Vevehe Kehe ke Eke mo Tau Tagata Fakaheke Olioli Lahi he Lalolagi Katoa
“Haleluia. Fakaheke atu a mutolu ko e tau fekafekau a Iehova; ati fakaheke atu a ke he higoa a Iehova.”—SALAMO 113:1.
1, 2. (a) He lagotatai mo e Salamo 113:1-3, ko hai kua lata mo e fakaheke fakamakamaka ha tautolu? (e) Ko e heigoa e huhu kua tonuhia ke huhu?
KO E Atua ko Iehova e Tufuga Homo Ue Atu he lagi mo e lalolagi, ko e Pule Katoatoa ke he lagi mo e lalolagi katoatoa tukulagi tukumuitea. Kua lata katoatoa a ia mo e ha tautolu a fakahekeaga fakamakamaka. Ko e mena hanei ati poaki mai e Salamo 113:1-3 ki a tautolu: “Haleluia. Fakaheke atu a mutolu ko e tau fekafekau a Iehova; ati fakaheke atu a ke he higoa a Iehova. Kia fakamonu atu ke he higoa a Iehova ke kamata ainei, to hoko ni ke he tukulagi. Kia fakaheke atu ke he higoa a Iehova ke kamata ke he mena ne hake ai e la, ti hoko ni ke he mena ne to ai.”
2 Ha ko e Tau Fakamoli he Atua, kua olioli ai a tautolu ke taute e mena nei. Ko e fiafia ha ia to nakai leva ti fakahoko he Atua ko Iehova e lologo olioli nei he fakahekeaga ne fa e uhu e tautolu he vaha nei ke puke e lalolagi katoa! (Salamo 22:27) Kua logona nakai e leo hau he matakau lologo lahi nei he lalolagi katoa? Kaeke ke pihia, liga ko e fiafia ha ia ke taute a koe ke vevehe kehe mai he lalolagi nakai kaufakalataha mo e ai fai olioli nei!
3. (a) Ko e heigoa kua taute e tau tagata a Iehova ke kehe ue atu? (e) Ko e heigoa e tau puhala kua fakatoka kehe a tautolu?
3 Ko e fakaheke auloa e tautolu a Iehova kua taute moli a tautolu ke kehe ue atu. Kua vagahau mo e fakaako a tautolu ke he mena taha mo e fakaaoga e tau puhala tatai ke fakapuloa e ‘mahani mitaki lahi a Iehova.’ (Salamo 145:7) E, ha ko e tau tagata tukulele a Iehova, kua fakatoka kehe a tautolu ma e fekafekauaga he ha tautolu a Atua, ko Iehova. Ne tala age e Atua ke he tau tagata tukulele hana i tuai, ko Isaraela, ke fakatumau ke vevehe kehe mai he tau motu ne viko takai ia lautolu mo e ke aua neke ilaila ke he tau gahua he tau motu ia. (Esoto 34:12-16) Ne age e ia ke he tau tagata hana e tau matafakatufono ke lagomatai a lautolu ke taute e mena nei. Ti pihia foki e vaha nei, kua foaki mai e Iehova ki a tautolu hana a Kupu Tapu, ko e Tohi Tapu. Ko e fakaakoaga i ai kua fakakite ki a tautolu e puhala ke vevehe kehe tumau a tautolu mai he lalolagi nei. (2 Korinito 6:17; 2 Timoteo 3:16, 17) Nakai toka kehe a tautolu he nonofo kehe he tau kaina apiaga lotu mo e tau fale lotu, tuga e tau tagata omonuo mo e tau taupou pope ha Papelonia Lahi. He muitua ke he fakafifitakiaga a Iesu Keriso, ko tautolu ko e tau tagata fakaheke a Iehova ke he tau tagata.
Fifitaki e Iki Fakaheke a Iehova
4. Fakatoka fefe e Iesu e fakafifitakiaga he fakaheke a Iehova?
4 Nakai maueue a Iesu mai he hana a finagalo ke fakaheke a Iehova. Mo e kua fakatoka kehe he mena nei a ia mai he lalolagi. Ke he tau sunako mo e faituga i Ierusalema, ne fakaheke e ia e higoa tapu he Atua. I luga he mouga po ke ke he kaukau tahi, ko e ha mena ni ka fakapotopoto e tau tagata tokologa, ne fakamatala e Iesu e tau kupu moli ha Iehova ke he tau tagata. Ne fakapuloa e ia: “Hoku Matua na e, kua fakaaue au kia koe, ko e Iki he lagi mo e lalolagi.” (Mataio 11:25) Ti hoko foki ke he mogo ne kamatamata a ia ki mua ha Pilato Ponotio, ne fakamaama e Iesu: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli.” (Ioane 18:37) Ne loto fakaaue a Iesu ke he aoga he hana a gahua. Ko fe ni e mena ne ha ha ai a ia, kua fakamatala a Iesu hagaao ki a Iehova mo e fakaheke a ia ke he tau tagata.
