Tala Mitaki ke he 500 e Vagahau
KE HE lotouho he latau he motu i Ruanata, ne fehola e matakau tote he tau tagata fakaliliu he tau kaina ha lautolu, toka hifo ai e tau koloa ha lautolu. Ka e maeke a lautolu ke uta e tau komopiuta lepetopo (laptop) ha lautolu, nukua ta atu ai e lautolu ke he tau kemuaga pagotā. Ko e ha? Ke maeke ia lautolu ke matutaki e fakaliliu he tau tohi fakavē ke he Tohi Tapu ke he vagahau Kinyarwanda.
Ko e fifine fuata he Faahi Toga ki Uta ha Asia ne gahua he komopiuta haana ti hoko ke he tulotopō, fāhia ke he mategūgū, vevela, mo e mate tumau e hila ne tauhele ke he gahua fakaliliu haana. Ko e heigoa e foliaga haana? Ke felauaki tonu mo e magaaho lolomi.
Ko e tau tagata fakaliliu nei ko e vala he matakau ne kavi ke he 2,300 e tagata foaki noa ne gahua he molea ai 190 e matakavi he lalolagi katoa. Kehekehe e tau tau moui ha lautolu mai he 20 ke teitei 90, mo e gahua fakamakamaka a lautolu ke maeke he tau tagata ke moua e mafanatia mai he ogo he Tohi Tapu ke he 500 e vagahau.—Fakakiteaga 7:9.
Hoko ke he Tau Tagata Vagahau Kehekehe
He tau tau foou nei, ko e gahua fakaliliu he Tau Fakamoli a Iehova kua tupu lahi mahaki. Ma e fakatai, he 1985, ne lolomi fakatatai The Watchtower ke he 23 e vagahau—ko e matagahua ofoofogia he magaaho ia. He mogonei, kua moua The Watchtower ke he 176 e vagahau, ti lolomi fakatatai e tau fufuta oti ke maeke he tau tagata totou he lalolagi katoa ke tatai e vala tala ka fakaako he taha e magaaho.
Kavi ke he 50 e vagahau, The Watchtower hokoia ni e senolo ne lomi fakailoa tumau. Ko e ha? Kua nakai mahuiga ke he tau kamupanī lolomi ke taute e tau tohi ke he tau vagahau he motu. Ka ko e Tau Fakamoli a Iehova he lalolagi katoa kua atāina ke foaki ke fakalagotatai e tau koloa ha lautolu ke maeke e Kupu he Atua mo e tau tohi fakavē ke he Tohi Tapu ke moua he tau matakavi ne kua lata.—2 Korinito 8:14.
Kua uho lahi ke he tau tagata e ogo he Tohi Tapu ke he vagahau ni ha lautolu. Ma e fakatai, kua nakaila leva e fakaliliu e tau tohi faka-Tohi Tapu ke he vagahau Miskito, ko e vagahau he tau tagata ne kavi ke he 200,000 i Nicaragua. Taha e fifine ne ole ma e tohi My Book of Bible Storiesa he vagahau Miskito, ti ko e akoako foki i ai he magaaho ne ta atu e tohi. He kitia e tohi fulufuluola, ne manako e akoako ki ai. Ne nakai manako e fifine ke age ai, pete he age he akoako ki a ia 20 e kilokuleme he tau fua kofe (coffee bean) ke tautui aki e tohi!
Tali mai he tau hogofulu tau kua mole, na fakaliliu e tau tohi fakavē ke he Tohi Tapu ne molea e hogofulumaua e vagahau fakamotu i Mesikō, putoia e vagahau Maya, Nahuatl, mo e Tzotzil. He nakaila hogofulu e tau, ne malikiti e tau fakapotopotoaga he Tau Fakamoli a Iehova he vagahau fakamotu mo e vagahau matalima he motu ia mai he 72 ke molea e 1,200. Liga tuku he Tau Fakamoli a Iehova e ogo he Tohi Tapu ke he tau loto he tau tagata, ka e toka atu e lautolu ke he Atua ke fakatupu e tau tega he kupu mooli.—1 Korinito 3:5-7.
Fakaliliuaga Foou he Tohi Tapu ke he 80 e Vagahau
He tau tau foou nei, ne gahua malolō e Tau Fakamoli a Iehova ke taute katoa po ke vala e New World Translation of the Holy Scriptures ke he 80 e vagahau. Ti ko e heigoa e fua? Taha e Fakamoli Aferika Toga ne pehē hagaao ke he Tohi Tapu he vagahau Tswana: “Ko e koloa fulufuluola anei. To fakaholo ki mua e loto fakaaue haaku ma e Kupu he Atua. Ko e vagahau ne fakaaoga kua mukamuka ke totou mo e fiafia.” Ko e tagata totou Tsonga mai i Mosamipiki ne tohi: “Pete he fai tohi ne fakavē ke he Tohi Tapu, ko e nakai fai Tohi Tapu kua tuga e pakūlagi mo e uhila ka e nakai fai uha! Ka kua tō hifo e uha fakalataha mo e fakatoka mai e New World Translation he vagahau Tsonga.”
Ke he puhala ofoofogia, ko lautolu ne fakaliliu mo e tufatufa e tala mitaki i loto he Tohi Tapu hane fakamooli e perofetaaga i tuai. Ko Iesu Keriso ni ne talahau: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”—Mataio 24:14.
[Matahui Tala]
a Ne taute fakailoa he Tau Fakamoli a Iehova.
[Graph he lau 15]
(Ma e puhala katoa ne tohi aki, kikite e tohi)
NEW WORLD TRANSLATION
Moua katoa po ke vala
1950 1*
1970 7*
1990 13*
2000 36*
2010 80*
FALU TOHI
1950 88*
1960 125*
1970 165*
1980 190*
1990 200*
2010 500*
NUMERA HE TAU VAGAHAU
[Tau Fakatino he lau 15]
Kavi ke he 2,300 e tagata foaki noa ne fakaliliu e tau tohi faka-Tohi Tapu ke he 500 e vagahau
PENINI
SOLOVENIA
AITIOPE
PERITANIA