Ko Hai ka Hao Mai he “Aho he Atua”?

“Po ke fefe ha mutolu a mahani ke lata ai ke he tau mahani mitaki mo e tau mahani Atua. Kua fakatalitali mo e foli atu kia hoko mai e aho he Atua.”​—2 PETERU 3:11, 12.

1. Ko hai ne gahua mo e loto, katoa mo e malolo ha Elia?

KUA fifili e Iehova ko e Atua mai he tau tagata a lautolu ka eke mo tau hakeaga fakalataha mo e hana Tama, ko Iesu Keriso, he Kautu he lagi. (Roma 8:16, 17) He nonofo agaia a lautolu he lalolagi, kua gahua e tau Kerisiano fakauku mo e loto, katoa mo e malolo ha Elia. (Luka 1:17) I loto he vala tala fakamua, kua mailoga e tautolu e tau tataiaga he vahaloto he tau gahua ha lautolu mo e tau gahua he perofeta ko Elia. Ka e kua e gahua he hukui ha Elia, ko e perofeta ko Elisaio?​—1 Tau Patuiki 19:15, 16.

2. (a) Ko e heigoa e mana fakamui ha Elia, mo e mana fakamua ha Elisaio? (e) Ko e heigoa e kitiaaga moli kua nakai hake a Elia ke he lagi?

² Ko e mana fakahiku ne taute e Elia ko e vevehe ua e vai he Vailele ko Ioritana he ta aki e hana a tapulu lahi. Kua fakaata he mena nei a Elia mo Elisaio ke o atu he hala toka momo. He o atu ai a laua he fahi uta he vailele, ati uta he hiohio a Elia ke he taha fahi he lalolagi. (Kikite e puha he lau 15 ne fakamatapatu “Ko e Lagi Fe ne Fano a Elia ki Ai?”) Kua toka hifo e tapulu lahi ha Elia. He fakaaoga ai e Elisaio ke ta aki e kauvai ha Ioritana, kua vevehe ua foki e vai, ati maeke a ia ke liu atu he hala toka momo. Kua fakamaaliali mai he mana nei kua eke tuai a Elisaio mo hukui ha Elia ke fakaholo atu e tapuakiaga moli i Isaraela.​—2 Tau Patuiki 2:6-15.

Aoga Lahi e Tau Fua he Mahani Atua

3. Ko e heigoa ne talahau e Paulo mo Peteru hagaao ke he ha ha hinei ha Iesu mo e “aho he Atua”?

³ He mole atu e tau senetenari he vaha ha Elia mo Elisaio, ne matutaki he tau aposetolo ko Paulo mo Peteru e hauaga he “aho he Atua” mo e ha ha hinei ha Iesu Keriso mo e “lagi fou mo e lalolagi fou” anoiha he magaaho ia. (2 Tesalonia 2:1, 2; 2 Peteru 3:10-13) Ke hao mai he aho lahi ha Iehova​—ka fakaotioti e Iehova hana tau fi mo e fakahao hana tau tagata​—kua lata ia tautolu ke kumi a Iehova mo e fakatata e mahani molu mo e tututonu. (Sefanaia 2:1-3) Ka e ko e falu he tau fua, kua kitia maali ai ka onoono atu a tautolu ke he tau mena tutupu ne putoia ai e perofeta ko Elisaio.

4. Ko e heigoa e kakano he fakamakutuaga he fekafekauaga ha Iehova?

⁴ Kua aoga lahi ke fakamakutu ke he fekafekauaga ha Iehova kaeke ke hao mai he “aho he Atua.” Ko Elia mo Elisaio kua fakamakutu ke he fekafekauaga ha Iehova. Mo e makutu ia ni, kua foaki he tau Kerisiano fakauku he vaha nei e fekau tapu ki a Iehova mo e takitaki e fakamatalaaga he tala mitaki.a Tali mai he lotouho he atu tau he 1930, ne fakamafana e lautolu e tau tagata ne talia e fekau he Kautu mo e amaamanaki ke moui tukulagi he lalolagi ke tukulele ai a lautolu ki a Iehova mo e ke papatiso. (Mareko 8:34; 1 Peteru 3:21) Kua totou miliona ne talia e fakamafanaaga nei. Kua lagataha a lautolu he pouligia mo e mate fakaagaga he hala, ka e he mogonei kua iloa e lautolu e kupu moli he Atua, kua kuku mau ai e amaamanakiaga he moui tukulagi he lalolagi parataiso, mo e hane fakamakutu ai ke he fekafekauaga ha Iehova. (Salamo 37:29; Fakakiteaga 21:3-5) Ha ko e ha lautolu a fakamakutu, kaufakalataha, mahani fulumokoi, mo e falu gahua mitaki, kua ta mai e lautolu e okiokiaga ke he tau matakainaga fakaagaga he Keriso ne ha ha agaia he lalolagi.​—Mataio 25:31-46.

