Lagomatai e Falu ke Fakaako e Tau Manako he Atua

“Nakai ha ha ia au e pule ke he mena ia; oi fakaalofa foki kia au, kaeke ke nakai fakamatala e au e vagahau mitaki.”​—1 KORINITO 9:16.

1, 2. (a) Ko e heigoa e gahua fakafahiua ne manako a Iehova ki a tautolu ke fakaauloa ki ai? (e) Ko e heigoa kua lata he tau tagata loto fakamoli ke fakaako ke eke mo tau tagata he Kautu he Atua?

KUA ha ha ia Iehova e vagahau mitaki ma e tau tagata. Ha ha ia ia e Kautu, ti manako a ia ke logona ai he tau tagata he tau kavi oti! Ti, lagataha he fakaako e tautolu e vagahau mitaki nei, kua manako mai e Atua ki a tautolu ke fakamatala ai ke he falu. Ko e gahua fakafahiua anei. Ke fakamua aki, kua lata ia tautolu ke fakapuloa e vagahau mitaki he Kautu he Atua. I loto he hana perofetaaga ne hagaao ke he “fakaotiaga he lalolagi,” ne talahau e Iesu: “To fakamatala atu foki e vagahau mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—Mataio 24:3, 14.

² Ko e fahi ke ua aki he gahua nei kua putoia ke fakaako a lautolu ne tali fiafia mai ke he fakapuloaaga he Kautu. He mole atu e liu tu mai hana, ne tala age a Iesu ke he matakau lahi he hana tau tutaki: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; Ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mataio 28:19, 20) Ko e ‘tau mena ne poaki e Iesu’ kua nakai mai ia ia ni; ka e fakaako e ia e falu ke omaoma ke he tau poakiaga, po ke tau manako he Atua. (Ioane 14:23, 24; 15:10) Ke fakaako e falu ke ‘omaoma e tau mena oti ne poaki he Keriso’ kua putoia ai ke lagomatai a lautolu ke fakaako e tau manako he Atua. Ko e tau tagata loto fakamoli kua lata ke fakafeleveia e tau manako he Atua ke eke mo tau tagata he Kautu hana.

3. Ko e heigoa e Kautu he Atua, mo e ko e heigoa ka ta mai ke taute e fekau he Kautu mo vagahau mitaki lahi?

³ Ko e heigoa e Kautu he Atua? Mo e ko e heigoa ka fakakatoatoa ke taute aki e fekau he Kautu mo vagahau mitaki lahi? Ko e Kautu he Atua ko e fakatufono i luga he lagi. Ko e mena mua e uho ke he loto ha Iehova, ha ko e kakano he mena ia ka fakatokoluga ai e ia hana higoa, fakamea ai mai he tau ekefakakelea oti. Ko e Kautu ko e kanavaakau ka fakaaoga e Iehova ke omoi aki e finagalo hana ke taute he lalolagi tuga ni i luga he lagi. Ko e kakano a ia ne fakaako e Iesu a tautolu ke liogi ma e Kautu he Atua ke hoko mai mo e hataki a tautolu ke tuku fakamua ai he tau momoui ha tautolu. (Mataio 6:9, 10, 33) Kua kitia nakai e koe e kakano ne mua atu e aoga ki a Iehova ke fakaako e tautolu e falu hagaao ke he hana Kautu?

Ko e Paleko ka e Nakai kua Mamafa

4. Kua maeke fefe ke fakakite ko e ha tautolu a matagahua ke fakamatala e vagahau mitaki, kua nakai mamafa?

⁴ Ko e mena mamafa kia ke fakamatala e vagahau mitaki nei? Nakai pihia! Ke fakatai: Kua ha ha he matua tane e matagahua ke foaki e tau koloa ma e hana magafaoa. Ko e kaumahala ke taute ai kua fakatatai ni ke he holiaaga he tua Kerisiano. Kua tohi mai he aposetolo ko Paulo: “Kaeke kua nakai leveki e taha hana faoa, ti au atu kia lautolu kua nonofo mo ia, kua fakatikai e ia e tua, kua mua foki hana kelea kia ia kua faliuliu.” (1 Timoteo 5:8) Ka ko e mena mamafa kia e matagahua ia ma e tagata tane Kerisiano? Nakai kaeke ke fakaalofa a ia ke he hana magafaoa, ha ko e mena ka pihia to manako a ia ke foaki ma lautolu.

5. Pete ni ko e gahua fakamatala mo e taute tutaki ko e matagahua, ko e ha kua lata ia tautolu ke fiafia ke fakaauloa ki ai?

