Fakamatala e Tala Mitaki Katoa mo e Fifiliaga Malolo

¹ He mataulu he senetenari fakamua, ne poaki e Iesu Keriso hana tau tutaki ke fakamatala e tala mitaki he Kautu mo e “ke eke e tau motu oti kana mo tutaki.” (Mata. 24:14; 28:19, 20) Kua hokulo lahi e fakaakoaga hana ke he Tau Fakamoli a Iehova, ti he matahiku he senetenari ke 20 aki, ko e fakamatakainaga Kerisiano ha tautolu kua tolomaki hake ke molea e 5,900,000 he tau tutaki ke he 234 e motu. Ko e fakahekeaga ue atu ha ia ke he ha tautolu a Matua he lagi!

² Kua huhu atu a tautolu he mogonei ke he senetenari ke 21 aki. Kua fakamakamaka lahi e Fi ha tautolu ke faguna e matapatu gahua ha tautolu ke fakamatala e Kautu mo e taute tutaki. Kua fakaaoga e ia e tau peehiaga mai he hana fakatokaaga he lali ke liliuina a tautolu, moumou ha tautolu a magaaho, mo e fakaaoga e tau malolo ha tautolu aki e tau manako mo e tau fiafia nakai aoga. He nakai toka e fakatokaaga nei ke tuhi mai e tau mena aoga he moui, kua fakakite e tautolu ki a tautolu ni mai he Kupu he Atua e mena ne mua ue atu​—ko e taute e finagalo a Iehova. (Roma 12:2) Ko e kakano a ia ke oma e tomatomaaga he Tohi Tapu ke ‘fakamatala e kupu ke he tau aho kua mitaki mo e tau aho kua kelea mo e ke fakakatoatoa ni ha tautolu a feua.’​—2 Timo. 4:2, 5.

³ Feaki e Fifiliaga Mauokafua: Kua lata he tau Kerisiano ke “tumau mo e katoatoa e fifiliaga mo e puke ke he finagalo oti he Atua.” (Kolo. 4:12, fakatatai NW) Ko e fakakakanoaga he kupu “fifiliaga” ko e “fakaohoohoaga po ke taofiaga malolo; ne kua talitonu.” Ko e tau Kerisiano kua lata ia tautolu ke talitonu ko e moli lahi e kupu fakaperofeta he Atua mo e hanei tonu a tautolu he vaha he fakaotiaga. Kua lata ke malolo e taofiaga ha tautolu ke tuga he aposetolo ko Paulo, ne talahau ko e tala mitaki “ko e mana he Atua ia ke momoui ai a lautolu oti kana kua tua.”​—Roma 1:16.

⁴ Kua fakaaoga he Tiapolo e tau tagata kelea mo e kua fakavai, ko lautolu ia ni ne kua fakaheheina, ke fakaohooho mo e fakahehe foki falu. (2 Timo. 3:13) Ha kua hataki tuai mai ai, kua taute e tautolu e tau lakaaga ke fakamalolo aki ha tautolu a fifiliaga kua moua e tautolu e kupu moli. He nakai toka e tau fakatupetupe he moui nei ke fakalolelole aki e makutu ha tautolu, kua tuku fakamua tumau e tautolu e tau mena he Kautu. (Mata. 6:33, 34) Po kua nakai manako foki a tautolu ke galo e mafiti he tau magaaho, he liga manatu kua mamao agaia e fakaotiaga he fakatokaaga nei. Ka kua tata lahi mai tuai. (1 Pete. 4:7) Pete ni kua logona e tautolu kua lauia tote e fakapuloaaga he tala mitaki he falu motu ha ko e fakamatalaaga kua fakafita ki ai, ko e gahua hataki kua lata ni ke fakatumau.​—Eseki. 33:7-9.

