Puhala ne Taute e Tau Leveki Faifano mo Tau Fekafekau Pule Tua Fakamoli

“Kia takitokotaha a mutolu mo e fekafekau ko e taha ke he taha ke he mena ia ni, ke fakalata ke he mena fakaalofa kua moua e ia, tuga ne tau fekafekau pule mitaki ke he tau mena fakaalofa kehekehe he Atua.”​—1 PETERU 4:10.

1, 2. (a) Maeke fefe ia koe ke fakakakano e kupu “fekafekau pule”? (e) Ko hai ne fakalataha ke he tau fekafekau pule ne fakaaoga he Atua?

NA FAKAAOGA katoa e Iehova e tau Kerisiano tua fakamoli hana mo tau fekafekau pule. Ko e fekafekau pule kua fa mahani ke eke mo fekafekau ne pule he kaina. Kua liga pule foki a ia ke he tau mena fakapisinisi he hana a iki. (Luka 16:1-3; Kalatia 4:1, 2) Kua ui e Iesu hana a kau fakamoli ne fakauku he lalolagi ko e “fekafekau fakamoli.” Ke he fekafekau pule nei kua tuku age “hana tau mena oti,” fakalataha mo e tau gahua fakamatala he Kautu.​—Luka 12:42-44; Mataio 24:14, 45.

² Kua talahau he aposetolo ko Peteru ko e tau Kerisiano oti ko e tau fekafekau pule he fakaalofa noa he Atua ne fakakite ai he tau puhala kehekehe. Kua takitokotaha e Kerisiano ke fai tuaga ke maeke ia ia ke taute e fekafekau pule tua fakamoli. (1 Peteru 4:10) Ko e tau motua Kerisiano ko e tau fekafekau pule, ti ha ha mo lautolu ko e tau leveki faifano. (Tito 1:7) Kua lata ke kitekite fefe ke he tau motua faifano nei? Ko e heigoa e tau mahani mo e tau fioiaaga ne kua lata ke moua e lautolu? Mo e maeke fefe ia lautolu ke foaki e mena mitaki lahi?

Loto Fakaaue ma e Ha Lautolu a Fekafekauaga

3. Ko e ha kua ui ai e tau leveki faifano ko e “tau fekafekau mitaki”?

³ He tohitohi ke he leveki faifano mo e hana hoana, ne taha e hoa mau Kerisiano ne talahau: “Kua manako a maua ke fakailoa ha maua a loto fakaaue ma e tau magaaho mo e fakaalofa ne foaki mai e mua ki a maua. Ko e magafaoa, kua lagomatai lahi he ha mua a tau fakamaloloaga mo e tomatomaaga a mautolu. Iloa e mautolu kua lata ia mautolu ke fakatumau ke tupu fakaagaga, ka e fakalataha mo e lagomatai ha Iehova mo e tau matakainaga tane mo e fifine tuga a mua, ko e tau mamahi kua taute ai ke fakamukamuka.” Ko e tau fakailoaaga pehenei kua fa mahani mau ha kua ha ha he tau leveki faifano e fiafia fakatagata ke he tau matakainaga tua auloa, ke tuga ni he leveki fakamitaki he fekafekau pule mitaki e tau mena manako he kaina. Ko e falu ko e tau tagata lauga mitaki lahi. Tokologa ne mitaki lahi ke he gahua fakamatala, ka e ko e falu kua talahaua ha ko e ha lautolu a mafanatia mo e fakaalofa hofihofi. He feaki mo e fakaaoga e tau mena fakaalofa pihia ke fekafekau ke he falu, kua lata tonu e tau leveki faifano ke ui ko e “tau fekafekau pule mitaki.”

