Taofi Mau e Fakalatahaaga he Tau Aho Fakamui Nei
“Kia lata e tau mahani ha mutolu mo e vagahau moli . . . , kua tumau a mutolu mo e loto fakalataha, mo e manatu fakalataha, mo e fakamakamaka fakalataha ha ko e tua ha he vagahau moli.”—FILIPI 1:27.
1. Ko e heigoa e kehekehe ne ha ha he vahaloto he Tau Fakamoli a Iehova mo e he lalolagi?
KO E “tau aho fakamui” anei. Nakai taumaleku ai, kua ‘hohoko mai tuai e tau aho uka.’ (2 Timoteo 3:1-5) He “vaha ke fakahiku” nei, fakalataha mo e hana tauhele ke he kaufakalatahaaga he tagata, kua kitia maali e kehe lahi he Tau Fakamoli a Iehova ha ko e ha lautolu a mafola mo e fakalatahaaga. (Tanielu 12:4) Ka e kua poaki age ke he tau tagata ne vala he magafaoa he tau tagata tapuaki ha Iehova he lalolagi katoa, ke igatia ke gahua fakalahi ke taofi mau e fakalatahaaga nei.
2. Ko e heigoa ne talahau e Paulo hagaao ke he puipuiaga he fakalatahaaga, mo e ko e heigoa e huhu ka onoono a tautolu ki ai?
2 Ne tomatoma he aposetolo ko Paulo e tau katofia Kerisiano ke taofi mau e fakalatahaaga. Ne tohia e ia: “Kia lata e tau mahani ha mutolu mo e vagahau moli kia Keriso, po ke fina atu au mo e feleveia mo mutolu po ke nofo kehe au, kia fanogonogo au ke he tala ki a mutolu, kua tumau a mutolu mo e loto fakalataha, mo e manatu fakalataha, mo e fakamakamaka fakalataha ha ko e tua ha he vagahau moli. Kua nakai fakamatakutaku foki a mutolu ka he taha mena e lautolu kua totoko mai; ha ko e fakamailoga ia he malaia kia lautolu; ka ko e fakamailoga he moui kia mutolu, mai he Atua foki a ia.” (Filipi 1:27, 28) Nukua fakamaaliali mai ai he tau kupu ha Paulo e lata ha tautolu ke gahua auloa ko e tau Kerisiano. Ti, ko e heigoa, mogoia, ka lagomatai a tautolu ke taofi mau ha tautolu a fakalatahaaga Kerisiano he tau aho uka nei?
Omaoma ke he Finagalo Faka-Atua
3. Ko e magaaho fe mo e o mai fefe e tau Tagata Motu Kehe nakai pilitome ke eke mo tau tutaki he Keriso?
3 Taha e puhala ke taofi mau e fakalatahaaga ha tautolu ko e omaoma ke he finagalo faka-Atua he tau magaaho oti. Liga to ui e mena nei ma e hikihikiaga he tau manamanatu ha tautolu. Kia manamanatu ke he tau tutaki Iutaia fakamua ha Iesu Keriso. He magaaho ne fakamatala fakamua a Peteru ke he tau Tagata Motu Kehe nakai pilitome he 36 V.N., ne foaki he Atua e agaga tapu ki luga he tau tagata nei he tau motu, ati papatiso ai a lautolu. (Gahua, veveheaga 10) Ato hoko e mogoia, ko e tau Iutaia, mo e tau tagata kua liliuina ke he lotu Iuta ni hokoia, mo e tau Samaria kua eke mo tau tutaki ha Iesu Keriso.—Gahua 8:4-8, 26-38.
4. He mole ai e fakamaamaaga he mena ne tupu hagaao ki a Konelio, ko e heigoa ne talahau e Peteru, mo e ko e kamatamata ha ne fakatupu he mena ke he tau tutaki Iutaia ha Iesu?