⁵ Ti ko e tau huhu aoga lahi he vaha fakamui nei ko e: ‘Uta fakahokulo nakai e au e poakiaga a Iesu ke taute tutaki? Ka fakamatala e au e tala mitaki, fakakite nakai e au e fifiliaga malolo kua moli e Kautu? Kua fakamakamaka nakai au ke fahia fakalahi atu ke he fekafekauaga fakamoui nei?’ He mailoga e mamao ha tautolu ke he fakaotiaga, kua lata ia tautolu ke haga hifo ki a tautolu ni mo e ke he ha tautolu a poakiaga ke fakamatala mo e fakaako, He taute e tautolu pehe to fakamoui e tautolu ni a tautolu katoa mo lautolu ne fanogonogo ki a tautolu. (1 Timo. 4:16) Maeke fefe ia tautolu oti ke fakamalolo ha tautolu a fifiliaga mo tau fekafekau?

⁶ Fifitaki ke he Tau Tesalonia: Ne talahau he aposetolo ko Paulo, he manatu e gahua lahi he tau matakainaga i Tesalonia, hagaao ki a lautolu: “Ko e mena nakai hoko atu ha mautolu a vagahau mitaki kia mutolu, ko e kupu hokoia, ka ko e malolo, mo e Agaga Tapu, katoa mo e [“fifiliaga malolo,” NW], ha kua iloa e mutolu ha mautolu a mahani ha ko mutolu, he nofo ai a mautolu mo mutolu. Ne fifitaki mai foki a mutolu kia mautolu, katoa mo e Iki, he talia e mutolu e kupu mo e matematekelea lahi, mo e fiafia mai he Agaga Tapu.” (1 Tesa. 1:5, 6) E, ne nava a Paulo ke he fakapotopotoaga he tau Tesalonia ha kua pete ni ko e tau favale lalahi ne fakamatala a lautolu mo e makutu mo e fifiliaga malolo. Ko e heigoa ne fakamalolo a lautolu ke taute e mena nei? Ke he laulahi, ko e makutu mo e fifiliaga ne kitia e lautolu he aposetolo ko Paulo mo e he tau katofia gahua hana kua lauia mitaki ki a lautolu. He puhala fe?

⁷ Ko e tau momoui ha Paulo mo e tau tagata o fenoga hana kua fakakite moli kua ha ha ia lautolu e agaga he Atua mo e kua talia loto katoa e lautolu e mena ne fakamatala e lautolu. Ka e fakamua to o mai ki Tesalonia, ko Paulo mo Sila kua fakakeleaina i Filipi. Nakai fakafili, kua keli a laua, tuku fale puipui, mo e tuku ke he akau fakahala. Ka ko e tau kamatamata nei, kua nakai fakalolelole ha laua a makutu ma e tala mitaki. Kua fakatoka mai he mena tupu faka-Atua a laua, ati takitaki atu ke he fakaliliuina he leveki fale puipui mo e hana magafaoa, mo e taute ai taha puhala ma e tau matakainaga nei ke fakaholo atu ha laua a fekafekauaga.​—Gahua 16:19-34.

⁸ Ha ko e malolo he agaga he Atua, ne hau a Paulo ki Tesalonia. Ne gahua ai a ia ke moua aki hana tau koloa kua lata mo e fakakatoatoa atu a ia ke fakaako e kupu moli ke he tau Tesalonia. Ne nakai fakamanou hifo a ia he fakamatala e tala mitaki he tau magaaho oti kua lata. (1 Tesa. 2:9) Ko e fakamatalaaga katoa mo e fifiliaga malolo ha Paulo kua lauia lahi ke he tau tagata he matakavi ati tiaki he falu ia lautolu e tapuaki tupua fakamua ha lautolu ke eke mo tau fekafekau he Atua moli, ko Iehova.​—1 Tesa. 1:8-10.

