“Ko Ia kua Nakai Kitia e Mutolu ka e Fakaalofa Atu kia Ia”
“Ko ia kua nakai kitia e mutolu, ka e fakaalofa atu kia ia, kua nakai kitia a ia ainei, ka e tua ni ki ai kua olioli ai a mutolu.”—1 PETERU 1:8.
1. Pete ni e nakai fai he lalolagi he vaha nei ne kitia a Iesu, fefe e fakamakau he falu tagata fakalotu ke fakakite e fakamoli ki a ia?
NAKAI fai ne moui he lalolagi he vaha nei kua kitia a Iesu Keriso. Ka e, totou miliona e tau tagata ne talahau kua fakaalofa ki a ia. He tau tau takitaha ia Ianuari 9, i Manila, he tau Filipaina, ko e fakatino fakatatai ki a Iesu Keriso kua fua ai e satauro kua toho he tau puhala tu ne kua fakamaama ai ko e fakakiteaga kua mua atu e lahi, mo e mua atu e fulufuluola he lotu talahaua he motu. Kua tau poka mo e tau omoi e moto tagata fiafia; kua toli hake falu tagata he falu ke he laliaga goagoa ke aamo e mena fakatai. Kua tokologa ne fakalataha atu ke kitekite e mena nei kua fakaohooho lahi ha ko e fakaholoaga faiagahau. Ka e, falu ia lautolu ko e tau tagata ne logona e pipiki moli atu ki a Iesu. Ha ko e fakamoliaga he mena ia, kua liga tui e lautolu e satauro po ke ke liga o tumau he tapu. Pete ia, maeke nakai he tau tapuaki tupua pihia ke talahau ko e tapuakiaga moli?
2, 3. (a) Ko hai he tau tutaki a Iesu ne kitia mo e logona moli a ia? (e) Ko hai foki he senetenari fakamua ne fakaalofa ki a Iesu mo e tua ki a ia, pete ni kua nakaila kitia mata ia e lautolu a ia?
2 Ke he senetenari fakamua, kua ha ha ai loga e tau afe ke he tau motu Roma i Iutaia, Samaria, Perea, mo Kalilaia ne kitia mata mo e logona a Iesu Keriso. Ne fanogonogo a lautolu ka e fakamaama e ia e tau kupu moli mafanatia hagaao ke he Kautu he Atua. Ko lautolu ne kitia mata e tau mana ne taute e ia. Ko e falu ia lautolu nei ne eke mo tau tutaki fakamoli hana, mo e talahau ai ko ia “ko e Keriso, ko e Tama he Atua moui.” (Mataio 16:16) Pete ia, ko lautolu ne tohi he aposetolo ko Peteru e hana a tohi omoomoi fakamua ki ai kua nakai ha ha ai ia lautolu nei.
3 Ko lautolu ne tohi atu a Peteru ki ai kua ha ha ai ke he tau motu a Roma i Pono, Kalatia, Kapatokia, Asia, mo Pitunia—haia viko ni he matakavi he vaha nei ko Tuake. Kia lautolu ne tohi e Peteru: “Ko ia kua nakai kitia e mutolu, ka e fakaalofa atu kia ia, kua nakai kitia a ia ainei, ka e tua ni ki ai kua olioli ai a mutolu, mo e fiafia kua nakai maeke ke fakamatala atu, kua homo atu ni.” (1 Peteru 1:1, 8) Ti o mai fefe a lautolu ke iloa a Iesu Keriso ke hoko ai ke fakaalofa ki a ia mo e fakagahuahua e tua ki a ia?
4, 5. Maeke fefe he tau tagata ne nakaila kitia a Iesu ke lahi e mena ne ako ki a ia ke fakaalofa ki a ia mo e tua ki a ia?
4 Moli ai, ko e falu i Ierusalema he magaaho ne fakamatala ai e aposetolo ko Peteru ke he moto tagata ne o atu ke he faiagahau he Penetekoso he 33 V.N. He mole e faiagahau tokologa e tau tutaki ne nonofo i Ierusalema ke maeke ke moua e falu fakaakoaga mai he tau aposetolo. (Gahua 2:9, 41, 42; fakatatai 1 Peteru 1:1.) Ke he tau fenoga misionare tafeliuaki, kua taute he aposetolo ko Paulo e fekafekauaga fakamakamaka ti pihia foki ke he tau tagata ne nonofo ai ke he matakavi ia ne kua fakafano atu e Peteru he magaaho fakamui e tohi faka-Tohiaga Tapu fakamua ne ha ha ai hana higoa.—Gahua 18:23; 19:10; Kalatia 1:1,2.
