Ko e Heigoa kua Lata ia Tautolu ke Taute ke Hao Mai?

TAHA ai e magaaho ne huhu e taha tagata tane ki a Iesu: “Ko e Iki na e, to tokogaogao kia a lautolu ke fakamomoui?” Ti tali fefe a Iesu? Kua pehe kia a ia: ‘Kia talia ko au ko e hau a Iki mo e Fakamouiaga, mo e hao ai a koe’? Nakai! Ne pehe a Iesu: “Kia eke taha a mutolu ke huhū atu ke he gutuhala apiapi; ha kua tala atu e au kia mutolu, to kumi e tau tagata tokologa kia huhū atu, ka e nakai maeke ni.”​—Luka 13:23, 24.

Kaumahala kia a Iesu ke tali e huhu he tagata tane? Nakai, ha ko e mena nakai huhu e tagata tane to uka fefe ke hao mai; ne huhu a ia ko e tote kia e numela. Ti kua fakakite ai e Iesu ko e tokogahoa lahi e tau tagata mai he mena ne tua ki ai, ka eketaha a lautolu ke fakamakamaka ke moua e monuina homo ue atu nei.

‘Nakai kua pihia e mena ne tala mai ki a au,’ ka liga fetoko e falu tagata totou. Ti liga fatiaki e lautolu nei a Ioane 3:16, ne pehe mai: “Nukua pihia e fakaalofa lahi he Atua ke he lalolagi, he foaki mai e ia hana Tama fuataha, kia nakai lata e ha tagata ne tua ki a ia ke mate, ka e moua e moui tukulagi.” (King James Version) Ti kua tali ai a tautolu: ‘Ti ko e heigoa mogoia kua lata a tautolu ke tua ki ai? Mena moui moli kia a Iesu? E moli. Ko e Tama kia he Atua a ia? Nakai taumaleku! Mo e kakano he ui he Tohi Tapu a Iesu ko e “Akoako” mo e “Iki,” nakai kia kua lata foki a tautolu ke tali tonu ke he tau mena ne fakaako e ia, mo e omaoma ki a ia, mo e mumuitua ki a ia?’​—Ioane 13:13; Mataio 16:16.

Muitua ki a Iesu

Ko e hanai e mena ne tutu mai ai e tau lekua! Kua tokologa e tau tagata ne kua fita he tala age ki ai ko e “hao mai” a lautolu ne eke ke tote lahi e manako ke mumuitua po ke omaoma ki a Iesu. Ne tohia moli he fekafekau lotu Porotesano e mena nai: “E, kua lata ke mau tumau e tua ha tautolu ki a Keriso. Ka e ko e talahauaga ko e lata lahi mahaki ke pihia, po ke eke ke pihia, ko e mena nakai fai fakaveaga ne toka ai he Tohi Tapu.”

Ka e kehe ai, ha ko e mena fakamau he Tohi Tapu e tau mahani kelea ne fa taute mau he falu tagata ne manamanatu ko e “hao mai” a lautolu. Ne vagahau hagaao ke he tagata ne fa taute tumau e tau puhala ia, kua tala age ke he tau Kerisiano: “Hanai, kia tuku kehe e mutolu e tagata mahani kelea nā ia mutolu.” Kua moli ni ko e nakai manako e Atua ke he tau tagata mahani kelea ke fakakelea hana fakapotopotoaga Kerisiano!​—1 Korinito 5:11-13.

Ti ko e heigoa mogoia e kakano, ke muitua ki a Iesu, mo e maeke fefe ia tautolu ke taute e mena ia? E, ko e heigoa ne taute e Iesu? Kua mahani kelea kia a ia? tagata feuaki? tagata konahia? tagata pikopiko? Nakai fakamoli kia a ia ke he tau mena pisinisi? Kua nakai pihia! ‘Ka e,’ he liga huhu a koe, ‘kua eke ni kia a au ke fakamea oti e tau mena ia mai he moui haku?’ Ma e tali, manamanatu la ki a Efeso 4:17 hifo katoa ke he Efeso 5:5. Kua nakai pehe mai ko e to talia he Atua a tautolu pete ni ko e heigoa e tau mena ne taute e tautolu. Ka e kehe, he tala mai ki a tautolu ke kehe mai he tau motu he lalolagi ne “kua nakai tuai logona e lautolu ha mena, . . . ka ko mutolu, nakai ako pihia e mutolu e tau kupu a Keriso . . . Kia tuku kehe e mutolu e tagata tuai ke he tau mena ne mahani ai a mutolu i tuai . . . Ko e tagata ­kaiha aua neke liu kaiha foki . . . Ka ko e feuaki, mo e tau mena kelea oti, mo e velevelemena, aua neke talahau e tau mena ia ki mua ha mutolu, tuga e mena kua lata mo e tau tagata tapu. . . . Nukua iloa tuai e mutolu e mena nai, ko e tagata feuaki, po ke taha kua eke mena fakalialia, po ke velevelemena, (ko e mena hufeilo ke he tupua haia,) nakai fakai taha ia lautolu ke moua māna e kautu a Keriso [m]o e Atua.”