4. Ko e heigoa e huhu ka kikite ki ai he mogonei?

⁴ “Kua lata mo e tau fekafekau kua toka ki ai e tau mena, kia takitokotaha mo e fakamoli,” he tohia he aposetolo ko Paulo. (1 Korinito 4:2) Ke fekafekau ke he tau katofia Kerisiano he tau fakapotopotoaga kehekehe ke he taha fahi tapu mo e taha fahi tapu ko e monuina kehe mua atu mo e olioli. Ka e pete ni he pihia, ko e matagahua mamafa foki a ia. Ti maeke fefe, mogoia, e tau leveki faifano ke tua fakamoli mo e kautu he taute ha lautolu a fekafekauaga pule?

Kua Kautu he Taute ha Lautolu a Fekafekauaga Pule

5, 6. Ko e ha e liogi mo e falanaki ki a Iehova kua aoga lahi ai ke he moui he leveki faifano?

⁵ Ko e liogi mo e falanaki ki a Iehova ka aoga lahi kaeke e tau leveki faifano ke kautu ke eke mo tau fekafekau pule. Ha ko e ha lautolu a setulu mo e tau matagahua loga, kua logona e lautolu he falu magaaho e pehia mamafa. (Fakatatai 2 Korinito 5:4.) Ti kua lata ia lautolu ke fakalautatai mo e lologo he salamo ko Tavita: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe; nakai tuku e ia tukulagi e tau tagata tututonu ke fagahuatia.” (Salamo 55:22) Kua fakamafana foki e tau kupu ha Tavita: “Kia fakaaue ke he Iki ke he taha aho mo e taha aho; kua tuku e tau kavega ki luga ia tautolu.”​—Salamo 68:19.

⁶ Tamai i fe e Paulo e malolo ke leveki aki hana a tau matagahua fakaagaga? “Kua maeke ia au e tau mena oti kana ke he fakamalolo mai [“he Atua,” NW] kia au,” he tohia e ia. (Filipi 4:13) E, ko e Atua ko Iehova e Punaaga he malolo ha Paulo. Kua tomatoma mai pihia foki a Peteru: “Kaeke ke fekafekau e taha kia fakalata ke he malolo kua foaki mai he Atua, kia fakaheke e Atua ke he tau mena oti kana, ha ko Iesu Keriso.” (1 Peteru 4:11) Taha e matakainaga ko ia ko e leveki faifano ke he tau tau loga ne peehi e lata ma e falanaki ke he Atua, kua talahau: “Kia tumau ke onoono ki a Iehova ka fehagai mo e tau mena vihi, mo e kumi e lagomatai he hana a fakatokatokaaga.”

7. Kua gahuahua fefe e lagotatai he gahua he leveki faifano?

⁷ Kua lata e leveki faifano ne kautu mo e lagotatai. Ke tuga ai e falu he tau Kerisiano, kua fakamakau a ia ke ‘mailoga ai e tau mena aoga.’ (Filipi 1:10, fakatatai NW.)a He magaaho ka fai huhu e tau motua he fakapotopotoaga hagaao ke he taha lekua, ko e mena pulotu ke tutala a lautolu mo e leveki takaiaga ne ahiahi. (Tau Fakatai 11:14; 15:22) Kua tuga anei, ko e hana tau onoonoaga lagotatai mo e fakatonuaga faka-Tohiaga Tapu to eke ke lahi e lagomatai he fakatumau e tau motua ke fehagai e lekua he mole e fano kehe mai a ia he fakapotopotoaga. He puhala taha ia ni, ne tala age a Paulo ki a Timoteo: “Ko e tau mena foki ne fanogonogo mai a koe kia au mo e tau talahau tokologa, kia tuku age e koe ke he tau tagata fakamoli, kua maeke ni ke fakaako atu ke he falu.”​—2 Timoteo 2:2.

