Ioane 15:13) Kua lata e poa-foaki noa he fakaalofa a Iesu ke futiaki mai e tali fakaaue lahi ia tautolu. Ke fakatai: Kaeke kua fakahao mai he taha a koe he tomo. Fano ni ka koe ki kaina, fakamomo, mo e nimo e mena ia? Moli nakai pihia! Kua fakaaue lahi a koe ke he tagata ne fakahao a koe. Ko e tagata ia moli ne moui ai agaia a koe. Kua tote mai kia e kaitalofa ha tautolu ke he Atua ko Iehova mo Iesu Keriso? Ka nakai fai lukutoto, kua eke oti a tautolu takitokotaha ke tomo he hala mo e mate. Ka e, kakano ha ko e gahua fakaalofa lahi mahaki nei, kua ha ha ai ia tautolu e amaamanakiaga ke he moui tukulagi he lalolagi parataiso.​—Roma 5:12, 18; 1 Peteru 2:24.

10. (a) Maeke fefe ia tautolu ke taute e lukutoto mo mena fakatagata? (e) Kua omoomoi fefe he fakaalofa a Keriso a tautolu?

¹⁰ Kia manamanatu fakalahi ke he lukutoto. Kia fakaaoga e koe ki a koe ni, tuga ne taute e Paulo: “Ka ko e moui kua moui ai nai au ke he tino, kua moui ai au ke he tua ke he Tama he Atua, ko ia ne fakaalofa mai kia au, mo e foaki mai e ia a ia ke hukui aki au.” (Kalatia 2:20) Ko e manamanatu fakalahi pihia ka ati hake e omoiaga mai he loto katoa, ha ko e mena tohia a Paulo ke he tau Korinito: “Ha kua omoomoi a mautolu he fakaalofa a Keriso . . . Ne matulei foki a ia ke hukui aki e tau tagata oti, kia nakai omaoma a lautolu kua momoui kia lautolu ni, ka ko ia ne matulei, mo e liu tu mai foki ke hukui aki a lautolu.” (2 Korinito 5:14, 15) Kua pehe e The Jerusalem Bible ko e “lofia lahi a tautolu” he fakaalofa a Keriso. Ka manamanatu a tautolu ke he fakaalofa a Keriso, kua futiaki ni a tautolu, kua amotia lahi mahaki, mo e lofia foki. Kua amotia ha tautolu a tau loto mo e omoomoi ai a tautolu ke gahua. Tuga he fakamaama mai he liliuaga a J. B. Phillips “ko e punaaga he tau gahua oti ha tautolu ko e fakaalofa ki a Keriso.” To nakai tupu mai he ha faga omoiaga kehe e tau fua ka mau tumau ia tautolu, tuga ne fakakite mai he fakafifitakiaga he tau Farasaio.

“Kia Kalo Kehe a mo e Mena Fakaea he Tau Farasaio”

11. Fakamaama mai e tau aga he tau Farasaio ke he tau gahua fakalotu.

¹¹ Kua fakagalo he tau Farasaio e fiafia he tapuakiaga ke he Atua. He nakai pehi lahi e fakaalofa ke he Atua, ne pehi lahi e lautolu e tau gahua ko e kakau fuafua he moui fakaagaga. Kua mao lahi a lautolu ke he tau mena fakamatafeiga he tau poakiaga ti kua eke a lautolu ke tuga ko e tututonu mai fafo, ka e ko loto “kua puke ke he tau huimotua he tau tagata mamate, mo e tau mena kelea oti.”​—Mataio 23:27.

12. He mole he fakamaulu e Iesu e tagata, fakakite fefe he tau Farasaio ni a lautolu ko e loto goagoa?

¹² Kua taha ai e magaaho ne hofihofi lahi e fakaalofa a Iesu ti fakamaulu e tagata ne mate hana lima. Kua fiafia ha e tagata nei he amanaki ni ti maulu e gagao ne kua nakai taumaleku ko e fa fakamamahi e tino mo e loto! Ka e nakai olioli fakalataha e tau Farasaio mo ia. Kua kehe, he tuhituhi na lautolu ke he tau mena ikiiki​—ko e taute e Iesu e lagomatai he aho Sapati. He lavelave lahi e tau loto ha lautolu ke he tau puhala ke fakagahua ai e Matafakatufono, kua galomoki ai ke he tau Farasaio e agaga moli he Matafakatufono. Kua nakai ofo ai he “hukia hana [Iesu] a finagalo ha kua mao ha lautolu a tau loto”! (Mareko 3:1-5) Ke lafi ki ai, ne hataki a ia ke he hana a tau tutaki: “Kia kalo kehe a mo e mena fakaea he tau farasaio mo e tau satukaio.” (Mataio 16:6) Kua fakatapakupaku ai e tau gahua mo e tau aga ha lautolu i loto he Tohi Tapu ke lagomatai aki a tautolu.