⁵ Kua tatai ai, ko e gahua fakamatala mo e taute tutaki ko e matagahua, ko e manako, ne kua falanaki fakalahi e tau momoui ha tautolu ki ai. Kua talahau mai pehe e Paulo: “Nakai ha ha ia au e pule ke he mena ia; oi fakaalofa foki kia au, kaeke ke nakai fakamatala e au e vagahau mitaki.” (1 Korinito 9:16; fakatatai Esekielu 33:7-9.) Ka e, ko e fakaohoohoaga ha tautolu ke fakamatala ko e fakaalofa, nakai ko e matagahua noa. Ko e mena ne mua ko e fakaalofa a tautolu ke he Atua, ka e fakaalofa foki a tautolu ke he ha tautolu a tau katofia, mo e iloa e tautolu e aoga ki a lautolu ke logona e vagahau mitaki. (Mataio 22:37-39) Kua age ai ki a lautolu e amaamanakiaga ma e vaha anoiha. Ti nakai leva to fakahakohako he Kautu he Atua e tau fakafiliaga hepe, uta kehe e tau ekefakakelea katoa, mo e liuaki mai e mafola mo e kaufakalatahaaga​—ko e tau mena oti ma e fakamonuinaaga tukulagi ha lautolu ne omaoma ke he hana a pule tututonu. Nakai kia fiafia a tautolu, e olioli lahi, ke fakaauloa e vagahau mitaki pihia mo e falu?​—Salamo 110:3.

6. Ko e ha e fakamatalaaga mo e taute tutaki ko e tau paleko uka?

⁶ He magaaho taha ni, ko e fakamatalaaga mo e gahua taute tutaki nei kua tuku mai e palekoaga uka. Nukua kehekehe e tau tagata. Kua nakai tatai e tau fiafiaaga po ke tau lotomatala ha lautolu. Ko e falu kua mitaki e fakaakoaga, ka ko e falu kua tote lahi e ­fakaakoaga. Ko e totouaga​—ne fa mahani mo mena fiafia ki ai​—kua onoono ki ai he mogonei ko e gahua uka. Ko e talahauaga teva totou, kua fakakakano ai ko e “aga po ke tuaga iloa ke totou ka e nakai fia loto,” ko e lekua tupu tolomaki, pihia foki ni he tau motu ne talahaua e mua atu e tuaga he fakaakoaga. Ti, kua maeke fefe, mogoia, a tautolu ke lagomatai e tau tagata he tau feakiaga mo e tau fiafia kehekehe pihia ke fakaako e mena ne manako e Atua ki ai?​—Fakatatai 1 Korinito 9:20-23.

Kua Mautali Fakamitaki ke Lagomatai e Falu

7. Kua taute fefe “he fekafekau fakamoli mo e loto matala” a tautolu ke lagomatai e falu ke fakaako e tau manako he Atua?

⁷ Ko e mena mukamuka e gahua uka ke taute kaeke kua ha ha ia koe e tau kanavaakau po ke tau mena gahua kua lata. Ko e kanavaakau ne kua lata mo e taha gahua he aho nei to liga ke fakafou po ke hukui a pogipogi ha ko e tau hikihikiaga kua lata. Kua tatai ai mo e ha tautolu a matagahua ke fakapuloa e fekau hagaao ke he Kautu he Atua. He tau tau kua mole, kua foaki mai “he fekafekau fakamoli mo e loto matala” ki a tautolu e tau kanavaakau kua lata tonu, ko e tau tohi ne kua talaga pauaki ke fakaaoga ka takitaki e tau kumikumiaga Tohi Tapu he kaina. (Mataio 24:45) Ati kua mautali ai a tautolu ke lagomatai e tau tagata he “tau motu oti, mo e tau faoa, . . . mo e tau vagahau kehekehe” ke fakaako e tau manako he Atua. (Fakakiteaga 7:9) Mai he taha magaaho ke he taha magaaho, kua foaki mai e tau kanavaakau fakafou ke fakatumau ke he hikihikiaga kua lata he fonua he lalolagi. O mai a a tautolu ke onoono atu ke he falu he tau fakafifitakiaga.

8. (a) Ko e heigoa e vala ne ha ha he tohi “Let God Be True” ma e fakalaulahiaga he kumikumiaga he Tohi Tapu? (e) Ko e heigoa e kanavaakau ma e gahua kumikumi ke he Tohi Tapu ne kua foaki mai he 1968, mo e ko e puhala fe ne talaga pauaki ai? (i) Kua eke fefe e tohi Kupu Mooli mo lagomatai ke he gahua taute tutaki?