4 He magaaho ne fai iloaaga e tau aposetolo mo e falu he tau matakainaga tane i Ierusalema hagaao ke he liliuina ha Konelio mo e he falu he tau Tagata Motu Kehe, kua fiafia a lautolu ke fanogonogo ke he hokotaki ha Peteru. He mole he fakamaama age e mena tupu ne putoia ki ai a Konelio mo e he falu he tau Tagata Motu Kehe ne tua, ne fakaoti e aposetolo mo e tau kupu: “Hanai, kaeke kua tatai e fakaalofa [he agaga tapu] kua foaki mai he Atua kia lautolu [ko e tau Tagata Motu Kehe] mo tautolu [tau Iutaia], he tua ke he Iki ko Iesu Keriso, ko hai kia au nai, ke maeke ai kia au ke hataki atu ke he Atua?” (Gahua 11:1-17) Kua fakatupu he mena nei e kamatamataaga ma e tau tutaki Iutaia ha Iesu Keriso. To omaoma nakai a lautolu ke he finagalo he Atua mo e talia e tau Tagata Motu Kehe ne tua mo tau katofia tapuaki ha lautolu? Po ke to fakahagahaga kelea aki nakai e fakalatahaaga he tau fekafekau ha Iehova he lalolagi?
5. Tali atu fefe e tau aposetolo mo e falu he tau matakainaga, ke he moliaga ko e foaki he Atua e fakamagaloaga ke he tau Tagata Motu Kehe, mo e ko e heigoa kua lata ia tautolu ke ako mai he aga nei?
5 Kua pehe mai e talahauaga: “Kua logona e lautolu [tau aposetolo mo e falu he tau matakainaga tane] e tau kupu ia ati fakamamate ai a lautolu, kua fakaheke atu foki ke he Atua, kua pehe atu, ko e moli, kua foaki atu foki he Atua ke he tau tagata kehe e tokihala ke momoui ai.” (Gahua 11:18) Kua puipui mo e fakamalolo tuai he aga ia e fakalatahaaga he tau tutaki ha Iesu. He magaaho ku ni, ka e holo ki mua e gahua fakamatala he tau Tagata Motu Kehe, po ke tau tagata he tau motu, mo e kua ha ha e fakamonuinaaga ha Iehova i luga he tau gahua pihia. Kua lata ni ia tautolu ke fakamamate he magaaho ka ole mai ma e ha tautolu a kauauloa, he fakalataha atu mo e fakatokatokaaga he fakapotopotoaga fou po ke ka taute e falu hikihikiaga fakateokarasi ki lalo he takitakiaga he agaga tapu he Atua. Ko e ha tautolu a kauauloa mo e loto katoa ka fakafiafia a Iehova mo e to lagomatai a tautolu ke taofi mau ha tautolu a fakalatahaaga he tau aho fakamui nei.
Kia Pipiki ke he Kupu Mitaki
6. Ko e heigoa e hufiaaga ne toka he kupu moli ma e fakalatahaaga he tau tagata tapuaki ha Iehova?
6 Ha ko e vala he magafaoa he tau tagata tapuaki ha Iehova, kua taofi mau e tautolu e fakalatahaaga ha ko tautolu oti kana kua “fakaako he Atua” mo e kuku fakamalolo atu ke he hana a kupu ne fakakite. (Ioane 6:45; Salamo 43:3) Ha kua fakave e tau fakaakoaga ha tautolu ke he Kupu he Atua, kua vagahau oti a tautolu mo e fetaliaaki. Kua talia fiafia e tautolu e tau mena kai fakaagaga ne foaki e Iehova he puhala mai he “fekafekau fakamoli mo e loto matala.” (Mataio 24:45-47) Ko e tau fakaakoaga tatai pihia kua lagomatai a tautolu ke taofi mau ha tautolu a fakalatahaaga he lalolagi katoa.
7. Kaeke ke uka ia tautolu takitokotaha ke maama taha fakaakoaga pauaki, ko e heigoa ha tautolu kua lata ke taute, mo e ko e heigoa kua nakai lata ia tautolu ke taute?