13. Ko e heigoa e fakaakoaga ma tautolu ne moua mai he fakafifitakiaga he tau Farasaio?

¹³ Kua fakaako mai he fakafifitakiaga he tau Farasaio ki a tautolu kua lata ke ha ha ia tautolu e onoonoaga kua fai kakano mitaki ke he tau gahua. Kua moli, ko e mena aoga lahi e tau gahua, ha kua ‘mate e tua kaeke kua noa mo e tau gahua.’ (Iakopo 2:26) Pete ni, na fa hagahaga e tau tagata nakai mitaki katoatoa ke fakafili e falu ha ko e tau mena ne taute e lautolu ka e nakai ko e tau tagata fefe a lautolu. He falu magaaho, liga fa fakafili pihia foki ne tautolu a tautolu ke he puhala nei. Kua liga to matua e makutu ha tautolu ke he tau gahua, tuga kaeke ko e mena fakaagaga na ia ha tautolu. Kua maeke ia tautolu ke nimo kua aoga lahi ke onoono hifo ke he omoomoiaga he tau loto ha tautolu. (Fakatatai 2 Korinito 5:12.) Kua liga eke a tautolu ke mao kikiha ke he tau mena fakamatafakatufono oti ti kua ‘lehu kehe e namu, ka kua folofua e kamela,’ he omaoma ke he mena ne tohi ka e holifono hana kakano moli.​—Mataio 23:24.

14. Ko e ha e tau Farasaio kua tuga e liu kapiniu inu po ke kapiniu lapalapa kiva?

¹⁴ Ko e mena ne nakai maama he tau Farasaio ko e ka fakaalofa moli e tagata ki a Iehova, to mui mai ni e mahani Atua fakamoli. Ko e mena hau i loto e tau mena fakaagaga ki fafo. Kua akonaki lahi e Iesu e tau Farasaio ha kua hepehepe ha lautolu a tau manamanatu ke he mena nei, he pehe: “Oi fakaalofa kia mutolu e tau tohikupu, mo e tau farasaio, ko e tau tagata fakavai! ha kua fakamea e mutolu e tua he kapiniu mo e kumete, ka ko loto kua puke namo ke he fofo mena mo e mahani kelea. Ko koe na, e farasaio matapouli, kia fakamea fakamua e koe e liu he kapiniu mo e kumete, kia mea foki mo e tua.”​—Mataio 23:25, 26.

15. Fatiaki mai la e tau fakafifitakiaga ne fakakite ko e molea matua e kitiaaga a Iesu ke he tau mena kitia.

¹⁵ Ko fafo he kapiniuinu, he kapiniu lapalapa, ti pihia foki he fale, kua tote e mena ne fakakite mai. Kua nava lahi e tau tutaki a Iesu ke he fulufuluola he faituga a Ierusalema, ko e mena ne ui e Iesu “ko e ana he tau tagata fofo mena” kakano ha ko e tau mena ne taute i fale. (Mareko 11:17; 13:1) Kua tatai moli ai e faituga mo e tau miliona ne pehe ko e tau Kerisiano, tuga ne fakakite mai he fakamauaga a Kerisitenitome. Kua pehe a Iesu ko e to fakafili e ia e falu ne taute e “tau mana loga” mai he hana higoa, ko ‘lautolu ne eke e tau mahani kelea.’ (Mataio 7:22, 23) Ti kua mua atu e kehe, he pehe a ia hagaao ke he fifine takape ne foaki e tama tupe tote lahi ke he faituga: “Kua lahi ni e mena he fifine takape na kua nofogati kua tolo ke he mena kua toka ai e tau tupe . . . Ka ko ia kua nofogati, kua tolo e ia hana a tau mena oti ne toka ia ia, ko e hana tau mena oti ke moui ai.” (Mareko 12:41-44) Kua kehekehe ka e tau fakafiliaga? Nakai pihia. He tau tutuaga ua, kua atagia mai ia Iesu e onoonoaga a Iehova. (Ioane 8:16) Kua kitia e ia e tau omoiaga he loto ke he tau gahua mo e fakafili ke lata ki ai.

