Ma Tau Fuata—To Nakai Fakanimonimo e Iehova ha Mutolu a Tau Gahua!
“Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.”—HEPERU 6:10.
1. Fakakite fefe he tau tohi he Tohi Tapu ha Heperu mo Malaki kua loto fakaaue a Iehova ke he fekafekauaga hau?
KUA taute nakai e koe taha gahua totonu ma e kapitiga ti nakai fakaaue atu? Kua hukia lahi he magaaho ka uta fakateaga po ke, ue atu e kelea, ka nimopo e gahua fakamokoi. Ko e kehe ha ia, mogoia, he magaaho ka foaki e tautolu e fekafekau loto katoa ki a Iehova! Ne talahau he Tohi Tapu: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.” (Heperu 6:10) Kia manamanatu ko e heigoa e kakano he mena ia. To kitia moli e Iehova e mena ia ko e gahua hepehepe he vala hana—ko e hala—kaeke ke nimo ia ia e tau mena ne taute e koe mo e tau mena ne fakatumau a koe ke taute ke he fekafekauaga hana. Ko e Atua loto fakaaue moli ha ia!—Malaki 3:10.
2. Ko e heigoa ne taute e fekafekauaga ki a Iehova ke uho moli?
2 Kua ha ha ia koe e kotofaaga uho ke tapuaki mo e fekafekau ke he Atua loto fakaaue nei. Ha kua kavi ke ono ni e miliona he tau katofia talitonu hau ka fakatai atu ke he kavi ono piliona tagata he lalolagi katoa, nukua temotemoai moli e kotofaaga uho hau. Mua atu foki, ha kua fanogonogo mo e fai tali a koe ke he ogo he tala mitaki, ko e fakamoliaga a ia kua fiafia fakaperesona a Iehova ki a koe. Ha ko e mena ia, kua talahau e Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) E, lagomatai e Iehova e tau tagata takitokotaha ke fakaaoga e tau aoga he poa he Keriso.
Fakaaue ke he Kotofaaga Mitaki Lahi Hau
3. Fakakite fefe he tau tama tane ha Koru e loto fakaaue ma e tau kotofaaga he fekafekau ki a Iehova?
3 Tuga ne tala ki ai he vala tala fakamua, kua ha ha a koe he tuaga uho ke fakafiafia e loto a Iehova. (Tau Fakatai 27:11) Ko e taha mena anei kua nakai lata ia koe ke uta fakateaga. I loto he taha he tau salamo ha lautolu, ne fakakite he tau tama tane ha Koru e loto fakaaue ha lautolu ma e kotofaaga he fekafekau ki a Iehova. Ne totou e tautolu: “Kua mua e mitaki he aho taha ke he hāu a tau lotopā, ke he taha afe e tau aho kehe. Kua mua haku a manako ke tu ke he gutuhala he fale he haku a Atua, ke he manako ke nofo ke he tau fale ia he tau tagata mahani kelea.”—Salamo 84:10.
4. (a) Ko e heigoa ka liga taute falu ke kitia e tapuakiaga ha Iehova ke fakakaupa? (e) Ko e puhala fe ne fakakite ne Iehova a ia kua makai ke fioia mo e taui e tau fekafekau hana?
4 Kua pihia kia e logonaaga hau hagaao ke he kotofaaga hau ke fekafekau ke he Matua he lagi? Haia, he falu a magaaho kua tuga fakakaupa he tapuakiaga a Iehova e tokanoaaga hau. Ko e moli ke moui hagaao ke he matapatu fakaakoaga he Tohi Tapu kua lata ke foaki ne koe a koe. Ka e, he fakahikuaga, ko e mena ne ole e Iehova ki a koe ke lata ma e aoga ni hau. (Salamo 1:1-3) Ke lafi, kua kitia e Iehova e tau laliaga hau mo e fakakite e loto fakaaue hana ma e tua fakamoli hau. Moli, ne tohia e Paulo ko Iehova “kua taui mai a lautolu kua kumi fakamakutu kia ia.” (Heperu 11:6) Hane kumi magaaho a Iehova ke taute e mena nei. Ne talahau he perofeta tututonu i Isaraela i tuai: “Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.”—2 Nofoaga he Tau Patuiki 16:9.