5. Hagaao ki a hai e Salamo 22:22, mo e ko e heigoa e aga kua lata ia tautolu?
5 Ia Salamo 22:22, kua moua e tautolu e fakamoliaga fakaperofeta nei hagaao ke he Iki Fakaheke a Iehova: “To talahau atu e au hāu a higoa ke he haku a tau matakainaga; to fakaheke atu au kia koe ki mua he fakapotopotoaga.” Mo e he Heperu 2:11, 12, kua fakaaoga he aposetolo ko Paulo e tau kupu nei ke he Iki ko Iesu mo e ki a lautolu kua fakatapu he Atua ko Iehova ma e lilifu he lagi. Tuga a ia, ne nakai ma a lautolu ke fakaheke e higoa a Iehova ki a lautolu he fakapotopotoaga. Kua ha ha nakai ia tautolu e aga manamanatu pihia ka o atu ke he tau feleveiaaga he fakapotopotoaga ha tautolu? Ko e kau auloa fakamakamaka ha tautolu ke he tau feleveiaaga, he fanogonogo mo e he fakaaoga e tau leo, kua fakaheke ai a Iehova. Ka e oti kia he mena ia ha tautolu a fakaheke olioli lahi?
6. Ko e heigoa e poakiaga kua age e Iesu ke he hana tau tutaki, mo e maeke fefe a lautolu kua ofania e maama ke fakatokoluga e Atua?
6 Hagaao ke he Mataio 5:14-16, ne poaki foki e Iki ko Iesu ke he hana tau tutaki ke fakakite e maama ha lautolu ke maeke foki he falu ke fakaheke ki a Iehova. Ne pehe a ia: “Ko mutolu, ko e maama he lalolagi a mutolu. . . . Kia kikila atu pihia ha mutolu a maama ki mua he tau tagata, kia kitia ai e lautolu ha mutolu a mahani mitaki ati fakaheke atu ai a lautolu ke he Matua ha mutolu ha ha he lagi.” Ko lautolu kua ofania e maama kua ta mai e lilifu ke he Atua. Kua taute noa ni kia e lautolu e mena nei he talahau mo e taute e mitaki, ko e tau levekiaga fakatagata? Nakai, ka e kua taute e lautolu e mena nei he kau auloa ai ke fakatokoluga a Iehova. E, ko lautolu kua ofania e maama kua tukulele e lautolu a lautolu ke he Atua mo e eke mo tau tagata fakaheke olioli lahi hana. Kua taute nakai e koe e lakaaga fiafia nei?
Olioli he Fakaheke a Iehova
7. Ko e ha e tau tagata fakaheke a Iehova kua olioli lahi, mo e ko e heigoa e olioli ha lautolu he aho Penetekoso 33 V.N.?
7 Ko e ha e tau tagata fakaheke a Iehova kua olioli lahi mahaki? Kakano ko e olioli ko e fua he agaga tapu he Atua. Ia Kalatia 5:22, kua tohi ai he mole atu e fakaalofa. Kua fakakite he tau tutaki a Iesu he senetenari fakamua e fua nei he agaga ha Iehova. Ke he aho he Penetekoso 33 V.N., he mogo ne liligi hifo he Atua hana agaga ke he kavi he 120 he tau tutaki a Iesu, ne kamata a lautolu oti ke fakaheke a Iehova ke he tau vagahau kehekehe. Ko e tau Iutaia lilifu ne kua o mai ki Ierusalema he tau motu loga kua ‘fakahakuhaku mo e ofo.’ Ne fakapuloa e lautolu: “Kua fanogonogo atu a tautolu kia lautolu ha ne talahau mai ke he tau vagahau ha tautolu e tau mana he Atua”! (Gahua 2:1-11) Ko e heigoa e fua he tau vagahau kehekehe homo ue atu nei ne fakaheke ki a Iehova? Kavi ke 3,000 he tau Iuta mo e tau Iutaia liliuina ne talia e tala mitaki he Kautu hagaao ke he Mesia. Ne papatiso a lautolu, moua e agaga tapu, mo e fakamakau he lafi e tau leo ha lautolu ko e tau tagata fakaheke olioli ha Iehova. (Gahua 2:37-42) Ko e fakamonuinaaga ha a ia!
