Taute Nakai e Tautolu a Aperila 2000 mo Mahina Mitaki Lahi ha Tautolu?
1 He afiafi Lotu, Aperila 19, ko e tapunu haia he ha tautolu a fekafekauaga he tau. He aho ia, he to fakahaga e la he lalolagi katoa, to taute he tau fakapotopotoaga mo e he tau matakau oti he Tau Fakamoli a Iehova e Fakamanatuaga he matulei he Keriso. Ke he ha mena ni ne nonofo ai a tautolu, ko e fakamanatuaga he poa ha Iesu Keriso to eke ni mo matapatuaga he tau. Ko e aho he Fakamanatuaga kua fakamaama he mahina a Aperila he 2000 Calendar of Jehovah’s Witnesses.
2 Ko e mahina katoa ia Aperila ka foaki ki a tautolu e magaaho mitaki lahi ke fakatata ke he puhala solu katoatoa ha tautolu a loto fakaaue ma e fakaalofa noa a Iehova, ne fakakite he puhala poa he hana Tama. Taute fefe? Ne tohia he aposetolo ko Paulo: “Kua omoomoi a mautolu he fakaalofa a Keriso, kua manatu pehe a mautolu, kaeke kua mate tokotaha ke hukui aki e tau tagata oti kana, ti kua mamate tuai e tau tagata oti kana. Ne matulei foki a ia ke hukui aki e tau tagata oti, kia nakai omaoma a lautolu kua momoui kia lautolu ni, ka ko ia ne matulei, mo e liu tu mai foki ke hukui aki a lautolu.” (2 Kori. 5:14, 15) E, he magahala a Aperila kua maeke ia tautolu ke fakatata kua nakai moui a tautolu, kia tautolu ni, ka ki a ia ne matulei ma tautolu, ti taute ai mo mahina mitaki lahi ha tautolu ko e tau fekafekau he Kautu!
3 Kia Tohi ke Paionia Fakaku ia Aperila: Ne fakatoka he aposetolo ko Paulo e fakafifitakiaga omoomoi ma tautolu he talahau e ia: “Ka ko au ni, nakai manatu au ke he taha mena, ko e haku a moui foki nakai kuku e au, ka kia fakaoti e au haku a poitufi mo e fiafia, ko e feua ne moua e au mai he Iki ko Iesu, kia talahau fakatonu atu e au e tala mitaki he fakaalofa noa he Atua.” (Gahua 20:24) Kua ha ha ia tautolu e kotofaaga tatai ia ke fakamatala hagaao ki a Iehova ko e Atua. Kua lata ai ia tautolu ke eke a Aperila mo mahina mitaki lahi ha tautolu he gahua paionia fakaku!
4 Mo e lima e matahiku vahatapu he katoa, to eke a Aperila 2000 mo mahina fiafia lahi ma e tokologa ke paionia. Ia Mati he 1997, he hokotia a tautolu ke he tapunuaga he tau paionia fakaku, ko e 2,133 ne fakalataha ai kua hukui 17 e pasene he katoa he tau tagata fakailoa. He tau hake, ko e katoa he numera he tau tagata fakailoa ne hokotaki ia Aokuso 1998 kua malikiti ke molea 6 e pasene. Kakano he mena nei kua maeke agaia ia tautolu ke fakatolomaki atu foki e tapunu ia he tau paionia fakaku. Taha mena foki, ko e poakiaga ma e tau tula kua fakato hifo, ti kua taute ai e vala nei he fekafekauaga ke mukamuka ke he tokologa foki he fakapotopotoaga. Kua lata he tau tagata fakailoa ne papatiso ke mailoga he liogi ko e maeke nakai a ia ke paionia fakaku ia Aperila nei.
5 He fakaaoga e mahina a Aperila he 2000 Calendar, kia fakatokatoka a he mogonei e setulu hau ma e mahina ka hau. Fifili ko e tau aho fe kua maeke ia koe ke fakalataha ke he fekafekauaga he fonua, mo e lafilafi oti e tau tula ne logona e koe kua maeke ia koe ke foaki ke he gahua fakamatala he magahala he mahina. Totou foki e magaaho ne fakaaoga e koe he fakamatala ke he falu he magaaho noa po ke pauaki. Kua teitei katoa nakai e 50 tula ne poaki ma e tau paionia fakaku? Kaeke ku e tau tula hau, maeke nakai a koe ke hiki taha mena he setulu hau ke moua e magaaho ke paionia fakaku? Kua lata ia koe ke fakaavelesi taha ni e tula mo e 40 e minuti he tau aho takitaha ke moua e 50 tula he mahina.