5. Ko e ha kua aoga lahi ai ke taute fakamitaki atu ke he “tau matakainaga” ha Iesu, mo e ko e heigoa e fakafifitakiaga ne moua e tautolu mai ia Elisaio?

⁵ Ko lautolu ne taute e tau mena mitaki ke he “tau matakainaga” ha Iesu kakano ko e tau tagata fakauku nei ko e hana tau tutaki, kua ha ha ai e amaamanakiaga ke hao mai he “aho he Atua.” Ko e tane mo e hoana mau he maaga a Sunema kua fakamonuina lahi ha kua totonu mo e mahani fulumokoi ki a Elisaio mo e hana fekafekau. Kua nakai fai tama a laua nei, mo e kua motua e tane. Ka e mavehe age a Elisaio ke he fifine Sunema to fanau e ia e tama tane, ti kua tupu moli e mena nei. He magaaho ne mate ai e tama fuataha nei he mole atu e falu tau, ne fano a Elisaio ki Sunema mo e liu fakatu mai a ia. (2 Tau Patuiki 4:8-17, 32-37) Ko e tau palepale mitaki ha ia he fakakite e mahani fulumokoi ki a Elisaio!

6, 7. Ko e heigoa e fakafifitakiaga ne fakatoka e Naamanu, mo e ko e heigoa e kakano he mena nei ke he haoaga he “aho he Atua”?

⁶ Kua lata ke mahani fakatokolalo ke talia e takitakiaga ne fakave he Tohi Tapu ne mai he “tau matakainaga” he Keriso fakalataha mo e amaamanakiaga ke hao mai he aho ha Iehova. Kua fakakite he iki he kau Suria ko Naamanu e mahani fakatokolalo ke muitua ke he manatu ne talahau he tama fifine Isaraela ne fofo he tau, mo e kumi e fakamaloloaga he fano ki Isaraela ke kumi a Elisaio. Ka e nakai hau ke feleveia mo Naamanu, ne fakafano e Elisaio e fekau nei ki a ia: “Ti koukou lagafitu a koe i Ioritana, ti liu mai ai hau a tino tuai kia koe, ti mea ai a koe.” (2 Tau Patuiki 5:10) Kua hukia ai e loto ha Naamanu, mo e ita a ia, ka e he magaaho ne fakatokolalo ti hifo mo e uku lagafitu a ia i Ioritana, “ti liu mai ai hana tino tuai tuga ne tino he tama tote, ti mea ai a ia.” (2 Tau Patuiki 5:14) Fakamua to liu ki kaina, ne fenoga atu a Naamanu he hala loa ki Samaria ke fakaaue ke he perofeta ha Iehova. Kua nakai manako ke moua koloa ha koe tau mana mai he Atua, ne feleveia a Elia mo Naamanu ka e nakai mahalo ke talia e tau mena fakaalofa. Ne tala age fakatokolalo a Naamanu ki a Elisaio: “Ko e mena nakai tuai eke hāu a fekafekau e poa huhunu, po ke taha poa ke he tau atua kehe, ka ko Iehova ni.”​—2 Tau Patuiki 5:17.

⁷ He mumui mo e loto fakatokolalo ke he tau fakatonuaga he Tohi Tapu mai ia lautolu ne fakauku, kua totou miliona ne moua e monuina lahi he vaha nei. Ka e mua atu ai, he fakagahuahua e tua ke he poa lukutoto ha Iesu, kua fakamea fakaagaga a lautolu nei ne loto fakamoli. Kua moua e lautolu he mogonei e monuina he eke mo tau kapitiga ha Iehova ko e Atua mo Iesu Keriso. (Salamo 15:1, 2; Luka 16:9) Mo e ha lautolu a fakamoli ke he Atua mo e hana fekafekauaga to palepale ai he fakahao mai a lautolu he fakaotiaga tukulagi ka hoko ke he tau tagata agahala ne fakatokoluga, nakai mahalo ke tokihala he “aho he Atua” ne mafiti mai.​—Luka 13:24; 1 Ioane 1:7.