5 Ko e ha e tau tagata ia, ne nakai la kitia a Iesu, kua futia malolo mai ki a ia? Ke he vaha ha tautolu, ko e ha e tokologa he tau miliona, he lagi mo e lalolagi katoa, kua fakaalofa lahi ai ki a ia?
Ko e Tau Mena ne Logona e Lautolu
6. (a) Kaeke ke logona e koe e mena ne fakamatala e Peteru hagaao ki a Iesu he Penetekoso 33 V.N., ko e heigoa hau ka ako mai ai? (e) Lauia fefe e mena nei ke he falu 3,000 ne fakalataha atu?
6 Kaeke ko koe i Ierusalema he magaaho ne vagahau a Peteru ke he moto tagata he faiagahau he 33 V.N., ko e heigoa hau ka ako mai hagaao ki a Iesu? He nakai fakauaua ai ko e tau mana ne taute e ia kua fakakite ai kua fakafano mai he Atua a ia. Ti pete ni, e tamate he tau tagata agahala a Iesu, kua nakai ha ha a ia ke he tukuaga ka e kua liu fakatu mai mo e kua fakamatalahi ai ke he lagi ke he fahi matau he Atua. Ko Iesu ia ko e Keriso, ko e Mesia, moli, ne kua tohi ai he tau perofeta hagaao ki ai. He puhala mai ia Iesu Keriso, kua liligi hifo ai e agaga ke he tau tutaki hana ke maeke mafiti ai ia lautolu ke fakamoli ai ke he tau tagata he tau motu loga hagaao ke he tau mena mua atu e aoga ne taute he Atua he puhala he hana a Tama. Ko e tau loto he tokologa kua logona ai a Peteru ke he fakalatahaaga ia kua amotia ai, mo e kavi ke 3,000 ne kua papatiso ai ko e tau tutaki Kerisiano. (Gahua 2:14-42) Kaeke ko koe i ai, to taute nakai e koe e fifiliaga pihia?
7. (a) Kaeke ko koe i Anetioka he magaaho ne fakamatala e aposetolo ko Paulo i ai, ko e heigoa hau ka liga ke ako mai? (e) Ko e ha e falu he moto tagata kua eke ai mo tau tagata talitonu mo e fakamatala e tala mitaki ke he falu?
7 Kaeke ko koe taha ia lautolu ne fakalataha ai he magaaho ne fakaako ai e aposetolo ko Paulo i Anetioka ke he motu i Roma ko Kalatia, ko e heigoa foki ka liga ako mai e koe hagaao ki a Iesu? Kua liga ke logona e koe a Paulo he fakamaama kua fakahala he tau pule Ierusalema a Iesu ke he mate kua fita he talahau mai he tau perofeta. Liga kua logona foki e koe hagaao ke he fakamoliaga he kitia mata a Iesu he liu tu mai. Liga to nava moli a koe ke he fakamaamaaga a Paulo he liu tu mai a Iesu he mate, ne talahau e Iehova ko ia nei kua moli ni ko e Tama he Atua. Ti nakai kia mafanatia hau a loto he ako e koe ko e fakamagaloaga he tau agahala kua maeke ha ko e tua ki a Iesu ke takitaki atu ke he moui tukulagi? (Gahua 13:16-41, 46, 47; Roma 1:4) He mailoga e tau mena mua ue atu ke he tau logonaaga ha lautolu, kua eke ai falu i Anetioka mo tau tutaki, he fakalataha ke fakamakamaka ai ke he fakamatalaaga he tala mitaki ke he falu, ti pete ni e taute pihia kua kakano to fakafehagai a lautolu mo e favaleaga kelea lahi.—Gahua 13:42, 43, 48-52; 14:1-7, 21-23.
8. Kaeke ko koe he feleveiaaga he fakapotopotoaga Efeso he magaaho ne moua e lautolu e tohi a Paulo, ko e heigoa hau ka ako mai ai?