6 Ha kua fakato hifo foki e tula ma e tau paionia tumau, kua manamanatu nakai a koe ke hu atu ke he fekafekauaga gahua mau? Ko e ha ne leva ai e fakatali ke kamata? Mo e vaha vela hane mole kua lata ke kamata he mahina a Aperila! Ka fakauaua a koe ke he fahia hau ke moua e 70 tula ma e tau paionia tumau, ko e ha he paionia fakaku ia Aperila mo e fakatoka 70 e tula ke foli ki ai? Ka maeke agataha ai ia koe ke moua e tau tula ia, ti liga manako a koe ke fakapuke e laupepa ke matutaki ke he matakau he tau paionia tumau.—Kikite Our Ministry, lau 113-14.
7 Fakalataha Katoatoa ko e Tagata Fakailoa he Tala Mitaki: Ma tautolu oti, tau tagata fakailoa mo e tau paionia foki, ko e fakaalofa moli ha tautolu ke he Atua mo e tau katofia ne omoi aki a tautolu ke taute mo e solu katoa e mena kua fahia a tautolu ke he fekafekauaga a Iehova he fakalata ke he ha tautolu a tau tutuaga. (Luka 10:27) Ti kua fakakite e tautolu “kua gahua ai a tautolu, mo e fakakelea ai a tautolu, ha kua amaamanaki tuai a tautolu ke he Atua moui, ko ia ko e Fakamoui he tau tagata oti, ka e au atu kia lautolu kua tua.” (1 Timo. 4:10) Ko e kakano haia ne amanaki a tautolu ke kitia 100 pasene ka fakalataha mai ia Aperila, mo e fakalataha katoatoa e tau tagata oti ke he gahua ke Kautu.
8 Kia nakai nimo ia tautolu e tomatomaaga a Iesu: “Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” He mole laia e talahau e mena ia, ne ui a Iesu ke he tau tutaki 12 hana mo e fakafano a lautolu ke fakamatala. (Mata. 9:37, 38; 10:1, 5, 7) He kavi ke taha e tau he mole, he mole e fakaako e toko 12 ke he gahua fakamatala, ne “kotofa [e Iesu] e falu ne tokofitugofulu, kua fakafano atu a lautolu,” mo e age ki a lautolu e tau fakaakoaga ia ni: “Kua loga e tau saito ke helehele, . . . kia olelalo a mutolu ke he Iki hana e tau saito ke helehele, kia fekau atu e ia e falu ke gahua ke he hana tau saito ke helehele.” (Luka 10:1, 2) Ne hokotaki he tohi Tohi Tapu a Gahua e puhala ne tali e Iehova e tau liogi ia. He Penetekoso 33 V.N., ko e numera he tau tutaki kua tolomaki ke kavi ke 120. Ati, hokotia fakahaga ai ke he tau tapunuaga he 3,000 mo e 5,000 e tutaki. (Gahua 1:15; 2:41; 4:4) Mole e magaaho ia, ti “kua au atu ai he tokologa e tau tutaki.” (Gahua 6:7) Ti pihia foki he vaha fou nei, kua lata ia tautolu ke olelalo tumau ke he Iki ma e falu tagata fakamatala foki he Kautu! Ke fakalautatau ke he tau liogi ha tautolu, kua lata e tagata fakailoa he tau fakapotopotoaga ke igatia ke taute e tau fakaholoaga tonu ke fakalataha ke he fekafekauaga he tau mahina oti.
9 Fakamolemole liu kikite fakamitaki ki a Aperila he 2000 Calendar. Ha ko e tau aho ua fakamua he mahina ko e Aho Faiumu mo e Aho Tapu, maeke nakai ia koe ke fakatokatoka ke fakalataha ke he fekafekauaga he matahiku vahatapu ia, ke kamata tuai he mahina? Maeke nakai a koe ke fakalataha ke he tau “Aho Mekasini” oti he magahala he mahina katoa mo e matakau he Fakaakoaga Tohi he Fakapotopotoaga hau? Ka e fefe he fakamole taha po ke fiha e tula he tau Aho Tapu takitaha he fekafekauaga? Maeke nakai a koe ke pulega ke fakalataha ke he fakamatalaaga he afiafi? Mo e nakai nimo ke fakaaoga e tau magaaho ata oti hau ke fakamatala he magaaho noa he gahuaaga, he loto aoga, po ke he taha matagahua ni he aho. Fakamailoga e tau aho kua maeke ia koe ke fakamole falu magaaho he fekafekauaga, mo e fakaaoga e kalena ke fakamau aki e tula he fekafekauaga hau he mahina.
