Kitia Ni Kia e Koe e Fofoga he Tino?
1 He taute e tautolu e fekafekauaga ke he tau tagata, ko e mena fakamua ne kitia e tautolu he falu tagata fa fakauaua aki a tautolu ke talahau e tala mitaki ki a lautolu. Ma e fakatai, fefe e aga hau ka mata kakana tumau e tagata tane vale ki a koe ka ahi atu a koe ke he katofia hana ne kua fiafia ke he kupu moli? Ne fifili e matakainaga fifine paionia ne tupu e mena nei ki ai ke fina atu ke he tagata tane mo e vagahau ki a ia. Ne fakafeleveia hemu a ia ke he matakainaga. Ka e, ofogia ai, ne fanogonogo a ia ke he fekau he Tohi Tapu ti fiafia ai he talia ke fakaako. Ti ko e fua he nakai onoono e matakainaga ke he fofoga he tino, ne hafagi e puhala ma e tagata tane nei mo e hoana hana ke ako e kupu moli.
2 Ko e taha matakainaga fifine ne matakutaku fakamua ke he fofoga he tino he tagata tane fuata ne loloa e ulu ka e fakatumau ni ke fakamatala fakaku ki a ia he ha magaaho ni ka hau a ia ke he fale koloa ne gahua a ia i ai. Ne fua mitaki hana gahua, ti ko e Fakamoli papatiso e tagata tane fuata he magaaho nei. Ko e heigoa ka puipui a tautolu he fakahiku pouli to nakai talia a lautolu ia?
3 Muitua e Fakafifitakiaga a Iesu: Ne iloa e Iesu na foaki e ia e moui hana ma e tau tagata oti. Ti, nakai tolomuli a ia ha ko e fofoga he tino he falu. Ne mailoga e ia ko lautolu ne kelea e tau mahani ka liga mautali ke hiki ka foaki age e lagomatai mo e fifiliaga tonu. (Mata. 9:9-13) Ne lali a ia ke lagomatai a lautolu ne mautu mo e mativa. (Mata. 11:5; Mare. 10:17-22) Kia nakai fakafili e tautolu e tau tagata ne feleveia e tautolu he fekafekauaga ke he ha lautolu a fofoga he tino, fakapouli a tautolu neke ko e tuaga mitaki he loto. (Mata. 7:1; Ioane 7:24) Ko e heigoa kua lagomatai a tautolu ke muitua ke he fakafifitakiaga mua ue atu a Iesu?
4 Ha ko e fakaako ha tautolu ke he Tohi Tapu, kua maeke ia tautolu ke loto fakaaue kua ha ha he Kupu he Atua e malolo ke hiki e manatu, mahani, mo e aga he taha. (Efeso 4:22-24; Hepe. 4:12) Ko e mena ia, he fakailoilo ai, kua lata ia tautolu ke fakatumau e aga mitaki mo e toka e vala ne toe ki a Iehova, ko Ia ka kitia e tau loto he tau tagata.—1 Samu. 16:7; Gahua 10:34, 35.
5 Ko e ha tautolu a talahau nakai fili he tala mitaki ke he tau tagata oti, pete ni ha lautolu a fofoga he tino, kua lafi ke he gahua helehele lahi he tau aho fakahiku nei.—1 Timo. 2:3, 4.