Kua mumuitua ka tautolu ki a Iesu kaeke kua nakai lali a tautolu ke felauaki e tau momoui ha tautolu mo e hana fakafifitakiaga? Nakai kia kua lata a tautolu ke gahua ke eke e tau momoui ha tautolu ke tuga ha Keriso? Kua lavea e huhu aoga lahi ia, po ke liga mena nakai manamanatu e tau tagata ki ai ne fa talahau, tuga ne talahau he tama lau tuleke lotu: “Hau ki a Keriso he magaaho nei​—hau ni pihia a koe ai fai kelea.”

Ne hataki mai e taha he tau tutaki a Iesu to eke e tau tagata nakai mahani Atua ke “liu e lautolu e fakaalofa noa he Atua ha tautolu ke he mata kakana, mo e fakatikai e lautolu e Iki tokotaha, ko e . . . ha tautolu a Iki ko Iesu Keriso.” (Iuta 4) Liga maeke moli fefe ia tautolu ke liliu e fakaalofa noa he Atua “ke he mata kakana”? Taute pihia e tautolu ka tua noa ko e maluia he poa a Keriso e tau agahala taute pauaki ne loto a tautolu ke taute mau, ti nakai ko e tau agahala tuai he tupu maiaga nakai mitaki katoatoa he tagata ne fa e lali a tautolu ke tuku ki tua ia tautolu. Kua moli kua nakai manako a tautolu ke fetaliaaki mo e taha he tau akoako evagelia talahaua a Amerika, ne pehe kua nakai lata a koe ke “fakamea hau a moui, fuluhi kehe mai, tiaki e tau aga kelea he moui tuai, liliuina ke fetataiaki mo e tau mahani ne fakaako mai he Tohi Tapu.”​—Fakatatai Gahua 17:30; Roma 3:25; Iakopo 5:19, 20.

Omoi he Tua ke Gahuahua

Kua tokologa e tau tagata ne kua tala age ki ai ko e “tua ki a Iesu” ko e mena taute lagataha ni mo e nakai lata e tua ha tautolu ke malolo lahi ke omoi ai ke omaoma. Ka e nakai talia he Tohi Tapu e mena ia. Nakai pehe a Iesu kua fita he hao mai e tau tagata ne kua kamata ke o he puhala Kerisiano. Ka e kehe, he pehe a ia: “Ka ko ia ka tumau ato hoko ke he fakahikuaga, to fakamoui na ia.” (Mataio 10:22) Kua fakatai he Tohi Tapu e puhala Kerisiano ha tautolu ke he poitufi, ne ha ha ai e palepale he fakamouiaga he fakahikuaga. Mo e kua ole fakamakamaka mai: “Kia pihia ha mutolu a tafepoi, kia moua e mutolu.”​—1 Korinito 9:24.

Ti ke “talia a Keriso” kua lahi e mena ne putoia i ai mai he talia noa ni hokoia e tau monuina ne foaki mai he poa mua ue atu a Iesu. Kua lata ai ni ke omaoma. Kua talahau he aposetolo ko Peteru ko e kamata mai e fakafiliaga “he fale he Atua,” mo e lafi ki ai: “Kaeke foki kua fakamua kia tautolu, po ke fefe kia e fakahikuaga kia lautolu kua faliuliu ke he vagahau mitaki he Atua?” (1 Peteru 4:17) Ti kua lata a tautolu ke mua atu e mena ka taute mai he logona ni hokoia mo e tua. Kua pehe e Tohi Tapu kua lata a tautolu ke ‘eke a tautolu mo tau tagata omaoma ke he kupu, ka e aua neke fanogonogo hokoia ki ai, ke fakahehe ai e tautolu a tautolu.’​—Iakopo 1:22.

