Ko e Tau Fakamoli Kerisiano ma e Pule Katoatoa Faka-Atua
“Kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.”—1 PETERU 2:9.
1. Ko e heigoa e fakamoli ne lauia kua foaki hagaao ki a Iehova ke he tau vaha ato Kerisiano?
KE HE tau vaha ato Kerisiano, ha ha i ai e laini loa he tau fakamoli ne talahau fakamalolo ko Iehova ni e Atua moli. (Heperu 11:4–12:1) Malolo ai ke he ha lautolu a tua, ne omaoma mo e matakutaku ai a lautolu ke he tau matafakatufono a Iehova mo e nakai talia ke fakalataha ke he tau puhala he tapuakiaga. Ne foaki e lautolu e fakamoli malolo lahi ke he pule katoatoa he lalolagi mo e lagi katoatoa a Iehova.—Salamo 18:21-23; 47:1, 2.
2. (a) Ko hai e Fakamoli mitaki lahi mahaki a Iehova? (e) Ko hai ne hukui e motu ko Isaraela he fakamoli a Iehova? Iloa fefe e tautolu?
2 Ko e fakamoli fakahiku mo e mua ue atu he vaha ato Kerisiano ko Ioane Papatiso. (Mataio 11:11) Kua kotofa a ia ke fakailoa e hauaga he Taha ne Fifili, mo e fakafeleveia e ia a Iesu ko e Mesia kua mavehe. (Ioane 1:29-34) Ko Iesu ko e Fakamoli mua ue atu a Iehova, “ko e talahau kua fakamoli mo e moli.” (Fakakiteaga 3:14) Ha kua tiaki e Isaraela fakatino a Iesu, kua tiaki e Iehova a lautolu mo e fifili e motu fou, ko Isaraela fakaagaga he Atua, ke eke mo hana fakamoli. (Isaia 42:8-12; Ioane 1:11, 12; Kalatia 6:16) Kua fatiaki e Peteru e perofetaaga ki a Isaraela mo e fakakite kua hagaao ai “kia Isaraela he Atua,” ko e fakapotopotoaga Kerisiano, he magaaho ne pehe a ia: “Ko e hau fifili a mutolu, ko e tau patuiki mo e tau ekepoa, ko e motu tapu, mo e motu kua moua māna, kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.”—1 Peteru 2:9; Esoto 19:5, 6; Isaia 43:21; 60:2.
3. Ko e heigoa e matagahua lahi ha Isaraela he Atua mo e he “moto tagata tokologa”?
3 Ko e tau kupu a Peteru kua fakakite ko e matagahua lahi ha Isaraela he Atua ko e foaki e fakamoli ke he tau tagata hagaao ke he lilifu a Iehova. Ke he vaha ha tautolu ko e motu fakaagaga nei kua fakalataha ki ai e “moto tagata tokologa” he tau fakamoli ne fakalilifu foki e Atua ke he tau tagata. Ne kalaga mo e leo lahi a lautolu ma e tau tagata oti ke logona: “Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.” (Fakakiteaga 7:9, 10; Isaia 60:8-10) Maeke fefe a Isaraela he Atua mo e hana tau kau gahua ke fakakatoatoa ha lautolu a fakamoli? Ha ko e ha lautolu a tua mo e omaoma.
Tau Fakamoli Fakavai
4. Ko e ha e tau Iutaia he vaha a Iesu ko e tau fakamoli fakavai?
4 Ko e tua mo e omaoma kua lauia he moui ke he tau matapatu fakaakoaga mahani Atua. Ko e aoga he mena nei kua kitia ai ke he mena ne talahau e Iesu hagaao ke he tau takitaki fakalotu faka-Iutaia he hana a vaha. Ko lautolu nei kua “nonofo . . . ke he nofoa a Mose” tuga e tau faiaoga he Matafakatufono. Ti fakafano foki e lautolu e tau misionare ke liliu e tau tagata nakai talitonu. Ka e pehe a Iesu ki a lautolu: “Kua takai e mutolu e tahi mo e fonua kia mafoki mai ai taha; ka moua foki a ia, ti eke e mutolu a ia mo tagata Kehena kua mua foki a ia kia mutolu.” Ko lautolu e tau tagata lotu nei ko e tau fakamoli fakavai—fakatokoluga, fakatupua, mo e nakai fakaalofa. (Mataio 23:1-12, 15) Ke he taha magaaho kua pehe a Iesu ke he falu he tau Iutaia: “Ko mutolu, mai he matua ha mutolu ko e tiapolo ti kua fia eke e mutolu e tau mena kua manako ki ai e matua ha mutolu.” To talahau pihia he ha a ia ke he tau tagata he motu fifili he Atua? Kakano he nakai fanogonogo a lautolu ke he tau kupu he Fakamoli mua ue atu ha Iehova.—Ioane 8:41, 44, 47.