5. (a) Ko e heigoa taha he tau puhala mitaki kua maeke ia koe ke fakakite kua katoatoa e loto hau ki a Iehova? (e) Ko e ha kua liga uka ai ke tutala ke he falu hagaao ke he tua hau?
5 Ko e taha he tau puhala mitaki kua maeke ia koe ke fakakite kua katoatoa e loto hau ki a Iehova ke tutala ke he falu hagaao ki a ia. Kua moua nakai e koe taha magaaho ke fakamatala ke he falu kapitiga aoga hau hagaao ke he hau a tua? He magaaho fakamua, liga kua fakahopoate e mena nei, ti tuga kua fakatupu he manatu ia e matakutaku. ‘Ka e kua ka feki a lautolu ki a au?’ he liga huhu e koe. ‘Ka e kua ka talahau a lautolu kua kehe ni e lotu haku?’ Ne fakailoa e Iesu to nakai fanogonogo e tau tagata oti ke he ogo he Kautu. (Ioane 15:20) Ka kua nakai pehe e mena nei, kua lili a koe ke he moui tauamuamu mo e fakavihia. Ke he taha fahi, kua moua he tau fuata Fakamoli tokologa e tau tagata ka fanogonogo ti kua moua e fakalilifu lahi mai he tau kapitiga ha lautolu he pipiki mau ke he ha lautolu a tau taofiaga.
“To Lagomatai e Iehova a Koe”
6, 7. (a) Maeke fefe he taha tama fifine ne 17 e tau tau he moui ke fakamatala ke he tau kapitiga hana he vahega? (e) Ko e heigoa ne ako mai e koe he puhala ha Jennifer?
6 Ka e maeke fefe ia koe ke ati e malolo ke vagahau hake hagaao ke he tua hau? Ko e ha he taute e fifiliaga ke fakamoli he magaaho ka huhu e tau tagata ki a koe hagaao ke he lotu hau? Onoono la ke he mena ne tupu ki a Jennifer ne 17 e tau tau he moui. “Ne kai au he kai la he aoga. Ne fakatutala e tau tama fifine he laulau haku ke he tau lotu, mo e huhu mai taha he tau tama fifine ki a au ko e fano au he lotu fe,” he talahau e ia. Kua hopoate kia a Jennifer ke foaki e tali? “E,” he talahau e ia, “ha kua nakai iloa moli e au ko e fefe la e mena ka talahau mai.” Ti ko e heigoa ne taute e Jennifer? “Ne tala age e au ke he tau tama fifine ko e taha he Tau Fakamoli a Iehova au,” he fakaholo atu e ia. “Fakamua kua tuga ofo a lautolu. Ti kua tuga fita he manatu a lautolu ko e tau tagata kehe lahi e Tau Fakamoli a Iehova. Ati fakaohooho he mena nei a lautolu ke huhu mai ki a au, mo e maeke ia au ke fakamaama falu a mena ne nakai mahino mitaki e lautolu. Pihia foki he mole e aho ia, ne o mai e falu tama fifine ki a au he falu magaaho mo e tau huhu.”
7 Kua tokihala kia a Jennifer ke vagahau hake hagaao ke he tau taofiaga hana? Nakai pihia! “Ne logona hifo e au e olioli hagaao ki ai he tuku e magaaho kai la,” he talahau e ia. “Mogonei kua iloa mitaki he tau tama fifine ia ko hai e Tau Fakamoli a Iehova.” Kua mukamuka e tomatomaaga ha Jennifer mogonei: “Kaeke uka ia koe ke fakamatala ke he tau kapitiga he vahega po ke tau faiaoga, kia talahau e liogi mafiti. To lagomatai e Iehova a koe. To fiafia a koe kua fakaaoga fakamitaki e koe e magaaho hau ke foaki e fakamatala.”—1 Peteru 3:15.
