Ko e Heigoa e Kakano he Tokanoaaga Fakalotu ki a Koe?
KO E tau miliona kua tau ma e mena ia. Kua mamate foki e falu ma e mena ia. Ti moli ni ko e taha he tau koloa ne mua e uho he tau tagata. Ko e heigoa e mena ia? Ko e tokanoaaga! Kua fakakakano mai he The World Book Encyclopedia e tokanoaaga ko e “lotomatala ke taute e tau fifiliaga mo e ke fakagahuahua ai.” Liga ko e tokanoaaga ne kua mua atu e totokoaga velagia ki ai ko e tokanoaaga he lotu, ne kua fakakakano ai ko e “tonu ke talitonu ki ai mo e ke fakagahuahua e tua he fifiliaga he tagata.” Hagaao ai ke he United Nations Universal Declaration of Human Rights (Fakailoaaga he Lalolagi Katoa ma e Tau Tonu he Tagata he Tau Motu Kaufakalataha), “kua lata e tau tagata oti ke moua e tonu ke he tokanoaaga he talahauaga, manamanatuaga mo e lotu.” Kua putoia e mena nei ke he tonu he tagata “ke hiki hana lotu po ke taofiaga,” fakalataha ki ai mo e tokanoaaga “ke fakakite hana a lotu po ke taofiaga he fakaakoaga, tauteaga mena, tapuaki mo e onoonoaga.”—Vala tala 18.
Kua moli, to amanaki atu a tautolu ke tuku age he ha motu ne leveki moli hana tau tagata e tokanoaaga pihia. Kua momoko lahi, ha kua nakai pihia tumau e mena nei. “Kua aamotia he lotu e tau logonaaga hokulo he tokologa he tau tagata,” he tohi he The World Book Encyclopedia. “He falu he tau fakatufono kua lahi e matutakiaga ke he taha lotu ka e onoono atu ke he tau tagata he falu he tau lotu ke eke mo fakahagahaga kelea ke he pule malolo fakapolitika. Liga kua kitia foki he fakatufono e tau lotu ko e mena fakahagahaga kelea fakapolitika ha kua liga taute he tau lotu e fakamoliaga ke mua atu e omaoma ke he Atua ke he motu.”
Ha ko e tau kakano nei ne kua tuku ai he falu he tau fakatufono e tau fakakaupaaga ke he fakagahuahuaaga he tau lotu. Kua gahoa ne fakalolelole e fakagahuahua ke he ha tua. Ko e falu, pete ni kua talahaua ke fakailoa e tokanoaaga he tapuakiaga, kua malolo e pule ke he tau gahua fakalotu oti. Ka e fuluola ai, he taha e faga tokanoaaga fakalotu ne nakai falanaki ke he matakavi ne nofo ai a koe. He magaaho ne ha ha i Ierusalema he tau 32 V.N., ne talahau a Iesu ke he hana tau tutaki: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu. To iloa foki e mutolu e mena moli, ko e mena moli foki ke toka noa ai a mutolu.” (Ioane 8:31, 32) Ko e heigoa e kakano ha Iesu he fakamauaga nei?
Kua Fakatokanoa he Kupu Moli
He Tau Fahi Kaufakalataha, kua molea e miliona tagata ne toka he tau fale pouli. Mai ia lautolu nei, kua teitei ke tolu e afe ne kua fakahala ke mate. Kia tuku la ko koe he tuaga ia. To fefe e logonaaga hau? Ko e manatu ke he amanakiaga pihia kua fakaatukehe moli. Ka e, kua tonu ni, kua ha ha oti e tau tagata he tuaga teitei tatai ia. Ne talahau he Tohi Tapu: “Kua hala e tau tagata oti kana, to nakai hoko ke he fakahekeaga mai he Atua.” (Roma 3:23) E, ha ko e tau fanau ha Atamu, kua “tuku fale pouli” he tuaga agahala a tautolu.—Roma 5:12.
Ko e fakatupaaga he tau tagata ke he agahala mo e mate he loto ati talahau ai a Iesu ke he hana tau tutaki: ‘Ko e kupu moli foki ke toka noa ai a mutolu.’ (Ioane 8:32) Mo e tau kupu ia, kua tuku age e Iesu ke he hana tau tutaki e fakamagaloaga mai he agahala mo e fakatokanoa mai he mate! Kua maeke fefe e mena nei ke foaki age ki a lautolu? “Ka toka noa he Tama a mutolu,” he tala age e Iesu ki a lautolu, “kua toka noa fakamoli a mutolu.” (Ioane 8:36) E, he tuku hifo hana moui, ko e “Tama,” ko Iesu, kua eke ai mo poa lukutoto ke fakafua aki e mena ne galo ia Atamu. (1 Ioane 4:10) Ati hafagi ai he mena nei e puhala ma e tau tagata omaoma oti ke vevete mai he liliaga ke he agahala mo e mate. Ne mate ai e Tama fuataha he Atua “kia nakai mate taha ne tua kia ia, ka kia moua e ia e moui tukulagi.”—Ioane 3:16.