5. Iloa fefe e tautolu kua foaki e Kerisitenitome e fakamoli fakavai hagaao ke he Atua?
5 Ke he puhala taha, ke he tau senetenari tali mai he magaaho a Iesu, teau he tau miliona i Kerisitenitome kua talahau ke eke mo tau tutaki hana. Pete ia, kua nakai taute e lautolu e finagalo he Atua ti nakai talahau mai e Iesu. (Mataio 7:21-23; 1 Korinito 13:1-3) Kua fakafano atu e Kerisitenitome e tau misionare, tokologa ia lautolu kua loto fakamoli. Ka e, kua fakaako e lautolu e tau tagata ke tapuaki ke he atua Tolu Taha ne tugi e tau tagata agahala ke he afi a helo, mo e laulahi he ha lautolu a tau liliu kua fakakite e fakamoliaga tote he eke mo tau Kerisiano. Ma e fakatai, ko e motu Aferika ko Ruanata kua eke ai mo matakavi talumelie ma e tau misionare Katolika Roma. Ka e, fakalataha katoatoa agaia e tau Katolika Ruanata ke he tauaga fakamatakavi kua nakai la leva lahi he motu ia. Ko e tau fua he fekafekauaga misionare ia kua fakakite kua nakai moua ai e fakamoliaga Kerisiano ne moli mai i Kerisitenitome.—Mataio 7:15-20.
Moui ke he Tau Matapatu Fakaakoaga Mahani Atua
6. Ko e heigoa e tau puhala fe he mahani hako ka aoga he foaki e fakamoli?
6 Ko e tau mahani hehe mai ia lautolu ne talahau ko e tau Kerisiano ne tamai e ekefakakelea ke he “puhala he kupu moli.” (2 Peteru 2:2) Ko e Kerisiano moli kua moui ai lagotatai ke he tau matapatu fakaakoaga mahani Atua. Kua nakai kaiha a ia, pikopiko, mahani nakai fakamoli, po ke mahani kelea. (Roma 2:22) Kua nakai kelipopo moli e ia hana a katofia. Ko e tau tane Kerisiano kua takitaki mo e fakaalofa ha lautolu a tau magafaoa. Kua lagomatai mo e fakalilifu he tau hoana e takitakiaga ia. Kua fakamahani e fanau mai he ha lautolu a tau mamatua mo e kua mau tauteute ke eke mo tau fuata Kerisiano kua falanaki ki ai. (Efeso 5:21–6:4) Moli, kua agahala oti a tautolu mo e taute e tau mena hepe. Ka ko e Kerisiano moli kua fakalilifu ke he tau poakiaga he Tohi Tapu mo e taute e laliaga moli ke fakagahua a lautolu. Kua kitia ai e mena nei ke he falu mo e foaki e fakamoli mitaki. Ke he falu a magaaho, ko lautolu he mogo fakamua ne totoko ke he kupu moli kua kitia e mahani hako he Kerisiano mo e kautu ki ai.—1 Peteru 2:12, 15; 3:1.
7. Fefe e aoga he fefakaalofaaki e tau Kerisiano?
7 Kua fakakite e Iesu e vala aoga he mahani Kerisiano he magaaho ne pehe a ia: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Kua fakakite e lalolagi a Satani ke he ‘mahani hepehepe, feuaki, matahavala, velevelemena, loto kelea, puke namo ke he mahekeheke, keli tagata, taufetoko, fakavai, loto kona, tau tagata fefanafanāki, tauamuamu, fakalialia he Atua, hemu, fakatokoluga, hula, eke e tau lagatau ke he tau mena kelea, faliuliu ke he tau matua.’ (Roma 1:29, 30) Ke he tuaga pihia, ko e fakatokatokaaga he lalolagi oti kua fakakite mai he fakaalofa ko e fakamoliaga malolo lahi he agaga he Atua kua fakagahua—ko e fakamoli lauia lahi. Ko e Tau Fakamoli a Iehova kua eke mo fakatokatokaaga pihia.—1 Peteru 2:17.