8. Ko e ha e fakaakoaga Tohi Tapu, kumikumiaga, mo e manamanatu hokulo kua aoga lahi ai?

⁸ Ko e fakaakoaga faka-Tohiaga Tapu, kumikumiaga, mo e manamanatu fakahokulo ko e tau mena lata lahi ma e foakiaga he fakatonuaga mitaki. (Tau Fakatai 15:28) Taha e leveki maaga motu ne talahau: “Ka feleveia mo e tau motua, kua nakai lata ia mautolu ke maimaina ke talahau kua nakai iloa a mautolu e tali ke he taha huhu.” Ke lali ke moua e “finagalo he Keriso” hagaao ke he lekua ka maeke ai ke foaki e fakatonuaga fakave ke he Tohi Tapu ka lagomatai e falu ke fakatauo mo e finagalo he Atua. (1 Korinito 2:16) He falu magaaho kua lata he leveki faifano ke tohi ke he Sosaiete he Kolo Toko ma e takitakiaga. Ke he ha mena ni, ko e tua ki a Iehova mo e fakaalofa ma e kupu moli kua mua atu e aoga mai he kitiaaga po ke makaka. He nakai hau mo e “tau kupu kua mua ue atu, po ke iloilo,” ne kamata e Paulo hana a fekafekauaga i Korinito “mo e lolelole, mo e matakutaku, mo e vivivivi lahi.” Kua taute kia he mena nei a ia ke nakai fai aoga? Kua nakai pihia, ha kua lagomatai ai e tau Korinito ke moua e tua, ‘nakai ke he iloilo he tau tagata, ka e ko e malolo he Atua.’​—1 Korinito 2:1-5.

Falu he Tau Mahani Aoga Lahi

9. Ko e ha kua lata e maamaaga mo e tau motua faifano?

⁹ Ko e maamaaga ka lagomatai e tau leveki faifano ke moua e tau fua mitaki. Ne tomatoma e Peteru e tau Kerisiano oti ke “loto fakalataha,” po ke ke eke ke “fai maamaaga.” (1 Peteru 3:8, NW, matahui tala) Taha e leveki faifano ne logona e lata ke ‘iloa e tau tagata oti i loto he fakapotopotoaga mo e ke moli e lagomataiaga.’ Ko e agaga pihia ni, ne tohia ai e Paulo: “Kia fiafia a mutolu fakalataha mo lautolu kua fiafia, kia tagi foki a mutolu fakalataha mo lautolu kua tagi.” (Roma 12:15) Ko e tau aga pihia ne omoomoi e tau leveki faifano ke taute e tau laliaga fakamakamaka ke maama e tau mena vihi mo e tau tutuaga he tau matakainaga tua auloa. Mogoia ka age e lautolu e fakatonuaga faka-Tohiaga Tapu ati hake ka maeke ke moua e mitaki moli ane mai kua fakagahuahua ai. Ne moua he leveki faifano ne mahomo atu e fakakite e loto maamaaga e tohi nei mai he fakapotopotoaga ne tata ki Turin, Italia: “Kaeke ke manako a koe ke moua e fiafia, kia fiafia; kaeke ke manako a koe ke talia, kia talia; kaeke ke manako a koe ke moua e fakaalofa, kia mahani fakaalofa; kaeke ke manako a koe ke moua e lagomatai, kia mautali ke lagomatai. Ko e tau mena hanei ne ako e mautolu mai ia koe!”

10. Ko e heigoa ne talahau he tau leveki takaiaga mo e maaga motu hagaao ke he loto fakatokolalo, mo e ko e heigoa e fakafifitakiaga ne fakatoka e Iesu ke he mena nei?

