Ka Logona e Nakai Fahia ke Moui

“Kua tupu tumau e tau logonaaga nei,” he talahau e Adriana mai i Brazil. “Ti manatu au kua mitaki ni ke fakaoti e moui haaku.”

KUA fai magaaho nakai ne kelea lahi e logonaaga haau ti nakai manako a koe ke moui? Ka pihia, liga maama e koe e logonaaga ha Adriana. Matematekelea a ia he fakaatukehe lahi ti momoko mo e nakai fai amaamanakiaga. Moua a Adriana he gagao fakaatukehe ne momoko tumau.

Manamanatu foki ke he tagata taane Sapanī ko Kaoru, ne leveki e tau matua haana ne gagao mo e fuakau. “He mogoia, mamafa lahi e gahua tupe haaku,” he fakamaama e ia. “Fai magaaho ne nakai kai mitaki au, ti fakatauhele lahi e mohe haaku. Manatu au to galo e tau lekua haaku ka mate au.”

Ko e tagata taane Nigeria ko Ojebode, ne pehē, “Loto momoko tumau au ti hoko ke tagi, ati kumi puhala au ke fakaoti e moui haaku.” Fakaaue ai ko Ojebode, Kaoru, mo Adriana ne nakai fakaoti ne lautolu e tau momoui ha lautolu. Ka e totou teau afe ne taute pihia he tau tau takitaha.

MOUA MAI E LAGOMATAI

Laulahi he tau tagata ne taupega ko e tau tagata taane, tokologa ia lautolu ne mā lahi ke ole lagomatai. Pehē a Iesu ko e tau tagata gagao kua lata ke moua e ekekafo. (Luka 5:31) Ti ka pihia e tau logonaaga haau, fakamolemole ua mā ke kumi lagomatai. Tokologa ne lauia he gagao fakaatukehe kua moua e tau tuluiaga fakaekekafo ti fahia a lautolu. Ko Ojebode, Kaoru, mo Adriana ne moua e tuluiaga fakaekekafo ti kua lagomatai mogonei.

Liga age he tau ekekafo e tau vai po ke tutala po ke fakaaoga ua ke tului aki e gagao fakaatukehe. Lata foki a lautolu he tuaga ia ke moua e lalagoaga he magafaoa mo e tau kapitiga kua fakauka mo e fakaalofa. Ko e kapitiga uho ke moua he ha tagata ko Iehova ko e Atua, ko ia ne foaki e lagomatai kua mua e mitaki he haana Kupu ko e Tohi Tapu.

FAI TALI MAUOKAFUA NAKAI?

Ko e tau tagata ne gagao fakaatukehe ne fa leva e tuluiaga fakaekekafo ti lata ke fakaako ke fehagai ki ai mo e hikihiki e puhala moui ha lautolu. Ka taufetului a koe mo e gagao fakaatukehe, maeke a koe ke amaamanaki atu ke he vahā mitaki anoiha, tuga ne taute e Ojebode. Pehē a ia, “Amaamanaki au ke kitia e fakamooliaga ia Isaia 33:24, ne talahau tuai e magaaho ka nakai fai tagata he lalolagi ke pehē ‘Kua gagao au.’” Tuga a Ojebode, kia mafanatia he maveheaga he Atua ke he “lalolagi fou,” ka nakai tuai liu ke fai “matematekelea.” (Fakakiteaga 21:1, 4) Putoia he maveheaga ia e utakehe katoatoa he fakaatukehe mo e matematekelea. To galo tukulagi e tau logonaaga mamahi haau. Ko e tau logonaaga mamahi haau to “nakai tuai manatu . . . ti nakai hake ai ke he loto [haau] e tau mena ia.”—Isaia 65:17.

Tau Kupu Tohi Tapu ka Lagomatai

Maama he Atua e tau logonaaga haau.

“Ha ko au ko Iehova ko e Atua hau, ko ia kua taofi hau a lima matau; . . . kua pehe atu kia koe, Ua matakutaku a koe ko au ni kua lagomatai kia koe.”—Isaia 41:13.

Mua atu e maama mitaki e Iehova e tau logonaaga ha tautolu, ti manako a ia ke lagomatai a tautolu.

Manamanatu fakahokulo ke he Kupu he Atua.

“Ti ole atu a [Elia] ke mate a ia, kua pehe atu, Iehova na e, . . . kia uta kehe e koe haku a moui.”—1 Tau Patuiki 19:4.

“Ko e manamanatu fakahokulo ke he Kupu he Atua ne lagomatai au,” he ui e Ojebode. “Mailoga e au ne pihia foki e logonaaga he perofeta ko Elia.”

Fakaako mai ia lautolu he Tohi Tapu.

“Ka kua ole au [Iesu] māu, kia nakai mate hau [Peteru] a tua.”—Luka 22:32.

He mole e fakatikai lagatolu he aposetolo ko Peteru a Iesu, ne fakaatukehe a Peteru ti tagi lahi. “Ko e mena ne tupu ki a Peteru,” he ui e Kaoru, “ne lagomatai au ke kitia kua manamanatu a Iehova mo Iesu ke he tau logonaaga ha Peteru. Ti mafanatia au he mena nei.”

Ko e tau logonaaga mamahi haau to “nakai tuai manatu . . . ti nakai hake ai ke he loto [haau] e tau mena ia.”—Isaia 65:17