Tau Fakamoli ko e Fanau Fakaako he Tohi Tapu
8, 9. (a) Kua fakamalolo fefe e salamo ha ko e hana fakaako he Matafakatufono he Atua mo e manamanatu fakahokulo ki ai? (e) Ko e heigoa e tau puhala ka fakamalolo ai he fakaako e Tohi Tapu mo e manamanatu fakahokulo ki ai a tautolu ke fakatumau ke foaki e fakamoli?
8 Ke kautu he foaki e fakamoli mitaki, ko e Kerisiano kua lata ke iloa mo e fakaalofa ke he tau matapatu fakaakoaga tututonu a Iehova mo e vihiatia moli e matahavala he lalolagi. (Salamo 97:10) Ko e lalolagi kua fakaohooho he fakatolomaki e hana a manamanatuaga ni, mo e hana a agaga kua eke ai ke uka ke totoko. (Efeso 2:1-3; 1 Ioane 2:15, 16) Ko e heigoa ke lagomatai a tautolu ke tumau e aga manamanatu mitaki? Ko e fakaako tumau mo e fai kakano ke he Tohi Tapu. Ko e tagata tohi he Salamo 119 kua fatiaki lagaloga hana fakaalofa ke he Matafakatufono a Iehova. Ne totou e ia ki ai mo e manamanatu fakahokulo tumau ki ai, “ke he aho oti.” (Salamo 119:92, 93, 97-105) Ti ko e fua, ne tohi e ia: “Ko e tau kupu pikopiko kua vihiatia e au, kua vihiatia lahi ai e au; ka e manako au ke he hāu a fakatufono.” Mua atu ai, ko e hana a fakaalofa hokulo kua fakaohooho a ia ke gahua. Ne pehe a ia: “Takilagafitu ni ke he aho ke fakaheke atu ai e au kia koe, ha ko e hāu a tau fakafiliaga tonu.”—Salamo 119:163, 164.
9 Ke he puhala taha ia, ko e fakaako tumau ha tautolu he Kupu he Atua mo e manamanatu fakahokulo ki ai to hokotia ke he ha tautolu a tau loto mo e omoi a tautolu ke ‘fakaheke atu ki a ia’—fakamoli hagaao ki a Iehova—tumau, ti pihia foki “takilagafitu ni ke he aho.” (Roma 10:10) He tatai mo e mena nei, ko e tagata tohi he salamo fakamua kua pehe ko ia ne manamanatu fakahokulo tumau ke he tau kupu a Iehova “to lata a ia mo e akau kua to ke he tapa he tau vai lele, to fua mai ke he hana tau fua ke he tau ni hana; to nakai mokulu foki hana tau lau, to monuina foki a ia ke he tau mena oti kana ke eke e ia.” (Salamo 1:3) Kua fakakite foki he aposetolo ko Paulo e malolo he Kupu he Atua he magaaho ne tohi e ia: “Ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, Kia katoatoa ai e mitaki he tagata he Atua, kia taute ni a ia ke he tau gahua mitaki oti kana.”—2 Timoteo 3:16, 17.
10. Ko e heigoa kua maaliali ai hagaao ke he tau tagata a Iehova ke he tau aho fakamui nei?
10 Ko e tupu mafiti ki mua he numela he tau tagata tapuaki moli ke he senetenari 20 aki nei kua fakakite e monuina ha Iehova. Mo e nakai fai fakauaua, ko e matakau, ko e tau fakamoli he vaha fou nei ma e pule katoatoa faka-Atua kua feaki e fakaalofa he matafakatufono a Iehova ke he tau loto ha lautolu. Ke tuga e salamo, kua omoi a lautolu ke omaoma ke he Hana a matafakatufono mo e fakamoli mo e tua fakamoli ke he “aho mo e po” hagaao ke he lilifu a Iehova.—Fakakiteaga 7:15.
Tau Gahua Mua Ue Atu a Iehova
11, 12. Ko e heigoa kua fakakatoatoa he tau mana ne taute e Iesu mo e hana a tau tutaki?