¹⁰ Ke loto fakatokolalo mo e ke mukamuka ke fakafehagai ka lagomatai e tau leveki faifano ke taute fakalahi e mitaki. Taha e leveki faifano ne talahau: “Ko e mena kua mua e aoga ke tumau e aga fakatokolalo.” Ti hataki e ia e tau leveki faifano fou: “Aua neke fakahanoa a mutolu ke futiaki he tau matakainaga ne mua atu e muhu mena ha ko e tau mena ka liga taute e lautolu ia ma mutolu, po ke fakakaupa ha mutolu a fiafia ki a lautolu ia, ka e kia fakamakau tumau ke fakafehagai mo e falu mo e nakai fili.” (2 Nofoaga he Tau Patuiki 19:6, 7) Mo e ko e leveki faifano ne loto fakatokolalo moli to nakai molea e kitekiteaga he hana ni a aoga ko e hukui he Sosaiete. Ne talahau fakalatalata mai e leveki maaga motu: “Kia loto fakatokolalo mo e fakamakai ke fanogonogo ke he tau matakainaga. Kia fakatumau ke mukamuka ka fakafehagai.” Ko e tagata mua ue atu he moui, ko Iesu Keriso, kua liga taute e tau tagata ke logona e fakauauaaga, ka e kua lahi e loto fakatokolalo mo e mukamuka hana ke fakafehagai ati logona hifo foki he fanau e mafanatia ke he hana a fakalatahaaga. (Mataio 18:5; Mareko 10:13-16) Ko e tau leveki faifano kua manako ke he fanau, tau fuata mui, ko lautolu ne momotua​—moli ko e ha tagata ni mo lautolu oti he fakapotopotoaga—​ke logona e ataina ke o atu ki a lautolu.

11. He magaaho ka lata ai, ko e heigoa e lauiaaga he fakamolemole?

¹¹ Kua moli, ‘kua hehe a tautolu oti ke he tau mena loga,’ mo e nakai noa e ha leveki faifano ke nakai taute e tau mena hehe. (Iakopo 3:2) He magaaho ka taute e lautolu e tau mena hepe, kua foaki he fakamolemole moli ke he falu he tau motua e fakafifitakiaga he mahani fakatokolalo. Hagaao ai ke he Tau Fakatai 22:4, “ko e taui he mahani fakatokolalo mo e matakutaku [fai kakano] kia Iehova, hanai, ko e koloa, mo e lilifu mo e moui.” Mo e nakai kia lata e tau fekafekau oti he Atua ke ‘feoaki mo e ha lautolu a Atua mo e loto fakatokolalo?’ (Mika 6:8, NW, Liliu he 1960) He magaaho ne huhu ko e heigoa e fakatonuaga ka foaki e ia ke he motua faifano fou, ne pehe e taha leveki takaiaga: “Kia fakatokoluga e fakalilifu mo e manamanatuaga ma e tau matakainaga oti, mo e onoono ki a lautolu ko e mua e mitaki mai ia koe. To lahi ai e mena ka ako mai e koe he tau matakainaga. Kia tumau ke loto fakatokolalo. Aua fakatupetupe. Aua neke mahani fakatupua.”​—Filipi 2:3.

12. Ko e ha e makutu ke he fekafekau faka-Kerisiano kua aoga lahi ai?

¹² Ko e makutu ma e fekafekauaga faka-Kerisiano ka foaki e kakano mamafa ke he tau kupu he tau leveki faifano. Kua moli, he magaaho ka fakatoka e ia mo e hana hoana e tau fakafifitakiaga fakamakutu ke he gahua evagelia, kua fakamalolo ai e tau motua, ha lautolu a tau hoana, katoa mo lautolu he fakapotopotoaga ke fakakite e makutu ke he ha lautolu a fekafekauaga. “Kia fakamakutu ma e fekafekauaga,” he fakamafana he taha leveki takaiaga. Ne lafi atu a ia: “Moua e au, ke he tau mena oti, ka lahi e fakamakutu e fakapotopotoaga ke he fekafekauaga, kua fiha lahi e tau lekua ka moua e lautolu.” Taha foki e leveki takaiaga ne talahau: “Talitonu au kaeke ke gahua e tau motua he fonua mo e tau matakainaga tane mo e fifine mo e lagomatai a lautolu ke olioli ke he fekafekauaga, to fua mai e loto mafola mo e makona lahi he gahua ki a Iehova.” Ko e aposetolo ko Paulo ne ‘fakamalolo ke vagavagahau atu ki a mutolu e vagahau mitaki he Atua ke he tau Tesalonia mo e tau fakamalolo lahi.’ Kua pihia ai ne ha ha ia lautolu e manamanatuaga hohofi ke he hana a ahiahi mo e gahua fakamatala mo e manako ke liliu ke kitia foki a ia!​—1 Tesalonia 2:1, 2; 3:6.