7 Ka e kua kaeke ke uka ia tautolu takitokotaha ke maama po ke talia e falu fakaakoaga? Kua lata ia tautolu ke liogi ma e pulotu mo e taute e kumikumiaga ke he tau Tohiaga Tapu mo e tau tohi Kerisiano. (Tau Fakatai 2:4, 5; Iakopo 1:5-8) Liga lagomatai foki ke fakatutala mo e taha motua. Kaeke ke nakaila maama ia, liga ko e mitaki ke toka ai ni pihia. Liga to lomi fakailoa mai foki falu fakailoaaga he vala tala ia, ti ko e mogoia ka laulahi ai e maamaaga ha tautolu. Ko e mena hepe, ke lali ke fakamakamaka ke he falu he fakapotopotoaga ke talia e manatu kehe ha tautolu. To fakatupu he mena nei e fetotokoaki, nakai taute ke puipui aki e fakalatahaaga. Kua lahi ha e mitaki ke “lata mo e kupu moli” mo e ke fakamafana atu e falu ke taute pihia!—3 Ioane 4.
8. Ko e heigoa e aga hagaao ke he kupu moli kua mitaki?
8 He senetenari fakamua aki, ne talahau a Paulo: “Ko e vaha nai kua kitia taumaleku ai e tautolu ke he fakaata, ka ko e vaha ia to fehagai tonu ai; ko e vaha nai kua iloa e au ka e nakai katoatoa ai, ka ko e vaha ia to iloa mali e au, tuga foki he iloa mali na au.” (1 Korinito 13:12) Ti pete ni he nakai mahino katoatoa he tau Kerisiano fakamua e tau tala matafeiga, ka e tumau ni a lautolu ke kaufakalataha. He mogonei kua moua e tautolu e maamaaga nakai taumaleku ke he finagalo ha Iehova mo e hana a Kupu moli. Kia o mai a a tautolu he mogonei ke oue tulou ke he kupu moli ne moua e tautolu he puhala mai he “fekafekau fakamoli.” Mo e o mai a tautolu ke loto fakaaue ha kua takitaki e Iehova a tautolu he kakano he hana a fakatokatokaaga. Pete ni he nakai ha ha tumau ia tautolu e tataiaga he iloilo, nakaila hoko ia a tautolu ke he hoge po ke fia inu fakaagaga. Ka e, ko e ha tautolu a Leveki Mamoe, ko Iehova, kua taute a tautolu ke fakatumau e fefakalatahaaki mo e kua feaki fakamitaki mai a tautolu.—Salamo 23:1-3.
Fakaaoga Fakahako e Alelo!
9. Fakaaoga fefe e alelo ke maeke ke fakamalolo e fakalatahaaga?
9 Ke fakaaoga e alelo ke fakamafana aki e falu ko e taha puhala aoga lahi a ia ke fakamalolo aki e fakalatahaaga mo e agaga fakamatakainaga. Ko e tohi ne fakamaama aki e huhu ke he pilitome, kua fakafano he kau fakatufono he senetenari fakamua aki, ko e punaaga he fakamafanaaga. He oti e totou ki ai, ko e tau tutaki Motu Kehe i Anetioka kua “fiafia ai a lautolu ha ko e fakamafanaaga.” Ko Iuta mo Sila, ko laua ne fakafano mai i Ierusalema fakalataha mo e tohi, “kua fakamafana atu e laua, mo e fakamalolo e laua e tau matakainaga ke he tau kupu loga.” Kua nakai tuaha, ko e ha ha i ai ha Paulo mo Panapa, kua fakamafanafana mo e fakamalolo aki foki e tau katofia tua i Anetioka. (Gahua 15:1-3, 23-32) Kua maeke ia tautolu ke au atu ke taute pihia foki, ka fakapotopoto a tautolu ke he tau feleveiaaga Kerisiano mo e “fefakamafanaaki” he puhala he ha tautolu a ha ha i ai mo e tau tali.—Heperu 10:24, 25.