11 Ke he senetenari fakamua, kua fakamalolo he agaga tapu e tau Kerisiano fakamoli tua fakamoli ke taute e tau mana, ne kua foaki e fakamoliaga malolo ko e ha lautolu a fakamoli kua moli. He magaaho ne nofo ai a Ioane Papatiso he fale pouli, ne fakafano e ia e tau tutaki ke huhu ki a Iesu: “Ko koe kia ka haele mai, po ke leo a mautolu kia taha?” Ne nakai tali a Iesu ko e e po ke nakai. Ka e, pehe a ia: “Ati o atu a a mua mo e fakailoa kia Ioane e tau mena kua fanogonogo a mua ki ai mo e kitekite ki ai; Kua ala e tau matapouli, mo e ō e tau kulikuli, kua fakamea e tau lepela, mo e logona e tau teligatuli, kua fakamamatike e tau tagata mamate, mo e fakamatala e vagahau mitaki kia lautolu ne nonofogati; Ke monuina foki a ia kua nakai tupetupe ha ko au.” (Mataio 11:3-6) Kua eke e tau gahua malolo lahi nei ko e fakamoli ki a Ioane ko Iesu moli “ka haele mai.”—Gahua 2:22.
12 Ke he puhala taha ia, ko e falu he tau tutaki a Iesu kua fakamaulu a lautolu ne gagao mo e fakatu mai foki a lautolu ne mamate. (Gahua 5:15, 16; 20:9-12) Ko e tau mana nei kua tatai mo e fakamoli mai e ia ko e Atua ke lata mo lautolu. (Heperu 2:4) Mo e tau gahua pihia kua fakatata e malolo mua ue atu a Iehova. Ma e fakatai, kua moli ko Satani, ko e “iki he lalolagi,” kua ha ha i ai e kakano ke fakatupu e mate. (Ioane 14:30; Heperu 2:14) Ka e he magaaho ne fakatu mai e Peteru e fifine tua fakamoli ko Toreta mai he mate, kua maeke ni a ia ke taute ha ko e malolo mai ia Iehova, ha ko Ia ni ne maeke ke liuaki mai e moui.—Salamo 16:10; 36:9; Gahua 2:25-27; 9:36-43.
13. (a) Ko e heigoa e puhala he tau mana he Tohi Tapu kua talahau fakamoli ke he malolo a Iehova? (e)Fakamoli fefe he perofetaaga e matapatu manatu he fakamoliaga he tuaga Atua a Iehova?
13 He vaha nei, ko e tau gahua fakamana ia kua nakai liu foki. Kua fakakatoatoa tuai ha lautolu a gahua. (1 Korinito 13:8) Ka e pete ia, ha ha agaia ia tautolu e fakamauaga ha lautolu he Tohi Tapu, ne talahau fakamoli ki ai he tau tagata kitekite tokologa. He onoono fakamakutu e tau Kerisiano he vaha nei ke he tau fakamauaga tala tuai nei, ko e tau gahua ia kua foaki agaia e fakamoli kua lauia ke he malolo a Iehova. (1 Korinito 15:3-6) He lafi ki ai, ke he vaha ia ha Isaia, ne tuhi a Iehova ke he perofetaaga hakotika ko e fakamoliaga kehe lahi ko Ia ko e Atua moli. (Isaia 46:8-11) Loga e tau perofetaaga Tohi Tapu omoomoi fakaagaga faka-Atua kua fakamoli he vaha nei—loga ia lautolu ke he fakapotopotoaga Kerisiano. (Isaia 60:8-10; Tanielu 12:6-12; Malaki 3:17, 18; Mataio 24:9; Fakakiteaga 11:1-13) Ti fakakite foki kua nonofo a tautolu ke he “tau aho fakamui,” ko e fakamoliaga he tau perofetaaga nei kua fakamatalahi a Iehova ko e Atua moli ni.—2 Timoteo 3:1.
14. Ko e heigoa e tau puhala he fakamauaga tala tuai he vaha fou nei he Tau Fakamoli a Iehova kua fakamoli malolo lahi ko Iehova e Iki Pule Katoatoa?
14 Fakaoti aki, taute agaia e Iehova e tau mena lalahi mahaki, tau mena homo ue atu, ma e hana tau tagata. Ko e tupu ki mua he maama he kupu moli he Tohi Tapu kua takitaki he agaga a Iehova. (Salamo 86:10; Fakakiteaga 4:5, 6) Ko e tupu ki mua kua kehe lahi ne hokotaki ke he lalolagi katoa kua fakamoli mai ko Iehova ‘kua fakaave ke he hana ni a aho.’ (Isaia 60:22) He magaaho ne tutupu mai e favaleaga kelea lahi mahaki ke he taha motu mo e taha motu ke he tau aho fakamui, ko e fakauka fakamalolo he tau tagata a Iehova kua maeke ha ko e fakamalolo hake he agaga tapu. (Salamo 18:1, 2, 17, 18; 2 Korinito 1:8-10) E, ko e fakamauaga tala tuai he vaha fou nei he Tau Fakamoli a Iehova kua ha ha i ai e fakamoliaga malolo lahi ko Iehova ko e Iki Pule Katoatoa.—Sakaria 4:6.