13. Ko e heigoa he leveki faifano ka kikite ki ai he magaaho ka gahua mo e tau matakainaga Kerisiano he fekafekauaga he fonua?

¹³ He magaaho ka gahua mo e tau matakainaga Kerisiano he fekafekauaga he fonua, kua kitekite atu e leveki faifano ke he ha lautolu a tau tutuaga mo e tau kaupaaga. Pete ni kua liga lagomatai e hana a tau talahauaga, iloa e ia na liga hopoate e falu he magaaho ka gahua fakamatala ai mo e motua kua leva. He falu he tau tuaga, ha ko e mena ia, kua liga aoga lahi e fakamaloloaga mai he fakatonutonuaga. He magaaho ka faihoani e ia e tagata fakailoa po ke tau paionia ke he fakaakoaga Tohi Tapu, liga to manako a lautolu ke takitaki ai he leveki faifano. Kua pihia fakalata e mena nei ke fakamahani a lautolu ke he falu he tau puhala ke fakatolomaki ha lautolu a tau puhala fakaako.

14. Ko e ha kua maeke ai ke talahau kua fakaohooho he tau leveki faifano e makutu ke he falu?

¹⁴ Kua fakatupu he tau leveki faifano e makutu i loto he falu. Taha e leveki faifano i Ukanata ne fano hui he vaouhi matolutolu ke he taha e tula ke fakatauo mo e taha matakainaga tane ke he fakaakoaga Tohi Tapu ne kua tote e holo ki mua. He ha laua a fenoga ne to lahi e uha, ti hohoko atu a laua kua pala kuutu ai. He magaaho ne logona ai he magafaoa toko ono ko e tagata ahiahi ki a lautolu ko e leveki faifano, kua lahi mahaki e fiafia ha lautolu. Iloa e lautolu ko e tau akoako he lotu ha lautolu to nakai fakakite pihia e fiafia ke he fuifui. He Aho Tapu, ne o atu a lautolu ke he ha lautolu a feleveiaaga fakamua mo e talahau e manako ke eke mo Tau Fakamoli a Iehova.

15. Ko e heigoa e mena mitaki ne fiafia e leveki takaiaga makutu ki ai i Mesiko?

¹⁵ He maaga i Mesiko ko Oaxaca, ne taha e leveki takaiaga ne taute e taha mena ne nakai amanaki ki a ia. Ne taute a ia ke nofo he poko he fale puipui ke fa e po, ke maeke ke ahiahi e matakau toko fitu ne kua eke ai mo tau tagata fakailoa he Kautu. Ke he falu aho ne faihoani e ia e tau pagota nei he fakamatala a lautolu ke he taha poko ke he taha poko mo e takitaki e tau fakaakoaga Tohi Tapu. Ha ko e fiafia ne fakakite, ko e falu he tau fakaakoaga nei kua fakaholo atu ke he po. “He fakahikuaga he ahiahiaga, ko lautolu i loto mo au kua logona hifo e olioli mahaki ha ko e fua he fakamaloloaga fakafahi ua,” he tohi he leveki takaiaga makutu lahi nei.