“Kua Fakalata ke he Malolo ha Lautolu Takitokotaha”

16. Kua nakai lata he ha a tautolu ke fakatatai tumau ha tautolu a tau gahua mo e he taha Kerisiano?

¹⁶ Kaeke kua tonu e tau omoiaga he tau loto ha tautolu, kua nakai lata ke taute tumau e tau fakatataiaga. Ma e fakatai, kua tote e mena ka moua mai he lali ke fetoko ke tatai e tau tula ne fakamole he taha Kerisiano he fekafekauaga po ke tatai foki mo e tau mena ne taute he tagata ia he gahua fakamatala. Kua pehe a Iesu ke fakaalofa ki a Iehova mo e hau a loto katoa, loto manamanatu, solu, mo e malolo​—nakai ke he taha tagata. Ko e mena kehekehe e tau iloilo, malolo, mo e tau tutuaga he tau tagata takitokotaha. Kaeke kua fakaata he tutuaga hau, to omoomoi he fakaalofa a koe ke fakamole lahi e tau magaaho ke he fekafekauaga​—liga he eke foki mo fekafekau paionia gahua mau. Kaeke ko e taufetului a koe mo e gagao, ti kua liga tote e magaaho ne fakamole e koe ke he fekafekauaga mai he mena ne loto a koe ki ai. Kia nakai fakalolelole. Ko e mena nakai fuafua e mahani fakamoli ke he Atua mai he tau tula. He mea e tau omoiaga, to fai kakano mitaki a koe ke olioli. Kua tohia e Paulo: “Ka kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha.”​—Kalatia 6:4.

17. Mai he hau a puhala vagahau, talahau fakaku la e tala fakatai ke he tau taleni.

¹⁷ Kia manamanatu ke he tala fakatai a Iesu ke he tau taleni, ne fakamau ia Mataio 25:14-30. Kua hea he tagata tane ne kua teitei ke fano fenoga ke he taha motu e hana tau tupa mo e age hana tau koloa ki a lautolu ke leveki. “Kua age e ia e lima a taleni ke he taha, ka e ua ke he taha, ka e taha ke he taha; kua fakalata ke he malolo ha lautolu takitokotaha.” He magaaho ne liu mai e iki ke moua e tau mena mai he tau tupa hana, ko e heigoa ne moua e ia? Ko e tupa ne lima e taleni ne age e ia kua liu moua foki lima e taleni. Ti pihia foki e tupa ne ua e taleni ne kua age ki ai kua liu ua e taleni ne moua. Ka ko e tupa ne taha ni e taleni ne age ki ai kua tanu e ia he kelekele mo e nakai fai mena ne taute ke tupu e koloa he iki. Ti ko e heigoa e fuafuaaga he iki ke he tuaga ia?

18, 19. (a) Nakai fakatatai he ha he iki e tupa ne ua e taleni ne age ki ai mo e tupa ne lima e taleni ne age ki ai? (e) Ko e heigoa ne fakaako mai he tala fakatai he tau taleni ki a tautolu ke he navanavaaga mo e fakatataiaga? (i) Ko e ha ne kelea lahi ai e fakafiliaga he tupa ke tolu aki?