8. (a) Lagomatai fefe he liogi a Nehemia he magaaho ne fehagai a ia ke he tuaga tupu fakalutukia? (e) Ko e heigoa falu a tutuaga he aoga ka liga lata ia koe ke foaki e liogi ku mo e mai he loto ki a Iehova?
8 Mailoga ne fakamafana mai a Jennifer ke “talahau e liogi mafiti” ki a Iehova ka tupu mai e magaaho ke foaki e fakamatala hagaao ke he tua hau. Ko e mena nei ne taute e Nehemia, ko e tagata taute uaina ke he patuiki Peresia ko Aretaseta, he magaaho ne fehagai a ia ke he taha tuaga tupu fakalutukia. Kua maaliali lahi e fakaatukehe ha Nehemia ha kua tala age ki a ia hagaao ke he tuaga matematekelea he tau Iutaia mo e iloa foki kua moumou e tau kaupa mo e tau pahala ha Ierusalema. Ne fioia he patuiki kua tuga e tupetupe lahi a Nehemia, ti huhu a ia ki a Nehemia ko e heigoa ne tupu. Ato tali age, ne liogi a Nehemia ma e hatakiaga. Ti ole fakamalolo a ia ke foaki e fakaataaga ke liu ki Ierusalema ke lagomatai ke liu ati e maga ne malona. Ne foaki e Aretaseta e mena ne ole e Nehemia. (Nehemia 2:1-8) Ko e fakaakoaga? Kaeke matakutaku a koe ka tupu mai e magaaho ke foaki e fakamatala hagaao ke he tua hau, kia nakai tiaki e magaaho hau ke liogi mai he loto. “Kia tuku atu kia [Iehova] e tau mena oti kua fakaatukehe ai a mutolu,” he tohia e Peteru, “ha ko e mena kua manatu e ia a mutolu.”—1 Peteru 5:7; Salamo 55:22.
“Kia Mautali a Mutolu ke Tali Atu”
9. Maeke fefe ia Leah ne 13 e tau tau he moui ke tufa 23 e lagaki he tohi Young People Ask?
9 Mailoga e taha mena ne tupu foki. Ko Leah, ne 13 e tau he moui, hane totou e tohi Questions Young People Ask—Answers That Worka he magahala he hana kai la he aoga. “Kua onoono mai falu ki a au,” he talahau e ia, “nakai leva kua tokologa ne fakakiakia mai he ua haku. Ne kamata a lautolu ke huhu ko e tala e tohi ke he heigoa.” He matahiku he aho, ne tokofa e tama fifine ne ole ki a Leah ke moua e lagaki he tohi Young People Ask. Nakai leva, ne fakakite he tau tama fifine nei e tohi ke he falu, ti manako a lautolu ke fai lagaki foki. He tau fahitapu hake, ne tufa e Leah 23 e lagaki he tohi Young People Ask ke he tau kapitiga aoga hana mo e ha lautolu a tau kapitiga. Kua mukamuka kia ma Leah ke vagahau hake he magaaho fakamua ne huhu e falu hagaao ke he tohi ne totou e ia? Nakai! “Fakamua, ne hopo e ate haku,” he talahau e ia. “Pete ia, ne liogi au, mo e iloa e au ko Iehova a ia mo au.”
10, 11. Maeke fefe e tama fifine Isaraela tote ke lagomatai e iki kautau ha Suria ke ako hagaao ki a Iehova, mo e heigoa e tau hikihikiaga ne taute e ia he magaaho fakamui?
10 Liga fakamanatu atu he tala ha Leah ki a koe e tuaga pihia ne fehagai mo e tama fifine Isaraela tote ne uta paea ki Suria. Ko Naamanu, ko e iki kautau ha Suria, ko e tagata lepela. Liga ko e hoana hana ne kamata e fakatutalaaga ne fakaohooho e tama fifine tote nei ke vagahau hake hagaao ke he tua hana. “Ane mai kua fakalataha haku iki mo e perofeta ha ha i Samaria,” he talahau e ia, “po kua fakamalolo e ia a ia he hana lepela!”—2 Tau Patuiki 5:1-3.