⁸ Mai he 1946 ke he 1968, ko e tohi “Let God Be True” kua fakaaoga ai ke eke mo kanavaakau malolo lahi ma e fakaakoaga faka-Tohi Tapu, mo e 19,250,000 he tau lagaki ne kua lomi fakailoa ke he 54 e tau vagahau. Kua fakatoka mai he 1968, e tohi Ko e Kupu Mooli ke Takitaki Atu ai ke he Moui Tukulagi kua fakaaoga fakamitaki ai ke he tau tau loga ke kumikumi ke he Tohi Tapu mo lautolu ne fiafia mai. He vaha kua mole, kua nakai kehe ma e falu ke kumikumi mo e Tau Fakamoli a Iehova ke he taha tau mo e taha tau ka e nakai papatiso. Ka ko e kanavaakau nei kua talaga ai ke fakaohooho e tagata fakaako, ke fakamalolo aki a ia ke fakagahuahua e tau mena ne fakaako e ia. Ko e fua? Ne tala mai he tohi Jehovah’s Witnesses​—Proclaimers of God’s Kingdom: “Ma e tau tau fekafekauaga ne tolu ne kamata mai ia Sepetema 1, 1968, mo e fakaoti ia Aokuso 31, 1971, ko e 434,906 e katoa he tau tagata ne papatiso​—kua molea e fakapikiua he tau numera ne papatiso he magahala he tau tau tolu kua mole atu!” Tali mai he fakatoka ai, kua moua he tohi Kupu Mooli e tufatufaaga kua mua​—kua molea e 107,000,000 he 117 he tau vagahau.

9. Ko e heigoa e fakakiteaga pauaki ne ha ha he tohi Live Forever, mo e ko e heigoa e lauiaaga ne ha ha he fakatokatokaaga he tau tagata fakapuloa he Kautu?

⁹ He 1982 kua eke e tohi You Can Live For­ev­er in Par­a­dise on Earth mo matapatu tohi kua fakaaoga ke takitaki aki e tau kumikumiaga Tohi Tapu. Kua ha ha he kanavaakau nei molea e 150 he tau fakatataaga fakatino, ne igatia mo e tau fakamaamaaga i kelekele ne kua fakakite fakaku e tau puhala fakaako he tau fakatino. Ne talahau he fufuta he Our King­dom Min­is­try ia Oketopa 1982: “Kua kavi ke 20 e tau tau ne kua eke e ‘Let God Be True’ mo matapatu tohi kumikumiaga ha tautolu (mai he 1946 ke hoko atu ke he lotouho he tau atu tau he 1960) ne molea e 1,000,000 he tau tagata fakapuloa he Kautu ne kua lafi mai ke he ha tautolu a fakatokatokaaga. Ti kua lafi mai foki e 1,000,000 he tau tagata fakailoa he magaaho ne eke e Ko e Kupu Mooli ke Takitaki Atu ai ke he Moui Tukulagi mo matapatu tohi kumikumiaga ha tautolu he mole atu e fakatoka mai he 1968. Mo e fakaaogaaga he ha tautolu a tohi kumikumi fou, You Can Live Forever in Paradise on Earth, to kitia nakai e tautolu e tolomakiaga pihia ke he fakatokatokaaga he tau tagata fakailoa he Kautu? To moli ni, kaeke e mena nei ko e finagalo ha Iehova!” Kua kitia maali ai ko e finagalo ni ha Iehova, kakano ha kua mai he 1982 ke he ­1995, kua molea e 2,700,000 ne lafi mai ke he fakatokatokaaga he tau tagata fakailoa he Kautu!

10. Ko e heigoa e kanavaakau fou ne kua foaki mai he 1995, mo e ko e ha kua lata ai ke taute e tau tagata fakaako Tohi Tapu ke mafiti ke holo ki mua fakaagaga?