8. He mole atu e Penetekoso, ko e heigoa kua taute he tau Kerisiano ke fakaholo ki mua ha lautolu a olioli?
8 Kua fakaholo atu e hokotakiaga: “Kua nonofo mau a lautolu ke he faituga mo e loto fakalataha ke he taha aho mo e taha aho, kua tofitofi foki e areto ke he tau fale, kua kai e lautolu ha lautolu a tau mena kai mo e fiafia mo e loto fakamoli; kua fakaheke atu a lautolu ke he Atua, kua ofania foki he motu oti kana. Kua lafilafi he Iki ke he ekalesia ke he taha aho mo e taha aho a lautolu kua fakamomoui.” (Gahua 2:46, 47) Ko e feoaki fakalataha ni kia ha lautolu mo e kai he tau mena kai kua ta mai ki a lautolu e olioli lahi? Nakai, ko e matapatu olioli ha lautolu kua hau he fakaheke e Atua ko Iehova he taha aho mo e taha aho. Mo e kua fakalahi atu e olioli ha lautolu he mogo ne kitia e tau afe kua talia ke he fekau ha lautolu he fakamouiaga. Kua tatai mo tautolu he vaha nei.
Tau Tagata Fakaheke Olioli Lahi he Tau Motu Oti Kana
9. (a) Kamata e Atua i ne fe mo e fefe ke age ke he tau tagata he tau motu oti e magaaho ke logona e tala mitaki? (e) Ko e ha ne liligi hifo e agaga tapu ki a Konelio mo e hana a tau magafaoa fakamua to kamata e papatisoaga ha lautolu?
9 Nakai manako a Iehova ke he fuaaga he gahua maama he hana tau fekafekau ke fakakaupa ke he taha ni e motu. Ati ke he kamataaga he 36 V.N., ne age e ia ke he tau tagata he tau motu oti kana e magaaho ke logona e tala mitaki hana. Ke he hatakiaga he Atua, ne fano a Peteru ke he kaina he takitaki kautau Motu Kehe i Kaisaria. Ne moua e ia i ai a Konelio kua fakalataha mo e hana tau kapitiga tata lahi mo e magafaoa. He fa e fanogonogo fakamitaki a lautolu ke he tau kupu a Peteru, ne fakagahuahua e lautolu e tua ki a Iesu ke he tau loto ha lautolu. Iloa fefe e tautolu? Ha ko e agaga tapu he Atua ne hifo mai ke he tau tagata talitonu Motu Kehe ia. Fa mahani, ko e mena fakaalofa he Atua ko e agaga kua liligi hifo ni he magaaho ka oti e papatisoaga, ka e ke he magaaho ia kua fakakite fakamua e Iehova e taliaaga hana ki a lautolu nei ne nakai ko e tau Iutaia to fakatomo a lautolu. Kaeke ke nakai taute e Iehova e mena ia, to nakai iloa moli e Peteru kua talia he Atua e Tau Tagata Motu Kehe he mogonei mo Hana tau fekafekau mo e kua lata a lautolu ma e papatisoaga he vai.—Gahua 10:34, 35, 47, 48.
10. Ne talahau tuai fefe mai he vaha i tuai to fakaheke e tau tagata he tau motu oti kana ki a Iehova?
10 He tau vaha i tuai, ne talahau tuai e Iehova ko e tau tagata he tau motu oti kana to fakaheke ki a ia. To fai tagata fakaheke a ia he tau motu oti. Ke fakamoli e mena nei, ne fatiaki he aposetolo ko Paulo e tau perofetaaga mai he tau Tohiaga Tapu Heperu. Ne tala age a ia ke he tau fakapotopotoaga katoa he tau Kerisiano i Roma: “Kia fetaliaaki a mutolu ko e taha kia taha, tuga foki a Keriso ne talia e ia a tautolu, kia hoko ai e fakahekeaga ke he Atua. Kua pehe atu au, kua eke a Iesu Keriso mo fekafekau he peritome ha ko e fakamoli he Atua, kia fakamoli ai e tau mena ne talahaua tuai ke he tau tupuna; kia fakaheke e tau motu kehe ke he Atua ha ko e fakaalofa, tuga he tohi mai [he Salamo 18:49], Ko e mena ia ke talahaua ai e au a koe ki mua he tau motu kehe, to lologo atu foki au ke he hau a higoa. Ti pehe mai foki a ia [he Teutaronome 32:43], Kia fiafia a mutolu ko e tau motu kehe fakalataha mo e hana motu; mo e pehe foki [he Salamo 117:1], Kia fakaheke atu ke he Iki a mutolu ko e tau motu kehe oti, kia nava atu kia ia a mutolu ko e tau tagata oti kana.”—Roma 15:7-11.