11 Ko e fua he malolo he tama fifine tote nei, ne hau ai a Naamanu ke iloa “kua nakai fai [A]tua ke he lalolagi oti ni, ka kua ha i ai a ia i Isaraela ni.” Ti fifili foki e ia ‘to nakai tuai eke e ia e poa huhunu, po ke taha poa ke he tau atua kehe, ka ko Iehova ni.’ (2 Tau Patuiki 5:15, 17) Ne fakamonuina moli e Iehova e malolo he tama fifine tote ia. Kua maeke mo e to taute pihia e ia ma e tau fuata ikiiki he vaha nei. Kua fioia e Leah e mena ia ke moli. Fai magaaho, ne o atu e falu kapitiga aoga hana ki a ia mo e talahau kua lagomatai he tohi Young People Ask e tau mahani ha lautolu. “Kua fiafia lahi au,” he talahau e Leah, “he iloa e au kua lagomatai e au e falu ke fakaako fakalahi hagaao ki a Iehova mo e lagomatai a lautolu ke hikihiki e tau moui ha lautolu.”
12. Maeke fefe a koe ke fakamalolo ke tali atu ke he tua hau?
12 Kua maeke foki ia koe ke hokotia ke he tau puhala ia ke tuga ha Jennifer mo Leah. Kia muitua ke he tomatomaaga ha Peteru, ne tohia kua lata ia koe ko e Kerisiano ke fakatumau ke “mautali a mutolu ke tali atu mo e mahani molu mo e matakutaku kia lautolu oti kua hūhu mai kia mutolu ke he kakano he amaamanaki ha ha ia mutolu.” (1 Peteru 3:15) Maeke fefe ia koe ke taute e mena ia? He fifitaki e puhala he tau Kerisiano he senetenari fakamua ne liogi ki a Iehova ke lagomatai e ia a lautolu ke fakamatala “mo e fakamalolo.” (Gahua 4:29) Ti fakamalolo a ke tutala ke he falu hagaao ke he tau taofiaga hau. To liga fiafia a koe ke he tau fua. Mua atu foki, to fakafiafia e koe e loto a Iehova.
Tau Vitio mo e Tau Matagahua Pauaki
13. Ko e tau magaaho fe kua fakaaoga he falu fuata ke foaki e fakamatala? (Kikite tau puha he tau lau 12 mo e 13.)
13 Kua fakamaama he tau fuata tokologa e tua ha lautolu ke he tau kapitiga he aoga po ke tau faiaoga he fakaaoga e tau vitio. He falu a magaaho, kua hafagi foki he tau matagahua aoga e tau puhala ke tamai e fakaheke ki a Iehova. Ke fakatai ki ai, ua e tama tane ne 15 e tau tau he moui, ko e Tau Fakamoli a Iehova a laua, ne moua e kotofaaga ke tohi e hokotaki hagaao ke he taha he tau lotu he lalolagi ko e taha vala he ha laua a vahega fakamauaga tuai he lalolagi. Ne kau tokoua a laua nei ke tohi e hokotaki ha laua hagaao ke he Tau Fakamoli a Iehova, he fakaaoga e tohi Jehovah’s Witnesses—Proclaimers of God’s Kingdom ma e kumikumiaga ha laua.b Kua lata foki ia laua ke totou e hokotakiaga ne lima minuti. He oti ai, ne loga e tau huhu he faiaoga mo e tau tama ti tutu agaia a laua ki mua he vahega ke 20 atu foki minuti. He fai fahitapu he mole, ne fakatumau e tau kapitiga ha laua he vahega ke huhu hagaao ke he Tau Fakamoli a Iehova!
14, 15. (a) Ko e ha ne eke e matakutaku tagata mo matahele? (e) Ko e ha kua lata ia koe ke mauokafua he talahau e tau taofiaga hau ke he falu?