10. Ke puipui mai e fakalatahaaga, ko e heigoa kua lata ke taute kaeke ke tupu mai e ekefakakeleaaki?
10 Ka e, maeke agaia he alelo ka fakaaoga hehe ke fakahagahaga kelea ha tautolu a fakalatahaaga. “Ko e mena tote a ia [alelo], ka e hula ke he tau mena lalahi,” he talahau he tutaki ko Iakopo. “Kitiala, ko e tau akau loga kua tugi he afi tote.” (Iakopo 3:5) Vihiatia e Iehova a lautolu ne fakatupu e feveheveheaki. (Tau Fakatai 6:16-19) Ko e tau tala pihia ka fakatupu e nakai fakalatahaaga. Ti, ka e kua mogoia, kaeke ke ha i ai e taute mena fefakakeleaaki, ke pehe, ko e gutuloga e fakakelea atu ke he taha tagata po ke vagahau fakavihia atu ki a ia? To gahua ai e tau motua ke lagomatai a ia ne taute mena hehe. Ka e pete ni ia, ko ia ne vagahau kelea mo e nakai tokihala kua lata ke tuku ki tua, ke puipui e mafola, maopoopo, mo e fakalatahaaga he fakapotopotoaga. Ha ko e mena tohia e Paulo: ‘Aua neke feoaki mo e tagata ne talahaua ko e matakainaga ko ia ko e tagata vagahau kelea, aua foki neke kai mena fakalataha mo e tagata pihia.’—1 Korinito 5:11.
11. Ko e ha kua aoga ai e loto holoilalo kaeke ke talahau e tautolu taha mena ke fakatupu e feanaki he vahaloto ha tautolu mo e katofia tua?
11 Ko e liliaga he alelo ko e mena lagomatai ke taofi mau aki e fakalatahaaga. (Iakopo 3:10-18) Ka e fakalata, kua fai mena a tautolu ne talahau ke fakatupu aki e feanaki he vahaloto ha tautolu mo e katofia Kerisiano. Ti, nakai kia mitaki ke fakaaoga e uhoulu ke taute e mafola mo e matakainaga ha tautolu, ti fakamolemole kaeke ke lata? (Mataio 5:23, 24) Moli, kua lata e mena nei mo e fakatokolalo, po ke loto holoilalo, ka e tohia e Peteru: “Kia fakatapulu a mutolu ke he loto holoilalo; nukua, totoko he Atua ke he tau tagata fakatokoluga, ka e foaki mai e fakaalofa noa kia lautolu kua holoilalo.” (1 Peteru 5:5) To omoi he loto holoilalo a tautolu ke ‘tutuli e mafola’ mo e tau matakainaga ha tautolu, ka talahau e tau hehe ha tautolu mo e taute e fakamolemole kua lata. Nukua lagomatai he mena nei ke taofi mau e fakalatahaaga he magafaoa ha Iehova.—1 Peteru 3:10, 11.
12. Maeke fefe ia tautolu ke fakaaoga e alelo ke fakamalolo mo e taofi mau e fakalatahaaga he tau tagata ha Iehova?
12 Na maeke ia tautolu ke fakatolomaki e agaga fakamagafaoa mo lautolu he fakatokatokaaga ha Iehova kaeke ke fakaaoga fakahako ha tautolu a alelo. Ha ko e mena ia ni ne taute e Paulo, kua maeke ai ia ia ke fakamanatu ke he tau Tesalonia: “Ne mahani a mautolu kia mutolu takitokotaha tuga ne matua tane ke he hana fanau, he tomatoma atu a mautolu kia mutolu, mo e fakamafana atu, mo e talahau atu kia mutolu, kia o fano a mutolu ke lata mo e Atua.” (1 Tesalonia 2:11, 12) He fakatoka mai e fakafifitakiaga mitaki ke he mena nei, kua maeke ai a Paulo ke fakatonu e tau katofia Kerisiano ke “fakamafana a lautolu kua manava tote.” (1 Tesalonia 5:14) Manamanatu la ke he tau mena mitaki ka maeke ia tautolu ke taute he fakaaoga e alelo ke fakamafana, fakamalolo, mo e ati hake e falu. E, “mo e kupu ke he hana aho ke lata ai, kua mitaki lahi haia.” (Tau Fakatai 15:23) Ka e mua atu, kua lagomatai he vagahau pihia ke fakamalolo mo e taofi mau e fakalatahaaga he tau tagata ha Iehova.
Kia Fefakamagaloaki!