Tau Fekau Ni a Iesu

Kua toka ai he Tohi Tapu he tohi a Fakakiteaga e tau fekau mai ia Iesu, ne fakapuhala mai ia Ioane ke he tau fakapotopotoaga Kerisiano fakamua ne fitu. (Fakakiteaga 1:1, 4) Kua pehe kia a Iesu kakano ha kua fita he “talia” he tau tagata he tau fakapotopotoaga ia a ia, ko e lata naia? Nakai. Ne fakaheke e ia ha lautolu a tau gahua mitaki, ha lautolu a tau gahua lahi mo e ha lautolu a fakauka mo e vagahau foki ke he fakaalofa, tua, mo e fekafekauaga ha lautolu. Ka e pehe a ia ko e to tuku he Tiapolo a lautolu ke he kamatamata mo e to moua ai e lautolu e palepale “takitokotaha ke lata mo e ha [la]utolu a tau gahua.”​—Fakakiteaga 2:2, 10, 19, 23.

Ti kua fakamaama mai ai e Iesu ko e fai matagahua lahi ne lago ki ai mai he mena ne fa mahani e laulahi he tau tagata ke maama mai he magaaho ne tala age ki a lautolu ko e fakamouiaga ha lautolu, ko e “gahua kua fita he oti” mai ni he magaaho he feleveiaaga fakalotu ne “talia” e lautolu a Iesu. Kua pehe a Iesu: “Ko e tagata ka fia mui mai kia au, aua neke omaoma a ia kia ia, ka e nikiti a hana satauro, mo e mui mai ai kia au. Ha ko ia ne fia kuku hana moui, to moumou ai kia ia; ka ko ia ke moumou hana moui ha ko au, to moua ai e ia.”​—Mataio 16:24, 25.

Kia nakai omaoma ni a tautolu ki a tautolu? Muitua tumau ki a Iesu? Ko e mena lata mo e laliaga a ia. To hiki e tau momoui ha tautolu. Ka e, pehe moli kia a Iesu ko e liga to eke e falu ia tautolu ke ‘moumou ha lautolu a tau moui’​—ke mate ma Iesu? E, ko e vahega tua pihia ko e mena to moua mai ni he iloilo ke he tau mena mitaki ue atu ne ako e koe mai he tau kumikumiaga ke he Kupu he Atua. Kua kitia maaliali e mena nei he aho ne pinimaka he tau tagata lotu to muatua a Setefano ko e “nakai maeke foki ia lautolu ke totoko atu ke he iloilo mo e Agaga kua vagahau ai a ia.” (Gahua 6:8-12; 7:57-60) Mo e kua pihia ai e tua ne fakakite he tau afe he Tau Fakamoli a Iehova ne mamate he vaha ha tautolu he tau kemuaga pagota lalahi he tau Nasi he nakai loto ke fakakelea ha lautolu a loto logona hifo mitaki ne fakaako he Tohi Tapu.

Fakamakutu Kerisiano

Kua lata ia tautolu ke kuku mau ha tautolu a tua Kerisiano, kakano ko e mena nakai tuga ne kua liga logona e koe mai he falu lotu po ke mai he tau fakaholoaga televisoni fakalotu, kua pehe e Tohi Tapu, maeke a tautolu ke veveli. Kua talahau e tau Kerisiano ne tiaki e “puhala tonu.” (2 Peteru 2:1, 15) Ti kua lata ai a tautolu ke ‘gahua ni a tautolu mo e matakutaku mo e vivivivi, kia momoui ai a mutolu.’​—Filipi 2:12; 2 Peteru 2:20.

Kua pehenai kia e mena ne maama he tau Kerisiano he senetenari fakamua, ko lautolu ko e tau tagata ne logona moli a Iesu mo e hana tau aposetolo he fakaako? E. Iloa e lautolu kua fai mena a lautolu kua lata ke taute. Ne pehe a Iesu: “Kia o atu a a mutolu ke eke e tau motu oti kana mo tutaki, . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.”​—Mataio 28:19, 20.

He mole e falu fahi tapu he talahau e Iesu e mena ia, ne 3,000 tagata ne papatiso he taha ni e aho. Kua tupu vave lahi e numela ha lautolu ne tali tonu ke he 5,000. Ko lautolu ne tali tonu kua fakaako e falu. Ko e magaaho ne fakamavehevehe ai he favaleaga a lautolu, kua aoga ai ni ke folafola ha lautolu a fekau. Kua pehe mai e Tohi Tapu nakai ni ko e tau takitaki gahoa ka e “kua o fano foki a lautolu ne mavehevehe, mo e fakamatala atu e vagahau mitaki he kupu.” He teitei ke 30 e tau tau he mole atu, kua maeke ai e aposetolo ko Paulo ke tohi kua eke tuai e tala mitaki ke “fakamatala atu ke he tau tagata oti ke he lalolagi.”​—Gahua 2:41; 4:4; 8:4; Kolose 1:23.