“Ko Hai kia kua Kau mo Au? Ko Hai?”

8. (a) Ko e heigoa e onoonoaga ha lautolu ka hao mai he “aho he Atua” ke he tauteaga he finagalo faka-Atua? (e) Ko e heigoa e matagahua ne age ki a Iehu? (i) Ko e heigoa ka tupu ki a Iesepela?

⁸ Ko lautolu ne amaamanaki ke hao mai he “aho he Atua” kua lata ke nakai fakauaua he taute e finagalo faka-Atua. Ne talahau fakamalolo tuai e Elia e fakaotiaga he magafaoa keli tagata mo e tapuaki ki a Paala he Patuiki ko Ahapo. (1 Tau Patuiki 21:17-26) Ka e, fakamua to fakahoko e fakafiliaga nei, kua fai gahua e hukui ha Elia ko Elisaio ke fakaoti. (1 Tau Patuiki 19:15-17) He hoko ai e magaaho kotofa ha Iehova, ne hataki e Elisaio taha fekafekau ke fano ke fakauku e iki kautau ko Iehu mo patuiki fou ha Isaraela. He oti e liligi e lolo ke he ulu ha Iehu, ne tala age e fekafekau ki a ia: “Kua vagahau mai pehe a Iehova ko e Atua e Isaraela, Kua fakauku e au a koe ke eke mo patuiki he motu a Iehova, ko Isaraela. Ti kelipopo e koe e magafaoa a Ahapo ko e hau a iki, kia lalago e au kia Iesepela e toto he haku a tau fekafekau ko e tau perofeta, katoa mo e toto he tau fekafekau oti a Iehova. Ha ko e mena to mahaikava e magafaoa oti kana a Ahapo.” To liti e Patuiki Fifine ko Iesepela ke he tau kuli mo e nakai ni tanu.​—2 Tau Patuiki 9:1-10.

9, 10. Kua fakamoli fefe e kupu ha Elia ne hagaao atu ki a Iesepela?

⁹ Kua mailoga he tau tagata ha Iehu e kakano he fakaukuaga hana mo e fakailoa a ia ko e patuiki fou a Isaraela. Kua nakai fakauaua, ne fakamafiti atu a Iehu ki Isereelu ke kamata hana a fakafiliaga ke he tau takitaki tiaki taofiaga he tapuakiaga a Paala. Fakamua ke tuina he kaufana he fakafiliaga ha Iehu ko e tama ha Ahapo, ko e Patuiki ko Ioramo. Ati fenoga ai a ia ke huhu kua hau kia a Iehu he fekau he mafola. “Ke mafola ha ha, he loga pihia e tau feuaki he hāu a matua fifine ko Iesepela, mo e hana tau lagatau taulaatua?” he tali age e Iehu. Mo e mena ia, ne huhuki he kaufana ha Iehu e ate fua ha Ioramo.​—2 Tau Patuiki 9:22-24.

¹⁰ Kua kalo mai e tau fifine mahani Atua neke tuga a Iesepela po ko lautolu tuga a ia. (Fakakiteaga 2:18-23) He magaaho ne hoko atu a Iehu ki Isereelu, kua lali a Iesepela ke teuteu fakafuluola a ia ni. Ti kitekite mai he fakamaama ne fakafeleveia e ia a Iehu aki e fakafiufiu. Ne huhu a ia ke he tau fekafekau ha Iesepela: “Ko hai kia kua kau mo au? Ko hai?” Ti kitekite mai e tokoua po ke tokotolu e fekafekau ne pule. Ko lautolu kia he fahi ha Iehu? “Kia liti hifo e mutolu a ia,” he ui age e ia. Ke he naia ni, kua nakai fakauaua a lautolu, ti liti hifo e lautolu a Iesepela mahani kelea he fakamaama. Kua taholi fakalata he tau sevae he tau solofanua a ia. He magaaho ne o mai e tau tagata ke tanu a ia, ‘ne moua hokoia e lautolu hana gati ulu mo e tau tauuluhui mo e hana tauulu lima.’ Ko e fakamoliaga ofoofo ha a ia he kupu ha Elia: “To kai ai he tau kuli e tino a Iesepela”!​—2 Tau Patuiki 9:30-37.