14 Tuga kua fakakite he tau mena tutupu na, to moua e tau fakamonuinaaga lalahi ka tutala atu ke he falu hagaao ke he tau taofiaga mo e tau talitonu hau ko e taha he Tau Fakamoli a Iehova. Kia nakai toka e matakutaku tagata ke fofo e monuina mo e fiafia hau he lagomatai e falu ke o mai ke iloa a Iehova. Ne talahau he Tohi Tapu: “Ko e matakutaku ke he tau tagata ke hoko mai ai e matahele; ka ko ia kua tua kia Iehova, to nofo ai a ia mo e nakai haofia.”—Tau Fakatai 29:25.
15 Kia manatu, ha ko e fuata Kerisiano, kua moua e koe e tau mena ne manako lahi e tau kapitiga hau ki ai—ko e puhala mitaki he moui he mogonei mo e maveheaga ke moui tukulagi he vaha anoiha. (1 Timoteo 4:8) Ka kua fuluola, he Tau Fahi Kaufakalataha—kua manatu a koe nukua fakateaga lahi po ke manamanatu fakalalolagi e tau tagata—ne fakakite he taha viliaga ke hafa he tau fuata kua uta fakahokulo e lotu, mo e ko e toluaki ia lautolu ne talahau ko e tua he lotu ko e “fakaohoohoaga aoga lahi a ia” ke he tau momoui ha lautolu. Ko e tuaga ia kua tuga ke pihia foki he tau fahi loga he lalolagi. Ti liga ni mogoia, to fiafia e tau kapitiga aoga hau ke fanogonogo ke he tau mena ka talahau e koe hagaao ke he Tohi Tapu.
Ha ko e Fuata, Kia Fakatata Atu ki a Iehova
16. Ko e heigoa ne putoia ke fakafiafia a Iehova mai he tutala hokoia ke he falu hagaao ki a ia?
16 Moli, ke fakafiafia e loto a Iehova kua nakai ni kuenaia ke tutala hagaao ki a ia. Kua lata foki ia koe ke fakalautatai atu e mahani hau ke he tau tutuaga hana. Ne tohia he aposetolo ko Ioane: “Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.” (1 Ioane 5:3) To kitia e koe e moli he mena nei kaeke fakatata atu a koe ki a Iehova. Maeke fefe ia koe ke taute e mena ia?
17. Maeke fefe ia koe ke fakatata atu ki a Iehova?
17 Kia fai magaaho ke totou e Tohi Tapu mo e tau tohi fakave ke he Tohi Tapu. Ka lahi e ako hau hagaao ki a Iehova, to mukamuka ai ke omaoma ki a ia mo e ke tutala ke he falu hagaao ki a ia. “Kua ta mai he tagata mahani mitaki e tau mena mitaki mai he tau mena mitaki kua tanaki ke he hana loto,” he talahau e Iesu, “ha ko e puke he loto ke vagahau mai ai hana gutu.” (Luka 6:45) Ti fakapuke a e loto hau aki e tau mena mitaki. He ha he fakatoka e tau foliaga hagaao ke he mena nei? Liga kua lata ia koe ke holo ki mua he tauteute ma e tau feleveiaaga he fakapotopotoaga he fahitapu hake. Ko e foliaga foki hau mogoia ke fai vala he foaki e taha tali ku ka e mai he loto. Moli, kua lata mitaki foki ke fakagahuahua e koe e tau mena ne fakaako e koe.—Filipi 4:9.
18. Pete ni ka mamahi a koe ke he falu totokoaga, ko e heigoa kua maeke ia koe ke mauokafua ki ai
18 Ko e tau monuina ne mai he fekafekau ki a Iehova kua hololoa—haia, tukulagi. Moli, to liga moua e koe he falu magaaho e totokoaga po ke amuamu ha ko e taha he Tau Fakamoli a Iehova. Ka kia manamanatu ki a Mose. Ne talahau e Tohi Tapu “kua amaamanaki a ia ke he [taui].” (Heperu 11:24-26) Kua maeke foki ia koe ke mauokafua to taui e Iehova a koe ma e tau laliaga ne taute e koe ke fakaako hagaao ki a ia mo e tutala hagaao ki a ia. Haia, to nakai ni “fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”—Heperu 6:10.
