Kumi he Ha e Kupu Moli?

HE MAGAAHO ne pehe a Iesu ko e kakano katoa he hana moui ko e tala ke he kupu moli, kua vagahau a ia hagaao ke he mena uho ne ofania he tau Iutaia mahani fakamoli he tau senetenari. He tau mena tohia tapu ha lautolu, kua leva e tau Iutaia he totou e “kupu moli” he mailoga ko e mena moli, nakai ko e tala fakalatalata. He Tohi Tapu, ko e “kupu moli” ne kua fakaliliu ai e kupu Heperu “ʼemethʹ,” ne fakakite mai e mena mauokafua, mao, mo e, liga mua atu, maeke ke falanaki ki ai.

Kua fai kakano mitaki e tau Iutaia ke onoono ke he kupu moli ke he puhala ia. Ne ui e lautolu ha lautolu a Atua ko Iehova, “ko e Atua fakamoli.” (Salamo 31:5) Kua pihia e mena nei kakano ha ko e tau mena oti ne talahau e Iehova to taute ni e ia, ti taute ai ni e ia. He magaaho ka taute e ia e tau maveheaga, to fakamoli e ia a lautolu. Ka talahau e ia e tau perofetaaga, kua fakakatoatoa ai a lautolu. He magaaho ka talahau e ia e tau fakafiliaga fakahiku, to hohoko moli a lautolu. Kua loga e tau miliona he tau Isaraela ne kitia mata moli e tau mena moli nei. Kua fakamau hifo ai he tau tagata tane ne omoi he agaga ke tohia e Tohi Tapu he iloa tonu ko e tau mena tutupu moli he fakamauaga tala tuai a ia. He nakai tuga e falu tohi ne pehe ko e tau mena tapu, kua nakai tupu mai e Tohi Tapu he tutuaga tala fakalata po ke tala tuai. Kua mauokafua e fakaveaga he tau mena tutupu moli​—he tau mena moli he fakamauaga tuai, he kumikumiaga ke he kelekele, fakasaiene, mo e tau aga kaufakalatahaaga. Kua nakai ofo ai he pehe e salamo hagaao ki a Iehova: “Ko e mena moli foki hāu a fakatufono. . . . Ko e hāu a tau ­poaki oti foki kua moli ia. . . . Kua moli ni hāu a tau kupu.”​—Salamo 119:142, 151, 160.

Kua fakataogo mai e Iesu Keriso e tau kupu ia he salamo he magaaho ne pehe a ia he liogi ki a Iehova: “Ko e hau a kupu ko e kupu moli haia.” (Ioane 17:17) Iloa e Iesu ko e tau mena oti ne talahau he Matua hana kua mauokafua katoatoa mo e maeke ke falanaki ki ai. Kua pihia foki, a Iesu he “puke ke he . . . fakamoli.” (Ioane 1:14) Ne iloa ai he tau tutaki hana he kitia mata moli e lautolu, mo e fakamau hifo ai ma e tau atu hau oti kana, ko e tau mena oti ne talahau e ia ko e tau mena mauokafua, ko e kupu moli.

Ka e pete ni, he magaaho ne tala age e Iesu ki a Pilato ko e hau a ia ke he lalolagi ke vagahau e kupu moli, kua ha ha he loto hana e taha kupu moli pauaki. Kua taute e Iesu e talahauaga ia he tali e huhu a Pilato: “Ti ko e patuiki kia a koe?” (Ioane 18:37) Ko e Kautu he Atua, mo e gahua Patuiki a Iesu i ai, ne kua eke ko e matapatu tala, ko e alito, he fakaakoaga ha Iesu he magaaho ne nofo a ia he lalolagi. (Luka 4:43) Ko e Kautu nei ka fakatapu e higoa a Iehova, fakamatalahi hana pule katoatoa, mo e liu aki mai e tau tagata mahani fakamoli ke momoui tukulagi mo e fiafia, ko e “kupu moli” nai ne kua amaamanaki e tau Kerisiano moli oti kana ki ai. Ha kua aoga muatua e gahua a Iesu ke he fakakatoatoaaga he tau maveheaga oti kana he Atua, mo e ha kua “amene” oti kana e tau perofetaaga he Atua, po ke moli, kakano ha ko ia, kua maeke ai a Iesu ke pehe: “Ko au nai ko e puhala, mo e kupu moli, mo e moui.”​—Ioane 14:6; 2 Korinito 1:20; Fakakiteaga 3:14.

Kua fai kakano lahi mahaki ke he tau Kerisiano he vaha nei he mailoga ko e maeke lahi ke falanaki ke he kupu moli nei. Ti ko e kakano ko e tua ha lautolu ke he Atua mo e ha lautolu a amaamanakiaga ke he hana tau maveheaga mena fakave ai he tau mena tutupu moli, ne kua moli ni.

Kua pehe e fakatai he Tohi Tapu: “Kia fakafua mai ā e mena moli, aua neke fakafua atu; ko e iloilo ni, mo e ako mena, mo e loto manamanatu.” (Tau Fakatai 23:23) Ke tiaki e kupu moli he nakai aoga katoa po ke nakai moli to toe ai ni ke nakai moua e fakamoliaga mua ue atu he fiafia ne kua foaki mai he moui. Ke moua ai ko e ke moua e amaamanakiaga; ke iloa mo e fakaalofa ki ai ko e ke iloa mo e fakaalofa ke he Tufuga he lalolagi mo e lagi katoatoa mo e hana Tama fuataha; ke moui ke he mena ia ko e ke fai kakano mo e loto mafola e moui, he magaaho nei mo e ki tukumalagi.​—Tau Fakatai 2:1-5; Sakaria 8:19; Ioane 17:3.