⁹ Kua nakai fakalolelole he favale e tau tagata talitonu fou mai he fakamatala e tala mitaki. Ha kua omoi he ha lautolu a tua moua fou mo e talitonu katoatoa to eke ma lautolu e tau monuina tukulagi, kua omoi e tau Tesalonia ke fakapuloa e kupu moli ne kuku fakamakai e lautolu. Kua gahuahua lahi e fakapotopotoaga ia ati holofa e tau tala hagaao ke he tua mo e makutu ha lautolu ke he falu fahi i Maketonia mo e pihia foki ki Akaia. Ti he magaaho ne tohia e Paulo e tohi fakamua hana ke he tau Tesalonia, kua fita e talahaua e tau gahua mitaki ha lautolu. (1 Tesa. 1:7) Ko e fakafifitakiaga mitaki ha ia!

¹⁰ Omoi he Fakaalofa Ma e Atua mo e Ma e Tau Tagata: Maeke fefe ia tautolu, ke tuga e tau Tesalonia, ke fakatumau e malolo he fifiliaga fakatagata he magaaho ka fakamatala e tala mitaki he vaha nei? Hagaao ki a lautolu, ne tohia e Paulo: “Kua nakai noa ha mautolu a manatu ke he gahua ha mutolu ke he tua mo e ha mutolu a gahua uka kakano ko e fakaalofa.” (1 Tesa. 1:3; matahui tala NW) Kua kitia maaliali ai e fakaalofa loto fakamoli hokulo ha lautolu ma Iehova ko e Atua mo e ma e tau tagata ne fakamatala a lautolu ki ai. Ko e fakaalofa taha nei ni ne omoi a Paulo mo e tau faihoani hana ke foaki ke he tau Tesalonia “nakai kuenaia e vagahau mitaki he Atua, ka e katoa foki mo e moui ha [lautolu].”​—1 Tesa. 2:8.

¹¹ Pihia foki, ko e ha tautolu a fakaalofa hokulo ma Iehova mo e ma e tau tagata katofia ha tautolu ne omoi aki a tautolu ke manako ke fakalataha katoatoa ke he gahua fakamatala ne foaki he Atua ki a tautolu ke taute. Mo e fakaalofa pihia, kua mailoga e tautolu ko e matagahua fakatagata mai he Atua a ia ha tautolu ke fakapuloa e tala mitaki. He manamanatu fakahokulo mo e loto fakaaue ke he tau mena oti ne taute e Iehova ma tautolu he takitaki a tautolu ke he “moui tukulagi,” kua omoi a tautolu ke talahau ke he falu e tau kupu moli homo ue atu ia ni ne talitonu e tautolu mo e ha tautolu a loto katoa.​—1 Timo. 6:19.

¹² He nakai faihoania a tautolu ke he gahua fakamatala, ko e fakaalofa ha tautolu ma Iehova mo e ma e tau tagata kua lata ke tupu tumau. Ka pihia, to fakalagalaga a tautolu ke fakalahi e fakalatahaaga ha tautolu ke he fekafekauaga he taha gutuhala mo e taha gutuhala mo e ke kumi falu a puhala fakamatala kua hafagi ki a tautolu. To fakaaoga fakamitaki e tautolu e tau magaaho noa ke fakamatala ke he tau magafaoa tino, tau tuuta kaina, mo e tau tagata ne fa mahani ki ai. Pete kua tokologa e tau tagata ka liga fakaheu e tala mitaki ne foaki e tautolu mo e lali falu ke fakalavelave e fakapuloaaga he Kautu, kua logona hifo e tautolu e fiafia he loto. Ko e ha? Ha kua iloa e tautolu kua taute e tautolu e mena kua fahia ki ai ke fakamatala hagaao ke he Kautu mo e lagomatai e tau tagata ke moua e fakamouiaga. Ti to fakamonuina e Iehova e tau gahua ha tautolu ke moua e tau tagata loto tututonu. Pete ni he magaaho ka viko takai ia tautolu e tau peehiaga he moui mo e fakatumau a Satani ke fakalolelole e fiafia ha tautolu, kua maeke agaia ia tautolu ke fakatumau ha tautolu a fifiliaga malolo mo e ha tautolu a makutu ke fakamatala ke he falu. Ka taute e tautolu oti e vala ha tautolu, to fua mai ai e fakapotopotoaga makutu mo e malolo tuga ia i Tesalonia.

