Hokotaki he Tau Tagata Fakapuloa he Kautu
“Taute e Gahua he Tagata Evagelia”
KO E heigoa e kakano ke eke ko e tagata evagelia? Ko e kupu liliu mai he kupu Heleni eu·ag·ge·li·stesʹ a ia, ne kua matutaki tata lahi ke he kupu eu·ag·geʹli·on, ne kakano ko e “tala mitaki.” Ti ko e tagata fakamatala, po ke tagata uta fekau, he tala mitaki e tagata evagelia.
Ko e tau Kerisiano moli oti kana e tau tagata evagelia kakano he tukuogo e lautolu e tala mitaki hagaao ke he Kautu he Atua. Kua tonu lahi ai e aposetolo ko Paulo he tomatoma ki a Timoteo ke “taute e gahua he tagata evagelia.” Kua lata a Timoteo ke mailoga ke taute fakamitaki e gahua nei. Ne ole fakamakamaka a Paulo ki a ia ke ‘nofo fakalatalata a ia ke he tau mena oti’ mo e ke ‘fakakatoatoa hana a fekafekauaga.’—2 Timoteo 4:5, NW.
Kua lata foki a tautolu ko e tau tagata evagelia ke taute fakamitaki ha tautolu a fekafekauaga mo e ‘nonofo fakalatalata a tautolu,’ po ke mataala tumau ke foaki atu e tala mitaki he tau magaaho oti ne moua. Kua tokologa ne kua iloa a Iehova mo e hana tau maveheaga he mole he tutala e Tau Fakamoli a Iehova ki a lautolu he tau magaaho noa. Kua pihia e mena ne tupu ki a Seymore, ko e tagata tane i Papeto.
Ko e faiaoga he aoga fakatufono a Seymore. Ka ko e faiaoga gahua fakaku a Charles he aoga ia foki, mo e ko e taha he Tau Fakamoli a Iehova a ia, ko e tagata evagelia mataala. Ko e fekafekau gahua mau a ia, po ke paionia, ne fakaaoga e tau magaaho oti kua moua ke foaki ke he falu tagata e tala mitaki. Kakano ha ko e gahua fakamoliaga a Charles he tau magaaho noa ati ko e logona laia e Seymore e fekau he Kautu.
Kua nakai leva ti manako foki a Seymore ke foaki e tau kupu moli he Tohi Tapu ke he tau tagata oti ne kua maeke ke moua. Ti kamata ai a ia ke tutala he tau magaaho noa mo e tau tagata he gahuaaga hana, mua atu ke he tau tama aoga hana. Pete ni kua nakai maeke e lotu ke fakaako he tau aoga fakatufono he falu motu, kua kotofa ai ni e tagata tane nei ke fakaako e tau mena lotu mo e tau mahani mitaki uho. Ka ko e magaaho nei kua hiki e tau manamanatuaga tuai a Seymore hagaao ke he tau mena nai, kua hukui tuai he tau mena fou hana ne iloa mai he Tohi Tapu. He tau vahega noa, ne tutala a ia ke he hana tau tama aoga hagaao ke he maveheaga he Atua ke he lalolagi fou mo e amaamanakiaga he moui tukulagi.
Ti fefe e tau mahani he fanau? Tokologa ne fakakite e loto fiafia moli ke he tala mitaki he Kautu a Iehova. Ati hoko ai fakamui, ne kamata a Seymore ke taute e tau fakaakoaga Tohi Tapu mo e 13 he hana tau tama aoga. Kua lahi mahaki ha lautolu a loto fiafia ti kua fakatokatoka ni e lautolu ke taute lagaua e fakaakoaga Tohi Tapu he fahi tapu. Ti eke fakahaga e laulahi ia lautolu ke kamata ke o ke he tau feleveiaaga Kerisiano he Fale he Kautu tata he Tau Fakamoli a Iehova i ai. He magaaho nei kua tokohiva a lautolu ne kua eke ko e Tau Fakamoli tukulele mo e papatiso a Iehova. Ka ko Seymore, kua taute katoatoa e ia he magaaho nei hana fekafekauaga he fekafekau paionia mau mo e ko e motua foki he taha he tau fakapotopotoaga he Tau Fakamoli a Iehova i Papeto.
Ko e taha mai ni a e he tau fakafifitakiaga he Tau Fakamoli a Iehova mai he lalolagi katoa ne ‘taute e gahua he tau tagata evagelia,’ ke he vala nei, he fakamakau ke taute e gahua fakamoliaga he tau magaaho noa. Kua mumuitua a lautolu ke he akonakiaga he Tohi Tapu ne moua mai ia Kolose 4:5, 6, ne pehe: “Kia o fano a mutolu mo e iloilo ki mua ha lautolu i tua, mo e fakaaoga e mutolu e tau aho he mouiaga nai. Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.”