Ko e Tala Mitaki ke Fakamatala
15. Ko e heigoa e fakamoli fakalaulahi kua foaki he fakapotopotoaga Kerisiano?
15 Kua fifili e Iehova a Isaraela ko e hana a fakamoli ke he tau motu. (Isaia 43:10) Pete ia, gahoa ni he tau Isaraela kua poaki faka-Atua ke o ke fakamatala ki a lautolu ne nakai ko e tau Isaraela, mo e ko e mena fa aga anei ke fakailoa e tau fakafiliaga a Iehova. (Ieremia 1:5; Iona 1:1, 2) Pete ni, kua fakakite mai he tau perofetaaga he tau Tohiaga Tapu Heperu to liu a Iehova taha aho ke onoono fakalahi atu ke he tau motu oti, mo e mena nei kua taute e ia puhala ia Isaraela fakaagaga he Atua. (Isaia 2:2-4; 62:2) Ato hake ke he lagi, ne poaki a Iesu ke he hana tau tutaki: “Kia o atu a a mutolu ke eke e tau motu oti kana mo tutaki.” (Mataio 28:19) He onoono fakamahao a Iesu ke he “tau mamoe ni hokoia he faoa a Isaraela ne galo” kua fakafano hana tau tutaki ke he “tau motu oti kana,” pihia “ke hoko ni ke he fakaotiaga he lalolagi.” (Mataio 15:24; Gahua 1:8) Ko e fakamoli Kerisiano kua eke ke logona he tau tagata oti.
16. Ko e heigoa e poakiaga he fakapotopotoaga Kerisiano he senetenari fakamua kua fakamoli, mo e ko e heigoa e fakakaupaaga?
16 Kua fakakite e Paulo kua maama mitaki e ia e mena nei. Ke he tau 61 V.N., kua talahau a ia ko e tala mitaki ‘kua fua mai foki e tau fua ke he lalolagi oti.’ Kua nakai ni fakakaupa e tala mitaki ke he taha ni e motu po ke taha e matakau, tuga ia ne kua fakalataha ai ‘mo e hufeilo he tau agelu.’ Ka e, kua hafagi ke “fakamatala atu ke he tau tagata oti ke he lalolagi.” (Kolose 1:6, 23; 2:13, 14, 16-18) Ti ko e Isaraela he Atua ke he senetenari fakamua kua fakamoli e hana a poakiaga ke ‘fakakite atu e mitaki hana ne ui a lautolu ke o mai he pouli ke he hana maama ke ofo lahi ai.’
17. Fakatumau fefe e Mataio 24:14 ke fakamoli ke he puhala lahi?
17 Pete agaia, ko e gahua fakamatala he senetenari fakamua ia ko e kamata fakamua noa ni he mena ka fakakatoatoa ke he tau aho fakamui. Onoono nakai noa atu ke he magaaho ha tautolu, ne pehe a Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai e fakaotiaga.” (Mataio 24:14; Mareko 13:10) Kua fakamoli nakai e perofetaaga nei? Moli, kua fita. Mai he kamataaga tote he 1919, ko e fakamatala he tala mitaki kua fakalaulahi he magaaho nei ke he molea e 230 e tau motu. Ko e fakamoli kua logona ke he fahi Tokelau makalili mo e ke he tau matakavi vela. Ko e tau motu lalahi kua gahua, mo e tau aelani mamao kua tauteute ke maeke ia lautolu ne nonofo ai ke moua e fakamoli. Pihia foki ke he vahaloto he totokoaga lahi, tuga e felakutaki i Posinia mo Hesekovina, kua fakatumau e tala mitaki ke fakamatala. Ke tuga he senetenari fakamua, kua fua e gahua fakamoli “ke he lalolagi oti.” Kua hafagi ai e tala mitaki ke fakailoa “ke he tau tagata oti ke he lalolagi oti.” Ko e fua? Fakamua, ko lautolu ne toe ha Isaraela he Atua kua fakapotopoto mai “he tau magafaoa oti, mo e tau vagahau kehekehe, mo e tau motu, katoa mo e atu motu.” Uaaki, miliona he “moto tagata tokologa” kua kamata ke tamai ai “he tau motu oti, mo e tau faoa, mo e tau tagata keheheke, mo e tau vagahau kehekehe.” (Fakakiteaga 5:9; 7:9) Kua fakaholo atu e Mataio 24:14 ke fakamoli ke he puhala lahi.