¹³ Kia Nakai Mahala ke he Kamatamata: Kua lata foki mo e fifiliaga ka feleveia mo e tau kamatamata kehekehe. (1 Pete. 1:6, 7) Ne fakamahino age a Iesu ke he tau tutaki hana ka mumuitua a lautolu ki a ia, to ‘vihiatia foki a lautolu he tau motu oti.’ (Mata. 24:9) Ne tupu e mena nei ki a Paulo mo Sila he magaaho ne ha ha ai a laua i Filipi. Ne talahau he fakamauaga he Gahua veveheaga 16, ne tuku a Paulo mo Sila ke he poko ha he puloto he fale puipui mo e tuku ke he akau fakahala. Ka kua fa mahani, ko e fale puipui lahi kua tuga e kaupa po ke hala loa he taha pakafale ne toka ai e tau poko maama mo e fai matagi. Ka ko e poko ha he puloto he fale puipui, kua nakai maama ti kua tote lahi e ea. Ko Paulo mo Sila kua fakafehagai ni ke he pouli, vela, mo e elogia he poko matematekelea nei he fale puipui. Maeke nakai a koe ke manamanatu ke he matamatega ne logona e laua, he leva e tuku he akau fakahala mo e kua mafolefole mo e toto e tau tua ha laua he fahi?

¹⁴ Pete ni ko e tau kamatamata nei, ne tumau a Paulo mo Sila ke tua fakamoli. Ne fakakite moli e laua e fifiliaga fakamoli, ne fakamalolo aki a laua ke fekafekau ki a Iehova pete he tau kamatamata. Ko e fifiliaga ha laua kua fakamaama he kupu 25 he Gah veveheaga 16, ne talahau i ai kua “liogi mo e lologo a Paulo mo Sila ke he Atua.” Ka e pete ni kua haia a laua he poko ha he puloto he fale puipui, kua mauokafua a laua he moua e fiafia he Atua ati lologo fakalahi e tau tagata nei, kua taogo ai ke logona he falu pagota! Kua lata ke pihia e fifiliaga ha tautolu he vaha nei ka fehagai mo e tau kamatamata he tua ha tautolu.

¹⁵ Ko e tau kamatamata ne tapoki mai he Tiapolo ki a tautolu kua mano. Ma e falu liga ko e favale mai he magafaoa. Tokologa e tau matakainaga ha tautolu ne fehagai mo e tau paleko he fakamatafakatufono. Liga hoko mai e totoko he tau tagata tiaki taofiaga. Ha ha ai e tau kavega he fahi tupe mo e kapaletu ke he puhala ke foaki e levekiaga. Ko e tau fuata kua fakafehagai mo e tau peehiaga he atuhau he aoga. To kautu fefe a tautolu ka fakafehagai mo e tau kamatamata nei? Ko e heigoa kua lata ke fakakite aki e fifiliaga?

¹⁶ Ke fakamua mo e aoga lahi, kua lata ia tautolu ke leveki e fakafetuiaga fakatagata kua tata mo Iehova. He magaaho ne ha ha ai a Paulo mo Sila he poko ha he puloto he fale puipui, ne nakai fakaaoga e laua e magaaho ia ke gugu hagaao ke he tuaga ha laua po ke maanu ki a laua ni. Ne liogi agataha a laua ke he Atua mo e fakaheke a ia ke he tau lologo. Ko e ha? Ha kua ha ha ia laua e fakafetuiaga fakatagata kua tata mo e ha laua a Matua he lagi. Ne mailoga e laua kua mamahi a laua ha ko e tututonu ti ko e fakamouiaga ha laua kua tokai he tau lima ha Iehova.​—Sala. 3:8.