8 Ka e kua ane mai fakalataha a koe ke he fakapotopotoaga Kerisiano i Efeso, ke he motu ha Roma i Asia, he magaaho ne moua ai he tau tutaki e tohi fakaohooho a Paulo? Ko e heigoa hau ka ako mai ai hagaao ke he matagahua a Iesu he finagalo he Atua? He tohi ia ne fakamaama e Paulo ko e puhala mai ia Keriso ko e tau mena oti he lagi mo e he lalolagi to liuaki mai ai ke lagotatai mo e Atua, ko e mena fakaalofa he Atua kua puhala ia Keriso ne tuku age ai ke he tau tagata he tau motu oti kana, ko e tau tagata takitaha ne kua mamate ke he fofoga he Atua kakano ha ko e tau hala ne kua taute ai ke liu moui ha ko e tua ke he Keriso, ti ko e mena ia ko e fua he foakiaga nei, kua liu maeke ma e tau tagata ke eke mo tau fanau fakahelehele he Atua.—Efeso 1:1, 5-10; 2:4, 5, 11-13.
9. (a) Ko e heigoa ka lagomatai a koe ke maama ko e moua e koe e aoga he mena ne tohi e Paulo ke he tau Efeso? (e) Lauia fefe e tau matakainaga he tau motu Roma ke he talahauaga a Peteru ke he mena ne ako e lautolu hagaao ki a Iesu?
9 Ko e loto fakaaue kia ma e tau mena oti nei kua fakahokulo e fakaalofa hau ke he Tama he Atua? To fakaohooho kia he fakaalofa ia e moui hau ke he taha aho mo e taha aho, tuga ne fakamalolo he aposetolo ko Paulo he Efeso veveheaga 4 ke he 6? To omoi kia he loto fakaaue pihia a koe ke kumikumi fakamitaki ke he tau mena mua he moui hau? Mai he fakaalofa ma e Atua mo e fakaaue ke he hana Tama, to taute a koe ke lata ke hiki ke maeke he tauteaga he finagalo he Atua ko e mena uho moli he moui hau? (Efeso 5:15-17) Hagaao ke he puhala he tau Kerisiano i Asia, Kalatia, mo e falu he tau motu i Roma ne kua lauia ke he mena ne ako e lautolu, ne tohi he aposetolo ko Peteru ki a lautolu: “Ko [Iesu Keriso] kua nakai kitia e mutolu, ka e fakaalofa atu kia ia, . . . ka e tua ni ki ai kua olioli ai a mutolu, mo e fiafia kua nakai maeke ke fakamatala atu, kua homo atu ni.”—1 Peteru 1:8.
10. (a) Ko e heigoa e mena ne nakai fakauaua ai ne lafi ke he fakaalofa Kerisiano ma Iesu? (e) Aoga mai fefe foki ki a tautolu?
10 Kua fai mena foki ne nakai fakauaua ai ke lafi ke he fakaalofa he Tama he Atua ne kua logona e lautolu ko e tau Kerisiano fakamua ne tohi ki ai e Peteru. Ko e heigoa a ia? He magaaho ne tohi ai e Peteru e tohi fakamua hana, ko e ua he tau Evagelia—Mataio mo Luka—kua fita e utafano. Ko e tau Kerisiano he senetenari fakamua ne nakaila kitia a Iesu kua totou ke he tau talahauaga nei he Evagelia. Maeke foki ia tautolu. Nakai manamanatu noa e tau talahauaga he tau Evagelia; kua ha ha ai oti e tau matatohi he fakamauaga tuai ne talitonu. Ke he tau fakamauaga omoomoi ia, kua lahi e mena ne moua e tautolu ke fakahokulo ha tautolu a fakaalofa ke he Tama he Atua.
Ko e Mahani ne Fakakite e Ia
11, 12. Ko e heigoa i ai hagaao ke he mahani ne fakakite e Iesu ke he falu tagata ne taute a koe ke fakaalofa ki a ia?
11 Ki loto he fakamauaga tohi he moui a Iesu, kua ako e tautolu e puhala ne fehagai a ia mo e falu tagata. Ko e mahani ne fakakite e ia kua amotia e tau loto he tau tagata ti hoko mai ke he mogonei, ne molea e 1,960 he tau tau he mole e mate hana. Ko lautolu oti ne momoui kua pehia ai ke he tau lauiaaga he agahala. Totou miliona e tau tagata ne lauia noa he nakai fakafili tonu, fetului mo e gagao, po ke falu he tau kakano kua logona e pehiaaga fakaita. Ko lautolu oti pihia, kua pehe a Iesu: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.”—Mataio 11:28-30.