¹⁸ Fakamua, kia manamanatu la tautolu ke he tau tupa ne kua lima mo e ua e tau taleni ne age ki ai. Ke he tau tupa ua nei, kua pehe e iki: “Kua mitaki ko e fekafekau mitaki na e mo e fakamoli.” Ko e mena to tala age pihia nakai a ia ke he tupa ne lima e taleni kaeke kua ua ne mena ne moua e ia? Liga nakai! Ka ke he taha fahi, nakai pehe a ia ke he tupa ne ua ne tau taleni ne moua: ‘Ko e ha ne nakai lima e mena ne moua e koe? Ae, ono ke he tupa ne gahua mo koe, kitiala e tau mena lahi ne moua e ia maku!’ Nakai, ko e iki loto fakaalofa hohofi, ne kua fakatino mai a Iesu, ne nakai taute e ia ha fakatataiaga. Kua kotofa e ia e tau taleni “kua fakalata ke he malolo ha lautolu takitokotaha,” mo e nakai amaamanaki a ia ke lalahi mahaki e tau mena ka liuaki e lautolu mai he mena kua maeke a lautolu takitokotaha ke moua. Kua tatai ni e navanava ne moua tokoua he tau tupa, ha ko e mena fakamalolo mai he loto katoa a laua tokoua ke gahua ma e iki ha laua. Kua maeke oti a tautolu ke fai mena ne ako mai he mena nei.

¹⁹ Kua moli, nakai nava ke he tupa ke tolu aki. Kua liti ni a ia ke he pouli i fafo. Ha kua taha ne taleni ne age ki ai, ti nakai amaamanaki ke lahi e mena ka moua mai e ia tuga he tupa ne lima e taleni. Ka e nakai lali foki a ia! Ko e mena haia ne kelea lahi ai hana fakafiliaga kakano he aga ‘kelea mo e teva’ hana loto, ne fakakite mai ai ko e nakai fakaalofa ke he iki.

20. Fefe e onoonoaga a Iehova ke he ha tautolu a tau kaupaaga?

²⁰ Kua amaamanaki a Iehova ke fakaalofa a tautolu takitokotaha ki a ia mo e ha tautolu a malolo katoa, ka e mafanatia ha e tau loto “ha kua fioia e ia e mena ne eke aki a tautolu; kua manatu e ia ko e kelekele ni a tautolu nai”! (Salamo 103:14) Kua pehe mai ia Tau Fakatai 21:2 “kua fafati e Iehova e tau loto”​—nakai ke he fiha he tau numela. Maama e ia e tau kaupaaga ne nakai maeke he tagata ke uta kehe, pete ke he fahi tupe, tino, logonaaga he loto, po ke falu mena pihia foki. (Isaia 63:9) Ka e he magaaho taha, amaamanaki a ia ki a tautolu ke fakaaoga lahi oti e tautolu e tau koloa ne ha ha ia tautolu. Kua mitaki katoatoa a Iehova, ka ko e magaaho ne taute mena mo e hana tau tagata tapuaki nakai mitaki katoatoa, nakai kumi fakamahao a ia ke he mitaki katoatoa. Kua nakai eke a ia ke nakai kakano mitaki e tau mena ne taute po ke to matua e tau amaamanakiaga ki ai.

21. Ka omoomoi he fakaalofa e fekafekauaga ha tautolu ke he Atua, ko e heigoa e tau fua mitaki ka mui mai?

²¹ He fakaalofa ki a Iehova mai he loto katoa, solu katoa, loto manamanatu katoa, mo e malolo katoa ha tautolu ko e mena kua “mua ia ke he tau poa oti kua huhunu katoatoa, mo e tau poa oti.” (Mareko 12:33) Kaeke kua omoomoi he fakaalofa a tautolu, to taute mogoia e tautolu e tau mena oti kua maeke ia tautolu ke taute he fekafekauaga he Atua. Kua tohia e Peteru ko e tau fua he mahani Atua, fakalataha mo e fakaalofa, “ka ha ia mutolu e tau mena ia, mo e fakaloga, ti uta ai a mutolu mo tau tagata kua nakai teva, po ke teao ke he maama mitaki ke he Iki ha tautolu ko Iesu Keriso.”​—2 Peteru 1:8.

[Tau Matahui Tala]

Ke Fakamanatu

◻ Kua lata ko e heigoa e malolo ne omoi aki a tautolu he fekafekauaga ke he Atua?

◻ Fakaohooho fefe he fakaalofa ki a Keriso a tautolu ke fekafekau ki a Iehova?

◻ Ko e heigoa e tau manamanatuaga fakamua he tau Farasaio ne kua lata a tautolu ke kalo kehe mai?

◻ Nakai pulotu he ha ke fakatatai tumau ha tautolu a fekafekauaga mo e he taha Kerisiano?

[Tau Fakatino he lau 8]

Kehekehe e tau iloilo, malolo, mo e tau tutuaga he tau tagata takitokotaha