¹⁷ Ka fehagai a tautolu mo e tau kamatamata he vaha nei, kua lata foki ia tautolu ke hahaga ki a Iehova. Ne fakamafana e Paulo a tautolu ko e tau Kerisiano ke ‘fakailoa atu ke he Atua e tau manako ha tautolu; ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha tautolu, katoa mo e tau manatu ha tautolu.’ (Filipi 4:6, 7) Kua mafanatia ha he iloa to nakai tiaki e Iehova a tautolu ke fehagai takitokotaha ke he tau kamatamata! (Isaia 41:10) Kua haia tumau a ia mo tautolu ane mai kua fekafekau a tautolu ki a ia mo e fifiliaga moli.​—Sala. 46:7.

¹⁸ Ko e taha lagomataiaga lata ke fakakite e fifiliaga ko e nakai faihoania ke he fekafekauaga a Iehova. (1 Kori. 15:58) Ne tuku a Paulo mo Sila he fale puipui kakano kua nakai faihoania a laua he fakamatala e tala mitaki. Ne tiaki kia e laua e fakamatala ha ko e tau kamatamata? Nakai, ne fakaholo atu a laua ke fakamatala foki he fale puipui, mo e he fakatoka a laua, ne fenoga atu a laua ki Tesalonia mo e o atu ke he sunako he tau Iutaia ke ‘vagavagahau ai kia lautolu ke he tau Tohi.’ (Gahua 17:1-3) Ka malolo e fakaohoohoaga po ke talitonuaga ha tautolu ki a Iehova mo e mauokafua kua moua e tautolu e kupu moli, to nakai fai mena “ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.”​—Roma 8:35-39.

¹⁹ Fifiliaga Malolo he Tau Fakafifitakiaga he Vaha Fou Nei: Ha ha ai loga e tau fakafifitakiaga maaliali he tau tagata he vaha ha tautolu ne kua, tuga a Paulo mo Sila, fakatata e fifiliaga malolo. Taha e matakainaga fifine ne hao mai he kemu pagota i Auschwitz ne tala hagaao ke he tua mo e fifiliaga maunivaniva ne fakatata he tau matakainaga i ai. Ne talahau e ia: “He taha magahala he huhu toko mai, ne hau taha kautau ki a au mo e kuku e tau lima. ‘Ko e heigoa la ka taute e mautolu ki a mutolu ma tau tagata?’ he vagahau lahi mai a ia. ‘Ka fakahala e mautolu a mutolu, ai tokaga a mutolu. Ka tuku e mautolu a mutolu he fale puipui, ai la tokaga foki a mutolu. Ka tuku e mautolu a mutolu ke he kemu pagota, nakai tupetupe a mutolu. He magaaho ka fakahala e mautolu a mutolu ke he mate, ko e tutu ni a mutolu nakai hopoate. Ko e heigoa la ha mautolu ka taute ki a mutolu?’” Kua fakamalolo ha e tua ke kitia e tua ne ha ha he tau matakainaga ha tautolu he fehagai ke he tau tutuaga fakakikiveka pihia! Kua fakatumau a lautolu ke kumi lagomatai ki a Iehova ke fakauka.

²⁰ Moli kua manatu e tautolu e fifiliaga he tokologa he tau matakainaga ha tautolu ne fehagai ke he fakavihiaaga fakamatakau ne kua kitia ai he tau tau e kua mole. Pete kua ha ha a lautolu he tau tutuaga hagahaga kelea, kua mamata lahi e tau matakainaga tane leveki ke kitia kua fagai fakaagaga e tau matakainaga ha lautolu. Kua tumau a lautolu oti ke tua fakamoli katoa mo e fifiliaga malolo ko e ‘tau kavanaakau oti kua taute ke tau kia lautolu to nakai monuina ai.’​—Isaia 54:17.