12 Kua fakakite e Iesu e loto lolelole ma e tau tagata mativa, ki a lautolu ne hoge, mo lautolu ne fakaatukehe. He magaaho ne fakaata ai he tau tutuaga, ne fagai foki e ia e tau tagata tokologa fakamana. (Luka 9:12-17) Ne fakahao e ia a lautolu mai he fakatupa ke he tau mahani toka tuai. Ne ati hake foki e ia e tau tua ha lautolu ke he foakiaga he Atua ke tuku e fakaotiaga ke he tau matematekelea fakapolitika mo e fakatupe. Ne nakai pepela e Iesu e agaga ha lautolu ne kua fita he pehia. He ha ha ai e fakahelehele mo e fakaalofa, ne lagaki fakalotomatala e ia a lautolu ne mahani holoilalo. Ne fakamalolo e ia a lautolu ne kua tuga e kaho kua maihiihi ne kua veveli hifo mo lautolu ne tuga e vavae ne puho tote kua teitei ke mate. Ke hoko mai ke he vaha nei, kua omoomoi he hana higoa e amaamanakiaga, pihia foki ke he tau loto ha lautolu ne nakaila kitia a ia.—Mataio 12:15-21; 15:3-10.
13. Ko e ha e puhala ne fehagai a Iesu mo e tau tagata agahala kua futia e tau tagata?
13 Nakai talia e Iesu e taute mena kelea, ka e fakakite e ia e maamaaga ke he tau tagata ne taute e tau hehe he tau momoui ka e kua fakakite e fakatokihalaaga mo e haga atu ki a ia ma e lagomataiaga. (Luka 7:36-50) To nofo a ia mo e taumafa mo e tau tagata ne kua vihiatia he maaga kaeke ke logona e ia kua foaki he mena nei e magaaho ke lagomatai a lautolu fakaagaga. (Mataio 9:9-13) Ti ko e fua he fakatata e ia e mahani ia, kua totou miliona he tau tagata ne ha ha ai ke he tau tutuaga pihia ne nakaila kitia a Iesu kua omoi ke iloa a ia mo e tua ki a ia.
14. Ko e heigoa kua futia ki a koe hagaao ke he puhala ne lagomatai e Iesu e tau tagata ne gagao, kulikuli, po ke maanu?
14 Ko e puhala ne fehagai a Iesu mo e tau tagata ne gagao po ke kulikuli kua foaki e fakamoliaga he hana a mafanatia mo e fakaalofa hohofi ti pihia mo e hana a lotomatala ke ta mai ki a lautolu e fakamaloloaga. Ti, ko e tagata gagao ne maluia he lepela kua fina atu ki a ia mo e ole lagomatai, ne nakai fakaheu e Iesu he kitia. Ti nakai tala age a ia ke he tagata ka e, pete ni kua fakaalofa hofihofi a Iesu ki a ia, kua kelea lahi mahaki e gagao mo e nakai fai mena ke taute ke lagomatai. Ne ole he tagata tane: “Ko e Iki na e, ka finagalo a koe ki ai kua maeke ia koe ke fakamea au.” Mo e nakai fakauaua, ne oho atu a Iesu mo e amo e tagata tane lepela, mo e pehe: “Na loto au ki ai, kia mea a koe.” (Mataio 8:2, 3) Ke he taha magaaho ne maulu e fifine ha ko e fakapiki atu fakagalo ke he tapulu fafo hana. Ne fehagai a Iesu mo ia ke he puhala totonu mo e fakamoli. (Luka 8:43-48) Ti ko e magaaho ne hoko atu a ia ke he fakaholoaga he mauku, kua omoi a ia ke fakaalofa hofihofi ma e takape maanu ne kua mate ai hana a tama tane tokotaha maka. Pete ni he nakai manako a Iesu ke fakaaoga e malolo fakamana ne foaki age he Atua ke moua aki e tau mena kai ma hana, ne fakaaoga noa ai e ia ke fakaliu tu mai e tagata tane ne mate mo e liu aki a ia ke he hana a matua fifine.—Luka 4:2-4; 7:11-16.
15. Lauia fefe a koe ke he totouaga he tau talahauaga hagaao ki a Iesu mo e manamanatu fakahokulo ki ai?
15 He totou e tautolu e tau talahauaga nei mo e manamanatu fakahokulo ke he agaga ne fakatata e Iesu, kua hokulo ha tautolu a fakaalofa ki a ia nei ne toka hifo hana a moui tagata ke maeke ia tautolu ke momoui tukulagi. Pete ni he nakai la kitia e tautolu a ia, ka e futia e logonaaga ha tautolu ki a ia, mo e manako a tautolu ke muitua ke he hana a tau tuaga hui.—1 Peteru 2:21.