[Tau Matahui Tala]
a Lomi fakailoa he Tau Fakamoli a Iehova.
b Lomi fakailoa he Tau Fakamoli a Iehova.
Manatu Nakai e Koe?
• Ko e ha kua iloa moli e koe kua uho e fekafekauaga hau ki a Iehova?
• Ko e heigoa e tau puhala ke fakamatala he aoga ne kua kautu ki ai e falu?
• Maeke fefe a koe ke fakamalolo ke fakamatala ke he tau kapitiga hau he vahega?
• Maeke fefe ia koe ke fakatata atu ki a Iehova?
[Puha/Tau Fakatino he lau 12]
Fakaheke Foki he Fanau Ikiiki a Iehova!
Kua maeke foki he fanau ikiiki ke foaki e fakamatalaaga he aoga. Kikite ke he tau fakafitaaga nei.
Ne totou he vahega lima ha Amber ne hogofulu e tau he moui e tohi hagaao ke he tau fakakikiveka he tau Nasi ke he tau Iutaia he magahala he Felakutaki II he Lalolagi. Ne manatu a Amber ke tamai e vitio Purple Triangles ke he faiaoga hana. Ne ofo e faiaoga he iloa kua favale foki ke he Tau Fakamoli a Iehova i lalo he pule Nasi. Ne fakakite he faiaoga e vitio ke he vahega katoa.
He valu e tau he moui, ne tohia e Alexa e tohi ke he vahega hana ke fakamaama ko e ha kua nakai maeke ia ia ke putoia ke he fakamanatuaga Kirisimasi ha lautolu. Kua nava lahi e faiaoga hana ti ole e ia a Alexa ke totou fakalahi e tohi ke he vahega hana mo e ke he ua foki e vahega! “Kua fakaako au ke fakalilifu e falu ne kehe e tau taofiaga mai he haku,” he talahau e ia he magaaho fakamui, “mo e fakaaue atu au ki a mutolu he fakalilifu e fifiliaga haku ke nakai fakamanatu e Kirisimasi.”
Nakai leva he kamata e vahega taha, ne uta e Eric e tohi My Book of Bible Stories ke he aoga mo e ole ma e fakaataaga ke fakakite ai ke he tau kapitiga he vahega hana. “Fai manatu mitaki foki au,” he talahau he faiaoga hana. “Fefe he totou e koe e tala ke he vahega?” Ne totou ai e Eric. He oti ai, ne uiina e ia a lautolu oti ne manako ke fai lagaki he tohi ke hiki e tau lima ha lautolu. Kua hogofulu ma valu e tagata—fakalataha mo e faiaoga—ne hiki e tau lima! Mailoga hifo e Eric mogonei kua fai matakavi fakamatala pauaki a ia.
Kua fakaaue lahi a Whitney ne hiva e tau he moui ma e porosua Jehovah’s Witnesses and Education.c “Na fa age tumau he Mami haku e porosua nei ke he tau faiaoga haku he tau tau oti,” he talahau e ia, “ka e he tau nei kua age ni e au. Fakaaue ke he porosua ia ha kua fifili he faiaoga haku au ko e ‘tama pulotu he fahitapu.’”
[Matahui Tala]
c Ko e tau tohi oti ne totoku na taute he Tau Fakamoli a Iehova.?
[Puha/Tau Fakatino he lau 13]
Tau Tutuaga kua Fakaaoga he Falu ke Vagahau Hagaao ke he Tua ha Lautolu
He magaaho ka kotofa e hokotaki po ke matagahua aoga, kua fifili he falu e matakupu ka fakaata a lautolu ke foaki e fakamatala
Kua foaki he tokologa he tau fuata ke he faiaoga ha lautolu e vitio po ke tohi ne hagaaki ke he matakupu hane fakatutala he vahega
Ko e falu fuata he magaaho ka totou e Tohi Tapu po ke tohi fakave ke he Tohi Tapu he magahala okioki nukua o ki ai e falu a fuata ne huhu e tau huhu
[Fakatino he lau 10]
Maeke ia lautolu ne iloilo ke lagomatai ke fakaako e tau fuata ke fekafekau ki a Iehova