²¹ Tokologa e tau matakainaga ha tautolu ne nakai talitonu e tau hoa kua fakakite foki e tua malolo mo e fakauka. Taha e matakainaga i Kuatelupe ne feleveia mo e totokoaga malolo mai he hoana nakai talitonu hana. Ke fakalolelole a ia mo e fakatauhele hana fano ke he tau feleveiaaga Kerisiano, ne nakai tunu he hoana e tau kai hana po ke unu, auli, mo e haihai hana tau mena tui. Ke he tau aho loga, ne nakai tutala e hoana ki a ia. Ka e, he fakakite e fifiliaga fakamoli ke fekafekau ki a Iehova mo e haga ki a ia ke he liogi ma e lagomatai, ne maeke e matakainaga tane nei ke fakauka ke he tau mena oti. Ke he fiha e loa? Ke kavi ke 20 e tau​—ati maliu fakahaga e loto he hana hoana. Fakahiku, kua fiafia moli a ia ha kua talia he hoana e amaamanakiaga he Kautu he Atua.

²² Ke fakahiku, kia nakai nimo ia tautolu e fifiliaga malolo he tau matakainaga fuata ha tautolu ne o aoga ke he tau aho takitaha mo e fehagai mo e tau peehiaga mo e falu a paleko mai he atu ha lautolu. Hagaao ke he tau peehiaga ke fakatatai he aoga, ne talahau he taha tama fifine Fakamoli fuata: “He aoga kua fakamalolo he tau tama a koe ke totoko. Ti fakalilifu he tau tama a koe ka taute e koe taha totokoaga.” Ko e tau peehiaga ha ia ne fa e fehagai he tau fuata ha tautolu! Kua lata ia lautolu ke fakamalolo e tau manamanatuaga mo e loto ke totoko e tau kamatamata.

²³ Kua tokologa e fuata ha tautolu ne kua fakatumau ha lautolu a mahani fakamoli pete ko e tau kamatamata. Taha e fakafifitakiaga mai he matakainaga fifine fuata ne nofo i Falani. He taha aho ne lali e tau tama tane ke toho a ia ke figita a lautolu, ka e liogi a ia mo e totoko fakamalolo, ti toka he tau tama tane a ia. Fakamui, taha ia lautolu ne liu mai mo e tala age ke he tama fifine kua nava a ia ki a ia ha ko e hana malolo. Kua maeke agataha e tama fifine ke fakamatala ki a ia hagaao ke he Kautu, he fakamaama e tau tutuaga tokoluga ne fakatoka e Iehova ma lautolu oti ne manako ke fakalataha ke he tau fakamonuinaaga he Kautu. He tau tau aoga, ne fakamaama foki e ia e tau talitonuaga hana ke he vahega katoa.

²⁴ Ko e kotofaaga uho ha ia ne moua e tautolu ke fakalataha ki a lautolu ne fiafia a Iehova ke fakaaoga ke vagahau katoa mo e fifiliaga mauoka hagaao ke he hana finagalo! (Kolo. 4:12) Ke lafi ki ai, ha ha ia tautolu e magaaho homo ue atu ke fakakite e mahani fakamoli ha tautolu ka haia i lalo he favale he Fi tuga e leona ha tautolu, ko Satani ko e Tiapolo. (1 Pete. 5:8, 9) Kia nakai nimo kua fakaaoga e Iehova e fekau he Kautu ke ta mai e fakamouiaga ki a tautolu ne fakamatala e Kautu mo e ki a lautolu ne fanogonogo. Kia fakakite he tau fifiliaga ne taute e tautolu mo e puhala moui he tau aho oti ha tautolu kua tuku fakamua e tautolu e Kautu. Kia fakatumau a tautolu ke fakamatala e tala mitaki katoa mo e fifiliaga malolo!