Tau Fuata—Atihake e Fakaveaga Mitaki ma e Tau Aho ne Tatali
1. Ko e ha kua lata e tau fuata Kerisiano ke feaki e tua malolo?
1 Ko e heigoa kua mua atu he loto hau? Ko e heigoa hau ne manamanatu ki ai? Kua fakamatapatu kia e tau manatu hau ke he tau mena he fakatokaaga nei, po kua hoko atu taha ke he tau aho ne tatali mo e hagaaki mau ke he tau mena ne mavehe he Atua? (Mata. 6:24, 31-33; Luka 8:14) Kua latatonu ke moua e tua malolo ke fakagahuahua e tau maveheaga he Atua, ke tuga kua kitia mai he tau fakafifitakiaga ha Aperahamo mo Mose. (Hepe. 11:8-10, 24-26) Maeke fefe ia koe ke feaki e tua pihia mo e atihake e “fakaveaga mitaki mo e tau aho ne tatali”?—1 Timo. 6:19.
2. Ko e heigoa ha tautolu ne ako mai he fakafifitakiaga he Patuiki ko Iosia?
2 Kumi a Iehova: Ka fai fakaholoaga fakaagaga a koe mo e magafaoa hau, kua nava ai. Ka e ua piko to moua noa e tua malolo mai he fakaholoaga pihia. Ke kumi e “iloilo ke he Atua,” kua latatonu ke kumi ni e koe a Iehova. (Fakatai 2:3-5; 1 Nofo. 28:9) Ne taute he patuiki fuata ko Iosia e mena ia. Pete ni he tupu hake he takatakai nakai mitaki e moui fakaagaga, “ne kamata ai a ia ke kumi ke he Atua a Tavita hana matua” he magaaho ne 15 e tau tau hana he moui.—2 Nofo. 34:3.
3. Maeke fefe e tau Kerisiano fuata he vaha nei ke kumi a Iehova?
3 Kumi fefe e koe a Iehova? He kumikumi fakamatafeiga ke he tau mena kua talitonu a koe ki ai mo e ‘fakamoli ki a koe ni’ kua moolioli e mena a ia. (Roma 12:2) Ma e fakatai, maeke nakai ia koe ke fakamaama e talahauaga he Tohi Tapu hagaao ke he toto po ke fakakite kua kamata moli e Kautu he Atua ke pule ke he lagi he 1914? Ko e mouaaga he “maama ke he kupu moli” ko e vala aoga lahi he atihake he fakaveaga mitaki ma e tau aho ne tatali.—1 Timo. 2:3, 4.
4. Maeke fefe e tau tagata fakailoa nakaila papatiso ke fakakite e tupu ki mua ha lautolu?
4 Ko e kumi ha Iosia ke he Atua kua pu atu ke he tau fua mitaki. Ato tu e 20 e tau tau hana, ne gahua loto malolo a ia ke moumou e tapuakiaga fakavai he motu. (2 Nofo. 34:3-7) Tatai ai, ko e tupu fakaagaga hau to kitia ai ke he tau gahua hau. (1 Timo. 4:15) Kaeke ko e tagata fakailoa nakaila papatiso a koe, eketaha ke tupu ki mua e tuaga he fekafekauaga hau. Ua fiafia ke foaki hokoia ni he tohi. Taute mo foliaga hau ke fakaaoga e Tohi Tapu, ke fetutalaaki mo e tau tagata, mo e ke feaki e tau tagata fiafia ne moua e koe. (Roma 12:7) To lagomatai he mena nei a koe ke tupu fakaagaga.
5. Ko e heigoa e tau tutuaga kua hafagi ke fakalaulahi atu e fekafekauaga he tau Kerisiano kua papatiso?
5 Foaki ki a Iehova e Mena kua Fahia a Koe: Magaaho ne fakakite e koe e tukuleleaga hau ki a Iehova he papatiso, kua eke a koe mo fekafekau fakauku he Atua. (2 Kori. 3:5, 6) Kua hafagi he mena nei ki a koe e tau tutuaga ke fekafekau mau ki a Iehova. Putoia ki ai e paionia pihia foki e Peteli, misionare, mo e falu fekafekauaga ke he lalolagi katoa. Tumau agaia e loga he tau puhala ke fakalaulahi e fekafekauaga hau tuga he ako taha vagahau kehe po ke hiki atu ke fekafekau ke he matakavi ne lahi e manako lagomatai.
6. Maeke fefe ia tautolu oti ke atihake e fakaveaga mitaki ma e tau aho ne tatali?
6 Moli, to nakai maeke oti ke fakaata e tautolu a tautolu ma e tau kotofaaga nei he fekafekauaga, ka e maeke ia tautolu ke foaki ki a Iehova e mena kua fahia a tautolu ki ai. (Mata. 22:37) Ko e heigoa ni e tau tuaga hau, kia eke e fekafekau ki a Iehova mo matapatu he moui hau. (Sala. 16:5) He taute pihia, to atihake e koe e fakaveaga mitaki ma e tau aho ne tatali.