Aoga Fekafekau Fakateokarasi ma e 2002
1 Ko e lotomatala ke vagahau ne uta fakateaga he tokologa he tau tagata. Pete ia, ko e vagahau ko e mena fakaalofa mai ia Iehova. Kua fakaata a tautolu ke matutaki mo e falu mo e ke fakakite e tau manatu mo e tau logonaaga ha tautolu. Mua atu, kua maeke ai ki a tautolu ke fakaheke e Atua ha tautolu.—Sala. 22:22; 1 Kori. 1:4-7.
2 Ko e tau tagata tane, tau fifine, mo e tau fanau ne fakamahani he Aoga Fekafekau Fakateokarasi ke fakapuloa e higoa ha Iehova. (Sala. 148:12, 13) Ko e fakaholoaga he aoga ma e 2002 kua putoia katoa e tau vala tala he Tohi Tapu nukua aoga fakatagata ai ki a tautolu mo e fakaaoga ai ke he fekafekauaga. He tauteute ai ma e aoga mo e putoia ai, maeke ia tautolu ke fakatolomaki ha tautolu a iloilo mo e ha tautolu a tau feua ko e tau faiaoga he Kupu he Atua.—Sala. 45:1.
3 Totou e Tohi Tapu he Tau Aho Takitaha: Ka fai Tohi Tapu a tautolu, kia fakaaoga ha tautolu a tau magaaho ata ke totou ai. Laulahi ia tautolu ne fai minuti gahoa he aho kua ata ke fakaaoga e tautolu ke he puhala nei. Ko e aoga ha ia ke totou kau ke taha e lau he tau aho takitaha, ko e mena ni haia ke fakatumau a tautolu ke he fakatokaaga he fakaholoaga totou Tohi Tapu ha tautolu he setulu he aoga!—Sala. 1:1-3.
4 Ko e lotomatala ke totou fakamitaki e Tohi Tapu kua maeke ke lagomatai a tautolu ke hokotia ke he tau loto he tau tagata fanogonogo mo e fakalagalaga a lautolu ke fakaheke a Iehova. Ko e tau matakainaga tane ka taute e Kotofaaga Nu. 2 he aoga kua lata ke ako, ako, ako e kotofaaga he totou fakalahi. To foaki atu he leveki he aoga e fakamaloloaga mo e tau lagomataiaga ke fakatolomaki aki e puhala totou.
5 Fakaaoga e Tohi Reasoning: Fakave e Kotofaaga Nu. 3 mo e Nu. 4 ke he tohi Reasoning. Kua liga tokologa ia tautolu kua aga mau he fakaaoga e tau lagomataiaga aoga i loto ke he fekafekauaga he fonua. Kua lata e tau matakainaga fifine ke fifili e tau fakatokaaga kua lata mo e fonua. Kua lata e leveki aoga ke matakite pauaki ke he puhala fakaako atu ha lautolu mo e fakaaoga e tau Tohiaga Tapu.
6 Kia lagomatai he Aoga Fekafekau Fakateokarasi a tautolu oti ke fakatumau he fakaaoga e vagahau ha tautolu ko e mena fakaalofa ne mai he Atua ke fakapuloa aki e tala mitaki mo e ke fakaheke ha tautolu a Atua lahi, ko Iehova!—Sala. 34:1; Efeso 6:19.