Ti ko e kupu moli ne maeke ke fakatokanoa a tautolu kua agaagai viko ia Iesu Keriso. Ko lautolu ne eke mo tau tutaki mumuitua tuagahui hana kua moua ai e amaamanakiaga ke ataina mai he agahala mo e mate he magaaho ka pule katoatoa e Kautu he Atua ke he tau matagahua he lalolagi. Pihia foki he mogonei, ko lautolu ne talia e kupu moli he Kupu he Atua kua iloa ai e tokanoaaga moli. Ke he tau puhala fe?
Ko e tau miliona he vaha nei kua nonofo mo e matakutaku ke he tagata mate. Ko e ha? Kakano ko e ha lautolu a tau lotu kua fakaako ki a lautolu ko e toka he solu e tino ne mate mo e finatu ke he kautu fakaagaga. Ka e, kua fakakite mai he Tohi Tapu e kupu moli hagaao ke he tuaga he tagata mate. Kua tohi fakamaali mai ko e solu hau ko koe, nakai ko e taha vala galo ia koe ne moui he mole atu e mate. (Kenese 2:7; Esekielu 18:4) Ke lafi ki ai, kua nakai fakakikiveka e tau tagata mamate i loto he afi a helo, po ke taha vala a lautolu he kautu fakaagaga ne maeke ke fakalauia e tau tagata momoui. “Ka ko lautolu ne mamate,” he talahau he Tohi Tapu, “nakai iloa e lautolu ha mena . . . Kua nakai fai gahua, po ke manamanatu, po ke mena kua iloa, po ke iloilo ke he tukuaga, kua fina atu ki ai a koe.”—Fakamatalaaga 9:5, 10.
Tokologa he vaha nei ne matakutaku foki ke he vaha anoiha. To velagia nakai e ha tautolu a lalolagi he niukilia fakalutukia? To taute nakai he moumouaga he takatakaiaga he lalolagi e palaneta ha tautolu ke nakai fai moui i ai? To takitaki atu nakai e malolo hifo he tau mahani ke he matahavala mo e fakaagitau? Ko e tau mena matakutaku moli anei ma e tokologa. Ka e, kua foaki he Tohi Tapu e tokanoaaga mai he tau matakutaku kelea pihia. Kua fakatonu mai ki a tautolu “ko e lalolagi kua tumau tukulagi haia.” (Fakamatalaaga 1:4) Ne nakai tufuga noa e Iehova ha tautolu a palaneta ke kitekite ai ka moumou he tau tagata fakahanoa. (Isaia 45:18) Ka e, kua tufuga e Iehova e lalolagi ke eke mo kaina parataiso ma e magafaoa kaufakalataha he tagata. (Kenese 1:27, 28) Kua nakai la hiki hana a finagalo. Ne tala mai e Tohi Tapu ki a tautolu to “moumou ai foki [he Atua] a lautolu kua moumou e lalolagi.” (Fakakiteaga 11:18) He mole atu ai, “ko e tau tagata mahani molu, to eke ma lautolu e motu,” he talahau he Tohi Tapu, “ti fakafiafia foki e lautolu a lautolu ha ko e monuina kua lahi.”—Salamo 37:11.
Ne fakatokanoa foki he kupu moli he Kupu he Atua a tautolu mai he matakutaku ke he tagata. Kua foaki mai he Tohi Tapu ki a tautolu e tau fakafifitakiaga mitaki lahi he tau tagata tane mo e tau fifine ne fakatata e nakai matakutaku he ha lautolu a fakamoliaga ke he Atua. Ha ha ai ia lautolu nei a Kiteona, Parako, Tapora, Tanielu, Eseta, Ieremia, Apikaila, mo Iaeli—ke talahau ni e falu. Ne fakakite he tau tagata tane mo e fifine tua fakamoli nei e aga he salamo ne tohi: “Kua tua au ke he Atua; nakai matakutaku au ke he taha mena ka eke he tau tagata kia au.”—Salamo 56:11.
Kua Maeke a Koe ke Fakatokanoa he Kupu Moli
Tuga kua kitia ai e tautolu, ko e kupu moli i loto he Tohi Tapu kua ha ha ai e lauia ataina ki a lautolu he tau tau kehekehe he moui ne kua fakaako ki ai mo e tokaloto ai e fekau. Kua fakaataina mai a lautolu he matakutaku ki a ia ne mate, matakutaku ke he vaha anoiha, mo e matakutaku ke he tagata. Ke fakahikuaki, to fakatokanoa he lukutoto ha Iesu e tau tagata omaoma mai he agahala mo e mate. Ko e fiafia ha ia ke moui tukulagi he lalolagi parataiso, ne kua nakai tuai tuku fale pouli he ha tautolu a tuaga agahala!—Salamo 37:29.
Manako nakai a koe ke iloa lahi atu hagaao ke he tau fakamonuinaaga ne mavehe mai he Atua? Kaeke ke manako, ko e heigoa hau kua lata ke taute? Ne pehe a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Ti ane mai ke manako a koe ke iloa e tokanoaaga ne mavehe e Iesu ke he hana tau tutaki, kua lata ia koe ke ako hagaao ke he Atua ko Iehova mo e hana Tama. Kua lata ia koe ke iloa ko e heigoa e finagalo he Atua ati taute ai, ha kua pehe e Tohi Tapu: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:17.