Kau Fakamoli Atu ke he Tapuakiaga Moli

11. Ko hai a Ionatapu, mo e fakakite fefe e ia hana lagomatai ke he tapuakiaga moli?

¹¹ Ko lautolu ne amaamanaki ke hao mai he “aho he Atua” mo e moui tukulagi he lalolagi kua lata ke kau mo e loto katoa ke he tapuakiaga moli. Kua lata a lautolu ke tuga a Ionatapu, ko e tagata nakai ko e Isaraela ne tapuaki ki a Iehova. He fakaholo atu a Iehu ke fakamoli hana a matagahua, ne manako a Ionatapu ke fakakite hana a taliaaga mo e lagomatai. Ti fano a ia ke fonofono e patuiki fou ha Isaraela, ne kua fenoga atu ki Samaria ke fakaotioti a lautolu ne toe he fale ha Ahapo. He kitia ai a Ionatapu, ne huhu age a Iehu: “Kua tonu nakai hau a loto, tuga ne loto haku mo e loto hau?” Kua omoi he tali ha Ionatapu a Iehu ke tuku age hana lima mo e uiina a Ionatapu ke he hana kariota, he pehe age: “Kia o a taua mo au, ke kitia e koe haku a fakamalolo ha ko Iehova.” Nakai fakauaua, ne talia ai e Ionatapu he fakakite hana a lagomatai ke he tagata fakafili kua fakauku ha Iehova.​—2 Tau Patuiki 10:15-17.

12. Ko e ha kua tonu ai ia Iehova ke poaki e loto fakamoli katoatoa?

¹² Kua lata ke kau fakamoli atu ke he tapuakiaga moli, ha ko Iehova ko e Tufuga mo e Pule Katoatoa he Lagi mo e Lalolagi, ne poaki mai mo e kua lata tonu mo e ha tautolu a loto fakamoli katoatoa. Ne poaki age a ia ke he tau Isaraela: “Aua neke eke e koe māu ha tupua kua ta, po ke taha fakatai he taha mena ha he lagi i luga, po ke ha he fonua i lalo, po ke ha he tahi i lalo he fonua. Aua neke hufeilo a koe ki ai, aua foki neke fekafekau ki ai; ha ko au ko Iehova hau a Atua, ko e Atua ita tafua au.” (Esoto 20:4, 5) Ko lautolu ne amaamanaki ke hao mai he “aho he Atua” kua lata ke tapuaki mo e loto katoa ki a ia, fakalataha mo e “agaga mo e fakamoli.” (Ioane 4:23, 24) Kua lata ia lautolu ke mauokafua ke he tapuakiaga moli, tuga a Elia, Elisaio, mo Ionatapu.

13. He tatai e loto ha Ionatapu mo Iehu, ko hai ne fakailoa e Patuiki faka-Mesia, mo e fakakite fefe e lautolu e mena nei?

¹³ He oti ai e fakaotiotiaga he magafaoa ha Ahapo, ne taute e Iehu taha lakaaga ke fakakite aki e tau tagata ne tapuaki ki a Paala mo e moumou e lotu fakavai nei i Isaraela. (2 Tau Patuiki 10:18-28) He vaha nei, ko e Patuiki he lagi, ko Iesu Keriso, kua kotofa ai ke fakafili e tau fi ha Iehova mo e fakatokoluga Hana pule katoatoa. Tuga he tatai e loto ha Ionatapu mo Iehu, ko e “moto tagata tokologa” he tau “mamoe kehe” ha Iesu he vaha nei kua fakailoa mo e loto katoa ko Keriso ko e Patuiki faka-Mesia mo e kaufakalataha atu ke he tau matakainaga fakaagaga hana he lalolagi. (Fakakiteaga 7:9, 10; Ioane 10:16) Kua fakamoli e lautolu e mena nei he fakagahuahua e lotu moli mo e fakamakutu atu ke he fekafekauaga Kerisiano, hataki atu ke he tau fi he Atua kua hane mafiti mai e “aho he Atua.”​—Mataio 10:32, 33; Roma 10:9, 10.

Ha ha Ni Mua e Tau Mena Tutupu Kehe Lahi!