Nakai fakaliliuina tagata a Paulo tuga ne taute he tau akoako evagelia he tivi, ne talahau: ‘Talia a Iesu he magaaho nei, mo e hao tukulagi ai a koe.’ Po ke nakai tua lahi foki a ia tuga e taha fekafekau lotu Amerika ne tohia: “Tali mai he vaha tama tane fuata tote, . . . kua fita he hao mai au.” Kua molea lahi e 20 e tau tau he fifili e Iesu a Paulo ke uta e fekau Kerisiano ke he tau tagata he tau motu kehe, ne tohia he aposetolo nai ne malolo lahi he gahua: “Ka kua tatuki e au hoku tino mo e fakatupa a ia, neke iloa a au kua tiaki, ko au kua fakamatala atu ke he falu a tagata.”​—1 Korinito 9:27; Gahua 9:5, 6, 15.

Ko e fakamouiaga ko e mena fakaalofa noa ne foaki mai he Atua. Ko e mena nakai maeke ke moua noa ni he gahua. Ka e kua lata mo e mena ia ke fai laliaga a tautolu. Kaeke ke atu he taha tagata e mena fakaalofa tau uka ki a koe mo e nakai fakakite e koe hau fakaaue he nakai lagaki mo e uta e koe, liga to age ni he tagata foaki mena ke he tagata kehe he nakai fakaaue a koe. E, ko e mena uho lahi fefe e toto he moui a Iesu Keriso? Ko e mena fakaalofa noa, ka e kua lata ia tautolu ke fakakite ko e fakaaue lahi ke he mena ia.

Kua nonofo ai e tau Kerisiano he tutuaga hao ha kua ha ha a lautolu he tutuaga mitaki ki mua he Atua. Ka uta fakamatakau to moua moli e lautolu e fakamouiaga. Ka fakatakitaha, kua lata a lautolu ke taute e tau mena ne loto e Atua ki ai. Ka e taha e mena, maeke agaia a tautolu ke kaumahala, ha ko e mena pehe a Iesu: “Kaeke kua nakai tumau taha kia au, ti tiaki ai a ia ki tua tuga ne la, kua fakapakupaku foki.”​—Ioane 15:6.

‘Ko e Kupu he Atua Kua Moui Ia’

Ko e tutalaaga ne talahau he kamataaga he tala fakamua ko e mena kua teitei ke 60 e tau tau kua mole ne hoko ai. Ti tali tonu agaia a Johnny ko Iesu Keriso ni hokoia ka puhala mai e fakamouiaga, ka e iloa foki e ia kua lata a tautolu ke foli ke moua e mena ia. Kua tumau ai e tua hana, ko e Tohi Tapu ne fakakite mai e punaaga moli he amaamanakiaga ma e tau tagata mo e kua lata ia tautolu ke kumikumi ke he tohi homo ue atu ia, ke omoi ai he mena ia, mo e toka ai ke omoomoi a tautolu ke taute e tau gahua fakaalofa, tua, totonu, omaoma, mo e fakauka. Ne feaki hake e ia hana fanau ke tua ke he tau mena ia, mo e he magaaho nei kua fiafia lahi a ia he kitia a lautolu kua feaki hake foki ha lautolu a tau fanau ke he puhala taha ia. Kua manako lahi a ia ke ha ha ai he tau tagata oti e tua ia, mo e taute e ia e tau mena oti ne maeke ia ia ke tuku he tau loto mo e tau manamanatuaga he falu e tau mena ia.

Ne omoi he agaga e aposetolo ko Paulo ke tohi “ko e kupu he Atua kua moui ia.” (Heperu 4:12) Kua maeke ai ke hiki e tau momoui. Kua maeke ai ke omoi a koe ke loto lahi ke taute e tau gahua fakaalofa, tua, mo e omaoma. Ka e kua lata ia koe ke mua atu e mena ne taute nakai ke “talia” ni e manamanatuaga ke he mena ne talahau he Tohi Tapu ti koenaia. Kumikumi ki ai mo e toka hau a loto ke omoi he mena ia. Fakaata e pulotu he Tohi Tapu ke takitaki a koe. Magahala he 5,000,000 e Tau Fakamoli a Iehova he tau motu kua molea e 230 ne manako lahi ke taute noa he lotokaina e tau fakaakoaga Tohi Tapu. Ke kitia ko e heigoa kua maeke a koe ke ako mai he tau fakaakoaga ia, tohi ki a lautolu ne lomi fakailoa e mekasini nei. Ko e tua mo e malolo fakaagaga ka moua e koe to fakafiafia lahi ni a koe!