13. Ko e ha kua lata ai a tautolu ke fefakamagaloaki?
13 Ke fakamagalo age a ia ne fakahogohogomanava ne fita he fakamolemole mai, kua mitaki lahi a ia kaeke ke taofi mau e tautolu e fakalatahaaga Kerisiano. Ti lata ke lagafiha e fefakamagaloaki ha tautolu? Ne tala age a Iesu ki a Peteru: “Nakai tala atu e au kia koe ke lagafitu, ka kia laga fitugofulu kua taki fitu.” (Mataio 18:22) Kaeke ke nakai fakamagalo atu a tautolu, kua totoko atu ni a tautolu ke he fiafia ha tautolu. He fefe a ia? E, ko e faitaua mo e feaki e loto ita, ka kaiha e loto manamanatu mafola ha tautolu. Ti kaeke ke talahaua a tautolu ke he tau puhala favale mo e nakai fefakamagaloaki, liga to tamai e tautolu e fakamamahi ki a tautolu ni. (Tau Fakatai 11:17) Ko e mena nakai fiafia a ia ke he Atua ka taofi hifo e loto ita, ha ko e mena ke tataki atu ke he hala kelea lahi. (Levitika 19:18) Liu manatu foki, na hio e ulu ha Ioane ko e Papatiso ha ko e pulega ne taute e Herotia mahani kelea, ko ia ne “vale” ki a ia.—Mareko 6:19-28.
14. (a) Ko e heigoa ne fakaako mai he Mataio 6:14, 15 ki a tautolu hagaao ke he fakamagaloaga? (e) Kia fakatali tumau ni ka a tautolu ma e fakamolemole ato fakamagalo laia taha tagata?
14 Ko e liogi fakataitai ha Iesu kua putoia ai e tau kupu nei: “Kia fakamagalo e koe kia mautolu ha mautolu a tau hala; ha ko e mena fakamagalo atu a mautolu kia lautolu oti ne eke fakakelea kia mautolu.” (Luka 11:4) Kaeke ke nakai fefakamagaloaki a tautolu, kua fakahagahaga kelea ai tuai e tuaga ha tautolu, ha ko e taha vaha ni to nakai fakamagalo he Atua ko Iehova e tau hala ha tautolu, ha kua pehe a Iesu: “Kaeke ke fakamagalo atu a mutolu, ke he tau tagata e tau hala ha lautolu, ti fakamagalo mai foki a mutolu he Matua ha mutolu ha ha he lagi. Kaeke foki kua nakai fakamagalo atu e mutolu ke he tau tagata e tau hala ha lautolu, ti nakai fakamagalo foki ha mutolu a Matua ha mutolu a tau hala.” (Mataio 6:14, 15) Ti kaeke ke manako moli a tautolu ke taute ha tautolu a vala, ke taofi mau e fakalatahaaga he tau tagata tapuaki he magafaoa a Iehova, to fakamagalo a tautolu, liga ka fakanimonimo hifo e mena fakahogohogo manava ne liga ne taute ka e nakai manamanatu mo e nakai ha ha i ai ha manatu kelea. Kua pehe a Paulo: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a Keriso kia mutolu, kia pihia foki a mutolu.” (Kolose 3:13) Kaeke ke fefakamagaloaki a tautolu, kua lagomatai mai ki a tautolu ke taofi mau e fakalatahaaga uho he fakatokatokaaga ha Iehova.
Fakalatahaaga mo e Tau Fifiliaga Fakatagata
15. Ko e heigoa ne lagomatai aki e tau tagata ha Iehova ke taofi mau e fakalatahaaga he magaaho ka taute e tau fifiliaga fakatagata?
15 Kua taute he Atua a tautolu mo tau tagata tokanoa fakalataha mo e kotofaaga mo e matagahua ke taute e tau fifiliaga fakatagata. (Teutaronome 30:19, 20; Kalatia 6:5) Ka e, kua maeke a tautolu ke taofi mau ha tautolu a fakalatahaaga ha kua fakatauo a tautolu mo e tau matafakatufono mo e tau matapatu fakaakoaga he Tohi Tapu. Kua manamanatu a tautolu ki a lautolu he magaaho ka taute ai e tau fifiliaga fakatagata. (Gahua 5:29; 1 Ioane 5:3) Liga kua mafuta hake e huhu hagaao ke he tu uho. Kua maeke ia tautolu ke fakailoa e fifiliaga fakatagata he liu manatu “nakai ko e tau tagata he lalolagi” a tautolu mo e kua ‘tukituki e tautolu ha tautolu a tau pelu ke eke mo tau koho.’ (Ioane 17:16; Isaia 2:2-4) Ke tuga e mena ia, he magaaho ka lata ia tautolu ke taute e fifiliaga fakatagata hagaao ke he ha tautolu a fakafetuiaga ke he Fakatufono, kua manamanatu atu a tautolu ke he mena ne talahau he Tohi Tapu hagaao ke he “tau mena he Atua, kia uta a ke he Atua,” ka e omaoma a tautolu ke he “tau tui ne mua” ke he tau mena fakalalolagi. (Luka 20:25; Roma 13:1-7; Tito 3:1, 2) E, ko e manamanatu ke he tau matafakatufono mo e tau matapatu fakaakoaga he Tohi Tapu he magaaho ka taute e tau fifiliaga fakatagata ka lagomatai ke taofi mau e fakalatahaaga Kerisiano ha tautolu.
