Fakatata Atu ke he Atua
Ko Ia ne Fiafia ke he Fakafili Tonu
KUA lauia noa kia a koe he nakai fakafili tonu po ke ekefakakelea, liga he tagata ne nakai fakahala mo e nakai fakakite e tokihala? Uka lahi ke fahia ke he falu mena tuga e nakai fakafili tonu, mua atu ka fakamamahi he tagata ne amanaki a koe ke fakaalofa mo e leveki a koe. Liga hūhū hifo a koe, ‘Ko e ha ne fakaatā he Atua e tau mena ia ke tutupu?’a Mooli kua vihiatia e Iehova ko e Atua e tau nakai fakafili tonu oti kana. Kua fakamalolō mai he haana Kupu, ko e Tohi Tapu, ki a tautolu ko e tau tagata kafilo ne taute e mahani agahala ka moua e fakahala faka-Atua. Manamanatu la tautolu ke he tau kupu ne fakamau he aposetolo ko Paulo ia Heperu 10:26-31.
Ne tohi e Paulo: “Kaeke kua hala a tautolu mo e loto ki ai, ka kua talia tuai e tautolu e maama he kupu moli, ti nakai tuai toe ha poa mo e tau hala.” (Kupu 26) Kua lahi e hehē he tau tagata taute agahala pauaki. Ko e ha? Fakamua, ne nakai taute e lautolu e agahala pauaki he magaaho lolelole—ko e vahega hehē ne taute oti e tautolu ha ko e nakai mitaki katoatoa. Ne fakatumau a lautolu ke taute agahala. Uaaki, kua foli pauaki e tau agahala ha lautolu. Tuga he tohi he The Bible in Basic English, kua “taute pauaki e lautolu e mahani kelea.” Kua vakavaka hifo muatua e kelea he tau loto ha lautolu. Toluaki, kua nakai fua mai e tau agahala ha lautolu he goagoa. Kua moua e lautolu e “maama he kupu moli” hagaao ke he finagalo mo e tau puhala he Atua.
Fēfē e onoonoaga he Atua ke he tau tagata agahala ne nakai tokihala mo e fakafualoto? “Nakai tuai toe ha poa mo e tau hala,” he talahau e Paulo. Ko e poa he Keriso—ko e mena fakaalofa he Atua ma e tau tagata—kua ufiufi e tau agahala ne taute e tautolu ha ko e nakai mitaki katoatoa ha tautolu. (1 Ioane 2:1, 2) Ka ko lautolu ne taute agahala ka e nakai tokihala kua fakakite kua nakai fai fakalilifuaga a lautolu ke he mena fakaalofa uho nei. Ke he fofoga he Atua, kua “taholi e Tama he Atua, mo e talahau kua nakai tapu e toto” ha Iesu. (Kupu 29) He tau mahani ha lautolu, kua fakakite e lautolu e fakavihia ki a Iesu mo e taute e toto haana “mo mena fakateaga,” ke nakai fai aoga ke tuga ni e tagata nakai mitaki katoatoa. (Today’s English Version) To nakai moua he tau tagata nakai loto fakaaue pihia e aoga mai he poa he Keriso.
Ko e heigoa kua amanaki ki ai e tau tagata mahani kelea? Ne mavehe he Atua he fakafili tonu: “Ha ia au ke taui atu, to taui atu e au.” (Kupu 30) Kia mataala a lautolu oti ne taute e agahala ke he falu. To moua e lautolu ne nakai omaoma pauaki ke he tau fakatufono tututonu he Atua e fakahala. Fa mahani, to lauia ni a lautolu he tau agahala ha lautolu. (Kalatia 6:7) Pete ne nakai lauia a lautolu mogonei, to tūtū a lautolu ki mua he Atua he magaaho kū i mua ka hau a ia ke utakehe e tau nakai fakafili tonu oti he lalolagi nei. (Tau Fakatai 2:21, 22) Ne hataki e Paulo: “Ko e mena ke matakutaku lahi ai ke moua . . . he tau lima he Atua moui.”—Kupu 31.
He iloa kua nakai tokanoa e Iehova ko e Atua e agahala pauaki nukua mafanatia mo e atihake, mua atu ma lautolu ne mamahi ha ko e tagata mahani kelea ulukafilo. Maeke ia tautolu ke mauokafua he toka katoatoa e taui atu he kelea ke he tau lima he Atua, ne vihiatia e tau nakai fakafili tonu oti kana.
[Matahui Tala]
a He fakatutala ke he kakano ne fakaatā he Atua e matematekelea, kitekite ke he tohi Ko e Heigoa ne Fakaako Moli he Tohi Tapu? he lau 106-114, ne taute fakailoa he Tau Fakamoli a Iehova.