16. Ko e ha kua lahi ai e aoga he magaaho ka foaki he tau leveki faifano mo e ha lautolu a tau hoana e fakamaloloaga?

¹⁶ Kua lali e tau leveki faifano ke eke mo fakamaloloaga. He magaaho ne ahiahi e Paulo e tau fakapotopotoaga i Maketonia, ne “tomatoma atu [a ia] kia lautolu he tau kupu loga.” (Gahua 20:1, 2) Na maeke e tau kupu fakamalolo ke lahi e lagomatai ka hataki e tau fuata mo e tau momotua ke moua e tau foliaga fakaagaga. He taha la ofisa lahi he Sosaiete he Kolo Toko, kua fakakite mai he tau kumikumiaga na fakamalolo he tau leveki faifano ke teitei 20 e pasene ha lautolu ne foaki noa ke gahua he fekafekauaga mau. Ha ko e hana a fakafifitakiaga mitaki ko e tagata fakapuloa mau he Kautu, kua fakakite foki e hoana he leveki faifano ke eke mo punaaga lahi he fakamaloloaga.

17. Fefe e logonaaga he taha leveki takaiaga motua lahi hagaao ke he hana monuina ke foaki e lagomatai ke he falu?

¹⁷ Ko lautolu ne momotua mo e tau solu fakaatukehe kua lata lahi ke moua e fakamaloloaga. Taha e leveki takaiaga motua lahi ne tohi: “Ko e taha fahi he haku a gahua ne fakagahuahua e olioli nakai fai talahauaga, ko e monuinaaga ke foaki e lagomatai ki a lautolu ne lolelole mo e tino lolelole i loto he fuifui he Atua. Kua ha ha he tau kupu ia Roma 1:11, 12 e kakano uho ki a au, he moua e au e fakamaloloaga mahaki he ‘foaki kia lautolu taha mena fakaalofa ke lata mo e Agaga ke fakatumau ai a lautolu.’ ”

Tau Palepale ma e ha Lautolu a Tau Gahua Olioli

18. Ko e heigoa e foliaga faka-Tohiaga Tapu ne ha ha he tau leveki faifano?

¹⁸ Kua ha ha he tau leveki faifano e fiafia ne mua atu he tau matakainaga tua auloa he loto. Kua manako a lautolu ke fakamalolo e tau fakapotopotoaga mo e ati hake fakaagaga a lautolu. (Gahua 15:41) Taha e leveki faifano ne gahua fakamakamaka “ke tuku age e fakamaloloaga, foaki e okiokiaga, mo e ke fakaohooho e manako ke fakakatoatoa e fekafekauaga mo e fakatumau ke moui ke he kupu moli.” (3 Ioane 3) Ko e taha kua lali ke taofi mau e tau matakainaga tua auloa ke he tua. (Kolose 2:6, 7) Manatu ko e leveki faifano ko e “lagomatai fakamoli,” nakai ko e iki ke he tua he falu. (Filipi 4:3; 2 Korinito 1:24) Ko e hana a ahiahi ko e magaaho ma e fakamaloloaga mo e lahi e gahua, pihia foki e magaaho ma e tau kau he tau motua ke liliu kikite atu e tupu tolomaki kua kitia mo e manamanatu ke he tau foliaga anoiha. Mai he hana a tau kupu mo e fakafifitakiaga, kua maeke e tau tagata fakailoa, tau paionia, tau lagomatai fekafekau, mo e tau motua he fakapotopotoaga ke amanaki ke ati hake mo e fakaohooho ma e gahua i mua. (Fakatatai 1 Tesalonia 5:11.) Ti, he mogoia, kia lagomatai mo e loto katoa e tau ahiahi he leveki faifano, mo e fakaaoga e lagomatai ne foaki he leveki maaga motu.

19, 20. Kua palepale fefe e tau leveki faifano mo e ha lautolu a tau hoana ha ko e ha lautolu a gahua tua fakamoli?