16. Maeke fefe ia tautolu ke lagomatai ke taofi mau e fakalatahaaga he magaaho ka taute e tau fifiliaga faka-Tohiaga Tapu ne kua nakai hako po kua nakai hepe? Fakamaama.
16 Kua maeke foki ia tautolu ke taofi mau e fakalatahaaga Kerisiano ka taute e fifiliaga fakatagata katoatoa he Tohiaga Tapu ne nakai hako po ke hepe. Taute fefe e mena ia? He fakakite e manamanatuaga fefakaalofaaki ma e falu ne liga lauia he fifiliaga ha tautolu. Ke fakatai: I loto he fakapotopotoaga i Korinito i tuai, ne mafuta mai e huhu hagaao ke he vala kakano manu ne taute poa ke he tau tupua. Moli ni, nukua nakai lata e Kerisiano ke fakaauloa ke he hufeiloaga tupua. Ka e pete ni ia, na nakai hala ke kai e mena toe he vala kakano manu pehenei ne fakamaligi fakamitaki e toto, ti kua fakafua ai he makete. (Gahua 15:28, 29; 1 Korinito 10:25) Ka e, tupetupe agaia ni e tau manamanatuaga hifo he falu he tau Kerisiano ke he kaiaga he vala kakano manu nei. Ti fakatonutonu age a Paulo ke he falu he tau Kerisiano ke kalo mai, he fakatupetupe a lautolu. Ka ko e mena moli, ne tohia e ia: “Kaeke kua tupetupe e matakainaga haku he mena kai nakai tuai kai au e kakano he tau manu tukulagi, neke tupetupe haku a matakainaga kia au.” (1 Korinito 8:13) Ti pihia foki kaeke ke nakai putoia ki ai e matafakatufono po ke matapatu fakaakoaga he Tohi Tapu, ko e mena fefakaalofaaki a ia ke manamanatu atu ke he falu, he magaaho ka taute e tau fifiliaga fakatagata ne liga to lauia e fakalatahaaga he magafaoa he Atua!
17. Ko e heigoa e mena kua hataki ke taute he magaaho kua lata ia tautolu ke taute e tau fifiliaga fakatagata?
17 Kaeke ke fakauaua a tautolu ke he puhala ke taute, ko e mena fakapulotu ke fifili ke he puhala ka toka hifo a tautolu mo e manamanatuaga mea, mo e kua lata he falu ke fakalilifu ha tautolu a fifiliaga. (Roma 14:10-12) Kua moli ni, ka eke ke taute e tautolu e fifiliaga fakatagata, kua lata ia tautolu ke kumi e takitakiaga ha Iehova he liogi. Ke tatai mo e salamo, kua maeke ia tautolu ke liogi mo e mauokafua: “Kia haga mai hau a na teliga kia au. . . . Ha ko koe ni ko e haku a maka tumau, mo e haku a kolo; ki a takitaki mo leveki e koe au ha koe hau a higoa.”—Salamo 31:2, 3.
