Tala Tuai 6: Talia he Atua e Fakaaoga he Tau Mena Fakatai mo e Tau Fakatino ke he Tapuakiaga
Ko e heigoa e kamataaga he tala tuai?
“Nakai fakaaoga he tau Kerisiano fakamua atu e tau mena fakatai ke he tapuakiaga . . . Ko e fakahū maiaga he tau mena fakatai ke he lotu he senetenari ke 4 aki mo e 5 aki ne fakaatā ai ha ko e fakaakoaga na iloa mitaki e tau tagata goagoa ka fakaako ke he tau mena mooli faka-Kerisiano mai he tau mena fakatai ka e nakai mai he tau lauga po ke tau tohi.”—Cyclopedia of Biblical, Theological, and Ecclesiastical Literature, mai ia McClintock and Strong, Volume 4, lau 503 mo e 504.
Ko e heigoa ne talahau he Tohi Tapu?
“Aua neke eke e koe māu ha tupua kua ta, po ke taha fakatai he taha mena ha he lagi i luga, po ke ha he fonua i lalo, po ke ha he tahi i lalo he fonua. Aua neke hufeilo a koe ki ai.” (Esoto 20:4, 5) Ne tohi he aposetolo ko Ioane ke he tau Kerisiano he senetenari fakamua: “Tau fanau ikiiki na e, kia leveki e mutolu a mutolu kia mamao mo e tau tupua.”—1 Ioane 5:21.
Ko e tau mena fakatai kia tuga ne talahau he tau lotu ko e puhala ke hokotia ki ai mo e fakalilifu ke he tau mena ne hukui e lautolu? “He magaaho fakamua,” he tohi The Encyclopedia of Religion, “liga eke e tau mena fakatai mo matapatu fakatonuaga [fakaakoaga] mo e tau puhala fakamanaia; ko e tau fakavēaga haia ne fakaaoga e lautolu ke papale aki. Ka e nakai leva ne fakaaoga e tau mena fakatai ia ke he tapuakiaga. Tupu mooli e mena nei ke he tau fakatino ne eke mo vala mahuiga he lotu Ofotoko he Faahi Uta.” Pete ia, ne hako e perofeta ko Isaia ke hūhū: “To fakatai atu e mutolu e Atua kia hai? ko e heigoa foki e fakatai ke fakatai e mutolu a ia ki ai?”—Isaia 40:18.
Fakatatai e tau kupu Tohi Tapu nei: Isaia 44:13-19; Gahua 10:25, 26; 17:29; 2 Korinito 5:7
TALA MOOLI:
Nakai talia he Atua e fakaaoga he tau mena fakatai mo e tau fakatino
TIAKI E TAU TALA TUAI, PIPIKI KE HE KUPU MOOLI
Ko e heigoa ka fakahiku aki e tautolu mai he onoono fakakū nei ke he tau tala tuai ne fakaako agaia he tau lotu loga? Ko e “tau tala fakatai [Heleni, my ʹthos] nei kua talaga fakahalahū” ne nakai maeke ke totoko e kupu mooli mukamuka mo e mafanatia he Tohi Tapu.—2 Peteru 1:16.
He manamanatu iloilo mogoia, kia nakai fakauaua ke fakatatai ai mo e Kupu he Atua—ko e punaaga he kupu mooli—ke he mena ne fakaako ki a koe. (Ioane 17:17) Ati mooli ai mogoia e maveheaga nei ki a koe: “To iloa foki e mutolu e mena moli, ko e mena moli foki ke toka noa ai a mutolu.”—Ioane 8:32.