11. Lagomatai fefe he Atua e tau motu oti kana ke ako hana tau kupu moli, mo e ko e heigoa e fua?
11 Nakai maeke e tau tagata ke fakaheke auloa a Iehova ato fakave e lautolu ha lautolu a amaamanakiaga ki a Iesu Keriso, ko ia ne kotofa he Atua ke pule ke he tau tagata he tau motu oti kana. Ke lagomatai a lautolu ke loto fakaaue ke he tau kupu moli Hana ne kua takitaki ke he moui tukulagi, kua fakatu he Atua e fakaholoaga fakaako he lalolagi katoa. Kua foaki e ia e hatakiaga he puhala he vahega fekafekau fakamoli. (Mataio 24:45-47) Ko e fua? Molea e lima miliona he tau leo olioli ne fa e lologo e tau fakahekeaga a Iehova ke he molea e 230 e tau motu. Mo e totou miliona foki hane fa e fakakite e fiafia he taute e mena taha. Kitiala e tokologa ne o atu ke he Fakamanatuaga he 1996: 12,921,933. Ofoofogia!
Kua Talahau Tuai e Moto Tagata Tokologa he Tau Tagata Fakaheke Olioli Lahi
12. Ko e heigoa e fakakiteaga omoomoi ne kitia he aposetolo ko Ioane, mo e ko e heigoa e fakakiteaga moli he mena ia?
12 He fakakiteaga, ne kitia he aposetolo ko Ioane e “moto tagata tokologa” mai he tau motu oti kana. (Fakakiteaga 7:9) Ko e heigoa e matapatu he tau fakahekeaga ne kua lologo he moto tagata tokologa nei fakalataha mo lautolu ne fakauku ne toe he Atua? Kua tala mai e Ioane ki a tautolu: “Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.” (Fakakiteaga 7:10) Kua fakapuloa mo e malolo e mena nei ke he tau kalakala oti he lalolagi. Kua kaufakalataha a tautolu he aloalo e tau lau pama, he fakaheke e Atua ko e Pule Katoatoa he Lagi mo e Lalolagi Katoatoa mo e talahau olioli lahi ki mua he lagi mo e lalolagi ko e fakamouiaga ha mautolu “ha” ia ia mo e hana Tama, ko e Punua mamoe, ko Iesu Keriso. Ko e loto fiafia ha ia e aposetolo ko Ioane he kitia e fakakiteaga fakaohooho nei he moto tagata tokologa! Mo e ko e loto fiafia ha ia ia tautolu he vaha nei he kitia, mo e fai vala foki, he kitia moli e mena ne kitia e Ioane!
13. Ko e heigoa kua fakatoka e tau tagata a Iehova he vevehe kehe mai he lalolagi?
13 Ha ko e tau fekafekau a Iehova, kua matalahi a tautolu he uta e higoa hana. (Isaia 43:10, 12) He eke a tautolu mo Tau Fakamoli a Iehova kua taute a tautolu ke kehe mai he lalolagi nei. Ko e olioli ha ia ke uta e higoa mua ue atu he Atua mo e ke taute e gahua faka-Atua hana ko e ha tautolu a finagalo he moui! Ko e finagalo mua ue atu a Iehova ke fakatokoluga hana higoa tapu mo e ke fakamatalahi hana pule katoatoa he lalolagi mo e lagi katoatoa he puhala he Kautu kua foaki e kakano ke he tau momoui ha tautolu. Mo e kua lagomatai e ia a tautolu ke ha ha ai he finagalo faka-Atua hana hagaao ke he hana higoa mo e Kautu. Kua taute e ia e mena nei ke he tolu e puhala.
