Ua Maimaina!
1 Ka mau amaamanaki a tautolu ke o atu ke fakamatala he taha gutuhala ke he taha gutuhala, ko e palekoaga mua ue atu kua fehagai mo tautolu ane mai ko e ha tautolu ni. Ko e tau logonaaga fakateaga ka liga maimaina a tautolu mai he vagahau e kupu moli ke he “tau tagata oti kana.” (1 Timo. 2:4) Ka e nakai lata a tautolu ke maimaina ke fakamatala e tala mitaki. Ko e ha?
2 Ko e Fekau ha Iehova: Kua matutaki e Iehova hana kupu he puhala mai he Tohi Tapu. Ka uta e tautolu e fekau nei ke he falu, kua talahau e tautolu hana tau manatu, nakai ko e ha tautolu ni. (Roma 10:13-15) Ka fakaheu he tau tagata e fekau he Kautu, kua fakaheu moli e lautolu a Iehova. Ka e, nakai fakalolelole a tautolu. Kua mauokafua a tautolu to maeke he fekau nei he Kautu ke talia fiafia e lautolu kua manako lahi ma e hikiaga he tau tuaga he lalolagi mo lautolu kua maimaina ke he tau manako fakaagaga ha lautolu.—Eseki. 9:4; Mata. 5:3, 6.
3 Kua Futiaki e Iehova e Tau Tagata: Ko e tagata ne fakaheu ke fanogonogo ki a tautolu i tuai kua liga fanogonogo mogonei ha kua hiki tuai hana tau tutuaga ti kua molu e tuaga he loto hana. Kua liga fakakite e Iehova hana taliaaga mogonei ki a ia mo e ‘futia mai ki a ia.’ (Ioane 6:44, 65) Ka tupu e mena nei, manako a tautolu ke mautali ke fakaaoga e Iehova mo e omaoma ke he takitakiaga fakaagelu he kumi a lautolu ia.—Fakakite. 14:6.
4 Foaki he Atua Hana Agaga Tapu ki a Tautolu: Kua fakamalolo he agaga tapu a tautolu ke vagahau “fakamalolo atu ke he kupu he Iki.” (Gahua 14:1-3) He manatu e lalagoaga malolo nei ia tautolu he fekafekauaga ha tautolu, to nakai fakauaua a tautolu ke vagahau e tala mitaki ke he tau katofia, tau kapitiga gahua, tau kapitiga aoga, tau magafaoa, po ke tau tagata tuaga tokoluga po ke mautu.
5 Fakaako Pihia e Iesu a Tautolu: Ne fakaaoga e Iesu e tau huhu fakaohooho manatu, tau fakataiaga moli, mo e fakakakanoaga faka-Tohi Tapu. Ne fakamaama e ia e kupu moli ke he puhala mukamuka nukua futia mai he hana loto. Ko e tau puhala mitaki lahi anei ma e vaha nei. (1 Kori. 4:17) Ko e tau tutuaga kua fakamatala a tautolu i ai nukua kehekehe, ka ko e fekau malolo he Kautu kua tumau agaia.
6 Kua uhoaki a tautolu he fakaaoga e Iehova ke lagomatai e tau tagata ke he puhala uho mo e aoga. Kia nakai maimaina a tautolu! Kia fakamalolo a tautolu mo e fakaata a Iehova ke “hafagi mai . . . e puhala he kupu ma tautolu” ke maeke ia tautolu ke vagahau e tala mitaki ke he falu.—Kolo. 4:2-4.