14. Ko e heigoa ne ha ha i mua ma e lotu fakavai?

¹⁴ Ne taute e Iehu e lakaaga ke fakaoti aki e tapuakiaga ki a Paala i Isaraela. He vaha ha tautolu, he puhala mai he Iehu Mua Atu, ko Iesu Keriso, to ta mai he Atua e fakatulakiaga ki a Papelonia Lahi, ko e kautu he lotu fakavai he lalolagi. Nakai leva to kitia e tautolu e fakamoliaga he tau kupu he agelu ke he aposetolo ko Ioane: “Ko e tau hoe foki ne hogofulu ne kitia e koe ke he manu favale, to fakavihia e lautolu e fifine fakataka [Papelonia Lahi] mo e moumou a ia, mo e uta kehe hana tau tapulu, to kai foki e lautolu hana tino, mo e huhunu a ia ke he afi. Ha kua tuku atu he Atua ke he tau loto ha lautolu ke eke hana finagalo, kia loto fakalataha foki a lautolu, ke ta age foki e lautolu ha lautolu a tau kautu ke he manu favale, ato fakakatoatoa ai e tau kupu he Atua.” (Fakakiteaga 17:16, 17; 18:2-5) Kua fakatino he ‘tau hoe hogofulu’ e tau pule kautau fakapolitika ne fa e pule he lalolagi. Pete ni kua ha ha ia lautolu e fakafetuiaga faivao he mogonei mo Papelonia Lahi, kua tote hana a magaaho. Ko e vala fakapolitika nei he lalolagi to fakaotioti e lotu fakavai, mo e to moua he “manu favale”​—ko e Tau Motu Kaufakalataha​—e matagahua ne mua mo e ‘tau hoe hogofulu’ ke moumou a ia.b Ko e magaaho ha a ia ke fakaheke ki a Iehova!​—Fakakiteaga 19:1-6.

15. Ko e heigoa ka tupu he magaaho ka lali ke moumou e fakatokatokaaga he Atua he lalolagi?

¹⁵ He mole e moumou he Patuiki ko Iehu e tapuakiaga a Paala, ne fuluhi atu hana fale patuiki ke he tau fi fakapolitika i Isaraela. To pihia ni e mena ka taute he Patuiki ko Iesu Keriso. To toe hifo e tau pule fakapolitika he mole e fakaotioti he tau lotu fakavai tuga ha Paala. I lalo he fakaohoohoaga ha Satani ko e Tiapolo, ko e tau fi nei he pule katoatoa ha Iehova to lali fakamakamaka ke moumou e fakatokatokaaga he Atua he lalolagi. (Esekielu 38:14-16) Ka e to fekau e Iehova e Patuiki ko Iesu Keriso ke tau ki a lautolu mo e fakaotioti a lautolu i Amaketo, ko e ‘tau he aho lahi he Atua mana,’ ke fakakatoatoa aki e tokoluga he pule katoatoa ha Iehova.​—Fakakiteaga 16:14, 16; 19:11-21; Esekielu 38:18-23.

Fekafekau mo e Fakamakutu ha Elisaio

16, 17. (a) Iloa fefe e tautolu kua fakamakutu a Elisaio ke he fakahikuaga he hana moui? (e) Ko e heigoa kua lata ia tautolu ke taute aki e tau tagafana he kupu moli?

¹⁶ Ato ta mai he “aho he Atua” e fakaotiaga ke he fakatokaaga katoa he tau mena kelea ha Satani, to fakamalolo mo e fakamakutu e tau fekafekau he Atua ke tuga a Elisaio. Kehe mai he hana gahua ko e fekafekau ha Elia, kua fekafekau tokotaha a Elisaio mo perofeta ha Iehova ke molea e 50 e tau tau! Mo e fakamakutu ai a Elisaio ke hoko ke he fakahikuaga he hana moui loa. Ato hoko hana mate, ne aahi atu e tama ha Iehu ko e Patuiki ko Ioasa ki a ia. Ne tala age a Elisaio ki a ia ke fana e fana ki fafo he fakamaama. Ne tu e fana he foliga, ti pehe age a Elisaio: “Ko e fana he fakamouiaga ke eke e Iehova, mo e fana he fakamouiaga mai ia Suria, ha ko e mena to keli e koe a Suria i Afeka ato fakaoti ai e koe a ia.” He ole age e Elisaio, ati ta e Ioasa e kelekele aki hana a tau kaufana. Ka e kua nakai fakamakutu a ia, ti lagatolu ni e ta. Ati talahau ai a Elisaio, ha ko e fua he naia, to lagatolu ni e kautu ha Ioasa ki Suria, ti ko e mena ia ni ne tupu. (2 Tau Patuiki 13:14-19, 25) Ne nakai keli oti he Patuiki ko Ioasa e tau Suria, ‘ke fakaotioti ai.’