Tumau ke Taofi e Fakalatahaaga Kerisiano
18. Fakakite mai fefe e Paulo e fakalatahaaga he fakapotopotoaga Kerisiano?
18 Ia 1 Korinito veveheaga 12, ne fakaaoga e Paulo e tino tagata ke fakatai aki e fakalatahaaga he fakapotopotoaga Kerisiano. Ne pehi atu a ia ke he tuaga tu tokotaha mo e aoga he tau tagata takitokotaha. “Kane mai ko e fahi tino taha e tau mena oti ia, to fefe e tino?” he huhu e Paulo. “Hanai, kua loga e tau fahi tino, ka e taha ni e tino. Nakai maeke foki ke he mata ke tala age ke he lima, nakai aoga a koe kia au; ti nakai maeke foki ke he ulu ke tala age ke he tau hui, nakai aoga a mua kia au.” (1 Korinito 12:19-21) Ke tuga ai, nakai taute e tautolu oti haia he magafaoa he tau tagata tapuaki ha Iehova e gahua taha. Ka e, kua kaufakalataha a tautolu, mo e kua manako a tautolu ko e taha mo e taha.
19. Maeke fefe ia tautolu ke lagomatai mai he tau foakiaga fakaagaga he Atua, mo e ko e heigoa ne talahau he taha matakainaga tane motua hagaao ke he mena nei?
19 Ke tuga he manako e tino ke kai, leveki, mo e takitakiaga, kua manako ai a tautolu ma e tau foakiaga fakaagaga ne mai he Atua he puhala he hana a Kupu, agaga, mo e fakatokatokaaga. Ke lagomatai mai he tau foakiaga nei, kua lata ia tautolu ke fai vala he magafaoa ha Iehova he lalolagi. He loga ai e tau tau he nofo he fekafekauaga he Atua, ne tohia mai he taha matakainaga tane: “Kua lahi e fakaaue haku ha kua moui au ke he iloilo he finagalo ha Iehova mai he tau aho ia ato hoko ke he 1914 ko e magaaho ne nakaila maama mitaki ai . . . mai ke he aho nei ne kikila ai e kupu moli tuga e la he mogo tupoula. Ti, kaeke ke taha e mena ne lahi mahaki e aoga ki a au, ko e fakatata tumau atu ni ke he fakatokatokaaga ne kitia ha Iehova. Ko e moui fakamua haku kua taute au ke iloa ko e nakai aoga ke falanaki ke he fakakakanoaga he tagata. Mo e, he magaaho ne maama ai e au e mena ia, ne ukufeke au ke nofo mau ke he fakatokatokaaga tua fakamoli. Ha ko e mena fai puhala foki nakai e tagata ke moua e fiafia mo e fakamonuinaaga ha Iehova?”
20. Ko e heigoa kua lata ia tautolu ke ukufeke ke taute hagaao ke he ha tautolu a fakalatahaaga ha ko e tau tagata ha Iehova?
20 Nukua hea e Iehova e tau tagata hana mai he lalolagi pouligia mo e nakai fakalataha. (1 Peteru 2:9) Ati tamai e ia a tautolu ki loto he fakalatahaaga monuina mo ia ni mo e ha tautolu a tau katofia tua. Ko e fakalatahaaga nei, to kitia ai he fakatokaaga fou he tau mena ne kua tata lahi mai he mogonei. Ha kua pihia e tau aho fakamui uka nei, kia o mai a a tautolu ke fakatumau ke ‘fakatapulu a tautolu aki e fakaalofa’ mo e taute e tau mena oti ne fahia a tautolu ki ai ke fakamalolo mo e ke taofi mau ha tautolu a fakalatahaaga uho.—Kolose 3:14, NW.
To Tali Fefe e Koe?
◻ Ko e ha kua maeke ai he taute e finagalo he Atua mo e pipiki atu ke he kupu moli ka lagomatai a tautolu ke taofi mau e fakalatahaaga?
◻ Matutaki atu fefe e fakalatahaaga ke he fakaaogaaga fakamitaki he alelo?
◻ Ko e heigoa ne putoia ki ai e fefakamagaloaki?
◻ Maeke fefe ia tautolu ke taofi mau e fakalatahaaga he magaaho ka taute e tau fifiliaga fakatagata?
◻ Ko e ha ne taofi mau ai e fakalatahaaga Kerisiano?
[Fakatino he lau 16]
He tuga ni he fakamaopoopo he tagata leveki nei hana fuifui mamoe, kua taute mau e Iehova hana tau tagata ke kaufakalataha
[Tau Fakatino he lau 18]
He fakamolemole mo e loto fakatokolalo he magaaho ka taute e tautolu e mena fakahogohogomanava, kua lagomatai ai a tautolu ke fakamalolo e fakalatahaaga