Tuku Age ki Ai mo e Kupu Moli
14, 15. (a) Ko e heigoa taha puhala kua lagomatai he Atua a tautolu ke ha ha ai ke he hana a finagalo faka-Atua hagaao ke he higoa mo e Kautu hana? (e) Kua kehe fefe e Kautu ne fakatu he 1914 V.N. mai he kautu ne uta kehe he 607 F.V.N.?
14 Fakamua, kua tuku age e Iehova ke he hana tau tagata e kupu moli. Ko e fakakiteaga kua mahomo atu e loto fiafia ko e hana Kautu ne kamata pule he 1914. (Fakakiteaga 12:10) Ko e fakatufono nei he lagi kua kehe mai he kautu fakatai i Ierusalema, ne fa mahani ke fakanonofo e tau patuiki he laini ha Tavita. Kua uta kehe e kautu ia, mo e he kamataaga he 607 F.V.N., ne oma katoatoa a Ierusalema ke he pule Motu Kehe he tau pule malolo he lalolagi. Ko e Kautu fou kua fakatu e Iehova he 1914 ko e pule he lagi ka nakai foaki age ke he taha ka ko Iehova ni, po ke to nakai moumou ai. (Tanielu 2:44) Ko e hana tuaga pule foki kua kehe. Fefe? Kua tali mai he Fakakiteaga 11:15: “Ti ha i ai ke he lagi e tau leo lalahi, kua pehe mai, Ko e tau kautu he lalolagi kua eke ma e Iki ha tautolu mo e hana Keriso, to eke foki a ia mo patuiki tukulagi tukumuitea.”
15 ‘Ko e tau kautu he Iki ha tautolu mo e hana Keriso,’ kua fakagahuahua e pule malolo ki luga he lalolagi katoa he tau tagata. Ko e talahauaga fou nei he pule katoatoa a Iehova, ne kua fakalataha hana Tama faka-Mesia mo e tau matakainaga 144,000 ha Iesu, ko e laulahi ia lautolu mogonei kua liliu tu mai ke he lilifu he lagi, nakai ko e loto fiafia he lotomatala noa—he taha fakaakoaga kua liga manako e tau tagata fakaako ke fakatutala ki ai. Nakai, ko e Kautu nei he lagi ko e fakatufono moli. Mo e amaamanakiaga fiafia ha tautolu ke moui tukulagi ke he mitaki katoatoa ha ko e fua he hana pule kua mai ki a tautolu e kakano kua lata ke fakatumau ke olioli. Ha kua tuku mai e tau kupu moli pihia he Kupu ha Iehova kua omoi a tautolu ke fakatumau ke vagahau fakamitaki hagaao ki ai. (Salamo 56:10) Kua taute fakatumau nakai e koe e mena nei he tala age ke he tau tagata oti ko e Kautu faka-Mesia he Atua hane fa e pule ai ke he lagi he magaaho nei?
Lagomatai he Agaga Tapu mo e he Fefakamatakainagaaki he Lalolagi Katoa
16, 17. Ko e heigoa e tau puhala ke ua aki mo e tolu aki kua lagomatai he Atua a tautolu ke ha ha ai he hana finagalo faka-Atua?
16 Ko e puhala ke ua aki kua lagomatai he Atua a tautolu ke ha ha ai ke he finagalo faka-Atua hana he foaki mai ki a tautolu hana agaga tapu, ne kua fakamalolo a tautolu ke taute hana a tau fua fulufuluola ke he tau momoui ha tautolu mo e moua hana taliaaga. (Kalatia 5:22, 23) Fakalaulahi atu ai, ne tohi e Paulo ke he tau Kerisiano fakauku: “Kua moua e tautolu . . . e Agaga mai he Atua, kia iloa ai e tautolu e tau mena kua foaki noa mai he Atua kia tautolu.” (1 Korinito 2:12) Ha ko e ha tautolu a tali atu ke he agaga a Iehova, kua iloa mo e maama e tautolu oti e tau mena mitaki he magaaho nei kua foaki mo e totonu mai e ia ki a tautolu—hana tau maveheaga, tau matafakatufono, tau matapatu fakaakoaga, mo e falu atu foki.—Fakatatai Mataio 13:11.