¹⁷ Mo e fakamakutu pihia tuga ha Elisaio, kua fakatumau e tau fakauku ne toe ke tau atu ke he tapuakiaga fakavai. Ko e ha lautolu a tau hoa ne moua e amaamanakiaga ke he lalolagi hane taute e mena taha ia ni. Ka e, ko lautolu oti ne amanaki ke hao mai he “aho he Atua” kua lata ke mauloto e tau kupu he tagata fakamakutu ko Elia ne hagaao ke he moumouaga he lalolagi. Kia o mai a tautolu ke uta e tau tagafana he kupu moli mo e fakatumau ke tau fakalataha mo lautolu​—e, ato pehe a Iehova kua oti tuai ha tautolu a tau gahua mo lautolu.

18. Kua lata fefe a tautolu ke tali atu ke he tau kupu he 2 Peteru 3:11, 12?

¹⁸ Nakai leva to ta mai he “aho he Atua” e fakaotiaga ke he fakatokaaga kelea nei he tau mena. Kia fakaata ai e tautolu a tautolu ke fakalagalaga he tau kupu loto fakamafana he aposetolo ko Peteru. “Ko e hanai, to fakaotioti e tau mena oti ia, po ke fefe ha mutolu a mahani ke lata ai ke he tau mahani mitaki mo e tau mahani Atua. Kua fakatalitali mo e foli atu kia hoko mai e aho he Atua.” (2 Peteru 3:11, 12) He magaaho ka fakaotioti e tau fahi oti he fakatokaaga nei ha ko e afi he ita he Atua ne kitia ai he puhala ia Iesu Keriso, ko lautolu hokoia ni ne talahaua e mahani tututonu mo e mahani Atua ka fakahao. Kua aoga lahi ai e mahani mitaki mo e mea fakaagaga. Pihia foki e fakaalofa ke he tau tagata katofia, ne kua fakakite he mailoga ha lautolu a tau manako, mua atu ke he puhala fakaagaga ha ko e ha tautolu a fekafekauaga Kerisiano.

19. Ko e heigoa kua lata ia tautolu ke taute ke hao mai he “aho he Atua”?

¹⁹ Kua fakakite nakai he tau kupu mo e tau gahua hau a koe ke eke mo taha fekafekau tua fakamoli mo e fakamakutu he Atua? Kaeke ke pihia, kua maeke ia koe ke olioli e amaamanakiaga ke hao atu he “aho he Atua” ke he lalolagi fou ne mavehe he Atua. E, to moua fakalata e koe e fakahaoaga kaeke ke taute fakamitaki atu a koe ke he tau matakainaga fakaagaga he Keriso kakano ko e tau tutaki hana a lautolu, tuga e tane mo e hoana Sunema ne mahani fulumokoi ki a Elisaio. Ke hao mai kua lata foki ia koe ke tuga a Naamanu, ne loto fakatokolalo he talia e hatakiaga faka-Atua ati eke ai mo tagata tapuaki ki a Iehova. Kaeke ke manako a koe ke moui tukulagi he lalolagi parataiso, kua lata ia koe ke fakatata e kau fakamoli ke he tapuakiaga moli, tuga ne taute e Ionatapu. Ti liga to ha ha a koe mo e tau fekafekau tua fakamoli ha Iehova, ka nakai leva ti kitia e fakamoliaga he tau kupu ha Iesu: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.”​—Mataio 25:34.

[Tau Matahui Tala]

To Tali Fefe a Koe?

◻ Ko e heigoa e falu he tau fua ne kua lata ke moua ke hao mai he “aho he Atua”?

◻ Ko e heigoa e fakafifitakiaga ne fakatoka he tane mo e hoana Suname he vaha a Elisaio?

◻ Ko e heigoa e fakaakoaga ka ako mai ia Naamanu?

◻ Kua maeke fefe ia tautolu ke muitua ke he fakafifitakiaga ha Ionatapu?

◻ Kua lata fefe a tautolu ke lauia he 2 Peteru 3:11, 12?