¹⁰ “Kua loga e tau saito ke helehele, ka ko e tau tagata gahua, kua tokogaogao a lautolu,” he talahau e Iesu. (Mataio 9:37) Ko e heleheleaga kua lahi moli. Kua lahi agaia e gahua ke taute. He falu he tau motu kua tohia e tau tagata i loto he tohi fakatalitali ma e tau kumikumiaga Tohi Tapu. Ti, mo e onoonoaga ke fakalaulahi fakaave e iloaaga ke he Atua, ko e he 1995 ne foaki “he fekafekau fakamoli mo e loto matala” e kanavaakau fou, ko e tohi lau 192 ne fakamataulu ko e Iloilo ne Takitaki Atu ke he Moui Tukulagi. Ko e kanavaakau nei kua mua e aoga kua nakai fakatumau ke he tau taofiaga pikopiko. Kua fakatata e kupu moli he Tohi Tapu ke he puhala tonu. Kua amaamanaki mai ke taute e tau tagata fakaako Tohi Tapu ke mafiti ke holo ki mua fakaagaga. Ko e tohi Iloilo kua fita he lahi e hufia ke he fonua he lalolagi mo e 45,500,000 he tau lagaki ne lomi ke he 125 he tau vagahau mo e tau fakaliliuaga ke he falu 21 he tau vagahau ne fa e lomi.

11. Ko e heigoa e kanavaakau hufia mitaki ne kua foaki mai ke lagomatai aki a lautolu ne nakai fai fakaakoaga po ke temotemoai ke totou, mo e kua taute fefe e fakamailoga malolo ke he ha tautolu a polokalama fakaakoaga he lalolagi?

¹¹ Mai he taha magaaho ke he taha magaaho, ne foaki mai he “fekafekau fakamoli” e tau kanavaakau talaga pauaki ma e tau tagata kua lata ai, po ke gahoa. Ke fakatai ki ai, ka e kua hane fai e tau tagata ne tuga kua lata mo e lagomatai pauaki ha ko e ha lautolu a aga fakamotu po ke feakiaga fakalotu? Maeke fefe a tautolu ke lagomatai a lautolu ke fakaako e tau manako he Atua? He 1982 ne moua e tautolu e mena tonu ne manako a tautolu ki ai​—ko e porosua lau-32 Ke Fiafia e Moui Tukulagi ke he Lalolagi! Ko e tohi pukeina he tau fakatataaga nei kua eke mo kanavaakau hufia mitaki ke fakaako a lautolu ne kua nakai fai fakaakoaga po ke kua temotemoai ke totou. Kua ha ha i loto e tau fakatataaga mukamuka lahi mo e mukamuka ke maama e tau matapatu fakaakoaga faka-Tohiaga Tapu. Tali mai he fakatoka ai, ko e porosua Fiafia e Moui kua toka ai e fakamailoga malolo lahi he ha tautolu a polokalama fakaako he lalolagi katoa. Kua molea e 105,100,000 he tau lagakiaga ne kua lomi ke he 239 he tau vagahau, kua eke ai mo tohi mua atu e fakaliliu he Sosaiete he Kolo Toko ne taute ke hoko mai ke he mogonei!

12, 13. (a) Tali mai he 1990, ko e puhala fou fe ne foaki mai he “fekafekau fakamoli” ke hokotia atu ke he tau tagata he lalolagi katoa? (e) Liga to fakaaoga fefe e tautolu e vitio he Sosaiete he ha tautolu a fekafekauaga he fonua? (i) Ko e heigoa e kanavaakau fou ne kua foaki mai laia ke lagomatai mai ha tautolu a gahua taute tutaki?

¹² Ke lafi atu ke he tau tohi kua lomi, ne kamata mai he 1990 kua foaki mai he “fekafekau fakamoli” ki a tautolu e tau puhala fakaakoaga ne fakakite mai e puhala fou ke hokotia atu ke he tau tagata he lalolagi katoa​—ko e tau vitiokasete. Ia Oketopa he tau ia, ko e vitio ne 55 e minuti ko e Jehovah’s Witnesses​—The Organization Behind the Name kua fakatoka mai​—ko e vitio fakamua laia ne taute he Sosaiete he Kolo Toko. Ko e kamataaga fulufuluola mo e lahi e fakailoaaga, ne kua moua ke hoko ke he 35 e tau vagahau, kua fakakite ai e fakatokatokaaga he tau tagata fakamoli ha Iehova he lalolagi katoa ne fa e fakamoli e poaki ha Iesu ke fakapuloa e vagahau mitaki he lalolagi oti. Ko e vitio kua talaga pauaki ke lagomatai aki ha tautolu a gahua taute tutaki. Ko e tau tagata fakailoa he Kautu kua nakai fakatuai ke fakaaoga e kanavaakau fou nei ke he fekafekauaga he fonua. Ko e falu kua tuku ai he tau kato tohi ha lautolu, mo e mautali ke fakakite po ke age fakaku ke he tau tagata ne fiafia mai. Nakai leva he fakatoka mai, ne tohia he leveki faifano: “Ko e tau vitio kua eke mo tau puhala he senetanari 21 aki ke hokotia atu ke he tau manamanatuaga mo e tau loto he tau miliona he tau tagata, ti ko e amaamanakiaga ha mautolu ko e vitio ke fakamua aki anei he Sosaiete ke fakaaoga ke fakalaulahi atu e gahua Kautu he lalolagi katoa.” Moli lahi, kua loga tuai e tau vitio ne foaki mai, fakalataha mo e fakaholoaga ne tolu e vala ko e The Bible​—A Book of Fact and Prophecy mo e Jehovah’s Witnesses Stand Firm Against Nazi Assault. Kaeke kua moua e tau vitio he Sosaiete ke he vagahau hau, kua fakaaoga nakai e koe a lautolu ke he fekafekauaga he fonua?a