17 Ma e puhala ke tolu aki kua lagomatai he Atua a tautolu, kua ha ha ia tautolu e fefakamatakainagaaki he lalolagi katoa mo e fakatokaaga he fakatokatokaaga mitaki lahi a Iehova ma e tapuakiaga. Ne vagahau e aposetolo ko Peteru hagaao ki ai he magaaho ne fakamafana e ia a tautolu ke “fakalilifu ke he tau tagata oti kana.” (1 Peteru 2:17) Ko e magafaoa fakaalofa ha tautolu he lalolagi katoa ko e tau matakainaga kua lagomatai a tautolu ke fekafekau ki a Iehova mo e olioli lahi he loto, tuga he poaki mai he Salamo 100:2: “Kia fekafekau a mutolu kia Iehova mo e fiafia; ati o mai a ki mua hana mo e kalaga fiafia.” Holo atu ke talahau he kupu 4: “Ati huhu atu a mutolu ke he hana tau gutuhala mo e fakahekeaga, kia huhu atu ke he hana tau lotopa mo e lologo; kia fakaheke atu a mutolu kia ia, kia fakamonu ke he hana higoa.” Ti ko e ha tautolu a fakamatala ke he tau tagata po ke o atu ke he tau feleveiaaga ha tautolu, kua maeke ke moua e tautolu e olioli. Ko e mafola mo e haohao mitaki ha ia kua moua e tautolu he tau lotopa he faituga fakaagaga a Iehova!
Olioli Lahi he Fakaheke a Iehova!
18. Ko e ha kua maeke ia tautolu ke olioli he fakaheke a Iehova pete- ni kua viko takai e favaleaga po ke tau mena vihi ia tautolu?
18 Pete ni e tau tutuaga uka, favaleaga, po ke falu mena vihi kua viko takai ia tautolu, kia olioli a tautolu ha ko tautolu i loto he fale tapuaki a Iehova. (Isaia 2:2, 3) Manatu ko e olioli e fua he loto. Ko e tau matakainaga Kerisiano fakamua ha tautolu ko e tau tagata fakaheke olioli lahi ha Iehova pete ni kua moua e lautolu e tau mena uka mo e tau kaumahala loga. (Heperu 10:34) Ko e tau matakainaga talitonu ha tautolu he vaha nei kua tatai tonu mo lautolu.—Mataio 5:10-12.
19. (a) Ko e heigoa e tau fakamafanaaga tumau kua fakaohooho a tautolu ke fakaheke a Iehova? (e) Kua falanaki e moui tukulagi ha tautolu ke he heigoa, mo e ko e heigoa e fifiliaga ha tautolu?
19 Ko tautolu oti kua fekafekau ki a Iehova kua fiafia ke omaoma ke he tau fakamafanaaga he Tohi Tapu ke fakaheke a ia. Kua fa liu e tohi a Fakakiteaga ke fakamaoki e tau fakahekeaga he Atua aki e talahauaga “Haleluia.” (Fakakiteaga 19:1-6) Ko e tau kupu ono he Salamo 150, ne tala mai ki a tautolu laga 13 ke fakaheke a Iehova. Ko e ogo he lagi mo e lalolagi katoatoa anei ke he tau tufugatiaaga oti ke fakalataha ke lologo olioli e fakahekeaga a Iehova. Ko e moui tukulagi ha tautolu kua falanaki ke he fakalatahaaga ke he kupu lologo Haleluia lahi nei! E, ko e tau tagata ni ka momoui tukulagi ko lautolu kua nakai oti e foaki e fakahekeaga ki a Iehova. Ko e mena ia, kua fifili a tautolu ke pipiki fakalahi ke he fakapotopotoaga fakamoli hana he lalolagi katoa ha kua tata mai e fakaotiaga. Ti, kua maeke ia tautolu ke amanaki ke kitia e tau kupu fakahiku he Salamo 150 ka fakamoli katoatoa ai: “Kia fakaheke atu kia Ioha e tau mena oti kana kua fafagu. Haleluia.”
To Tali Fefe e Koe?
◻ Taute fefe e tau tagata a Iehova ke kehe ue atu?
◻ Ko e ha e tau fekafekau a Iehova kua olioli lahi ai?
◻ Ko e heigoa ne fakatoka kehe a tautolu mai he lalolagi?
◻ Ko e heigoa e tau puhala tolu ne kua lagomatai he Atua a tautolu ke ha ha ai ke he hana a finagalo faka-Atua?
[Fakatino he lau 27]
Ko e mena fe ni kua ha ha ai a ia, kua fakamatala a Iesu hagaao ki a Iehova mo e fakaheke a ia ke he tau tagata