Ko e Hana a Falanakiaga Fakatokolalo ke he Atua
16. Kia hai ne fakamahino e onoonoaga a Iesu ki ai, mo e ko e heigoa e mena ne fakamalolo e ia a tautolu ke taute?
16 Ki luga he tau mena oti kana, ne fakamahino e onoonoaga hana ko Iesu mo e ha tautolu ke he hana a Matua he lagi, ko e Atua ko Iehova. Ne fakakite e ia e poakiaga ne mua atu he Matafakatufono, he pehe: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa.” (Mataio 22:36, 37) Ne fakamafana e ia hana a tau tutaki: “Kia tua a mutolu ke he Atua.” (Mareko 11:22) He magaaho ne fehagai a lautolu mo e tau kamatamataaga kelea lahi ke he tua ha lautolu, ne fakamafana e ia a lautolu: ‘Liogi tumau.’—Mataio 26:41.
17, 18. (a) Fakatata fefe e Iesu e falanakiaga fakatokolalo ke he hana a Matua? (e) Ko e ha e mena ne taute e ia kua aoga lahi ma tautolu?
17 Ne fakatoka e ia ni ko Iesu e fakafifitakiaga. Ko e liogi ko e vala aoga ke he hana a moui. (Mataio 14:23; Luka 9:28; 18:1) He hoko mai e magaaho ma hana ke fifili e tau tutaki hana, ne nakai falanaki noa a Iesu ke he hana ni a fifiliaga, pete ni ke he magaaho fakamua ne nonofo oti ai e tau agelu he lagi ki lalo hifo he hana a takitakiaga. Mo e fakatokolalo ne fakaaoga e ia e po katoa he liogi ke he hana Matua. (Luka 6:12, 13) He magaaho ne tapaki ai a ia mo e mate mamahi, ne liu a Iesu haga atu ke he hana a Matua, mo e liogi fakamakutu. Ne nakai ha ha ia ia e manamanatuaga kua iloa mitaki e ia a Satani mo e kua mukamuka ke fehagai ke he ha lagatau ne fakatoka ai e ia nei ne mahani kelea. Kua mailoga e Iesu e aoga ke nakai kaumahala ai a ia. Ko e ekefakakelea ha ia ma e hana a Matua kaeke ke pihia! Mo e kaumahalaaga ha a ia ma e tau tagata, ne ha ha ai e tau amaamanakiaga he moui kua falanaki ke he poa ka foaki e Iesu!
18 Kua liogi fakatumau a Iesu—he magaaho ne ha ha ai mo e hana a tau aposetolo ke he poko tapa ki luga i Ierusalema mo e mua atu he katene i Ketesemane. (Mataio 26:36-44; Ioane 17:1-26; Heperu 5:7) He mamahi ai ke he akau fakakikiveka, ne nakai vale a ia ki a lautolu ne fakafiufiu a ia. Ka e, liogi a ia ke lata mo lautolu ne taute e gahua kelea ia mo e nakai fai lotomatala: “Ma Matua na e kia fakamagalo atu e koe a lautolu; ha kua nakai iloa e lautolu e mena kua eke e lautolu.” (Luka 23:34) Ne fakatumau e ia hana a manamanatuaga ke he Matua, he ‘tuku atu a ia ni kia ia kua fakafili fakatonu.’ Ko e tau kupu fakaoti ne talahau e ia he akau fakakikiveka ko e liogi ke he hana a Matua. (1 Peteru 2:23; Luka 23:46) Kua fiafia ha ia ha tautolu, ha ko e falanakiaga katoatoa ki a Iehova, kua fakakatoatoa mo e fakamoli e Iesu hana a kotofaaga ne age he hana a Matua ki a ia! Ti pete ni he nakai kitia e tautolu a Iesu Keriso, kua hokulo ha ia he fakaalofa ha tautolu ke he hana fakaalofa ke he mena ne taute e ia!