¹³ Nakaila leva ia ko e kanavaakau fou, ko e porosua Ko e Heigoa e Manako he Atua ma Tautolu?, kua foaki mai ke lagomatai ha tautolu a gahua taute tutaki. Ko e ha ne lomi fakailoa ai? To fakaaoga fefe ai?

Kumikumi e Kanavaakau Fou

14, 15. Kua talaga e porosua Manako ma ha hai, mo e ko e heigoa ne toka i loto?

¹⁴ Ko e tohi fou Ko e Heigoa e Manako he Atua ma Tautolu? kua talaga ai ma e tau tagata ne kua fita he talitonu ke he Atua mo e fakalilifu e Tohi Tapu. Ko e tau leveki faifano katoa mo e tau misionare ne fakamahani mai i Kiliata ne kua loga e tau tau he gahua he tau motu mativa kua lagomatai ke he tauteuteaga he porosua nei. Haia i loto e puhala he kumikumiaga fakamatafeiga, kua ufitia ai e tau matapatu fakaakoaga he Tohi Tapu. Kua mafanatia, mukamuka, mo e tonu e tau kupu. Ka e he magaaho taha ia ni, kua nakai mukamuka lahi e tohi. Kua foaki mai, nakai hokoia ko e “huhu” ka e ko e “tau mena kakano” foki mai he Kupu he Atua ke he puhala ne lata he tokologa he tau tagata ke maama.​—Heperu 5:12-14.

¹⁵ He tau tau ne mole, kua ole mai e tau tagata fakailoa he Kautu he tau motu kehekehe ma e tohi pihia ni. Ke fakatai ki ai, ne tohia he la he Sosaiete he Kolo Toko i Papua Niu Kini: “Kua tupetupe e tau tagata ha ko e tau fakaakoaga ne fetotokoaki he tau lotu. Kua lata a lautolu mo e tau talahauaga maaliali he kupu moli, ne papale mai he tau kupu Tohi Tapu loga ti maeke ia lautolu ke kumi ki ai he ha lautolu ni a tau Tohi Tapu. Kua lata a lautolu mo e fakamaamaaga mahinohino mo e tonu ke he mena ne manako e Atua mai he tau Kerisiano fakalataha mo e tau aga fakamotu mo e tau gahua fefe kua nakai talia ki a ia.” Ko e porosua Manako ko e mena kua lata tonu ma tautolu ke lagomatai aki a lautolu pihia ke fakaako e tau manako he Atua.

16. (a) Ko hai ka lagomatai lahi he tau fakamaamaaga mukamuka i loto he porosua fou? (e) Liga to lagomatai fefe he porosua Manako a lautolu he matakavi hau?

¹⁶ Ti liga to maeke fefe a koe ke fakaaoga e kanavaakau fou nei? Ke fakamua aki, kua maeke ke fakaaoga ke kumikumi mo e tau tagata ne uka ke totou po ke liga nakai fia loto ke totou.b Ko lautolu takitokotaha pihia ka liga lagomatai he tau fakamaamaaga mukamuka i loto he porosua. He mole atu ai he taute e onoonoaga ke he taha lagakiaga he tohi nei, ne tohia he tau la he Kolo Toko e mena ne mui mai: “To eke ai e porosua ke lahi e aoga he tau fahi loga he motu ne nonofo ai e tau tagata ne nakai loto ke totou lahi.” (Parasili) “Kua ha ha ai e numera ha lautolu ne o mai ke he motu ne nakai iloa ke totou ha lautolu ni a vagahau motu mo e kua uka agaia ke totou faka-Falani. Ko e porosua nei kua liga lata ke fakaaoga mo lagomataiaga ka kumikumi mo lautolu pihia.” (Falani) Iloa nakai e koe e tau tagata he matakavi hau ka liga lagomatai he porosua Manako?