10 Ko Aperila ko e magaaho tonu ma e tau tagata oti ne kua lata mo e kua talia he tau motua ke kamata ke fekafekau mo tau tagata fakailoa nakala papatiso. Kaeke fakaako e koe e Tohi Tapu mo e taha tagata, kua lata tonu nakai e tagata ia ke finatu ke he leveki he fakapotopotoaga ke ole ke eke mo tagata fakailoa he tala mitaki? Kaeke fai fanau nakala papatiso a koe, kua tutala nakai a koe ke he tau motua hagaao ke he tupu fakaagaga ha lautolu? Nakai kia ko e mogo mitaki ainei ma lautolu ke kamata ke fakamatala?—Kikite Our Ministry, lau 97-100.
11 He ha tautolu a laliaga ke eke a Aperila 2000 mo mahina mitaki lahi ha tautolu, kua lata ia tautolu oti ke fakalataha ke he fekafekauga mo e tuku ha tautolu a tau hokotaki he fonua he matahiku he mahina. (Fakatatai Mareko 6:30.) Ko e tau tagata fakailoa fou nakala papatiso ne fakalataha laia ke he gahua he fonua kua lata ke fakamafana ke hokotaki e tau gahua ha lautolu he magaaho kua lata. He taute e vala ha tautolu, kua lafi e tautolu taha vala lahi ke he hokotaki a Aperila mo e ke he fakahekeaga lahi ka foaki ki a Iehova he puhala he ha tautolu a tau gahua fakamatala.
12 Ta Mai e Falu mo Koe ke he Fakamanatuaga: Nakai kia hopohopo e fiafia ha tautolu he kitia e tapunu fou he tau tagata ne o mai ke he Fakamanatuaga 2000 he matulei he Keriso? E! Kua fakakite he mena ia kua tokologa lahi mahaki e tau tagata ne fakapotopoto mai ke fakatata e tau fakaaueaga ha lautolu ma e tau fakakiteaga ne mua he fakaalofa ne taute e Iehova ko e Atua mo Iesu Keriso ma tautolu! (Ioane 3:16; 15:13) Kia tauteute ha fakaholoaga ne kua lata, ke nakai fai mena ke fakalavelave aki a koe mo e magafaoa hau he o mai ke he Fakamanatuaga.
13 Kua lata ke kamata uiina foki he mogonei falu ke he Fakamanatuaga. Tohi hifo a lautolu ne manako a koe ke o mai. Fakalataha ai a lautolu ne fakaako Tohi Tapu fakamua, ko lautolu oti ne fakaako he mogonei, mo lautolu oti ne fa liu aahi e koe. Lafi ke he tohi hau a lautolu ne matutaki mo koe he gahuaaga, he loto aoga, mo e he katofia, pihia foki ha tagata ne feua pisinisi mo koe. Kia nakai nimo foki ke fakalataha mai falu a tagata mahani mo e tau faoa tino hau. Ka oti he tohi hifo, kia makutu ke uta e tau uiina ki a lautolu takitaha. Fakamaama fakamitaki e magaaho mo e matakavi ka taute ai e Fakamanatuaga. He tata mai a Aperila 19, kia fakamanatu age ki a lautolu ne tohi hifo e koe, he finatu fakatagata po ke he telefoni. Foaki ke fakafaihoani e lautolu a koe ke he Fakamanatuaga he po ia.