Fakakite e Fakaalofa ha Tautolu ki a Ia
19. He fakakite e fakaalofa ma Iesu, ko e heigoa e tau gahua ka lata ia tautolu ke nakai maeke ke taute?
19 Maeke fefe ia tautolu ke fakakite fakamoli ko e fakaalofa ne talahau e tautolu kua mua atu ke he tau kupu noa? Ti ko e hana a Matua, ne fakaalofa a Iesu ki ai, kua nakai fakaata e tauteaga he tau tupua mo e ke taute e tau mena nei mo tapuakiaga, kua moli ai ke nakai tamai e tautolu e fakahekeaga ki a Iesu he tau e tau mena pihia ke he tau kahoa he tau kakia ha tautolu po ke ke uta fano ke he tau puhala tu. (Esoto 20:4, 5; Ioane 4:24) To nakai fai fakalilifuaga ki a Iesu ka o atu a tautolu ke he tau fekafekauaga fakalotu, mo e he taute pihia lagaloga ai ke he fahi tapu, kaeke kua nakai momoui lagotatai a tautolu mo e hana a tau fakaakoaga ke he vala fahi tapu ne toe. Ne pehe a Iesu: “Ko ia ha i ai haku a tau poaki, mo e omaoma ki ai, ko ia haia ke fakaalofa kia au; ko ia foki ke fakaalofa kia au, to ofania a ia he haku a Matua.”—Ioane 14:21, 23; 15:10.
20. Ko e heigoa falu he tau mena ka fakakite kua fakaalofa moli a tautolu ki a Iesu?
20 Ko e heigoa e tau poakiaga ne mai e ia ki a tautolu? Mua atu, ke tapuaki ke he Atua moli, ko Iehova, mo e ko ia tokotaha maka. (Mataio 4:10; Ioane 17:3) Ha ko e hana a kotofaaga he finagalo he Atua, ne fakaako foki e Iesu kua lata ia tautolu ke fakagahuahua e tua ia ia ko e tama he Atua mo e kua lata ia tautolu ke fakakite ai he tiaki e tau gahua kelea mo e ke o ai he maama. (Ioane 3:16-21) Ne fakatonu e ia ki a tautolu ke kumi fakamua e Kautu he Atua mo e hana a tututonu, tuku fakamua e tau mena nei ke he tau manako ke he tino. (Mataio 6:31-33) Ne poaki a ia ke fefakaalofaaki a tautolu tuga he fakaalofa a ia ki a tautolu. (Ioane 13:34; 1 Peteru 1:22) Mo e poaki a ia ki a tautolu ke eke mo tau fakamoli hagaao ke he finagalo he Atua, tuga ni he taute e ia. (Mataio 24:14; 28:19, 20; Fakakiteaga 3:14) Pete ni he nakaila kitia e lautolu a Iesu, ko e falu he Tau Fakamoli a Iehova ne toko lima e miliona he vaha nei kua omoi he fakaalofa moli ki a ia ke taute e tau poakiaga ia. Kua nakai fakalolelole he ha lautolu a nakaila kitia ia a Iesu e ha lautolu a fifiliaga ke omaoma. Ne manatu e lautolu e mena ne talahau he Iki ke he aposetolo ko Toma: “Kua talia kia e koe ha kua kikite mai a koe kia au? Uhoaki a lautolu nakai kitia, ka e talia ai ni.”—Ioane 20:29.
21. Kua aoga fefe ki a tautolu e fakalataha atu ke he Fakamanatuaga he mate he Keriso, ka fakahoko ke he tau nei he Aho Tapu, Mati 23?
21 Kua amaamanaki ai to ha ha ai a koe ia lautolu he lalolagi katoa ka fakapotopoto ke he Fale he Kautu he Tau Fakamoli a Iehova he mole e toaga la he Aho Tapu, Mati 23, 1997, ke fakamanatu e fakakiteaga lahi ue atu he fakaalofa he Atua ke he tau tagata mo e fakamanatu e mate he hana a Tama mahani fakamoli, ko Iesu Keriso. Ko e mena ne talahau mo e taute ke he magaaho ia kua lata ke fakahokulo e fakaalofa ki a Iehova mo e hana a Tama mo e ke fakatolomaki e manako ke taofi mau e tau poakiaga he Atua.—1 Ioane 5:3.
To Tali Fefe e Koe?
◻ Maeke fefe a lautolu ne kua tuhi ki ai e tohi fakamua ha Peteru ke o mai ke iloa mo e fakaalofa ki a Iesu?
◻ Ko e heigoa e falu he tau mena ne logona he tau Kerisiano fakamua ne kua fiafia a koe ki ai?
◻ Ko e heigoa hagaao ke he mahani ha Iesu ne fakakite kua fakahokulo aki e fakaalofa hau ki a ia?
◻ Ko e ha e falanakiaga fakatokolalo ha Iesu ke he Atua kua aoga ki a tautolu?
◻ Fakatata fefe e tautolu e fakaalofa ki a Iesu Keriso?
[Tau Fakatino he lau 28, 29]
Futia atu a tautolu ki a Iesu kakano ko e mahani ne fakakite e ia