18. Ko e heigoa e falu he tau mena ne kua fakakatoatoa he fakamatala e tala mitaki ke he lalolagi katoa?
18 Ko e fakamatala he tala mitaki ke he lalolagi katoa kua lagomatai ke fakamoli ko e ha ha hinei fakapatuiki a Iesu kua kamata. (Mataio 24:3) Fakalaulahi atu, ko e matapatu kakano a ia ne kua ‘helehele ai e lalolagi,’ ha kua takitaki e tau tagata ke he amaamanakiaga moli ma e tau tagata, ko e Kautu he Atua. (Fakakiteaga 14:15, 16) Ha ko e tau Kerisiano moli ni kua fakalataha ke he fakamatala he tala mitaki, ko e gahua aoga nei kua lagomatai ke fakakehe e tau Kerisiano moli mai he fakavai. (Malaki 3:18) Ke he puhala nei, kua gahua ma e fakahaoaga ha lautolu ne fakamatala ti pihia foki mo lautolu ne talia. (1 Timoteo 4:16) Mua atu e aoga, ko e fakamatala he tala mitaki kua tamai e fakahekeaga mo e lilifu ke he Atua ko Iehova, ko ia ne poaki ke taute ai, ne lagomatai a lautolu ne taute ai, mo e taute ai ke fua loga.—2 Korinito 4:7.
19. Ko e heigoa e fifiliaga kua fakamalolo ke ha ha he tau Kerisiano oti he hoko atu a lautolu ke he fekafekauaga fou he tau?
19 Ati ko e mena ia ni ne omoi e aposetolo ko Paulo ke talahau: “Oi fakaalofa foki kia au, kaeke ke nakai fakamatala e au e vagahau mitaki.” (1 Korinito 9:16) Kua logona hifo he tau Kerisiano he vaha nei e mena taha. Ko e fakamonuina mua ue atu mo e matagahua lahi mahaki ke eke mo ‘tau ekegahua he Atua,’ he uta ai e maama he kupu moli ke he lalolagi pouligia nei. (1 Korinito 3:9; Isaia 60:2, 3) Ko e gahua ne kua tote he kamata ai he 1919 kua hokotia ai ke he tau vala lalahi ofogia. Teitei ke lima e miliona he tau Kerisiano kua fakamatala ma e pule katoatoa faka-Atua he fakagahua e lautolu molea e piliona he tau tula he tau ke tamai e fekau he fakamouiaga ke he falu. Ko e olioli ha ia ke moua e vala ke he gahua nei he fakatokoluga e higoa a Iehova! He huhu atu a tautolu ke he fekafekauaga he tau 1996, kia fakamalolo a tautolu ke nakai fakamanou hifo. Ka e, ke fanogonogo tumau fakalahi atu a tautolu ke he tau kupu ha Paulo ki a Timoteo: “Kia fakamatala atu e kupu, kia fakamalolo.” (2 Timoteo 4:2) He taute pihia e tautolu, kua liogi mo e tau loto katoa a tautolu to fakatumau a Iehova ke fakamonuina e tau laliaga ha tautolu.
Manatu Nakai e Koe?
◻ Ko hai ne hukui a Isaraela ko e “fakamoli” a Iehova ke he tau motu?
◻ Fakakite fefe e mahani Kerisiano ke he foakiaga he fakamoli?
◻ Ko e ha e fakaako he Tohi Tapu mo e manamanatu fakahokulo ki ai kua lata tonu ma e Fakamoli Kerisiano?
◻ Ko e heigoa e puhala he fakamauaga tala tuai he vaha fou nei he Tau Fakamoli a Iehova kua eke mo fakamoliaga ko Iehova e Atua moli?
◻ Ko e heigoa kua fakakatoatoa ha ko e fakamatala he tala mitaki?
[Tau Fakatino he lau 27]
Mamao mai he pehiaga malolo, kua fakapuloa e tala mitaki mogonei “ke he tau tagata oti ke he lalolagi”