14 Ke fakatatau atu ke he fakailoaaga fakamua mai he Sosaiete, to taute he kau motua e matagahua pauaki ke fakamafana e tau tagata fakailoa oti nakai hakahakau ke o mai ke he Fakamanatuaga. (Mata. 18:12-14) To makai e tau motua ke liu kikite e tohi he Sosaiete ia Fepuari 2, 1999. Kua lata he tohikupu he fakapotopotoaga ke tohi hifo e tau tagata fakailoa oti ne nakai hakahakau, mo e kotofa he leveki fekafekau e tau motua ke o atu ke uiina a lautolu ke he Fakamanatuaga. Ti liga ka taute tuai e aahi fakamafana he leveki, kua maeke ia lautolu ne nakai hakahakau nei ke liu makutu ke he fekafekauaga he fonua, ti liga ia Aperila foki. To eke ai mo fakamaloloaga ki a lautolu ke uiina ke gahua mo e taha tagata fakailoa makaka he gahua he fonua.
15 Fakamalolo ke Mitaki e Putoiaaga ia Aperila! To taute he fakatokatokaaga mitaki he tau motua, tau fekafekau lagomatai, mo e tau ulu magafaoa oti a Aperila 2000 mo mahina mitaki lahi ha tautolu. To fakalotomatala e tau motua ke fakatokatoka fakamitaki e tau mena oti mo e ke takitaki e gahua. (Hepe. 13:7) Kua lata ke taute e tau fakaholoaga ma e tau feleveiaaga he fekafekauaga ke he fonua he vahatapu mo e he tau matahiku vahatapu. Ko e tau feleveiaaga foki ma e fekafekauaga kua lata ke fakatokatoka ke gahua he pale la mo e kamata he afiafi. Ka mau e setulu ma e tau mena oti ne fakatoka ma Aperila kua lata ke pine he lapa fakailoa. Kua lata ke fai tagata ka kotofa ke taute e tau setulu takitaha he feleveiaaga ma e fekafekauaga. Kua lata ke lahi e matakavi ka age ke gahua e lautolu he tau matakau takitaha.
16 He magahala ia Aperila to fakaaoga ai e tau mekasini he Ko e Kolo Toko mo e Awake! He lali ke kamata e tau fakaako Tohi Tapu, to foaki ai e porosua Manako ki a lautolu oti ne fakakite e fiafia. Ti ko e mena ia, kua lata ke ota loga e tau fufuta he tau mekasini mo e tau porosua.
17 He matahiku he mahina, to makai e tau takitaki he fakaakoaga tohi mo e tau hoa lagomatai oti ha lautolu ke fakamafana takitokotaha a lautolu he matakau ke tuku fakamafiti e tau hokotaki he gahua ka mole laia e matahiku he mahina. Liga lata ke taute foki e mena nei he Aho Tapu, Aperila 30. Ti, he mogo ka fakamau hifo he tohikupu e tau hokotaki, mo e ka mailoga e ia kua nakaila tuku e tau hokotaki he falu, lata ia ia ke fakamanatu fakaeneene ki a lautolu ke tuku e tau hokotaki ato hoko a Me 6, ko e mogo kua lata ia ia ke fakafano e hokotaki he fakapotopotoaga ke he Sosaiete. Liga lata foki ia ia ke fakailoa ke he tau takitaki he fakaakoaga tohi ke lagomatai a lautolu ke matutaki atu ke he tau tagata fakailoa takitaha.
18 Ko e vaha Fakamanatuaga ko e vaha he tau ne mua e aoga ma e tau tagata he Atua. Ko e magaaho lavelave lahi ma tautolu oti he fekafekauaga a Iehova. Ti, to pihia moli ni ka fakalataha katoatoa e tau tagata oti ko e tau tagata fakailoa he tala mitaki, ka maeke ia lautolu ke tohi hifo ke paionia fakaku ki a taute pihia ai, mo e ka lotomatala a tautolu ke ta mai falu tagata mo tautolu ke he Fakamanatuaga he matulei he Keriso. Kia liogi fakamakamaka a tautolu ma e fakamonuina lahi ha Iehova he lali a tautolu ke eke a Aperila 2000 mo mahina mitaki lahi ha tautolu, ke he fakahekeaga mo e lilifu he Atua!—Hepe. 13:15.
[Puha he lau 3]
Tau Paionia Fakaku
Katoa he Ha Tautolu a Tapunuaga: 2,133
(Mati 1997)
[Puha he lau 4]
Tau Tagata Fakailoa Katoa
Katoa he Ha Tautolu a Tapunuaga: 13,487
(Aokuso 1998)
[Puha he lau 5]
Tau Tagata he Fakamanatuaga
Katoa he Ha Tautolu a Tapunuaga: 26,196
(1997)