17. Ke he puhala fe ka liga aoga ai e porosua fou he tau motu loga, mo e ko e ha?

¹⁷ Ke ua aki, he tau motu loga to liga lata ke fakaaoga e porosua ke kamata aki e tau kumikumiaga Tohi Tapu mo e tau tagata matakutaku Atua pete ni ko e lahi fefe e fakaakoaga ha lautolu. Ka e moli, kua lata ke fakamakamaka ke taute ke kamata e kumikumiaga ke he tohi Iloilo ne Takitaki Atu ke he Moui Tukulagi. Ka e he falu tutuaga kua liga mukamuka lahi ke kamata e kumikumiaga he porosua. Ti he taha magaaho tonu ni, kua lata ke hiki e kumikumiaga ke he tohi Iloilo, ko e matapatu mo e lagomatai he kumikumiaga kua fakatoka e tautolu. Hagaao ai ke he fakaaogaaga nei he porosua Manako ne tohia he tau la he Kolo Toko: “Ke kamata e kumikumiaga Tohi Tapu ko e mena uka, mo e ko e tau magaaho ke kamata e kumikumiaga kua tuga e laukauka ka kamata he tagata fakailoa aki e porosua.” (Sihamani) “To eke e porosua pehenei ke hufia lahi ke kamata aki e tau kumikumiaga Tohi Tapu fou, ti fakaholo atu mogoia ke he tohi Iloilo.” (Italia) “Pete ni ko e tokoluga e tuaga fakaakoaga he tau Sapani, ka e tokologa ne fakakaupa e iloilo ke he Tohi Tapu mo e tau matapatu fakaakoaga i ai. Ko e porosua kua lata mo e fakaholoaga kua mua e mitaki ma e tohi Iloilo.”​—Sapani.

18. Ko e heigoa kua lata ia tautolu ke manatu hagaao ke he fakafeleveia atu ke he tau manako he Atua?

¹⁸ Kua ole mai e tau la he Sosaiete he lalolagi katoa ma e porosua nei, mo e kua foaki age e taliaaga ke fakaliliu ai ke he 221 he tau vagahau. Kia fakamoli ai e tohi fou nei ke mua e aoga he lagomatai mai a tautolu ke lagomatai atu e falu ke fakaako e tau mena ne manako e Atua ko Iehova ki a lautolu. Ma e vala ha tautolu, kia manatu e tautolu ko e fakafeleveia atu ke he tau manako he Atua, fakalataha mo e poakiaga ke fakamatala mo e taute e tau tutaki, kua tuku mai ki a tautolu e magaaho uho ke fakakite ki a Iehova e lahi he fakaalofa ha tautolu ki a ia. E, ko e mena ne manako mai e Atua ki a tautolu, kua nakai mamafa. Ko e puhala mitaki lahi a ia ke moui!​—Salamo 19:7-11.

[Tau Matahui Tala]

Maeke Nakai a Koe ke Fakamaama?

◻ Ko e tau gahua fakafahiua fe ne manako a Iehova ke he hana a tau fekafekau ke fakaauloa ki ai?

◻ Ko e ha e matagahua ha tautolu ke fakamatala mo e taute e tau tutaki, kua nakai mamafa ki a tautolu?

◻ Ko e heigoa e kanavaakau ne foaki mai he “fekafekau fakamoli mo e loto matala” ma e fakaaogaaga ha tautolu he ha tautolu a gahua fakamatala mo e taute tutaki?

◻ Kua talaga e porosua Manako ma ha hai, mo e maeke fefe a tautolu ke fakaaoga ai he ha tautolu a fekafekauaga?

[Fakatino he lau 17]

Ko e ha tautolu a gahua fakamatala mo e taute tutaki, kua nakai mamafa

[Tau Fakatino he lau 20]

“Let God Be True” (1946, liu tohi he 1952): 19,250,000 ke he 54 e tau vagahau

“Ko e Kupu Mooli ke Takitaki Atu ai ke he Moui Tukulagi” (1968): 107,000,000 ke he 117 e tau vagahau (Fakakite i Falani)

“You Can Live Forever in Paradise on Earth” (1982): 80,900,000 ke he 130 e tau vagahau (Fakakite i Rusia)

“Iloilo ne Takitaki Atu ke he Moui Tukulagi” (1995): 45,500,000 ke he 125 e tau vagahau (Fakakite i Sihamani)