¹⁹ Kua lahi e palepale he tau leveki faifano mo e ha lautolu a tau hoana ha ko e ha lautolu a gahua tua fakamoli, mo e kua maeke ia lautolu ke mauokafua to fakamonuina e Iehova a lautolu ma e tau mitaki ne taute e lautolu. (Tau Fakatai 19:17; Efeso 6:8) Ko Georg mo Magdalena ko e hoa tokoua kua momotua lahi ne fekafekau ke he tau tau loga he gahua faifano. He fonoaga i Lakesemepuka, ne fina atu e taha tagata ki a Magdalena, ko ia ne fakamatala a Magdalena ki ai he 20 e tau tau he mole. Ko e fiafia he fifine Iutaia nei ke he kupu moli kua fakalagalaga ai he tohi faka-Tohi Tapu ne toka e Magdalena mo ia, ti he taha magaaho ni ti papatiso ai a ia. Ko Georg ne fina atu e mahakitaga fakaagaga ki ai ne manatu e ia e aahi a ­Georg ke he hana kaina ne teitei ke 40 e tau tau he mole. Ko e fakafeleveiaaga loto fiafia ha Georg ke he kupu moli ne takitaki a ia mo e hana tane he magaaho fakamui ke talia e kupu moli. Ti ke totoku ni, kua olioli lahi tokoua a ­Georg mo Magdalena.

²⁰ Ko e fekafekauaga fua loga ha Paulo i Efeso kua tamai ki a ia e olioli mo e liga omoi a ia ke fatiaki e tau kupu ha Iesu: “Kua mua e monuina hana ke foaki atu, ke he monuina hana ke talia mai.” (Gahua 20:35) Ha kua putoia e gahua faifano ke foaki tumau, kua moua e lautolu ne gahua i ai e fiafia lahi, mua atu he magaaho ka mailoga e lautolu e tau fua mitaki he ha lautolu a gahua. Kua talahau he motua lolelole he tohi ke he taha leveki faifano ne lagomatai a ia: “Kua eke a koe ke lahi e ‘fakamafanatia’ he moui fakaagaga haku​—mua atu ke he mena ne iloa e koe. . . . To nakai iloa e koe e lahi he lagomatai hau ki a Asafo he vaha fou nei, ko ia ne ‘fetamakina ke tupetupe e tau hui.’”​—Kolose 4:11; Salamo 73:2.

21. Ko e ha ka talahau e koe ko e hagaao e 1 Korinito 15:58 ke he tau gahua he tau leveki faifano?

²¹ Ko e Kerisiano motua lahi ne gahua he takaiaga ke he tau tau loga ne loto ke manamanatu ke he 1 Korinito 15:58, ke he mena ne poaki mai e Paulo: “Kia tumau a mutolu mo e nakai fagahuatia, kia fakamakai nakai noa ke he gahua he Iki, he iloa e mutolu nakai noa mo e fua ha mutolu a fakafita ke he gahua he Iki.” Ko e tau leveki faifano kua lahi moli e tau mena taute he gahua he Iki. Ti kua loto fakaaue ha a tautolu he gahua a lautolu mo e olioli lahi mo tau fekafekau pule tua fakamoli he fakaalofa noa ha Iehova!

[Matahui Tala]

To Tali Fefe a Koe?

◻ Ko e ha kua maeke ke kitekite ke he tau leveki faifano mo “tau fekafekau pule mitaki”?

◻ Ko e heigoa e falu puhala ne lagomatai e tau leveki takaiaga mo e maaga motu ke taute fakalahi e mitaki?

◻ Ko e ha kua mua atu e aoga he mahani fakatokolalo mo e fakamakutu ki a lautolu ne ha ha he gahua faifano?

◻ Ko e heigoa e tau foliaga mitaki ne ha ha he tau leveki faifano?

[Fakatino he lau 16]

Kua fakamakamaka e tau leveki faifano ke fakamalolo e tau matakainaga tua auloa

[Tau Fakatino he lau 17]

Kua maeke katoa e tau fuata mo e tau momotua ke moua e aoga mai he fefakalatahaaki mo e tau leveki faifano mo e ha lautolu a tau hoana

[Fakatino he lau 18]

Na fakalagalaga he makutu he leveki faifano ke he fekafekauaga e makutu ke he falu